1 AHỌLU LẸ 7
7
1SỌLỌMỌNI sọ to ohọ̀ etọn titi dó owhè wiatòn, e sọ dotana ohọ̀ etọn lẹpo. 2Na é dó ohọ̀ zunkàn Lẹbanọni tọn tọn; ote etọn yín awàgbà kanweko, ogblo etọn awàgbà kandeao, jiyìyì etọn awàgbà ogbàn, do haji dotin kedali tọn ẹnẹ ji, po kedali whlẹtitli po to dotin lẹ ji. 3Tè yí kedali do ṣinyọn ẹn to aga to whlẹtitli kandeatón ji, he tin to dotin lẹ ji; fọtọ̀n to oha de ji. 4Vẹsẹnuvo lẹ sọ tin tò oha atọ̀n ji, hinhọ́n sọ tin pannukọn hinhọ́n to oha atọ̀n mẹ. 5Ohòn lẹpo po hòdòtin lẹ po tin zẹnzen to vẹ́sẹ́nuvo mẹ: hinhọ́n sọ tin pannukọn hinhọ́n to oha atọ̀n mẹ. 6E sọ basi awà dòtin lẹ tọn; ote etọn yín awàgbà kandeao, gbigblo etọn awàgbà ogbàn; awà de to yé nukọn; dòtin lẹ po whlẹtitli lẹ po to yé nukọn. 7E sọ basi awà ofìn tọn fie é na nọ dawhè te, yèdọ awà whẹ̀dida tọn: yè ji kedali do tó ẹ sọn họ̀nu mẹ jẹ hònu mẹ. 8Podọ ohò etọn fie é na nọ nọ́, akànmahó awetọ to awá lọ mẹ, yín azón mọnkọ tọn E sọ basi ohò de ga na viyọnnu Falo tọn (mẹhe Sọlọmọni ko yí hlan asi,) kẹdẹdi hlan awá he. 9Ehelẹpo yín zannu akuẹgégónu tọn, yèdọ sọn zannu kinkán mẹ, kẹdẹdi ojlẹ, yè yí ayìnyọn lẹ do sán, to hòmẹ po gbonu po, yèdọ sọn dòdo jẹ avọ̀vò kòn, mọ sọ wẹ to gbonu jẹ akanmahó daho. 10Dòdo lọ sẹ̀ yín zannu akuẹgégónu tọn lẹ, yèdọ zannu daho lẹ, zannu awàgbà ao tọn lẹ, po zannu awàgbà ṣinatòn tọn lẹ po. 11Aga sọ yín zannu akuẹgégónu tọn lẹ, yèdọ zannu kinkán lẹ, kẹdẹdi ojlẹ, po atin kedali po. 12Akanmahó daho lọ lẹ́dolẹ́do tindo oha atọ̀n zannu kinkán tọn lẹ, po oha whletitli kedali tọn de po; taidi hòhòmẹ akanmahó ohọ̀ OKLUNỌ tọn tọn, po awá ohọ́ lọ tọn po.
13Sọlọmọni ahọlu sọ domẹhlan bo hẹn Hilami wá sọn Tile. 14Ewọ wẹ visùnnu, nawe asúsiọsi de tọn sọn whẹndo Naflali tọn mẹ, otọ́ etọn wẹ dawe Tile tọn de, azọ́ntọ de to gànvẹ̃ mẹ; yè sọ yí nuyọnẹn po wuntùntùn po po anawiwà po do gó ẹ, nado basi azón lẹpo to gànvẹ̃ mẹ. Ewọ sọ wá ahọlu Sọlọmọni de, bo wà azọ́n etọn lẹpo. 15Na é tùn dòtin awe gànvẹ̃ tọn lẹ, sọn awàgbà fọtọ̀nnukunatọ̀n jiyìyì tọn mẹ dovòvò: po ohù awàgbà wiawe tọn de po lédo dopodopo yé tọn pó. 16E sọ basi opòtin kinkọ́n gànvẹ̃ tọn awe, nado zé do aga dòtin lẹ tọn lẹ ji: jiyìyì opòtin ode tọn yín awàgbà atọ́n, jiyìyì opòtin awetọ tọn sọ yín awàgbà atọ́n. 17Ajlala ylọnkọndu tọn lẹ tin finẹ, po azón gẹ̀dẹ sislo lẹ tọn po na opòtin he tin to aga dòtin lẹ tọn ji; ṣinawe na opòtin dopo, podọ ṣinawe na opòtin awetọ. 18Mowẹ é basi dòtin lẹ do; oha awe tin lẹ́do to ajlala ylọnkọ̀ndunọ dopo ji nado ṣinyọn opòtin he tin to aga dòtin lẹ tọn ji: mọwẹ é sọ wà do na opòtin awetọ. 