Ubwandilo 6
6
Ububị̄bị bwa bāndu
1Bo abāndu bāndịle ukubāla pakị̄su, po papo abalindwana, balinkupāpịgwa na bāndu bala bala. 2Abāna ba Kyala balinkwaga ukuti abāna ba bāndu abalindwana bala banụnụ ububūmbe; balinkubēga bamo ukuja bakasị bābo, balinkusalapo aba bābaganịle. 3Po papo Kyala alinkujoba alinkuti: Mbepo gwangu uju ịkupa ubūmị atịsakujaga bwịla mmụ̄ndu, namanga umwene mụ̄ndu gwa mmbili ugu gukufwa, ịkugonaga ifyinja imịa jimo na malōngo mabili ịtolo (120). 4Mmasịku gala gala, na mmasịku aga gākōngịle gilinkujako imịndu imịnywamụ fị̄jo imịsịsya igi bāpāpịle bo bēgịle abāna ba bāndu abalindwana. Gyo gyali mị̄ndu gya ịjolo igya maka, kangi gyali mị̄ndu imịfụmụke.
5Bo UNTWA āgịle ukuti, ubutulanōngwa bwa bāndu bubēle pa kị̄su, nukuti syosa inyịnogono sya mụ̄ndu mbị̄bị ndupu amasịku gōsa. 6Po papo UNTWA alinkusụlụmanịa ukuti kali nampelaga gwakị umụ̄ndu pakị̄su, sịlikummbaba mụ̄nda. 7Buno buno UNTWA alinkujoba alinkuti: Nikubapyụtaga pa kị̄su abāndu aba mbapelịle, abāndu nịfinyamāna, kangi nifya būmị ifị fịkwendela ulwanda, na sịnjunị sya mụmpālānga, namanga nsụlụmēnịe ukuti kali nāpelaga fyakị. 8Lolị Nwaka jo alinkukaba ilịpyana nkyenị mụ NTWA.
9Isị syo nōngwa sya kikolo kya Nwaka: Nwaka āli mụ̄ndu unngolofụ, unsịtakujobịgwamo ububị̄bị bumo kubāndu ba nkabalilo kāke, kangi alinkwenda na Kyala. 10Āli na bāna abālumyāna batatu: Syemụ Hamụ na Jafetị.
Nwaka ịkusōngola Īngalaba
11Ikị̄su kyalyonāngị̄ke nkyenị mwa Kyala, Ikị̄su kyalị̄swịle ulōnāngiko. 12Bo ịkukikēta ikị̄su, alinkwaga kyonangike, namanga abāndu bōsa ulwendo lwabo ulubị̄bị lwakindilị̄le pakị̄su. 13Po papo Kyala alinkummbūla Nwaka alinkuti. Nndụmwịle ukubapyụta bōsa abāndu, papo ikị̄su kyosa kị̄swịle ububị̄bị, panōngwa jābo po āngubapyụtila lumo ni kị̄su. 14Ugwe usōngolege ingalaba jāko ija matapwa, amakafụ, aga mpịkị unngwịna; ubīkemo amalị̄nga nkati kangi ujikānde ujisị̄ndilile ujimyalikisye nu mpụlya nkati na pānja. 15Ujitendekesyege jijege bo ulu: Mmbutalị bwake jijege amaboko bāmịa batatu (300) mbwēlēfụ jijege amaboko amalōngo mahāno (50), pa mwanya ubutalị ukufụma pāsi jijege amaboko amalōngo matatu (30). 16Mụngalaba ubīkemo ubwasị nkipimo kya kiboko kimo. Ubīkege ikifịgo pa lubafụ, utendekesyege na majulu matatu, ilya pāsi ilya bubili ni lya butatu. 17Ukēte une nịkuja pakutuma umwelēsyo pakị̄su ukuti mmbapyụtege abāndu bōsa pakị̄su, utūndu tōsa utu tuli nubūmị twịsakufwaga. 18Lolị nịkufị̄nga nanụngwe ukuti kwịsakwịngilaga mụngalaba ugwe, abānāko abālumyāna, unkasịgo pamopēne na bakasị ba banāko. 19Kangi mụ ngalaba kwịsakwịngilaga ni fya būmị fyosa, uluko nu luko, fyo kwịsakwịngilaga nafyo fị̄bili fịbili ikinyāmbala nikikị̄kulu, kokuti fịsefịponege pamopēne nanụngwe. 20Gwịse ufyegengepo fịbili fịbili ifya luko nu luko, mụnjunị mfịnyamāna na mụli fyosa ifị fikwendela ulwanda. 21Gwegege nifị̄ndu ifya luko lōsa ifị abāndu bịkulya, ni fya fịnyamāna ukafịbīkege bunụnụ, fyo fịsefịjege fyakulya fyako ugwe nifya fịnyamāna. 22Po papo Nwaka alinkusịbōmba syosa ukukōnga bo mụmo Kyala alinndagilị̄le.
Currently Selected:
Ubwandilo 6: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
