Malɨka 3

ɄYesu ɨkʉnsosia ʉmuunhu ɨkɨghono ɨkya Sabati

(Mataayi 12:9-14; Lʉʉka 6:6-11)

1Ɨkɨghono ɨkɨngɨ, ʉYesu akingila kange mʉ sinagogi, mula mwealyale ʉmuunhu jʉmonga ʉnya lʉvoko lʉno lʉfwile. 2AVafalisayi voope mwevalyale mʉ sinagogi jɨla, vakamwʉvɨlagha kuuti, nave kyaɨkʉnsosia ʉmuunhu jʉla mʉ kɨghono ɨkya Sabati, vantwale pa vʉhɨghi.

3ɄYesu akamʼbʉʉla ʉnya lʉvoko lʉno lʉfwile akati, “Ɨma pakate apa.” 4Pe akavaposia aVafalisayi akati, “Asi, lʉlɨku lʉno lʉnoghiile mʉ kɨghono ɨkya Sabati! Kuvomba inofu nambe kuvomba imbiivi? Kupoka ʉvwʉmi nambe kubuda?” Aveene navakamʉla kɨmonga. 5ɄYesu akavalola nɨ ngʼhalaasi, kange akasukunala, ʉlwakʉva valyale vasiiti kukwɨtɨka. Akamʼbʉʉla ʉmuunhu jʉla akati, “Gholosia ʉlʉvoko lwako.” Ʉmuunhu jʉla akagholosia, ʉlʉvoko lwake lʉkasooka. 6Neke aVafalisayi ye valʉvwene ʉluo, vakahʉma kʉnji, pe vakava vipʉlɨngʼhana na vavɨngɨlɨli va ntwa ʉHelode,#3:6 Vavɨngɨlɨli va ntwa ʉHelode: Kyale kɨpʉgha kya Vayahudi vano vakatangagha ʉvʉtwa ʉvwa Kɨlooma, kange vaale vamanyaani va ntwa ʉHelode ʉAntipa. Avaanhu ava navalyale vʉmanyaani na Vafalisayi, ʉlwene valyakongʼhanile palɨkɨmo na Vafalisayi mʉ mhola ɨja kʉmʼbuda ʉYesu. Ɨmhola ɨja ntwa ʉHelode ɨmba ɨlɨsio Helode kʉ Vʉghanʉle vwa Masio aMahesia. vʉle kyavikʉmʼbuda ʉYesu.

ɄYesu nɨ lɨpʉgha lya vaanhu mʉlʉbale mʉ lɨsʉmbe

7ɄYesu na vavʉlanɨsɨvua vaake vakavʉʉka vilʉta kʉ lɨsʉmbe. Ɨlɨpʉgha lya vaanhu lɨkalʉta kwa mwene. Avaanhu avuo valyahʉmile imbale sooni isa Galilaya ni sa kʉ Yudea, ifikaaja ifya pa vʉpiipi ni fya kʉ vʉtali: 8kʉ Yelusalemu, kʉ Idumea, ɨmwambo ɨja Yolidani, ni mbale isa kʉ Tiilo na kʉ Sidoni. Avaanhu vala vakalʉta kwa Yesu, ʉlwakʉva valyapʉliike imhola isa mbombo sino avombile. 9ɄYesu akavavʉʉla avavʉlanɨsɨvua vaake kuuti, vavesie ɨngalava, neke avaanhu vangatengʉle pikʉmpita, mwe ikale. 10Ʉlwakʉva ʉYesu alyasosisie vinga, avatamu avange vooni vakapipitagha kuuti vamwabasie, neke vasooke. 11Nava vaanhu vano vaale na mapepo amalamafu, pooni pano vakamwaghagha ʉYesu, vakaghwisagha pa maghʉlʉ ghaake, amapepo ghakakolagha ghakatisagha, “Ʉve veeve Mwana ghwa Ngʉlʉve!” 12Neke ʉYesu akaghadalɨkɨla kuuti naghangampʉlɨsyaghe kʉ vaanhu.

ɄYesu isalʉla avavʉlanɨsɨvua kɨjigho na vavɨlɨ

(Mataayi 10:1-4; Lʉʉka 6:12-16)

13ɄYesu akatogha pa kɨdunda, pala akavakemeela vano alighanile ʉmwene, vakalʉta kwa mwene. 14Akavasalʉla avaanhu kɨjigho na vavɨlɨ, vano akavatambʉla vasungʼhua,#3:14 Vano akavatambʉla vasungʼhua: Mʉ malembe ghamonga amasio agha namweghale. vavɨngɨsaniaghe nʉ mwene, avasuungʼhe kupʉlɨsia, 15kange avapeele ʉvʉtavʉlɨlua ʉvwa kʉdaga amapepo. 16Avaanhu kɨjigho na vavɨlɨ vano ʉYesu alyavasalwile ve ava: ʉSimoni jʉno ʉYesu akampeela ɨlɨtavua ɨlɨngɨ avisaghe ghwe Peteli, 17avakina Sebedaayi ʉYakovo nʉ Yohani ʉnnuuna, avuo ʉYesu akavapeela ɨlɨtavua ɨlɨ Boanelige, kwekʉti vaana va lʉgulumo, 18ʉNdeleeya, ʉFilipo, ʉBatolomaayo, ʉMataayi, ʉTomasi, ʉYakovo ʉnkina Alufaayo, ʉTadaayo, ʉSimoni ʉNkananayo,#3:18 ɄNkananayo: Kwekʉti ʉmuunhu ʉnya vʉvafi nɨ ɨɨsi jaake. ɄSimoni ʉjʉ alyale na matavua ghavɨlɨ, ɨlɨngɨ ghwe Simoni Nselote. Amatavua agha ʉmʉlʉvo ghwake ghwe ghʉmo (Lʉʉka 6:15; Mbombo sa Vasungʼhua 1:13). 19nʉ Yuuda Isikalioti jʉno alyamwohiile ʉYesu.

