Malɨka 4

Ɨkɨhwanɨkɨsio ɨkya nkesa mbeju

(Mataayi 13:1-9; Lʉʉka 8:4-8)

1ɄYesu akatengʉla kuvʉlanɨsia kange palʉbale pa lɨsʉmbe. Avaanhu vinga amapʉgha na mapʉgha vakakongʼhaana pa mwene, kuhanga akalamʉla pikwingila mʉ ngalava akikala, avaanhu vala vakajigha kʉnji kʉ lɨsʉmbe. 2Akavavʉlanɨsia si nyinga mʉ fihwanɨkɨsio. Mʉ mbʉlanɨsio saake akati,

3“Pʉlɨkɨsia ɨkɨhwanɨkɨsio ɨkɨ! Ʉnkesa mbeju jʉmonga alyalʉtile kukesa ɨmbeju. 4Ye ikesa ɨmbeju, jɨmonga jɨkaghua pa sɨla, injuni sikiisa, sikahola. 5Ɨjɨngɨ jɨkaghua pa lɨnhalavue, neke ʉlwakʉva ɨlɨhanga lyale lɨdebe, jɨkamela ngʼhaningʼhaani. 6Ye jɨmelile, ʉlʉjʉva lʉkanyaanya, jɨkʉʉma, ʉlwakʉva indela nasilyafikile paasi. 7Ɨjɨngɨ jɨkaghua pa malela gha madasia, jɨkamela, neke amadasia ye ghalembile ghakafweta, jɨkakunua kukoma ifipeke. 8Ɨjɨngɨ jɨkaghua pa lɨhanga ɨlɨnofu, jɨkamela, jɨkakʉla na kukoma vʉnono, jɨmo ifipeke fijigho fitatu, ɨjɨngɨ fijigho ntanda, ɨjɨngɨ kɨlʉndo.” 9ɄYesu akati, “Ʉnya kʉpʉlɨka, apʉlɨkaghe.”

Ʉvʉfumbue vwa Yesu ʉvwa kʉjova mʉ fihwanɨkɨsio

(Mataayi 13:10-17; Lʉʉka 8:9-10)

10Pambele ʉYesu na vavʉlanɨsɨvua vaake kɨjigho na vavɨlɨ palɨkɨmo na vavɨngɨlɨli avange, ye vijekiile, vakamposia vwɨmɨla ifihwanɨkɨsio. 11ɄYesu akavamʉla akati, “Ʉmue ʉNgʉlʉve avapeliile kukagʉla isa vʉsyefu ʉvwa Vʉtwa vwake. Neke vano valɨ kʉnji nɨkʉvavʉʉla imhola sooni mʉ fihwanɨkɨsio, 12ndavʉle lɨlembilue kuuti,

‘Kulola vilolagha, neke navikʉsivonagha.

Kupʉlɨka vipʉlɨkagha, neke navikʉsitangʼhaniagha,

valangomokela, nɨvapyanɨle.’ ”#Yesaya 6:9-10

ɄYesu ilʉvʉlania ɨkɨhwanɨkɨsio ɨkya nkesa mbeju

(Mataayi 13:18-23; Lʉʉka 8:11-15)

13ɄYesu akavavʉʉla akati, “Ʉmue nave namʉkʉkɨtangʼhania ɨkɨhwanɨkɨsio ɨkɨ, pe kyamʉkʉfitangʼhania ndaani ifihwanɨkɨsio ifingi? 14Lɨno pʉlɨkɨsia, ʉnkesa mbeju ikesa ɨlɨsio lya Vʉtwa vwa Ngʉlʉve. 15Pa sɨla pano ɨmbeju jɨlyaghwile, ve vaanhu vano vipʉlɨka ɨlɨsio lya Ngʉlʉve, neke ʉSetano ikwisa ngʼhaningʼhaani ivʉsia ɨlɨsio ɨlio mʉ moojo ghaave. 16Pa lɨnhalavue pano ɨmbeju jɨlyaghwile, ve vaanhu vano vipʉlɨka ɨlɨsio lya Ngʉlʉve, ʉnsiki ʉghuo vikʉlyʉpɨla nʉ lʉkeelo. 17Neke ʉlwakʉva ɨlɨsio lɨla lɨsila ndela mʉ mwojo ghaave, vigadɨlɨla ʉnsiki nʼdebe, lʉngavoneke ʉlʉtalamu lʉmonga, nambe isa kʉvapumusia vwɨmɨla ɨlɨsio, ʉnsiki ghʉghuo ye vikʉlʉlekagha ʉlwɨtɨko. 18Pa madasia pano ɨmbeju jɨlyaghwile, ve vaanhu vano vipʉlɨka ɨlɨsio lya Ngʉlʉve, 19neke imbombo sa mʉ ɨɨsi, kuyasʉka vwɨmɨla ʉvʉkavi vwa kyʉma nʉ vʉnoghelua vwa fiinu finga ifya mʉ ɨɨsi, fifweta ɨlɨsio, neke nalikoma ifipeke. 20Looli, pa lɨhanga ɨlɨnono pano ɨmbeju jɨlyaghwile, ve vaanhu vano vipʉlɨka ɨlɨsio lya Ngʉlʉve na kʉkʉlyʉpɨla, vikoma vʉnono, jʉmo ifipeke fijigho fitatu, ʉjʉnge fijigho ntanda, ʉjʉnge kɨlʉndo kɨmo.”

