Ubwandilo 23

Ubufwe bwa Sala na Abụlahamụ nukūla ubujo bwa kusyilapo

1Umwene Sāla bo agonịle ifyinja imịa jimo na malōngo mabili, nifyinja fihāno na fịbili (127), 2alinkufwila mu Kilyatialaba mụ Hebulonị nkị̄su kya Kanānị. Abụlahamụ alinkunndilila Sāla īfwa īngulūmba. 3Po papo Abụlahamụ alinkusụmụka ukufụma apa umfị̄mba gwalipo alinkwakujoba na Bahịtị alinkuti: 4Une ndinhēsya kangi njēngịlemo ịtolo mmyinụ mụno, lolị ngaja nabo ubujo bwakunsyilapo unkasị gwangu, ubwakusyiligwapo uswe. 5Po papo Abahịtị balinkummwamụla Abụlahamụ balinkuti: 6Gwe Malafyale pilikisya kumyitu, ugwe uli mụ̄ndu gwa Kyala, kangi gwimikị̄gwe fị̄jo mmyitu mụno. Usalege ịtolo ubujo ubu ubuganịle mmapūmba gītu, mo ukagusyilege umfị̄mba gwako, akajapo najumo nkati mmyitu uju abagị̄le ukukukānịsya ugwe ukugusyilamo umfị̄mba gwako. 7Po papo Abụlahamụ alinkusụmụka alinkugwa ulupị nkyenị mmbankikolo kya Bahịtị abenekị̄su. 8Alinkupyelesya kumyabo alinkuti: Linga mwịtị̄ke nalolị ukūmbapo ubujo bwakuti nsyilepo umfị̄mba gwangu gusōkemo nkyenị mmyangu mụmbilikisye lelo: Nātigi mụmbyelekesye kwa Efuloni unnya Sohalị. 9Ukuti āmbepo imbako jāke iji jili pa Makipela, iji jili kubumalīkisyo bwa nngūnda gwake. Anyūlikisyege pa ntēngo ugu apimịle bo nanụmwe mụkukēta nu kupilika, kokuti bujege bujo bwangu bwakusyilanapo. 10Umwene Efuloni ālịpo pala pala nkati mbākikolo kya ba Hịtị; po papo alinkummwamụla Abụlahamụ bo bikupilika abanịne na bāngi bōsa aba bābūngēne pakipata kya kāja kāke, alinkuti: 11Gwe Malafyale pilikisya kumyangu, ngupēle unngūnda pamopēne na ji mbako iji jilịmo mụmo. Nịkukupa bo bikupilika bōsa abā nkikolo kyangu; ukagusyile mụmo umfị̄mba gwako. 12Po papo Abụlahamụ alinkugụ̄ndama pāsi nkyenị mbāndu bōsa abenekị̄su. 13Alinkunsūma Efuloni bo bikupilika bōsa alinkuti: Linga gwịtị̄ke nalolị, ulīmbūlaga ukuti ngupege indalama sịsyo sịfwene nu ntēngo gwa nngūnda. Gwambilile īndalama po nngusyilege umfị̄mba gwangu. 14Umwene Efuloni alinkummwamụla Abụlahamụ alinkuti: 15Malafyale gwangu, ikị̄su kila untēngo gwake guli īndalama sya fesa bāmịa bana (400), lelo sya fịkị sịlịpo ugwe na nịne? Būkaga ịtolo kagusyile umfịmba gwako. 16Po papo Abụlahamụ alinkwịtika alinkumpimila Efuloni ubusito bwa ndalama sya fesa isị Efuloni āpimịle bamịa bana (400), syo alinkumpa nkyenị mbāndu bōsa abenekị̄su ukukōngana nubusịto bwa fịpimo ifị bāpimilaga abāndu ba nkị̄su.

17Buno buno unngūnda gwa Efuloni ugu gwali mụ Makipela kubusōkelo ilịsuba ku Mamule, alinkupēgịgwa Abụlahamụ, alinkupēgwa unngūnda na ji mbako iji jālịmo kangi ni mịpịkị gyosa igi gyalịmo. 18Filinkwipela ukuja fyake Abụlahamụ bo bịkukēta bōsa Abahịtị aba bālịpo bo babūngēne nkāja kala. 19Panyụma pali sịsịsị po alinkunsyila Sala unkasị mụ mbako iji jāli mu nngūnda gwa Makipela ukulabila ku Mamule, ku Hebulonị nkị̄su kya mu Kanānị. 20Unngūnda pamopēne na ji mbako iji jālịmo aba Hịtị balinkumpa Abụlahamụ ukuja bujo bwake bwa kusyilamo.

Currently Selected:

Ubwandilo 23: NYB96

Highlight

Copy