1 AHỌLU LẸ 8
8
1WHENẸNU wẹ Solọmọni pli mẹho Islaeli tọn lẹ, po ogán whẹndo le tọn lẹpo po, ahọvi lẹ sọn owhé otọ́ ovi Islaeli tọn lẹ tọn gbè, do Sọlọmọni ahọlu de to Jelusalẹm mẹ, nado hẹn alki alẹ̀nù OKLUNỌ tọn tọn hẹji tón sọn tòdaho Davidi tọn mẹ wá, ehe yín Ziọni. 2Omẹ Islaeli tọn lepo sọ pli yéde do Solọmọni ahọlu de do hùnwẹ lọ kòn, to osùn Etammi mẹ, he yín osùn ṣinawetọ. 3Mẹho Islaeli tọn lẹpo sọ wá, yẹwhenọ lẹ sọ zé alki OKLUNỌ tọn lọ. 4Yé sọ hen alki OKLUNỌ tọn lọ hẹji wá, po gohò opli tọn lọ po, po nuzinzán wiwe lẹpo po, he ko tin to Gohọ̀ lọ mẹ; yèdọ ehelẹ wẹ yẹwhenọ lẹ po Levinu lẹ po hẹn hẹji wá. 5Ahọlu Sọlọmọni po agùn Islaeli tọn lẹpo po, he yè hẹn pli do e de lẹ, tin to e de to alki lọ nukọn, bo to lẹngbọ lẹ po oyín lẹpo yí do to avósan, heyè ma sọgan dọ kavi hia na gégé. 6Yẹwhenọ lẹ sọ hen alki alẹ̀nù OKLUNỌ tọn tọn wá homẹ do otẹn etọn mẹ, biọ otẹn wiwegbahugbahu ohọ̀ lọ tọn mẹ, do otẹn wiwe talala lọ mẹ, yèdọ do awà kẹlubimi tọn lẹ glọ; 7Na kẹlubimi lẹ lọ dlẹn awà yetọn jẹ do otẹn alki lọ tọn ji, kẹlubimi lẹ sọ ṣinyọn alki lọ ji po opò etọn lẹ pó to aga 8Opò lẹ lọ dite sọmọ bọ yè to obẹ́nu opò lẹ lọ lẹ tọn mọ sọn otẹn wiwe mẹ to otẹn wiwe gbahugbahu lọ nukọn, ṣigba yè ma mọ yé to gbonu gba: ye sọ tin fine, je azán he. 9Nude ma tin to alki lo mẹ finẹ hú tafo awe zannu tọn he Moṣe be do fine to Holẹbi, whenuena OKLUNỌ basi alẹnu de po ovi Islaeli tọn lẹ po, whenuena yé jẹgbonu sọn aigba Egipti tọn mẹ wá. 10E sọ wá jọ, whenuena yè hẹn yẹwhenọ lẹ lọ jegbonu sọn otẹn wiwe lọ mẹ wá, wẹ aslọ gohò OKLUNỌ tọn lọ mẹ, 11Somọ bọ yẹwheno lẹ lọ ma sọgan site nado wàdevizọn na aslọ lọ tọn wutu: na gigo OKLUNỌ tọn gọ ohọ̀ OKLUNỌ tọn lọ mẹ.
