Ubwandilo 30

1Umwene Lahelị bo āgịle ukuti akampāpilamo na jumo umwana Jakobụ, po papo alinkuja nubūfị nunkulu, alinkummbūla Jakobụ, alinkuti: Mbapo abāna, linga utịkūmba ngufwa une. 2Umwene Jakobụ alinkukalala fị̄jo alinkunkemela alinkuti: Ne Kyala une? Kangi alinkuti: Jo une nēngukānịsye ukupāpa abāna? 3Po papo Lahelị alinkuti: Oko mmwege Biliha ummbōmbị gwangu unndīndwana uju aje nkasịgo; ambāpilege abāna mbagatege. 4Po papo Lahelị alinkumpa unndume ummbōmbị gwake Bịlịha alinkuja nkasị Jakobụ alinkwegana nagwe. 5Bịlịha alinkwambilila ikifụba alinkumpāpila Jakobụ umwana unndumyana. 6Lahelị alinkuti: Kyala āndōngị̄le īnōngwa jāngu, apilị̄ke ulwịpụ̄to lwangu āmbēle umwana unndumyana; alinkumpa īngamụ ja Ndanị. 7Bịlịha ummbōmbị gwa Lahelị alinkuja nikifụba kangi, po lelo alinkumpāpila Jakobụ umwana unndumyana ugwa bubili. 8Lahelị alinkwịnogona alinkuti: Ndwịle nu nkulu gwangu lilino po nuntolịle. Po papo alinkumpa īngamụ ja Nafụtalị.

9Bo Lēja āgịle ukuti alekịle ukupāpa, alinkummwega Sịlịpa ummbōmbị gwake unndīndwana, alinkumpa unndume Jakobụ ukuti ajege nkasị. 10Po papo Sịlịpa alinkumpāpila Jakobu umwana unndumyana. 11Lēja alinkuti: Ndi nulusekelo! Alinkumpa ingamụ ija Gandi. 12Sịlịpa ummbōmbị unndīndwana gwa Lēja, alinkumpāpila Jakobụ umwana unndumyana ugwa bubili. 13Lēja alinkwịnogona alinkuti: Ndi Nsangalufụ! Buno abakị̄kulu abị̄nāngu bịsakūnjobaga ubusangalufụ, po papo alinkumpa īngamụ ja Aselị.

14Mmasịku gakutōndolela inganụ Lubenị alinkubūka mmịgūnda, alinkwakwapako nīseke sịmo isị bịkuti tunguja, alinkuntwalila unna Lēja. Po papo Lahelị alinkusūma kwa Lēja alinkuti: Nātigi ūmbeko sịmo īseke sya tunguja isị umwanāko atwele. 15Lolị Lēja alinkummwamụla alinkuti: Ngīmba ugwe kwịnogona ukuti nhobwịke apa upokịle unndume gwangu? Ngīmba kulōnda ukupoka na sịseke sya tunguja isị umwanāngu atwele? Umwene Lahelị alinkwamụla nubusụlụmanịe alinkuti: Po lelo ūmbeko iseke sya tunguja isị atwele umwanāko, kokuti Jakobụ īse agone nnyụ̄mba jako ikilo iki. 16Namajolo bo Jakobụ ịkugomoka ukufụma kunngūnda, Lēja alinkusōka ukwakwaganịla nagwe alinkummbūla alinkuti: Īkilo iki kugona kumyangu pāpo ngūlịle ugwe niseke sya tunguja isị umwanāngu atwele. 17Po papo Jakobụ alinkwakugona nnyụ̄mba jā Lēja ikilo kila kila. Kyala alinkupilika ulwịpụ̄to lwa Lēja, alinkuja nikifụba, alinkumpāpila Jakobụ umwana unndumyana ugwa buhāno. 18Umwene Lēja alinkwịnogona alinkuti: Kyala āmbēle une ifịhōmbịgwa fyangu papo unndume gwangu nālimpēle ummbōmbị gwangu unkị̄kulu. Buno buno alinkumpa īngamụ ja Isakalị. 19Lēja alinkuja nikifụba kangi, alinkumpāpila Jakobụ umwana unndumyana ugwa ntandatu. 20Po papo Lēja alinkujoba alinkuti: Kyala āmbēle une ikyabupe ikinụnụ; lilino po unndume gwangu ikūngịndikaga namanga numpāpị̄le abāna ntandatu. Buno buno alinkumpa ingamụ ja Sabulonị. 21Panyụma lelo po Lēja alinkupāpa umwana unndindwana, jo alinkumpa īngamụ ja Laịna. 22Po lelo Kyala alinkunkumbuka Lahelị, ālimpilị̄ke ulwịpụ̄to lwake alinkwenda nukummwịgula īmbāpo. 23Alinkuja nikifụba, alinkupāpa umwana unndumyana. Lahelị alinkujoba alinkuti Kyala ēpwịsye īsonị syangu. 24Alinkumpa īngamu ja Josefụ, alinkwịpụ̄ta alinkuti ngusūma ukuti UNTWA ānyongele ujūngi umwana unndumyana.

