Ubwandilo 45

Josefụ ịkwịnāngisya kubāmyabo

1Buno buno Josefụ alinkutolịgwa nu kwịkasya nkyenị mmbabōmbị bāke, alinkukōlela alinkuti: Amụbasōsyemo abāndu bōsa mụno. Alinkusịta nukusyalamo najumo umụ̄ndu ujūngi bo umwene ịkwịnāngisya kubāmyabo. 2Alinkukūta niịsyu ilikulūmba alinkulila, buno buno na Begịpịtị balinkupilika, kangi nababā nnyụ̄mba ja Falao balinkupilika. 3Po papo Josefụ alinkubabūla abāmyabo alinkuti: Jo une Josefụ; bule tāta akāli mūmị nalolị? Lolị abēne abāmyabo balinkutolịgwa nukummwamụla, papo ulutēnde lwabakomịle kumyake.

4Umwene Josefụ alinkubabūla alinkuti: Nikubasūma ukuti mụsegelele kuno. Abēne balinkusegelela. Po papo alinkubabūla alinkuti: Jo une ne Josefụ unnụgụna gwinụ uju mwalimmūlị̄sye mwEgịpịtị. 5Lolị lilino mụngatamịgwaga mụndụmbụla syinụ, ukwịlōnga mwịbēne panōngwa ja kuti mwalinyūlị̄sye une kuno. Jo ju Kyala uju ālindumịle une ukuti ndalepo kuno kokuti nịsembupoke ubūmị bwa bāndu. 6Namanga iki kyo kyinja kya bubili ukufụma mụmo injala jigwilị̄le nkị̄su; kangi fịsyele ifyinja fịhāno apa kutisakujako ukulima kangi nukutōndola. 7Kyala ālindumịle une ukutalapo nkyenị mmyinụ ko kuti ikikolo kyinụ kyendelelege. Nātumị̄gwe ukuti mbapoke umwe mụjeko kubūmị. 8Buno buno lelo mụkaja jo umwe mwe mwalindumịle une kuno, himma; lolị jo Kyala uju ambelịle une ukuti mfwanege ndi gwịse gwa Falao, nukuti njege nkulūmba gwa nnyụ̄mba jā Falao, kangi nukuja nndagilị gwa kị̄su kyosa kya Egịpịtị. 9Oko, mụbūke mbibimbibi kwa tāta, mụkammbūle ukuti: Umwanāko Josefụ ịkuti: Kyala ānyīmị̄ke une ukuja gwa kukilagila ikị̄su kyosa kya Mwegịpịtị; gwịsege kuno kumyangu, ungakābilaga. 10Kwịsakwịtūgalaga nkị̄su kya Gosyenị, kwịsakujaga pabupị̄pị nanịne, ugwe nabānāko, kangi na bāna ba banāko. Ni mịtị̄mo gyako, īng'ōmbe syako na ifị ulinafyo fyosa. Kula kula lolị ko une nịsakukuswilaga. 11Fịsyele ifyinja fịhano ifya njala, po lelo ngị̄gana ukuti gwịngilege mbutolwe ugwe ni nyụmba jāko kangi na ifị uli nafyo fyosa. 12Lilino lelo mwịkētị̄le mwịbēne, jōpe na ju nnụgụna gwangu Benjamịnị asịkētịle ukuti joune ngujoba nanụmwe. 13Mụkampāngilege tāta nisyalwimiko lōsa ulu ndwagịle nkị̄su kya Mw'egịpịtị, kangi na ifị mụfịbwene fyosa; mụkēndēlelege ukwịsa nagwe kuno tāta. 14Po papo alinkwenda nukunkumbatila mmakosị unnụgụna Benjamịnị, alinkulila, jōpe Benjamịnị alinkulila bo bakāli bakūmbatēne mmakosị. 15Alinkubaponịa nulufịpo ulwa bunyamụ̄ndu bōsa abāmyabo kangi alinkulila nabo, pānyụma pali sịsịsị po abāmyabo balinkwanda ukujoba nagwe.

16Bo īnōngwa sịsịsị sịfumwịke na nnyụ̄mba ja Falao isyakuti: Abāmyabo ba Josefụ bị̄sịle, Falao umalafyale gwa kị̄su, palikimo na babōmbị bāke balinkwịkyela fị̄jo. 17Falao alinkummbūla Josefụ alinkuti: Ubabūle abāmyinụ ukuti: Amụkwesye ị̄nyāmbi syinụ pa mbụ̄nda, mụbūkege kukị̄su kya Kanānị. 18Mụkammwege ugwịsēmwe naba nnyụ̄mba syinụ, mụkị̄sege kuno kumyangu, nịsakubapaga ifịnụnụ fyōsa ifya Mw'egịpịtị mụno mwịsakulyaga ifị̄ndu ifịnụnụ fyosa ifya nkị̄su iki. 19Kangi ubalagilege utigi mwege amageletị ukufụma nkị̄su kya Egịpịtị agakwakubapīmbilamo abānīnụ abakeke na bakasị bīnụ. Mụkammwege nu gwịsēmwe mụkị̄sege. 20Mụngịnogonelangako ni fyuma fyinụ buno mbapēle umwe ikị̄su iki kikīndilị̄le ubunụnụ Mwegịpịtị mụno.

21Abāna ba Ịsịlaelị balinkubōmba bo buno buno. Josefụ alinkubapa amageletị, bo mụmo Falao alinndagilị̄le, kangi alinkubapa nifị̄ndu fya mụnjila. 22Alinkubapa bōsa imyenda gyakufwala ntubalilo twa lusekelo lolị Benjamịnị jo alinkumpa īndalama bāmịa batatu (300) ni myenda gya kufwala ntubalilo twa lusekelo mịhāno, igi gili pasịma. 23Alinkuntumila ugwịse īmbụ̄nda kalōngo isị syapīmbịle ifị̄ndu ifịnụnụ ifya nkị̄su kya Mwegịpịtị, ni mbụ̄nda īmbīkị kalōngo isị syapīmbịle inganụ ni fịsyesye kangi nifyakulya ifị̄ngị, ukuja fyakulya fyagwịse mụnjila. 24Po papo Josefụ alinkubasụmụsya abāmyabo, alinkwakubasịndikila, lelo bo ịkulagana nabo alinkubabūla alinkuti: Komma ukulwa mụnjila. 25Po papo balinkufyuka ukufụma nkị̄su kya Egịpịtị, balinkwakufịka kugwịsabo Jakobụ, nkị̄su kya Kanānị. 26Balinkummbūla ugwịsabo balinkuti: Josefụ alịko, mūmị, jo uju ịkulagila nkị̄su kyosa ikya Egịpịtị. Bunobuno Jakobụ ātolị̄gwe isyakubōmba alinkusịta nukusịsūbila isị bammbūlaga. 27Lelo bo abānāke bampāngị̄le Jakobụ amasyu gōsa aga Josefụ ābabūlịle; kangi bo agabwene amageletị aga Josefụ ātumịle ukuti gakabēge, po papo Jakobụ ugwịsabo alinkukaba amaka. 28Ịsịlaelị alinkujoba alinkuti: Sị̄ngolịle nalolị isya kuti umwanāngu Josefụ alịko, mūmị, nsụmwịke, ngubūka ukuti ngammbone bo ngāli ukufwa.

Currently Selected:

Ubwandilo 45: NYB96

Highlight

Copy