Ubwandilo 27

Ịsịhaka ịkunsaja Jakobụ

1Ịsịhaka bo akāngele na māso gāke gāpūpēle, alinkummbilikila Esabu umwanāke ugwakipānda, alinkummbūla alinkuti: Gwe mwanāngu, umwene alinkwamụla alinkuti: Une apa. 2Ịsịhaka alinkuti: Kēta lilino ngāngēle, kangi ngalimanya niịsịku lyangu lyakufwila. 3Lilino lelo, gwegege ifyakufwimila fyako, ubupīndo bwako nututonolelo, ubūkege mmatēngele ukāfwimile inyama. 4Gwịse undendekekesyege ifyakulya ifịnyāfụ fyo undwalile kuno, ukuti nisendyemo lelo nēnde nukukusaja bo ngāli ukufwa.

5Lebeka alinkupilika bo Ịsịhaka ịkummbūla Esabu. Lelo bo Esabu abūkịle mmatēngele nkufwima inyama jakwịsakuntendekekesya ugwịse, 6po papo Lebeka alinkujoba nu mwanāke Jakobụ alinkuti: Mbilị̄ke bo ugūso ịkummbūla unkulugo Esabu ịkuti: 7Ubūke mmatēngele ukafwime, ukandwalile ikinyamāna, gwịse undendekekesye ifyakulya ifinyāfụ ifị mfịganịle, ukuti nịsendyemo po nēnde nukukusaja ugwe nkyenị mụ NTWA bo ngāli nukufwa. 8Lilino lelo gwe mwanāngu pilikisya isị nguja pakukubūla, 9ubūke kukibaga ukēge utupene tubili ututụpe ukuti nịsengutendekekesye ifị̄ndu ifinyāfu ifị ugūso afịganịle. 10Po lelo gwịse umpege jujugwe ukuti alye po ēnde nukukusaja bo akāli ukufwa. 11Po papo Jakobụ alinkummbūla unna Lebeka alinkuti: Kēta unkulu gwangu ali nulusyoja ummbili gōsa, une lolị ngānalo, ndi ntenenefụ ịtolo. 12Pamo tāta akāmbalamasyege, po lelo ịsakumanya ukuti ngunsyoba, buno buno nịsakwambilila ikigụne mbujo bwa kwambilila ulusajo. 13Umwene unna alinkummwamụla alinkuti: Īkigụne kyako kịsekijege kyangu une, ugwe lolị būka ukabōmbe isị. 14Alinkubūka alinkwakuntwalila unna, umwene lelo unna alinkutendekesya ifyakulya fya lūma ulunụnụ ifị ugwịse āfịganịle. 15Po papo Lebeka alinkwega imịselekesye gya Esabu umwanāke unkulūmba igi āli nagyo nnyụ̄mba gyo alinkumfwika Jakobụ umwanāke unnāndi. 16Alinkuti ni fịgubo fya mbene alinkumfwika mmaboko na mmakosị mụno ulusyoja lukālịmo. 17Po papo Lebeka alinkunnị̄nga Jakobụ umwanāke mmaboko gāke ifyakulya fịla ifya lūma ulunụnụ, kangi nikisyesye iki ātendekị̄sye.

18Alinkwịngila mụmo ālịmo ugwịse, alinkuti: Tāta umwene ugwịse alinkuti, une mwanāngu; Gwanị? 19Umwene Jakobụ alinkummbūla ugwịse, alinkuti: Ne Esabu umwanāko ugwakipānda; mbōmbịle bomụmo gwalimbūlị̄le, oko lelo sụmụka gwịtūgasye pakulya inyama iji ngutendekekị̄sye ko kuti gwende nukūsaja une. 20Ịsịhaka alinkunndālūsya kangi alinkuti: Usakịle ndilịndilị? Ujāgịle nakalinga ịtolo, umwene Jakobụ alinkwamụla alinkuti: Untwa Kyala gwako āndūlịle ukuti njāge mbibimbibi. 21Ịsịhaka alinkummbūla Jakobụ alinkuti: Segelela kuno, mwanāngu, ngupalamāsye, ngẹte linga jo ugwe gwe mwanāngu Esabu nalolị. 22Po papo Jakobu alinkusegelela kugwịse, umwene alinkumpalamāsya mụmmbili, alinkuti: Ilị̄syu lyo lya Jakobụ, lolị amaboko go ga Esabu. 23Alinkusị̄ta nukummanya papo amaboko gāke gāli nulusyoja bo aga nkulu Esabu po papo alinkunsaja. 24Alinkunndālūsya kangi alinkuti: Ugwe gwe mwanāngu Esabu nalolị? Jakobụ alinkwamụla alinkuti: Ee, jo une nalolị. 25Po papo Ịsịhaka alinkuti: Ndwalila kuno inyama iji utendekị̄sye mwanāngu ukuti nndyemo po nēnde nukukusaja, Jakobu alinkuntegelekesya ugwịse, umwene alinkulya, alinkuntwalila nu bwalwa bwa māfīlu alinkunwa. 26Po papo lelo ugwịse Ịsịhaka alinkummbūla umwanāke alinkuti: Segelela kuno ūfịpe une gwe mwanāngu. 27Alinkusegelela kugwịse alinkumfịpa; umwene ugwịse alinkunụ̄sya imyenda gya mwanāke, alinkunsaja alinkujoba alinkuti:

Kēta ulūma ulunụnụ lwa myenda gya mwanāngu, Lufwene ịtolo nulūma lwa nngūnda ugu UNTWA āgusajịle.

28Kyala akutịmikisyege īndūngwa ja kumwanya.