19Opòtin lẹ he tin to aga dòtin lẹ tọn ji to awá lọ mẹ yín azón lilì tọn, awàgbà ẹnẹ. 20Opòtin lẹ sọ tin ga to aga to dòtin awe ji, sẹpọ́ hoto he tin to ajlala ylọnkọndunọ dali: pomeglanate lẹ yín fọde, to oha lẹ mẹ lédo pó to opòtin awetọ ji. 21E sọ zé dòtin lẹ dote to awá tẹmpli tọn kòn: é sọ zé dòtin adusimẹ tọn dote, bo ylọ oyín etọn Jakini: é sọ zé dòtin amiyọnmẹ tọn dote, bo ylọ oyín etọn Boazi. 22Podọ to aga dòtin lẹ lọ tọn ji wẹ azón lilì tọn te: mọwẹ yè dotana azọn dòtin lẹ tọn do. 23E basi ohù kinkòn awàgbà ao tọn sọn otónu jẹ otónu lódo to loboto mẹ, jiyìyì etọn yín awàgbà atón: hùzizẹ awàgbà ogbàn tọn de lódo e pé. 24Podọ to oglọ otónu e tọn lédo pó wẹ sódido he lédo e lẹ te, na awàgbà ao, lédo ohù lọ pó: sódido lẹ lọ tin to oha awe mẹ, Yè kòn whenuena é yín kinkòn. 25E ṣite to oyín wiawe ji, atọ̀n to pinpọ́n agewaji dali, atọ̀n to pinpọ́n whèyíhó dali, atọ̀n to pinpọ́n hùwaji dali, atón sọ to pinpọ́n whèzẹtẹn dali: ohù lọ sọ tin to yé ji to aga, adà yetọn to godo wàji tin to hòmẹ dali. 26E sọ yín alọgbigblo dopo titli, otónu etọn yè basi di otónu kọfo de tọn, di ovòvo lilì de tọn: é hẹn awulẹtò fọtọ́n awe. 27E sọ basi dòdonu gànvẹ̃ tọn ao; awàgbà enẹ wẹ ote dòdonu ode tọn, awàgbà ẹnẹ gbigblo etọn, awàgbà atọ̀n jiyìyì e tọn. 28Azọ́n dòdonu lẹ tọn yin ehe nkọ: agbègbèji lẹ tin to finẹ to hunkọ lẹ lọ ṣẹnṣẹn: 29Podọ to agbègbè lẹ ji he tin to hunkọ lẹ lọ ṣẹnṣẹn yín okinni lẹ, oyín lẹ, po kẹlubimi lẹ po; podọ to hunkọ lẹ lọ ji opódo de tin to aga: podọ to okinni lẹ po oyín lẹ po glọ wẹ sislo azọ́n pipla tọn lẹ te; 30Dòdonu dopodopo tindo kẹkẹfọ gànvẹ̃nọ ẹnẹ, po kẹkẹpò gànvẹ̃ tọn lẹ po: afọ etọn ẹnẹ lẹ tindo afọligbé lẹ: to ozẹ́nvla lọ glọ wẹ afọligbé kinkọ̀n lẹ te, po azọ́n sislo lẹ po to adà dopodopo mẹ 31Onù é tọn to opòtin hòmẹ podọ to aga yín awàgbà dopo: podọ onù etọn tin lédo to godo azón opódo de tọn, awàgbà dopo po odá dopo po: podọ anapipa lẹ tin to onù e tọn ji ga, agbègbèji yetọn lẹ yín adàẹnẹ ma mlin. 32Kẹkẹfọ ẹnẹ lẹ tin to agbègbèji lẹ lọ glọ; kẹkẹtin kẹkẹfọ lẹ lọ tọn lẹ tin to dòdonu lọ mẹ: jiyìyì kẹkẹfọ de tọn yín awàgbà dopo po odá awàgbà dopo tọn po. 33Azọ́n kẹkefọ lẹ lọ tọn tin taidi azọ́n afọ kẹkẹfọ de tọn: kẹkẹtin yetọn lẹ, po kẹkẹfọtónu yetọn lẹ po, po ajọnenmẹ yetọn lẹ po, po kẹkẹsẹnsẹntin yetọn lẹ po kinkòn wẹ popo 34Afọligbé ẹnẹ tin to lọnglọnẹn ẹnẹ dòdonu dopodopo tọn tọn dali: afọligbé etọn lẹ sọ tin sọn dòdonu lọsu mẹ. 35Podọ to aga dòdonu lọ tọn lédo loboto jiyìyì odá awàgbà de tọn tin to finẹ: podọ to