12Whenẹnu wẹ Sọlọmọni dọhó, dọ, OKLUNỌ ko dọ dọ ewọ na nọ nò zinvlu titli mẹ. 13Yẹn nugbonugbo ko dó ohọ̀ ofininọ̀ tọn de na we, otẹn de na we nado nọ nọ́ e hòmẹ kakadoi. 14Ahọlu sọ lẹ́ nukunmẹ etọn pé, bo dona agùn Islaeli tọn lẹpo: agùn Islaeli ton lẹpo sọ ṣite. 15E sọ dọmọ. Donanọ OKLUNỌ yín, Jiwheyẹwhe Islaeli tọn, he yí onù etọn do dọhó hlan, Davidi otọ́ ṣie, bo sọ yí alọ etọn do hẹn ẹn sẹ, dọmọ, 16Sọn azán he gbè yẹn hẹn Islaeli omẹ ṣie lẹ jegbonu sọn Egipti wá, Yẹn ma dè todaho de sọn whẹndo Islaeli tọn lẹ mẹ nado dó ohọ̀ de gba, na oyín ṣie nido tin to fine; ṣigba yẹn dè Davidi nado tin to Islaeli omẹ ṣie lẹ ji. 17Dinvie é ko tin to ayiha Davidi otọ́ ṣie tọn mẹ nado dó ohọ̀ de na oyín OKLUNỌ tọn, Jiwheyẹwhe Islaeli tọn. 18Ṣigba OKLUNỌ dọ hlan Davidi otọ ṣie dọmọ, Na nugbotọn é ko tin tọ ayiha towe mẹ nado dó ohò de na oyín ṣie, hiẹ wà dagbe bọ é ko do tin to ayiha towe mẹ: 19Ṣogãn hiẹ ma na dó ohọ lọ gba; ṣigba visunnu towe he na jẹgbonu sọn adàja towe me, ewọ wẹ na dó ohò lọ na oyín ṣie. 20OKLUNỌ ko sọ hẹn ohó etọn he é dọ lódo; na yè hẹn yẹn tite to otẹn Davidi otọ́ ṣie ton mẹ, bo sọ sín ofìn Islaeli tọn ji, dile OKLUNỌ gblọnadan do, bo ko sọ do: ohọ̀ lọ na oyín OKLUNỌ tọn, Jiwheyẹwhe Islaeli ton. 21Yẹn ko sọ zé otẹn de do finẹ na alki lọ, ehe mẹ alẹ̀nù OKLUNỌ tọn lọ te, he é basi po otọ́ mìtọn lẹ po, whenuena é hẹn yé tọ́n sọn aigba Egipti tọn ji wá.
22Sọlọmọni sọ ṣite to agbà OKLUNỌ tọn lọ nukọn to nukun agùn Islaeli tọn lẹpo tọn mẹ, bo dlẹn alọ etọn lẹ jẹgbonu hlan olọn: 23Bo dọmọ, OKLUNỌ È, Jiwheyẹwhe Islaeli tọn, Jiwheyẹwhe de ma tin to fine di we, to olon mẹ to aga, kavi to aigba go to oglọ; he nọ yìn alẹ̀nù po lẹblanu po he mẹmẹsi etọn lẹ, he yí ayiha yetọn lẹpo do zinzọnlin to nukọn towe. 24Mehe ko yìn hẹ mẹmẹsi towe Davidi otọ ṣie enẹ he hiẹ gblọnadan etọn nẹ: nugbo, hiẹ yí onù towe do dọhó, bo sọ yí alọ towe do hẹn ẹn sọ, dile é yín to azán he gbè 25Enẹwutu dinvie, OKLUNỌ E, Jiwheyẹwhe Islaeli tọn, Yìn hẹ mẹmẹsi towe Davidi otọ ṣie enẹ he hiẹ gblọnadan etọn nẹ̀, domọ, Sunnusi de ma to na dẹ́n we to nukun ṣie mẹ nado sín ofìn Islaeli tọn ji; eyín ovi towe le gbé payi aliho yetọn go, nado nọ zinzọnlin nukọn ṣie dile hiẹ zinzọnlin to nukọn ṣie do. 26Enẹwutu dinvie, Jiwheyẹwhe Islaeli tọn È, yẹn vé we, gbọ ohó towe ni yín nugbonọ, he hiẹ dọ hlan mẹmẹsi towe Davidi otọ́ ṣie. 27Ṣigba be Jiwheyẹwhe to owàlọ nugbo mẹ na nọ̀ aigba go? dayi e go, olon