Luka 23

Jesụ nkyenị mwa Pịlāti

(Mat. 27:1-2,11-14; Mali. 15:1-5; Joh. 18:28-38)

1Lelo po papo abāndu ikilūndilo kyosa balinkusụmụka balinkuntwala nkyenị mwa Pịlāti. 2Balinkwanda ukunsịtakā balinkuti: Umụ̄ndu uju tummwagịle ịkubasofya abāndu, ịkukānịsya ukusōnga īsōngo kwa Kesale kangi ịkujoba ịkuti bạ̄ti jo Kilisịtị, Malafyale umwene. 3Po papo Pịlāti alinkunndālūsya alinkuti: Bule ugwe gwe Malafyale gwa Bajụ̄ta? Ālimmwamwịle ātịle: Ena sịli bo mụmo kujobela. 4Po papo Pịlāti alinkujoba kubapụ̄tị abakulūmba na kufịlūndilo alinkuti: Ngajagamo najimo īnōngwa mmụ̄ndu uju. 5Lolị abēne balinkūmīlisya fị̄jo ukujoba balinkuti: Ịkubasāmbulanịa abāndu nimanyisyo syake mụ Jụtaị mōsa, ukufụma mụ Galịlaị ukwịsakufịka kuno.

Jesụ nkyenị mwa Helotị

6Lelo bo Pịlāti apilị̄ke sịsịsị, ālālūsị̄sye ātịle: Umụ̄ndu uju gwa mụ Galịlaị? 7Lelo bo asyagēnịe ukuti Jesụ āfụmịle nkị̄su kya Helotị, alinkwenda nukuntuma kwa Helotị uju pakabalilo kalakala ali mụ Jelụsalemụ, 8Helotị āhobwịke fịjo bo ịkummbona Jesụ namanga āpilị̄ke īnōngwa syake ukwanda patalị ālōndaga ukummanya, kangi āsūbilaga ukukēta ikị̄ka kimo ikya kupela umwene. 9Buno buno lelo alinkunndālūsya akabalilo akatalị; lolị Jesụ alinkusịta kummwamụla nasịmo. 10Abapụ̄tị abakulūmba na bamanyandagilo bālipo balinkunsịtakā namaka fị̄jo. 11Po papo Helotị pamopēne nabasịkali bāke balinkunnjwelụla balinkummōbela; lelo pānyụma bo bamfwikịle umwenda unnụnụ balinkunngomolela kwa Pịlāti. 12Po papo Helotị na Pịlāti balinkwenda nukumanyana ilị̄sịku lilalila, namanga bwịla bāli kilugu.

Jesụ alōngị̄gwe ukuti afwege

(Mat. 27:15-26; Mali. 15:6-15; Joh. 18:39—19:16)

13Po papo Pịlāti alinkubabūngānịa abapụ̄tị abakulūmba na balōngosi bābāndu, 14alinkubabūla alinkuti: Mụntwele umụ̄ndu uju kumyangu ukuti ābasofanịaga abāndu. Lelo nunndālūsị̄sye papapa nkyenị mmyinụ ngajagamo najimo īnōngwa iji atulịle mụli isị mụnsịtākịle syosa. 15Jope Helotị akammwaga ubusobị, anngomolị̄le kumyitu. Sịkajapo nasịmo isị abōmbịle umụ̄ndu uju isyakumpelela ukuti agogịgwege. 16Po lelo ānịkunkụpamịka nifịkotị po ngummwabulaga. [ 17Lelo bwịla pa kyaka lwalịpo ulwịho lwa kubābulila umpịnyịgwa jumo.]