aga dòdonu lọ tọn otetun etọn lẹ po agbègbeji etọn lẹ po tin sọn doponẹ mẹ. 36To titẹ́ otetun etọn lẹ tọn go, podọ to agbègbeji etọn lẹ go, wẹ é pà kẹlubimi, okinni lẹ, po odetin lẹ po do, kẹdẹdi otẹnmẹ dopodopo tọn, po azọ́nsislo lẹ po lẹ́do. 37Le nkọ wẹ é basi dòdonu ao lẹ do: yé mẹpo tindo kinkọ̀n dopo, ojlẹ dopo, po ohia dopo po. 38E sọ basi ozẹ́nvla gànvẹ̃ tọn ao: ozẹ́nvla dopo hẹn awulẹtò kande: ozẹ́nvla dopodopo yín awàgbà ẹnẹ: podọ to dopodopo dòdonu ao lẹ tọn ji ozẹ́nvla dopo. 39E sọ zé dòdonu lẹ do, atọ́n to adà adusi ohò lọ tọn go, atọ́n sọ to adà amiyọn ohò lọ tọn go: é sọ zé ohù lọ do adà adusi ohò lọ tọn ji to whèzẹtẹn dali, hlan ohùwaji dali. 40Hilami sọ basi ozẹ́nvla lẹ, po fẹli lẹ po, po ṣiklẹ lẹ po. Mowẹ Hilami dotana bibasi azọ́n lẹpo ton do he é basi na Sọlọmọni ahọlu to ohọ̀ OKLUNỌ tọn mẹ: 41Dotin awe lẹ, po apánko awe opòtin tọn lẹ po he tin to aga dòtin lẹ tọn go; podọ azọ́n ylọnkọ̀ndu tọn lẹ nado ṣinyọn apánko awe opòtin tọn lẹ he tin to aga dòtin lẹ tọn go; 42po pomeglanate fode lẹ po na azọ́n ylọnkòndu lẹ lọ; oha awe pomẹglanate tọn lẹ na azọ́n ylọnkọ̀ndu tọn dopodopo, nado ṣinyọn apánko opòtin lẹ tọn lẹ he tin to dòtin lẹ ji; 43po dòdonu ao lẹ po po ozẹ́nvla ao lẹ po to dòdonu lẹ ji; 44ohù dopo lọ, po oyín wiawe lẹ po to ohù lọ glọ; 45ozẹ́n lẹ, po fẹli lẹ po, po ṣiklẹ lẹ po: yèdọ nuzinzán helẹ pó, he Hilami basi na ahọlu Sọlọmọni, to ohọ̀ OKLUNỌ tọn mẹ, yín gànvẹ sisé tọn. 46To odànfafa Jọdani tọn ji wẹ ahọlu kọ̀n yé te, to okò yigba ji to Sokọti po Zeletani po ṣẹnṣẹn. 47Sọlọmọni sọ jó nuzinzán lẹpo dai majlẹ, na yé yín susu gbahu wutu: ojlẹ gànvẹ tọn yè ma sọgan dinmọ gba. 48Sọlọmọni basi nuzinzán he tin to ohọ̀ OKLUNỌ tọn mẹ lẹpo: agbà sikanọ lọ, podọ tafo fieji akla-adlọ te, sọn sika mẹ; 49po miyọngbántin lẹ tọn po, atọ́n to adusi mẹ, atọn to amiyọn mẹ, to fiwiwe gbahugbahu lọ nukọn, sọn sika dagbedagbe mẹ; po võvo lẹ po, po mìyọngbánlẹpo, poobẹ́ lẹpo, sọnsikamẹ; 50po kọfo lẹ po, po miyọngbánkòdènú lẹ po, po siklẹ lẹ po, po ṣivi lẹ po, po gànzẹ́n lẹ po, sọn sika dagbedagbe mẹ; po opla lẹ po, na ohọ̀n ohọ̀ hòmẹ tọn lẹ tọn, oten wiwe gbahugbahu lọ, podọ na ohọ̀n ohọ̀ lọ ton lẹ, nado yónẹn, tẹmpli lọ tọn, sọn sika mẹ. 51Le yè dotana azọ́n he do he Sọlọmọni ahọlu basi do ohọ̀ OKLUNỌ tọn mẹ. Sọlọmọni sọ hẹn onú lẹ wá homẹ ehe otọ́ etọn Davidi ko klandowiwe, yèdọ fataka, po sika po, po nuzinzán lẹ po, bo bé ye do adọkunnu ohò OKLUNỌ tọn tọn lẹ mẹ.
Currently Selected:
1 AHỌLU LẸ 7: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.