po olọn olọn le tọn po ma sọgan hen we; whè sọ na ohọ̀ he ehe yẹn ko dó! 28Gãnṣo hiẹ ni tindo hòpọ́n hlan odẹ́ mẹmẹsi towe tọn, podọ hlan óvẹ̀ etọn OKLUNỌ E Jiwheyẹwhe ṣie, nado tuntóai hlan awhá podọ hlan odẹ́ he mẹmẹsi towe to hiho to nukọn towe to azán he gbè: 29Na nukun towe lẹ nido yín hùnhùn hlan ohọ̀ he kọ̀n to ozán po okle po, yèdọ hlan otẹn lọ kọ̀n fìetọn hiẹ ko dọmọ, Oyín ṣie na tin to finẹ: nado nọ tuntóai hlan odẹ̀ he mẹmẹsi towe na nọ hò hlan otẹn he kòn. 30Hiẹ ni nọ tuntóai hlan ovẹ́ mẹmẹsi towe tọn, po Islaeli omẹ towe lẹ tọn po, whenuena yé na hodè hlan otẹn he kọ̀n: nugbo, hiẹ ni sè to olọn oten fininò towe mẹ; whenuena hiẹ se, no jona. 31Eyín omẹ de wàylando do kómẹnu etọn, podọ yè zé whiwhle do e ji nado hẹn ẹn nado whle, bọ é wá bo whle to agbà towe nukọn to ohọ̀ he mẹ: 32Whenẹnu hiẹ ni sè to olọn mẹ, bo wà, bo dawhẹna mẹmẹsi towe lẹ, gbigblewhẹ̀do mẹylankan lọ, nado hẹn aliho etọn wá ota etọn titi ji; po whẹsùsùna dódónọ lọ po, nado na ẹn kẹdẹdi dódó etọn 33Whenuena yè hò Islaeli omẹ towe lẹ liai to kẹ̀ntọ lọ nukọn, na yé ko wàylando do we wutu; eyín yé sọ vó lé do de we, bo yígbèna oyín towe, bo hodẹ̀ bo basi ovẹ́ hlan we to ohọ̀ he mẹ: 34Whenẹnu hiẹ ni sè to olọn mẹ, bo jona ylando Islaeli omẹ towe lẹ tọn lọ, bo sọ vọ́ yé hẹn wá do aigba he hiẹ ko na yé lọ kọ̀n do otọ́ yetọn lẹ de. 35Whenuena yè sú olọn, bọ ojikun de ma tin, na yé kò wàylando do we wutu; eyín yé hodẹ̀ hlan otẹn he kọ̀n, bo yígbèna oyín tòwe, bo lẹ́ sọn ylando yetọn mẹ, whenuena hiẹ bìanukunna yé: 36Whenẹnu hiẹ ni sè to olọn mẹ, bo jona ylando mẹmẹsi towe lẹ tọn, po Islaeli omẹ towe lẹ tọn po, whenuena hiẹ plọn yé aliho dagbe lọ ehe mẹ yé do nọ zinzọnlin biọ; bo do ojikun hlan aigba towe ji, ehe hiẹ na hlan omẹ towe lẹ na ogú de. 37Eyín ohùvé tọ́n to finẹ to aigba lọ ji, eyín azọ́nvàmẹ tin finẹ eyín azọ̀njẹ́mẹji kavi òdó, owẹ̀n kavi owán de; eyín kẹ̀ntọ yetọn glọn yé do to aigba tòdaho yetọn lẹ tọn mẹ; azọ́nylankan depope, lànmẹzòn depope tin finẹ; 38Odẹ́ po ovẹ́ po depope yè basi gbọn mẹdepope dali, kavi gbọn Islaeli omẹ towe lẹpo dali, ehe na yọnẹn omẹ dopodopo azònylankan ayiha etọn titi tọn, bo dlẹ́n alọ etọn lẹ jẹgbonu hlan ohọ̀ he kọ̀n; 39Whenẹnu hiẹ ni sè to olọn otẹn fininọ̀ towe mẹ, bo jona, bo wà, bo gọ́ do omẹ dopodopo de kẹdẹdi aliho etọn lẹ, ayiha mẹhetọn hiẹ yọnẹn; (na hiẹ, yèdọ hiẹ sókẹdẹ, wẹ yọ́n ayiha ovi gbẹtọ lẹ tọn lẹpo tọn;) 40Na yé nido nọ dibusi we to