ɄYesu nʉ Belisebuli

(Mataayi 12:22-32; Lʉʉka 11:14-23; 12:10)

20Pambele ʉYesu akagomoka kʉ kaaja, avaanhu vinga vakakongʼhaana kange. ɄYesu na vavʉlanɨsɨvua vaake vakakunua naghʉ nsiki ʉghwa kʉlia, ʉlwakʉva avaanhu valyamemile kyongo. 21Ʉngʼina na vanine va Yesu ye vapʉliike imhola isio, vakalʉta kʉkʉntoola, ʉlwakʉva vakasaghagha kuuti ahasɨngʼhiine ʉlʉhala. 22Voope avavʉlanɨsi va ndaghɨlo kuhʉma kʉ Yelusalemu vakatisagha, “ɄYesu alɨ nɨ lɨpepo ɨlɨ Belisebuli,#3:22 Belisebuli: Ɨlɨ lɨtavua lya Setano, ʉmʼbaha ghwa mapepo ghooni. ɨlɨvaha lya mapepo. Ɨlɨpepo ɨlio lye lɨno lɨkʉmpeela ingʉfu isa kʉdaga amapepo.”

23ɄYesu akavakemeela avaanhu vala, akajova navo mʉ kɨhwanɨkɨsio akati, “Ndepoonu ʉSetano idaga ʉSetano? 24Nave avaanhu va vʉtwa vʉmo vagalʉngʼhane, ʉvʉtwa ʉvuo vunangɨka. 25Nava vaanhu va mʉ nyumba jɨmo vangagalʉngʼhane, ɨnyumba ɨjio jinangɨka na kupalasana. 26Navʉ vʉtwa vwa Setano vʉngagalʉngʼhane, navʉngɨɨme, neke ʉvuo vuuva vwe vʉsililo vwake. 27Ʉvwakyangʼhaani vwe ʉvʉ, ʉmuunhu ghweni naangingile mʉ nyumba ja muunhu ʉnya ngʉfu kughoma ifiinu fyake, looli taasi ankole ʉnya nyumba ankʉnge, neke aghome ifiinu fyake fyoni.”

28Akavavʉʉla avaanhu vala akati, “Kyangʼhaani nɨkʉvavʉʉla, ʉNgʉlʉve alavasaghɨla avaanhu inyɨvi saave na maligho ghaave ghooni. 29Looli ʉmuunhu jʉno ɨkʉmʉligha ʉMhepo ʉMwɨmɨke, ʉjuo ʉNgʉlʉve naalansaghɨla lʉsiku. Ʉjuo iiva nʉ nkole ʉghwa kʉvʉsila kʉsila.” 30ɄYesu akajova ʉluo, ʉlwakʉva valyatiile alɨ nɨ lɨpepo ɨlɨlamafu, pano akavombagha ɨmbombo ɨnyɨmɨke.

Avanyalʉkolo ava kyangʼhaani ava Yesu

(Mataayi 12:46-50; Lʉʉka 8:19-21)

31Ʉngʼina na vanine va Yesu vakafika pa nyumba jɨno mwealyale ʉYesu, vakɨɨma panji, neke vakansuungʼha ʉmuunhu kʉkʉnkemeela ʉYesu. 32Ʉmuo mwekyale ɨkɨpʉgha ɨkya vaanhu vansyʉngʉtiile, vikalile vikʉmpʉlɨkɨsia. Vamo vakamʼbʉʉla#3:32 Vamo vakamʼbʉʉla: Luvoneka vano valyamʼbʉlile ʉYesu valyale ve vavʉlanɨsi va ndaghɨlo. ʉYesu vakati, “Ghwe Yesu, ʉmama ghwako na vanunaavo valɨ panji vikʉkʉlonda.” 33ɄYesu akavamʉla akati, “Ʉmama na vanuuna vango, ve vaveeni?” 34Akavasyetʉkɨla avaanhu vano vansyʉngʉtiile akati, “Lolagha, avaanhu vooni ava ghwe mama na vanunavango. 35Ʉmuunhu jʉno ivomba isa vughane vwa Ngʉlʉve, ʉjuo ghwe nnunavango, lʉmbʉlyango, ghwe mama ghwango.”

Currently Selected:

Malɨka 3: wbi

Highlight

Copy