18Abēne lolị balinkukōlela bōsa pamopēne balinkuti: Nsōsyepo umụ̄ndu uju lolị utwabulile Balaba. 19(Balaba āpịnyị̄gwe mụnnyololo kunōngwa ja kupasyula nkāja akakulūmba na kunōngwa ja kugoga umụ̄ndu). 20Pịlāti alinkwandisya ukujoba nabo, namanga ālōndaga ukummwabula Jesụ; 21lolị abēne balinkukōlela fị̄jo balinkuti: Jo unkomele pakikohekano! Jo unkomele pakikohekano! 22Akābutatu Pịlāti ābalālūsịsye ātịle: Fịki, abōmbịle mbị̄bị ngị? Une ngajagamo najimo īnōngwa īngulūmba ijakunngogela; po lelo nịkunkomangamo ịtolo napō nịkummwabulaga. 23Lolị balinkūmīlisya balinkumfwamba balinkulāta ukukōlela ukuti akomelịgwege pakikohekano. Po papo unjwego gwabo gulinkwenda nukuntola. 24Po papo Pịlāti alinkutụmụla ukuti isị bāsūmaga syo sịbōmbịgwege. 25Alinkummwabula umụ̄ndu uju alịgalilị̄gwe mụnnyololo kunōngwa ja kubasambulania ni sịlikalị abāndu kangi nukugoga umụ̄ndu; umwene Jesụ jo alinkubanị̄nga ukuti bammbōmbelege isị bālōndaga.

Jesụ ịkukomelịgwa pakikohekano

(Mat. 27:32-44; Mali. 15:21-32; Joh. 19:17-27)

26Lelo bo bịkubūka nagwe mụnjila balinkwaganịla nu mụndu jumo gwa mụ Kịlene uju īngamụ jake āli jo Sịmonị, bo afụmịle kunngūnda, balinkunkola balinkutwika ikikohekano ukuti apīmbe ankōngege nakyo Jesụ. 27Abāndu ikilūndilo kikị̄ngị balinkunkōnga; nkilūndilo kilakila bālimo abakị̄kulu aba banndililaga, bāpālile īfwa. 28Jesụ alinkubasyụtụkila alinkuti: Mwe bakị̄kulu ba mụ Jelụsalemụ, mụngāndililaga, lolị mwịlililege mwịbēne na bānīnụ. 29Namanga gịkwịsaga amasịku apa abāndu bịsakutigi: Bali nulusako fị̄jo abakị̄kulu abasịtabāna aba bakōngesyamo sịku abāna! 30Kalakala kịsakujaga ko kabalilo aka abāndu bịsakujobaga kufyamba bātigi: Amụtugwilege! Kangi bajobēge kutwamba bātigi: Amụtusyilege! 31Lelo linga syo sịkubōmbịgwa sịsịsị ku mpịkị ummbisi, po sịsakujaga bulebule kuli ugu gūmịle?

32Abāngi babili bope, aba bāli batulanōngwa, balinkutwalịgwa pamopēne nagwe kukugogịgwa. 33Lelo bo bafịkịle apa bịkuti po pa Lupaja, po balinkubakomela pafịkohekano, abatulanōngwa bala jumo ābīkị̄gwe kukiboko kyake ikị̄kīlo, ujūngi kukiboko kyake ikị̄mama. 34Jesụ ạ̄tile: Baswege, gwe Tāta! Bakasịmanya isị balipakubōmba. Po papo balinkujabana imyenda gyake bo bagilagulịle ubulagusị. 35Abēne abāndu balinkwima palapala balinkukēta: lolị abakulūmba balinkunseka balinkuti: Abāngi ābapokaga; aịpoke mwene lelo linga jo Kilisịtị, unsūngulịgwa gwa Kyala! 36Abasịkali bope balinkummōbela, balinkusegelela kumyake balinkumpa ubwalwa bwa āsịkị, 37balinkuti: Ulị̄poka gwịmwene linga uli Malafyale gwa Bajụ̄ta! 38Bwalịpo bope nubusị̄mbe pamwanya ubwakuti: Uju jo ju Malafyale gwa Bajụ̄ta.