Jakobụ ịkujobesanịa na Labanị

25Bo Lahelị ampāpị̄le Josefụ, Jakobụ alinkummbūla Labanị alinkuti: Ngusūma ukuti unyịtikisye ngomoke mbūke kumyitu. 26Umbepo abakasị bāngu aba nālyegịle pakukubōmbela ugwe īmbōmbo, kangi na banāngu ukuti mbūkege; pāpo nanụngwe ujimēnye ịtolo īmbōmbo iji mbōmbịle. 27Loli umwene Labanị alinkummwamụla alinkuti: Ugwe mbilikisya, une nsyagịle mụ mbepo ukuti, UNTWA āmbēle ulusajo mmyako ugwe. 28Umbūlege lelo ifịhōmbịgwa ifị̄ngị ukukīnda ifịtasị, ifị kufịlōnda ukuti ngupege. 29Umwene Jakobụ alinkwamụla alinkuti: Pilika amasyu gangu, usịmēnye ịtolo nanụngwe na mụmo ngubōmbị̄le ugwe, kangi na mụmo imịtị̄mo gyako gyolokị̄le bo ngutị̄ma. 30Namanga gwalinagyo imịtị̄mo mịnāndi ịtolo bo ngāli ukwịsa, lolị lilino gibēle fị̄jo. UNTWA akusajịle ugwe pōsa apa nakubōmbelaga. Lelo lilino po nisakubabōmbelaga ndilị aba nnyụ̄mba jāngu? 31Labanị alinkunndālūsya alinkuti: Ngīmba kulōnda ukuti ngupe fịkị? Umwene Jakobụ alinkummwamụla alinkuti: Ndịkuti umbepo kamo akāndu mma. Lolị nịkwịtika ukutị̄ma imịtị̄mo gyako nu kugilindilila, linga kwịtika ukūmbōmbela isị. 32Oko, nsyungūtile mmịtị̄mo gyako gyosa umụsyugu, ukuti nsalengemo utung'ōsị ututị̄tu tōsa nutupene tōsa ututonōnde nu tukekanịe, tututu to tukujaga go mfwalo gwangu. 33Buno buno lelo po kwịsakubwagaga ubwanalolị bwangu bo kubala, linga gwịsịle kutwagamo mụ ntị̄mo gwangu utung'ōsị utu tukāja tutị̄tu nutupene utu tukaja tutonōnde, pamo tukaja tukekanịe, po gwịse umanyege ịtolo ukuti nhījịle mụntị̄mo gwako. 34Umwene Labanị alinkwamụla alinkuti: Mma nụnụ ịtolo, oko tubōmbe bo mụmo ujobị̄le. 35Lelo mwịsịku lila lila Labanị alinkusōsyamo mụntị̄mo gwa mbene īmbōngo syosa isị syali ngololanịe na isị syali ndonōnde, kangi ni mbene syosa isị syali ngekanịe, pamo ndonōnde, alinkusịsosyamo ni ng'ōsị syosa isị syali ndị̄tu. 36Alinkubapa abānāke ukuti basịtị̄mege. Alinkwepukapo pamāso pa Jakobụ nu ntị̄mo gwake, alinkwenda injila ja masịku matatu. Umwene Jakobụ jo alinkutị̄ma imịtị̄mo gya Labanị igi gyasyele. 37Po papo Jakobụ alinkwega utupịkị utubisị: Akapịkị ka nndobo nutupịkị twa luko ulūngi tubili alinkutukubula amakāndi mụ̄nyụma apa na apa, ukuti akapịkị kōsa kaje nubulabanịe. 38Utupịkị tututu alinkutwimika mfịpōndo ifị imịtị̄mo gyanwelangamo amīsi, pala pala imịtị̄mo gyake gịsaga pa kunwela. Īng'ōsị pamo īmbene isị sị̄pīngwịle sịlinkwenda pala pala kumbōngo nkyenị ntupịkị tula tula. 39Jo nōngwa iji mmịtị̄mo gyake syapāpịgwaga īmbene īsulula, īngekanịe nī ndonōnde. 40Jakobu alinkusịpāgula pa mịtị̄mo gya ng'ōsị sya Labanị isị syali sulula nisị syali ngekanịe alinkusịtwala kuntị̄mo gwake; buno buno Jakobụ alinkugubāsya untị̄mo gwake, alinkugubīka pasịma kisịta kugōngānịa pamopēne nuntị̄mo gwa Labanị. 41Isya maka mụntị̄mo gula linga sị̄pīngwịle Jakobụ ājagakubīka utupịkị tula nkipōndo kya kunwelamo amīsi nkyenị mụntị̄mo, ukuti syendelege pabupị̄pị nutupịkị tula. 42Lolị isyene isị sịkāli na maka syo Jakobụ alinkusịta kusibīkila utupịkị tula tula, buno buno īsịtamaka sịlinkuja sya Labanị isyene isya maka sịlinkuja sya Jakobụ. 43Momụmo ikyuma kilinkubālila nakalinga, alinkuja nkabị fị̄jo, āli ni mịtị̄mo gimị̄ngị, na babōmbị abakị̄kulu na banyāmbala, ni ngamịla kangi ni mbụ̄nda.

Currently Selected:

Ubwandilo 30: NYB96

Highlight

Copy