Ubwandilo 16

Hagali na Isịmailị

1Salai unkasị gwa Abụlamụ akālimpāpị̄lemo umwana. Lolị Salai āli nu mmbōmbị gwake unkị̄kulu, ugwa kikolo kya Begịpịtị uju īngamụ jāke āli jo Hagali. 2Po papo Salai; alinkummbūla Abụlamụ alinkuti: Kēta UNTWA āmbịnyịle ubupāpị, po gwege ummbōmbị gwangu uju ajege nkasịgo; pamo mo mbagị̄le ukukabilamo abāna mmyake. Umwene Abụlamụ alinkugị̄tika amasyu ga Salai. 3Umwene Salai unkasị gwa Abụlamụ alinkummwega Hagali ummbōmbị gwake Umwegịpịtị, bo Abụlamụ agonịle ifyinja kalōngo mụ Kanānị, alinkumpa Abụlamụ unndume, ukuti ajege nkasị. 4Bo Abụlamụ ammwegịle Hagali ukuja nkasị, po papo Hagali alinkuja ni kifụba. Bo Hagali ị̄bwene ukuti ali ni kifụba alinkwanda ukummbōmbela amatị̄ngo Salai. 5Po papo Salai alinkummbūla Abụlamụ alinkuti: Ububị̄bị ubu būnyāgịle bukugomokelege jujugwe, ngupēle ummbōmbị gwangu ukuti ajege nkasịgo, umwene bo āgịle ukuti ali nikifụba, une ambelịle ukuja kāndu ka ịtolo kumyake. Umwene UNTWA jo ajege nndōngị gwitu na nụngwe na nịne. 6Abụlamụ alinkummwamụla Salai alinkuti: Kēta ummbōmbị gwako ali mmaboko gāko; ummbōmbelege isị gwịganịle ugwe. Po Salai ālyandịle ukuntāmya, Hagali alinkujōnga alinkusōkapo.

7Ugwandumị gwa malafyale alinkummwaga Hagali pa nyị̄buko ja mīsi ndungalāngala, īnyị̄buko iji jili mụnjila ija kubūkila ku Syulị. 8Umwene alinkunndālūsya alinkuti: Gwe Hagali, gwe mmbōmbị gwa Salai ufụmịle kūgu? Kutwaku? Umwene Hagali, alinkuti: Nummbopịle jūba gwangu Salai. 9Po papo ugwandumị gwa malafyale alinkummbūla alinkuti: Gomokelaga ku kwa Salai ukījị̄syege kumyake. 10Po papo ugwandumị gwa Malafyale alinkwandisya alinkummbūla alinkuti: Nalolị nịsakubāsyaga aba nndujụ̄ngụ lwako, bịsakuja bị̄ngị, najumo atịsakumanyaga ukubabala. 11Kangi ugwandumị gwa malafyale alinkummbūla Hagali alinkuti: Lilino uli nikufụba; kwịsakumpāpaga umwana unndumyana: uju kwịsakumpaga ingamụ ja Isịmailị pāpo UNTWA apilị̄ke ingụ̄to ja kutamịgwa kwako. 12Umwanịke jujuju ịsakujaga bo imbụ̄nda ja mmatēngele, ịsakujaga nndugu gwa bāndu bōsa, kangi abāndu bōsa bịsakulwaga nagwe; mbūmị bwake bōsa ịsakukīndanaga na bakamụ bāke bōsa. 13Buno buno alinkujilūmba ingamụ ja NTWA uju ājobịle nagwe, alinkuti: Jo ugwe gwe Kyala uju ịkukēta, namanga alinkuti: Nalolị nummbwene Kyala pōpe ngāli nndi mūmị napapo nummbwene? 14Kokuno inyị̄buko iji jilinkukōlelịgwa ijā Beli-lahai-loi. (Ko kuti inyị̄buko ja mūmị uju ịkūngēta) īnyị̄buko jijiji jili pakati pa kị̄su kya Kandesị ni kya Belendi.

15Po papo Hagali alinkummpāpila Abụlamụ umwana unndumyana; umwene Abụlamụ alinkumpa ingamụ ja Isịmailị, umwanāke uju Hagali ālimpāpịle. 16Abụlamụ ali nifyinja amalōngo lwele na ntandatu (86) akabalilo kala kala Hagali ampāpilege Isịmailị.

Currently Selected:

Ubwandilo 16: NYB96

Highlight

Copy