39Jumo mmbatulanōngwa babili bala bakomelị̄gwe nagwe alinkunhēlụla Jesụ alinkuti: Ukaja gwe Kilisịtị ugwe? Ka ukwịpoka gwịmwene po utupokege nanụswe! 40Loli ujūngi jula jo alinkunkemela unnịne alinkuti: Nụngwe utịkuntị̄la Kyala napa kufụ̄ndịgwa pamopēne nagwe? 41Uswe lolị twe bākị lolị twe kutubagị̄le ukubōmbelịgwa sịsịsị, namanga tụkwambilila umfwalo gwa isị twabōmbịle, lolị uju akabōmbamo īmbị̄bị nasịmo. 42Po papo alinkujoba kwa Jesụ alinkuti: Jesụ, ukāngumbukege bo kwịngila mmaka gāko gabunyafyāle. 43Jesụ ālimmwamwịle ātịle: Nalolị ngukubūla ugwe ukuti kwakujaga nanịne gumụsyugu mbusyuka bwa basūngulịgwa.

Ubufwe bwa Jesụ

(Mat. 27:45-56; Mali. 15:33-41; Joh. 19:28-30)

44Pị̄pị na pakabalilo kantāndatu, īngị̄sị jilinkugwa pakị̄su kyosa ukwịsakufịka pakabalilo ka buhāno na buna, 45ilị̄suba lilinkuleka ukubala; ilịbālika lya nnyụ̄mba īnyị̄kemo lilinkutāfụkana pakāti na pakāti. 46Lelo Jesụ alinkukụ̄ta ilịsyu ilịkulūmba alinkuti: Gwe Tāta, īmbepo syangu ngusịbīka mmaboko gāko! Lelo bo ajobịle lilīli alinkwenda nukusịlilika. 47Lelo bo unndōngosi gwa basịkali asịbwene isi syabonị̄ke, alinkuntụ̄fya Kyala alinkuti: Umụ̄ndu uju nalolị āli nngolofụ! 48Kangi abāndu bōsa aba babūngēne pakukēta, bo basịbwene isị syabonị̄ke balinkugomokela ntwaja twabo kuno bo bịkwịkoma ifịpāmbaga fyabo, 49Bōsa aba bālimmēnye na bakị̄kulu aba bālinkōngịle ukufụma mụ Galịlaị balinkwima pabutalị balinkusịbona syosa sịsịsị.

Ukusyilịgwa kwa Jesụ

(Mat. 27:57-61; Mali. 15:42-47; Joh. 19:38-42)

50Lelo ālipo jumo umụ̄ndu uju īngamụ jake ali jo Josefụ uju āfụmịle nkāja ka Bajụ̄ta aka bạ̄tigi: Alimateja. Ālimo nndukomāno lwabalōnganōngwa; āli mụ̄ndu unnụnụ kangi unngolofụ, 51uju akālitị̄ke isị bābātị̄ke naisị bābōmbịle, āli mụ̄ndu uju āgụ̄lilaga ikitāngālala kya Kyala. 52Umụ̄ndu jujuju ābūkịle kwa Pịlāti kukusūma ummbili gwa Jesụ. 53Po papo lelo alinkugwega alinkugunịembetēlela mmwenda untakanyịfụ umwelụ alinkwakunndāmbalika mwịpūmba ili lyasongolị̄gwe nndwalabwe, ili najumo ujūngi akālambalikị̄gwe mo sịku. 54Lolị lyali lyo ịsịku lya kwịtendekesya (Pakihāno) bo Sabāti ịkuja pakwanda. 55Abakị̄kulu aba bālisịle nagwe ukufụma mụ Galịlaị, bālinkōngịle balinkulibona ilịpūmba, balinkugubona namụmo ummbili gwake gwalambalikilị̄gwe; 56po lelo balinkugomoka, balinkwakutēndekesya imịkota ni nyēmba sya lūma ulunụnụ sya kugupaka ummbili; lelo pa sabāti balinkutūsya ukukōngana ni ngomēlesyo.

Currently Selected:

Luka 23: NYB96

Highlight

Copy