Ubwandilo 15

Kyala ịkufị̄nga ulufị̄ngo na Abụlamụ

1Bo sịkīndịle sịsịsị po ilịsyu lya Kyala lilinkummwịsila mụnjosị Abụlamụ lilinkuti: Gwe Abụlamụ, ungatị̄laga, une nndi ngulu jāko, ifị nịkukupaga ugwe fịkujaga fị̄ngị ịtolo. 2Po papo Abụlamụ alinkujoba alinkuti: Gwe Ntwa gwangu Kyala, kūmbaga fịkị une, ifyinja fịkīndịle ne nsịtakuja nu mwana najumo ugwa pakilīngo, ugwa kūnyị̄ngilapo jo ju mmbōmbị gwangu Elịjeselị ugwa nkị̄su kya Ndamasịka? 3Abụlamụ alinkōngelapo ukujoba alinkuti: Ukāmbapo umwana najumo, ju ntumwa uju āpāpilị̄gwe nnyụ̄mba jāngu jo isakujaga gwa pakilīngo kyangu. 4Po papo lelo ilịsyu lya NTWA lilinkummwịsila lilinkuti Umụ̄ndu ujo jo atịsakukwịngilapo pakilīngo kyako: Lolị umwana uju kwịsakumpāpaga jujugwe jo ịsakukwịngilapo. 5Po papo UNTWA alinkusōka pānja na Abụlamụ alinkuti: Kēta kumwanya, bala īndōndwa, linga ubagị̄le ukusịbala. Po papo alinkummbūla alinkuti: Mo mụno bịsakujilaga ubwịngị aba nndujụ̄ngụ lwako. 6Umwene alinkummwịtika UNTWA. Buno buno UNTWA alinkunnjoba ubugolofụ Abụlamụ.

7Po papo UNTWA alinkummbūla Abụlamụ alinkuti: Jo une ne NTWA; ne ngutwele kuno ukufụma ku: Ulu, nkị̄su kya ba Kalitai, joune ne ngupēle ikị̄su iki ukuja kyako. 8Umwene Abụlamụ alinkuti: Gwe NTWA Kyala, kali ngusịmanyaga bule bule ukuti nịsakukikabaga ikị̄su iki? 9Po papo UNTWA alinkummbūla alinkuti: Undwalile īngwata īndama ija fyinja fịtatu ni ngūnde, ni ngungubija indụbwa. 10Umwene Abụlamụ alinkuntwalila Kyala fyosa fịfịfị alinkufịbụtanịa pabili alinkufịkatịsanịa ifịpị̄mba fịlinkubūngāna fịbili fịbili mụngīndi ịbili: lolị injunị syo alinkusị̄ta nukusịbụtanịa pabili. 11Bo imịnōmbo gịsịle pa nyama Abụlamụ alinkugikaga.

12Lelo bo ilịsuba likujōnga, utulo utwịngị tulinkunkola Abụlamụ; lelo po papo ulutēnde lwa ngị̄sị lulinkummwaga. 13Umwene UNTWA alinkummbūla Abụlamụ alinkuti: Syo usyaganịege mbwanalolị isya kuti abanndujụ̄ngụ lwako bịsakujaga baponị nkị̄su iki kikaja kyabo; kangi bịsakujaga batumwa mụmo, bịsakwangalilịgwaga mụla mụla ifyinja bāmịa bana (400). 14Lolị nịsakukilōngaga ikikolo iki bịkukibōmbela, pānyụma bịsakusōkaga nifyuma fyabo ifị̄ngị. 15Lolị ugwe kwịsakubūkaga kubāgūso nulutēngāno, kwịsakusyilịgwaga mbukāngale ubunụnụ. 16Abēne aba nkikolo kyako abā mụngulilo ja buna, bịsakugomokelaga kuno kuno, namanga ububị̄bị bwa Bāmoli bukāli bukafịkapo pabubafụ̄ndilo.

17Bo ilịsuba lijōngịle, ni ngị̄sị jigwịle po papo lilinkuboneka ilyosị ili lyafụmaga nkigemo, iki kyakaga īndapi sya mōto, go gulinkukīsanịa pakati pa fịtụlị fya nyama. 18Mwịsịku lilyo UNTWA alinkufị̄nga na Abụlamụ alinkuti: Ikị̄su iki kyo mmbapele, aba nndujụ̄ngụ lwako, ukufụma ndwisi lwa nkị̄su kya Egịpịtị ukwakufịka ndwisi ulukulūmba ulwa Fụlatị, 19pamopēne ni kị̄su kya Bakenị, ni kya Bakenisị, ni kya ba Kandimonị, 20ni kya Bahati, ni kya Bapelesị, nikya Balefai, 21ni kya Bāmoli, nikya Bakanānị ni kya Bagịligasị, nikya Bajebusị.

Currently Selected:

Ubwandilo 15: NYB96

Highlight

Copy