Ubwandilo 24
24
Unkasị gwa Ịsịhaka
1Lelo Abụlahamụ ākāngēle, āgonịle fị̄jo, UNTWA ālinsajịle mụnjila syosa. 2Po papo Abụlahamụ alinkujoba kummbōmbi gwake unkulūmba, uju ālimweneleli gwa fyosa ifi āli nafyo alinkuti: Ubīke ikiboko kyako mụndapatapa syangu. 3Ufị̄nge ulufị̄ngo nkyenị mụ NTWA Kyala ugwa kumwanya na pāsi apa ukuti: Utịsakummwegela umwanāngu unkị̄kulu ukufụma mbakị̄kulu ba nkị̄su kya Bakanānị mụno. 4Lolị, kwịsakubūkaga ku kị̄su kya bātāta kubakamụ bāngu, ko kwakummwegelaga unkị̄kulu umwanāngu Ịsịhaka. 5Po papo ummbōmbị gwake alinkummwamụla alinkuti: Bule, linga unkị̄kulu ajịlekukāna ukwịsa na nịne ku kị̄su iki, bule nịsembūkege nu mwanāko ku kị̄su kila kila gwafụmịleko? 6Umwene Abụlahamụ alinkwamụla alinkuti: Ungịsakusụlwa ukuntwala umwana ku kị̄su kila. 7UNTWA Kyala gwa kumwanya, uju ālīnyēgịle une ukufụma nnyụ̄mba ja tāta na nkị̄su iki nāpāpị̄gwemo, uju āfị̄ngịle ulufị̄ngo na nịne ātịle, nịsakubapaga aba nndujụ̄ngụ lwako ikị̄su iki, jo ịsakukutumilaga ugwandumị gwake ugwa kukūlōngolela ugwe nkyenị, po lelo buno buno kwa kummwegela unkị̄kulu umwanāngu ukufụma kula kula. 8Loli linga unkị̄kulu atịsakwịtika ukwịsa na nụngwe kuno, bo uli mwabuke ku lufị̄ngo lwangu ulu, umwene umwanāngu jo ungịsakuntwalaga kula. 9Po papo ummbōmbi jula alinkunkola Abụlahamụ umalafyale gwake pa ndapatapa alinkwenda nu kujīga kumyake bo mụmo ālịmmbūlị̄le.
10Po papo lelo ummbōmbị gwa Abụlahamụ alinkusụmụka ukubūka, alinkwegapo ingamịla sya malafyale gwake kalōngo, kangi ni fya bupe fị fị̄ngị ịtolo ukufụma ku malafyale gwake. Po papo alinkubūka ku kị̄su kya Mesopotamịja, nkāja ka Naholị. 11Lelo bo ajịlekufịka nkabalilo kā namajolo aka abakị̄kulu bikunegela amīsi, po papo alinkusyimika ingamịla ukuti sitūsye pa bupị̄pị ni kisịba, pa butalịpo na kāja kala. 12Po papo alinkwịpụ̄ta alinkuti: Gwe NTWA, gwe Kyala gwa Malafyale gwangu Abụlahamụ, nịkukusūma ukuti unyīmile umūsyugu, ulijaga niịpyana kumalafyale gwangu Abụlahamụ. 13Kēta nīmịle pakisiba iki, apa abalindwana ba nkāja aka bịkwịsaga kukunega amīsi. 14Linga ngujoba nagwe jumo unndindwana ukuti: Oko, nnwepo gamo amīsi mụ ndeko jāko lelo umwene ịse atigi: Ele nwapo kangi nịkusịnwesyaga na sịngamịla syako: ngwịpụ̄ta ajege jo jūjo umpēle umụ̄ndu gwako Ịsịhaka. Mụli sịsịsị mo nịkumanyilaga ukuti kukūmbuka ulufị̄ngo lwako ku malafyale gwangu.