azán lẹpo mẹ he yé do tin to ogbẹ́ to aigba lọ ji, he hiẹ na hlan otọ́ mìtọn lẹ. 41Huenẹ gbọn ojonọ lọ tọn dali, he ma tin sọn Islaeli omẹ towe lẹ mẹ gba, whenuena é na tọ́n sọn otò dindẹn de mẹ wá na oyín towe tọn wutu; 42(Na yé na sè linlin oyín daho towe tọn, po alọ hlọnhlọnnọ towe tọn po, po awàdindlẹn jẹgbonu towe tọn po;) whenuena ewọ na wá bo hodẹ́ hlan ohọ̀ he kọ̀n; 43Hiẹ ni sè to olọn otẹn fìninò towe mẹ, bo wà kẹdẹdi ehe ojonọ lọ ylọ hlan we na lẹpo; na akọta aigba tọn lẹpo nido yọ́n oyín towe, nado nọ dibusi we, dile Islaeli omẹ towe lẹ to wiwà do, podọ yé nido yọnẹn dọ yè ylọ ohọ̀ he ehe yẹn ko dó lọ gbọn oyín towe dali. 44Eyín omẹ towe lẹ jẹgbonu yì jẹ awhànfùntẹn to kẹ̀ntọ yetọn jì, aliho depope hiẹ na do yé hlan gbọn, bọ yé sọ hodé hlan OKLUNỌ hlan tòdaho lọ kòn ehe hiẹ ko dè, podọ hlan ohọ̀ lọ kọ̀n ehe yẹn ko dó na oyín towe: 45whenẹnu hiẹ ni sè odẹ́ yetọn po ovẹ́ yetọn po to olọn mẹ, bo gọalọna linlẹn yetọn. 46Eyín yé wàylando do we, (na omẹ de ma tin bo ma wàylando,) bọ hiẹ yín adinọ to yé de, bo jó yé hlan kẹ̀ntọ yetọn lọ, mọ bọ yé yí yé do bẹ́ mẹglọnọ yì do aigba kẹ̀ntọ lọ tọn ji, nukọn nukọn kavi yakẹ; 47Gãnṣo eyín yé na lẹn yéde mẹ pọ́n to aigba lọ ji fie yè yí yé do bó mẹglọnọ yì, bo sọ vó ló, bo basi ovó hlan we to aigba yé he yí ye do bẹ́ mẹglọnọ yì lẹ tọn ji, dọmọ, Míwlẹ ko wàylando, bo ko sọ ylannuwà, míwlẹ ko yí kanyinylan do zán; 48Eyín ye yí ayiha yetọn lẹpo po alindọn yetọn lẹpo po do gọ̀ do de we to aigba kẹ̀ntọ yetọn lẹ tọn ji, ehe yí yé do bé mẹglọnọ yì, bo sọ hodẹ́ hlan we hlan aigba yetọn kòn, ehe hie ko na hlan otọ́ yetọn lẹ, tòdaho he hiẹ ko dè lọ, po ohọ̀ lọ po ehe yẹn ko dó na oyín towe: 49whenẹnu hiẹ ni sè odẹ́ yetọn po ovẹ́ yetọn po to olọn otẹn fininò towe mẹ, bo gọalọna linlẹn yetọn; 50bo jona omẹ towe he ko wàylando do we lẹ, po sẹ́ngbigba yetọn lẹpo po ehe mẹ yé ko wàylan do we te; bo na awubla yé to enẹlẹ he yí yé do bé mẹglọnọ yì lẹ nukọn, na yé nido tindo awubla to yé ji: 51Na omẹ towe lẹ wẹ yé yin, po ogú towe po, he hiẹ hẹn tọ́n sọn Egipti, sọn ogblagbla ozohọ́ gànyu tọn mẹ: 52Na nukun towe lẹ nidò yín hùnhùn hlan ovẹ̀ mẹmẹsi towe tọn, podọ hlan ovẹ̀ Isláeli omẹ towe lẹ tọn, nado tuntóai hlan yé to whèdepopenu yé dawhá hlan we. 53Na hiẹ ko klan yé sọn akọta aigba tọn lẹpo go, nado yín ogú towe, dile hiẹ dọhó do gbọn alọ Moṣe mẹmẹsi towe tọn mẹ, whenuena hiẹ OKLUNỌ Jiwheyẹwhe E hẹn otọ́ mìtọn lẹ tọ́n sọn Egipti wá.