Akupege ni mboto ja pakị̄su,

akumekesyege ifị̄ndu ifị̄ngị na māfị̄lu.

29Ifịkolo fya bāndu fịkubōmbelege ugwe, fịbụngụlụkege nkyenị mmyako,

Ujege Malafyale gwa bamyinụ abēne bo balāmbege kumyako.

Bagụnịgwege bōsa aba bịkukugụna ugwe,

Basajịgwege aba bịkukusaja ugwe.

Esabu ịkusūma ulusajo kwa Ịsịhaka

30Mbibimbibi ịtolo bo Ịsịhaka amalịle ukunsaja Jakobụ, kangi bo Jakobụ ịkusōka ịtolo mụmo āli ngwịse, po papo unkulu Esabu alinkwịsa ukufụma kuno ābūkịle kukufwima. 31Jōpe ātendekị̄sye ifyakulya ifịnụnụ alinkuntwalila ugwịse alinkuti: Gwe tāta, sụmụka ulyemo inyama iji ne mwanāko ngutwalị̄le, ukuti ūsaje une. 32Umwene ugwịse alinkunndālūsya alinkuti: Gwanị ugwe? Esabu alinkwamụla alinkuti: Jo une Esabu, ne mwanāko gwa kipānda. 33Po papo Ịsịhaka alinkutetema, alinkuja nulutēnde fị̄jo, alinkuti: Jwanị uju ābūkịle nkufwima uju andwalịle inyama une? Buno ndị̄le lululu ịtolo bo ukāli ukwịsa ugwe. Jo nu mpēle ulusajo kangi ịsakujaga nsajịgwa bwịla ịtolo. 34Bo Esabu apilị̄ke amasyu ga gwịse alinkukụ̄ta īngụ̄to īngulūmba fị̄jo, īmbela busụlụmanịe fị̄jo, alinkummbūla ugwịse alinkuti: Gwe tāta ulīsajaga nanị̄ne, mbelịle. 35Umwene Ịsịhaka alinkuti: Kēta Unnụgụnago ịsịle papapa ēndịle nukūsyoba une, po papo ēgịle ulusajo lwako. 36Umwene Esabu alinkuti: Ngīmba mụkaja momụmo, mụno jijīlịle īngamụ jāke ukuja jo Jakobụ? Namanga ịjịngị̄sye mbujo bwangu kabili. Mbwandilo āpokịle ubwakipānda bwangu kangi lilino apokịle ulusajo lwangu. Po papo Esabu alinkunndālūsya ugwịse alinkuti: Gwe tāta ukāsyakisyapo nalumo ulusajo une? 37Ịsịhaka alinkummwamụla Esabu alinkuti: Kēta nummwimịke ukuja jo malafyale gwako, na bā myabo bōpe numpēle ukuti bajege bākummbōmbela jūjo; nunsajịle ukuti ajege ni fyakulya fị̄ngị kangi nu bwalwa bwa māfị̄lu, po lelo ngupege fịkị ugwe mwanāngu? 38Esabu alinkwendelela ukupyelesya kugwịse alinkuti: Gwe tāta, ngīmba gwali nulusajo lumolwene ịtolo, ulīsajaga na nị̄ne tāta? Po papo Esabu alinkukụ̄ta fị̄jo.

39Ịsịhaka ugwịse alinkummwamụla alinkuti:

Kwịsakupōndwaga ikị̄su ukuja bujo bwako,

kwịsa kupōndwaga ni ndūngwa iji jikufụma kumwanya.

40Fyosa ifyakukutūla kwịsakufyagilaga nkulwa ubwịte,

kwisakummbōmbelaga unnụgụnago.

Lolị linga kị̄sịle ikyinja ikya kunsāmbukila kwịsakwịjābulaga kūngoje syake isị akupịnyịle ugwe.

41Esabu alinkunkalalila Jakobụ unnụgụna panōngwa ja lusajo ulu ugwịse ālimpēle, po papo alinkwịnogona mụndụmbụla jāke alinkuti: Akabalilo kākufwila tāta kasegelị̄le, bo kakīndịle, po lelo nịsakunngoga unnụgụna gwangu Jakobụ. 42Lolị Lebeka alinkusịpilika isị Esabu ātendekị̄sye mụndụmbụla jāke, po papo alinkummbilikila umwanāke Jakobụ, alinkummbūla alinkuti: Unkulugo Esabu ikukufị̄nga ịkulōnda ukukugoga ugwe. 43Lilino lelo mwanāngu ubagīle ukubōmba isị nịkuja pakukubūla, sụmụkaga, ujōngege, ubūkege kwa Labanị ulị̄lūmbu gwangu nkị̄su kya Halanị. 44Ukị̄tūgalege kuko ukufịka papo ubukalale bwake bwisakupūjūkilaga, bo īndụmbụla jāke jitịkwịnogonelako kuli isị gwalimmbōmbị̄le, 45po nịsakukutumilaga ị̄ndumị ijakuti: Gwịsege. Bo ilyojo lya nkulugo limalị̄ke. Jijege nōngwa ja fịkị ijakutị mụfwege mwesa mwe babili mwe banāngu mwịsịku limolyene?

46Po papo Lebeka alinkwịbụnēsya, alinkummbūla Ịsịhaka alinkuti: Ngị̄kyela nabo abakasị ba Esabu abākikolo kya ba Hịtị iki, linga jōpe Jakobụ ịkuti nēgege jumo mụli bababa, po kwali kunụnụ ukusịta kujako kubūmị une.

Currently Selected:

Ubwandilo 27: NYB96

Highlight

Copy