15Lelo bo akāli ịkwịpụ̄ta alinkunyomoka Lebeka ịkwịsa apīmbịle īndeko ja mīsi pakibeja. Umwene Lebeka jo āli mwana gwa Betwelị āli mwisukulu gwa Mịlịka na Naholị unnụgụna gwa Abụlahamụ. 16Lebeka āli nndīndwana unnụnụ fị̄jo kumāso, unsịta kummanyamo nu nnyāmbala, alinkusụlụka nkisịba alinkūnegela amīsi mu ndeko jāke. 17Mbibimbibi ịtolo ummbōmbị gwa Abụlahamụ alinkusegelela kumyake alinkunsūma alinkuti: Ulīmbapo gamo amīsi ga mundeko jāko nnwepo. 18Umwene unndindwana alinkwamụla alinkuti: Ele, isaga malafyale gwangu, po papo mbibimbibi ịtolo alinkwenda nukutūla indeko jāke, alinkujikola mmaboko alikujị̄namịsyapo bo umụ̄ndu ịkunwa. 19Lelo bo anwịle po papo Lebeka alinkuti: Ngusịnegela syope na sị ngamịla syako. Mpaka syope sịnwele. 20Nakalinga ịtolo, Lebeka alinkukūsya amīsi mụno syanwelaga īngamịla, alinkugomokela kangi nkisịba nkunega amīsi agāngi mpaka amalile ukusinwesya syosa. 21Umwene ummbōmbị gwa Abụlahamụ alinkunkēta fị̄jo kimyemye ịtolo, ukuti asimanye linga UNTWA ammwimị̄le pamo mma.
22Umwene bo asịnwesịsye īngamịla amīsi, po papo unnyāmbala jula alinkusakula akakuba ka sahabu alinkunnị̄nga, kangi alinkusakula ni ngēngele sya sahabu ibili alinkumfwika Lebeka mungōngi. 23Po papo alinkunndālūsya alinkuti: Uli mwana gwanị? Bule bulịmo ubugono nnyụ̄mba ja gūso ukuti tukagonemo? 24Umwene unndindwana alinkwamụla alinkuti: Une ndimwana gwa Betwelị, umwịsukulu gwangu unkị̄kulu jo Mịlịka unkasị gwa Naholị. 25Ubugono bulimo nnyūmba ja tāta; kangi alinkuti lilịmo nilị̄su, kangi nifị̄ndu fya ngamịla syako. 26Po papo umụ̄ndu jula alinkufụgama pāsi alinkwịpụ̄ta ku NTWA. 27Alinkuti: Atụfịgwege UNTWA Kyala gwa Malafyale gwangu Abụlahamụ; uju akị̄bwa isị āfị̄ngịle ku malafyale gwangu Abụlahamụ; āndalwịsye nukūfịkisya ku nyụmba ja gwamyabo gwa malafyale gwangu.
28Lelo po papo unndindwana jula alinkubopa ukubūka ku nyụmba ja nna, alinkwakubapāngila syosa isị syabonịke. 29Lebeka āli nịlūmbu uju īngamụ jāke āli jo Labanị. Umwene Labanị jo alinkubopa ukubūka ku kisịba kuno ālịko umụ̄ndu jula. 30Umwene bo akibwene ikikuba ni ngēngele sya mmaboko kangi bo apilị̄ke Lebeka bo ikupānga isya nhēsya jula, bo ịkuti; isị syo isị āmbūlịle umụ̄ndu jula kokuno alinkusegelela ku mūndu jula uju ālyimịle kifụkị ni ngamịla pa kisịba. 31Alinkwakummbūla alinkuti: Gwe nsajịgwa gwa Kyala, tubūke ku kāja, gwimịle fịkị pānja? Buno tutendekị̄sye īnyụ̄mba ja kugonamo ugwe kangi na pabugono ingamịla syako. 32Po papo umụ̄ndu jula alinkwịtika ukwịngila nnyụ̄mba. Lebeka alinkusyabula īngamịla, alinkusịpa ilị̄su kangi alinkusịpa ni fịndu ifịngị, alinkutwala na mīsi ga kusụgụsụla mmalūndi umụ̄ndu jula pamopēne nāba āli nabo. 33Lelo bo bantegelekịsye ifyakulya; umwene alinkubabūla alinkuti: tāsị ndịkulya; njobe tāsị inōngwa isị mbīngilịle kuno, umwene alinkuti: Emwa, oko jobaga.