54E sọ yín mọ, dọ whenuena Sọlọmọni ko basi tadona hiho odẹ́ he lẹpo tọn po ovẹ po hlan OKLUNỌ, é tite sọn agbà OKLUNỌ tọn nukọn, sọn jijẹklo to oklo etọn lẹ ji mẹ po alọ etọn lẹ po dindlẹn jẹgbonu hlan olọn kòn. 55E sọ ṣite, bo yí ogbè léle do dona agùn Islaeli tọn lẹpo, dọmọ, 56donanọ OKLUNỌ yín, he ko na ogbọjẹ hlan Islaeli omẹ etọn lẹ, kẹdẹdi ehe é ko gblọnadan etọn lẹpo: ohó dopo ma gbọvó sọn dagbe adangblọn etọn tọn lẹpo mẹ, he é gblọnadan etọn gbọn alọ Moṣe mẹmẹsi etọn tọn mẹ. 57OKLUNỌ Jiwheyẹwhe mìtọn tin to mí de, dile é ko tin to otọ́ mìtọn lẹ de do: mì dike é jó mí do blo, kavi gbẹ́ mi dai blo: 58Na é nido gò ayiha mìtọn lẹ hlan ẹn, nado nọ zinzọnlin to aliho etọn lẹpo mẹ, podọ nado nọ yìn gbèdide etọn lẹ, po osẹ́ndoai etọn lẹ po, po whẹ̀dida etọn lẹ po, he é ko degbèna otọ́ mìtọn lẹ. 59Gbọ ohó ṣie helẹ he yẹn yí do basi ovẹ́ to OKLUNỌ nukọn, ni tin yakẹ hlan Ọklunọ Jiwheyẹwhe mìtọn de to okle po ozán po, dọ é ni gọalọna linlẹn mẹmẹsi etọn tọn, po linlẹn Islaeli omẹ etọn lẹ ton po, dile azán dopodopo na biọ do: 60Na akọta aigba tọn lẹpo nido yọnẹn dọ OKLUNỌ lọ, ewọ wẹ Jiwheyẹwhe; ode de ma tin to finẹ. 61Enẹwutu mì gbọ ayiha mìtọn ni yín pipé to OKLUNỌ Jiwheyẹwhe mìtọn de, nado nọ zinzọnlin to oséndoai etọn lẹ mẹ, podọ nado nọ yìn gbèdide etọn lẹ, di to azán he gbè. 62Ahọlu, po Islaeli lẹpo po lẹ nọ, sán avọ́ to OKLUNỌ nukọn. 63Sọlọmọni sán avọ́ nunina jijọho tọn lẹ, he é sán hlan OKLUNỌ, oyín fọtọ́n konukunawe, po lẹngbọ fọtọ́n kantọ̀n po. Mọwẹ ahọlu po ovi Islaeli tọn lẹpo po klan ohọ́ OKLUNỌ tọn lọ do wiwe. 64Azán doponẹ gbè wẹ ahọlu biọ ṣẹnṣẹn awá he tin to ohò OKLUNỌ tọn nukọn; na finẹ wẹ é sán avọ́ nunina mimẹ̀ te po avọ́ nunina jinulili tọn po, po ojó avọ́ nunina jijọho tọn lẹ po: na agbà gànvè tọn he tin to OKLUNỌ nukọn tin whiwhè gbahu nado hẹn avọ́ nunina mimẹ̀ te po avọ́ nunina jinulili tọn lọpo, po ojó avọ́ nunina jijọho tọn lẹ lọ po wutu. 65Mowẹ Sọlọmọni wà hùnwhẹ lọ to ojlẹ nẹ mẹ, po Islaeli lẹpo po hẹ ẹ, agùn daho de, sọn bibiọ whégbe Hamati tọn jẹ tòpésé Egipti tọn, to OKLUNỌ Jiwheyẹwhe mìtọn nukọn, azán ṣinawe po azán ṣinawe po, Yèdọ azán wiẹnẹ. 66To azán sinatòntọ gbè é do gbẹtọ lẹ hlan yì, yé sọ dona ahọlu, bo yì gohọ̀ yetọn lẹ kọ́n gọ́nayajẹ po homọhùn ayiha tọn po na dagbewanyi he OKLUNỌ dohia hlan Davidi mẹmẹsi etọn, podọ hlan Islaeli omẹ etọn lọ.
Currently Selected:
1 AHỌLU LẸ 8: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.