Ubwandilo 5
5
Aba nkikolo kya Atamụ
1Aba bo bāndu aba nndujụ̄ngụ lwa Atamụ uju Kyala ālimpelịle nkifwanị kyake Jūjo. 2Alinkumpela unnyāmbala nu nkị̄kulu, alinkwenda nukubasaja alinkubapa īngamụ ja: Bāndu. 3Lelo bo Atamụ agonịle ifyinja mịa jumo ni fyinja amalōngo matatu (130), po papo alinkumpāpa umwana unndumyana, uju āfwene nagwe, ugwa nkifwanị kyake jo alinkumpa īngamụ ija Setị. 4Bo Atamụ ampāpị̄le Setị, alinkugona ifyinja bāmịa lwele (800); alinkupāpa abāna abāngi; abanyambala na bakị̄kulu. 5Atamụ āfwịle bo agonịle ifyinja bāmịa bahāno na bana ni fyinja amalōngo matatu (930).
6Bo Setị agonịle ifyinja mịa jumo nifyinja fịhāno (105), alinkumpāpa Enosị. 7Umwene Setị bo ampāpịle Enosị alinkugona ifyinja bāmịa lwele, nifyinja fịhāno na fịbili (807), āpāpịle na bāna abāngi abanyambala na bakị̄kulu. 8Setị āfwịle bo ali nifyinja bāmịa bahāno na bana nifyinja kalōngo na fịbili (912).
9Enosị āli nifyinja amalōngo mahāno na mana (90) bo ịkumpāpa Kenanị. 10Umwene bo ampāpịle Kenanị, alinkugona ifyinja bāmịa lwele nifyinja kalōngo na fịhāno (815), alinkupāpa abāna abanyambala nabakị̄kulu. 11Enosị āfwịle bo agonịle ifyinja bāmịa bahāno na bana nifyinja fịhāno (905).
12Bo Kenanị ali nifyinja amalōngo mahāno na mabili (70), alinkumpāpa Mahalaleli. 13Kūnyụma bo apāpị̄gwe Mahalaleli, Kenanị alinkugona ifyinja bāmịa lwele nifyinja amalōngo mana (840), alinkupāpa abāna abāngi abanyambala na bakị̄kulu. 14Kenanị alinkwenda nukufwa bo agonịle ifyinja bāmịa bahāno na bana nifyinja kalōngo (910) pamopēne.
15Bo Mahalaleli agonịle ifyinja amalōngo ntandatu nifyinja fịhāno (65), alinkumpāpa Jaletị. 16Bo mahalaleli ampāpịle Jaletị, āgonịle ifyinja bāmịa lwele ni fyinja amalōngo matatu (830) āpāpịle abāna abanyambala na bakị̄kulu. 17Mahalaleli āfwịle bo agonịle pakị̄su ifyinja bāmịa lwele nifyinja amalōngo mahāno na mana na fịhāno pamwanya (895).
18Bo Jaletị agonịle ifyinja mịa jumo, nifyinja amalōngo ntandatu na fịbili pamwanya (162) alinkumpāpa Enokị. 19Lelo bo ampāpịle Enokị, āgonịle ifyinja bāmịa lwele (800), āpāpịle abāna abanyambala na bakị̄kulu. 20Mbūmị bwake bōsa Jaletị āgonịle ifyinja bāmịa bahāno na bana na malōngo ntandatu nifyinja fịbili (962), po papo alinkwenda nukufwa.
21Bo Enokị ali nifyinja amalōngo ntandatu, nifyinja fịhāno (65), alinkumpāpa Metusela. 22Lelo bo ampāpịle Metusela, Enokị alinkwenda na Kyala mfyinja bāmịa batatu (300); āpāpịle abāna abanyambala na bakị̄kulu. 23Po lelo mbūmị bwake bōsa Enokị alinkuja nifyinja bāmịa batatu na malōngo ntandatu, nifyinja fihāno (365). 24Umwene Enokị alinkwenda bwịla na Kyala; po lelo alinkusịtakumanyịgwa kuno ābūkịle, namanga Kyala ālimmwegịle.
25Bo Metusela agonịle ifyinja mịa jumo na malōngo lwele nifyinja fịhāno na fịbili (187), alinkumpāpa Lamekị. 26Umwene Metusela bo ampāpịle Lamekị, alinkugona ifyinja bāmịa bahāno na babili na malōngo lwele, nifyinja fịbili pamwanya (782); āpāpịle abāna abanyambala na bakị̄kulu. 27Buno buno mbūmị bwake bōsa Metusela, āgonịle ifyinja bāmịa bahāno na bana na malōngo ntandatu nifyinja fịhāno na fịna pamwanya (969); po papo alinkwenda nukufwa.
28Bo Lamekị afịkịle ifyinja mịa jumo na malōngo lwele ni fyinja fịbili (182); alinkupāpa umwana unndumyana. 29Alinkumpa īngamu ja Nwaka, alinkuti jujuju jo gwakututwalila ulutūsyo mụ mbōmbo jītu ingafụ; ija maboko, nkị̄su iki Kyala ākigụnịle. 30Lelo bo Lamekị ampāpịle Nwaka, alinkugona ifyinja bāmịa bahāno na malōngo mahāno na mana nifyinja fịhāno (595). Alinkupāpa abāna abanyambala na bakị̄kulu. 31Buno buno mbūmi bwake bōsa Lamekị alinkuja nifyinja bāmịa bahāno na babili na malōngo mahāno na mabili nifyinja fịhāno na fịbili pamopēne (777); po papo alinkwenda nukufwa.
32Lelo bo Nwaka ali nifyinja bāmịa bahāno (500), alinkupāpa Syemụ, Hamụ na Jafetị.
Currently Selected:
Ubwandilo 5: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