34Po papo alinkubabūla alinkuti: Une ndi mmbōmbị gwa Abụlahamụ. 35UNTWA ansajịle fị̄jo umalafyale gwangu, mụ̄ndu nalolị, Kyala ampēle imịtị̄mo gya ng'ōsị ni gya ng'ōmbe, ampēle indalama sya fesa nisya sahabu, nababōmbị abanyambala na bakị̄kulu, kangi ni ngamịla ni mbụ̄nda. 36Jope Sāla unkasị ampāpị̄le umalafyale gwangu umwana unndumyana mbukāngale, jo uju Abụlahamụ ampēle fyosa ukuti fịjege mmaboko gāke. 37Lelo umalafyale gwangu nāfịngile nagwe ulufị̄ngo ātịle: Ungịsakummwegelaga umwanāngu unkị̄kulu uju afụmịle mbalīndwana ba nkikolo kya ba Kanānị mụmo njēngile. 38Lolị gwise ubūkege ku bankikolo kya bā tāta, ku bakamụ bāngu, ko ukammwegelege unkị̄kulu umwanāngu. 39Po papo une ndinkujoba ku malafyale gwangu ndinkuti: Bule linga ikwakukāna ukwịsa nanị̄ne kuno? 40Umwene alinkummbūla alinkuti: UNTWA uju ngwenda bwịla nkyenị mmyake, ịsakukutumila ugwandumị gwake, jo isakujisajaga īnjila jāko, ukwakummwegela umwanāngu unkị̄kulu umfụma mbāmyitu, kangi ugwa nkikolo kya bā tāta. 41Po kwịsakujaga mwabuke kulufị̄ngo lwangu, linga ubūkịle kubakamụ bạngu, lelo linga abēne bakānịle ukukupa unkị̄kulu, po ugwe kwịsa kujaga mwabuke kulufị̄ngo lwangu.
42Umụsyugu bo mfikile pa kisịba pala, po ndinkwịpụ̄ta ndinkuti: Gwe NTWA gwe Kyala gwa malafyale gwangu Abụlahamụ, ulīndūla ukuti injila jāngu iji jinoge. 43Kēta nīmịle pakisịba kya mīsi apa; oko, lelo linga unndīndwana jumo ịkwịsa kukunega amīsi nu nnsūmege ukuti: Nnwepo gamo amīsi mụndeko jāko; po lelo linga umwene ịkuti, 44nwapo, syope na sị ngamịla syako nikusinegelaga; nikwịpụ̄ta ukuti ajege jo nkị̄kulu uju umpēle umwana gwa malafyale gwangu.
45Lelo bo ngāli nukumalisya ukwịpụ̄ta mụ ndụmbụla jāngu, ndinkunyomoka Lebeka ịkusōka nkāja ịkwịsa kukunega amīsi, āli ni ndeko jāke pakibeja; bo asụlwịke nkisịba anegịle amīsi, po papo ndinkunsūma ndinkuti: Ulīmbapo gamo amīsi nnwemo. 46Mbibimbibi ịtolo alinkutūla īndeko jāke alinkuti: Ele nwapo, syope ni ngamịla syako nịkusịnwesyaga, po papo ndinkunwa syope ni ngamịla sịlinkunwela. 47Ndinkunndālūsya unndindwana ndinkuti: Uli mwana gwanị? Umwene alinkwamụla alinkuti: Ndi mwana gwa Betwelị, unnya Naholị, uju Mịlịka āli mpapị̄le, po papo ndinkwenda nukumfwika ikikuba pa mbụlo ni ngēngele mmaboko. 48Ndinkufụgama pāsi ndinkwịpụ̄ta ku NTWA ndinkumpāla UNTWA Kyala gwa malafyale gwangu Abụlahamụ, uju angolokị̄sye injila ukuti nịsenummwage unkị̄kulu ujụ afụmịle mbakamụ ba malafyale gwangu; ukuti jo ajege nkasị gwa mwanāke. 49Bo amalịle ukubabūla syosa sịsịsị po alinkujoba nabo alinkuti: Lilino lelo linga mụgāmbilị̄le amasyu ga malafyale gwangu nkīsa kyinụ na mbwanalolị bwinụ, po mụ̄mbūlege, pōpe linga mụtịkugāmbilila mụ̄mbūle, kokuti nị̄pūlege kubūngi.