Ɨkɨhwanɨkɨsio ɨkya lʉmuli

(Lʉʉka 8:16-18)

21ɄYesu akajova kange kʉ lɨpʉgha lɨla akati, “Asi, ʉlʉmuli luletua kuuti lʉkupikilue nɨ lɨteneka, nambe kuuva mʉ fungu ɨja kɨtala? Jeeje! Luvɨkua pa kyɨmɨlo. 22Fye lʉlɨvuo, sooni sino sifisiime silaava pa vʉvalafu, soope sino sili kʉ vʉsyefu silavoneka. 23Ʉnya kʉpʉlɨka, apʉlɨkaghe!”

24Akavavʉʉla kange akati, “Pʉlɨkɨsyagha vʉnono sino nijova! Ɨkɨghelelo kɨno mughelela avange, kye kɨno ʉNgʉlʉve ilikʉvaghelela na jʉmue, kange ilikwongelesia fiijo. 25Ʉlwakʉva jʉno alɨ nʉ vʉkagʉsi vwɨmɨla ʉVʉtwa vwa Ngʉlʉve, ʉjuo ikwongelesivua. Looli jʉno nsila vʉkagʉsi ʉvuo, nambe ʉvʉkagʉsi ʉvʉdebe vʉno iiti alɨ navwo, ikunyua.”#4:25 Akadebe aka, mʉ Kɨyunaani kalembilue, Jʉno alɨ nakyo ikwongelesivua, jʉno nsila kɨɨnu, nakɨ kɨdebe kɨno alɨ nakyo ikunyua.

Ɨkɨhwanɨkɨsio ɨkya mbeju vʉle jimela na kukʉla

26ɄYesu akajova akati, “ɄVʉtwa vwa Ngʉlʉve vʉlɨ ndavʉle ɨkɨhwanɨkɨsio ɨkɨ: Ʉmuunhu jʉmonga alyavyalile ɨmbeju mʉ mʉghʉnda. 27Neke ʉmwene akaghonagha na kusisimuka ifighono fyoni kɨsila kʉkagʉla muno jimelela na kukʉla. 28Ɨlɨhanga lɨlio limesia, ghitala amatʉndʉ, neke amasoojo, kʉvʉsililo ɨngano jɨno jelile. 29Kyajʉmile, apuo itoola ifya kʉbenela, ʉlwakʉva ʉnsiki ʉghwa kʉbena ghʉfikile.”

Ɨkɨhwanɨkɨsio ɨkya mbeju ɨndebe fiijo

(Mataayi 13:31-32, 34; Lʉʉka 13:18-19)

30Akajova ɨkɨhwanɨkɨsio ɨkɨngɨ akati, “Tʉhwanɨkɨsie nɨ kɨki ʉVʉtwa vwa Ngʉlʉve? Nambe tʉvwoleke mʉ kɨhwanɨkɨsio kɨki? 31ɄVʉtwa vwa Ngʉlʉve vʉhwaniine nɨ mbeju ɨndebe kukila sooni,#4:31 Mbeju ɨndebe kukila sooni: Mʉ Kɨyunaani lɨlembilue, ɨmbeju ja haladali. Kʉ Vayahudi ɨmbeju ɨjio jaale je mbeju ɨndebe kukila sooni. 32looli jɨngavyalue, jimela na kukʉla, ghuuva mmela nkome kukila amamela ghooni agha nyafu. Inhaafi saake siiva mbaha nasi njuni sitenga ifivwasu mumuo.”

33ɄYesu akavʉlanɨsyagha vaanhu ɨlɨsio lyake mʉ fihwanɨkɨsio finga ndavʉle ifio. Akavavʉlanɨsyagha ndavʉle vanoghiile kupʉlɨka. 34Naakajovagha kɨmonga kɨsila kʉhwanɨkɨsia, looli ye ijekiile na vavʉlanɨsɨvua vaake, akavaghanʉlɨlagha sooni.

ɄYesu ilitamɨsia ɨmhepo mʉ lɨsʉmbe

(Mataayi 8:23-27; Lʉʉka 8:22-25)

35Ɨkɨghono kɨkio ye vwilile, ʉYesu akavavʉʉla avavʉlanɨsɨvua vaake akati, “Tʉlovoke ɨmwambo jɨla.” 36Ɨlɨpʉgha lya vaanhu vakalɨleka baaho, avavʉlanɨsɨvua vaake vakingila mʉ ngalava muno mwale ʉYesu, pe vakavʉʉka palɨkɨmo, ingalava isingi sikavɨngɨlɨlagha. 37Ɨmhepo ɨnya ngʉfu jɨkagugula na kuvɨɨka amavɨngo ghano ghakatovagha ɨngalava, neke amalenga ghakatengʉla kumema mʉ ngalava. 38Ʉnsiki ʉghuo ʉYesu alyaghoneliile pa kɨsaghu kʉmbele mʉ ngalava. Avavʉlanɨsɨvua vaake vakansisimula vakati, “Ghwe Mʼbʉlanɨsi, ʉve kʉlyʉve ghuvona nakɨɨnu pano ʉsue tufua mʉ lɨsʉmbe muno?”

39ɄYesu akasisimuka akajɨdalɨkɨla ɨmhepo na mavɨngo akati, “Kɨmihe! Litama!” Ɨmhepo jɨkalitama, kʉkava mye. 40Akavaposia avavʉlanɨsɨvua vaake akati, “Kɨki mʉlɨ voghofi? Mʉjiighe mʉlɨ vasila lwɨtɨko?” 41Lʉkavavona ʉlʉdwesi ʉlʉvaha, vakijovasia vakati, “Ʉjʉ ghwe veeni, jʉno ɨmhepo na mavɨngo fikʉmpʉlɨka?”

Currently Selected:

Malɨka 4: wbi

Highlight

Copy