50Po papo Labanị na Betwelị balinkummwamụla ummbōmbị gwa Abụlahamụ balinkuti: inōngwa isị sịfụmịle ku NTWA; buno buno tukabagila ukujobapo sịmo kumyako, isya kukāna pamo ukwịtika. 51Lebeka uju alịpo būkaga nagwe akajege nkasị gwa mwana gwa Malafyale gwako bo mụmo ajobị̄le UNTWA.
52Umwene lelo ummbōmbị gwa Abụlahamụ bo apilị̄ke amasyu gagaga, po papo alinkugwa ulupị nkyenị mụ NTWA. 53Alinkusakula īnyāmbo sya fesa ni sya sahabu ni myenda fyo alinkumpapo Lebeka; umwene ulị̄lūmbu nu nna bo alinkubapa ifyabupe ifya ntēngo gwa pamwanya. 54Po papo umwene pamopēne naba āli nabo balinkuti nukulya ifị̄ndu fịla nu kunwa, balinkugona pāpo. Lelo bo balēmbwịke nulubūnju alinkubabūla alinkuti: Lilino nsụmwịke ku malafyale gwangu. 55Ulị̄lumbu gwa nndindwana pamopēne nu nna balinkummbūla balinkuti: Uleke tāsị unndīndwana agonepo unndūngu gumo pamo amasịku kalōngo, po lelo gwịse ubūkege nagwe bule? 56Lolị umwene alinkwamụla alinkuti: Mma, mụngāngābisyaga ibanya, buno UNTWA ajisajịle injila jāngu, ngubasūma ukuti mbūkege ku malafyale gwangu. 57Abēne balinkuti: Oko tummbilikile unndindwana tupilike isị ali nasyo. 58Balinkummbilikila Lebeka, balinkunndalūsya balinkuti: Gwịganịle ukubūka nu mụ̄ndu uju? Umwene Lebeka alinkwamụla alinkuti: Ena, nịganịle ngubūkaga nagwe. 59Po papo lelo balinkunsụmụsya Lebeka, balinkunsụmụsya nu ntūlị gwake unndindwana balinkubūka nu mmbōmbị gwa Abụlahamụ pamopēne na bāndu aba āli nabo. 60Balinkunsaja Lebeka balinkuti: Gwe ịlūmbu gwitu ubūkege ukīpelege ukuja nna gwa bāndu ba elufụ bābị̄ngị ịtolo, aba nndujụ̄ngụ lwako bịsebabalambikege abalugu bābo. 61Buno buno lelo Lebeka pamopēne na batūlị bāke abakị̄kulu balinkusụmụka ukubūka, balinkwakwịtoga pa ngamịla nu kunkonga umụ̄ndu jula. Umwene ummbombị gwa Abụlahamụ jula alinkummwega Lebeka, alinkusụmụka ukubūka.
62Pakabalilo kala kala Ịsịhaka afịkaga ịtolo ukufụma ku Beli-labai-loi, alinkwịtūgala kulubafụ lwa kwịtongo. 63Lelo Ịsịhaka bo ali mụnngūnda na majolo, bo ịkukēta alinkunyomoka īngamịla sịkwịsa pabutalịpo. 64Jope Lebeka bo ịkuti ngēte alinkummbona Ịsịhaka, nakalinga ịtolo alinkwịka pa ngamịla. 65Alinkunndālūsya ummbōmbị jula alinkuti: Jwanị umụ̄ndu jula ịkwenda mmịgūnda, ịkwịsa pakwaganịla nanụswe? Umwene ummbōmbị gwa Abụlahamụ alinkuti: Jo malafyale gwangu. Po papo Lebeka alinkwega umwenda gwake alinkwịkị̄nga. 66Po papo ummbōmbị jula alinkumpāngila Ịsịhaka syosa isị āsịbōmbịle. 67Po papo lelo Ịsịhaka alinkummwịngisya Lebeka mu hēma iji jāli ja Sāla unna, alinkuja nkasị. Ịsịhaka ālinnganịle fịjo Lebeka, buno buno āja jo nsubisi gwake mbufwile bwa nna.
Currently Selected:
Ubwandilo 24: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.
