Malɨka 11

ɄYesu ikwingila mʉ Yelusalemu na kaluulu

(Mataayi 21:1-11; Lʉʉka 19:28-40; Yohani 12:12-19)

1ɄYesu na vavʉlanɨsɨvua vaake vakava piipi kufika kʉ lɨkaaja ɨlya Yelusalemu, ʉlʉbale ʉlwa kɨkaaja ɨkya Betifage nɨ kya Betania, piipi nɨ kɨdunda ɨkya Miseituni.#11:1 Kɨdunda ɨkya Miseituni: Ɨkɨdunda ɨkɨ kyale na mapiki ghano ghikoma ifipeke fino fitambʉlua seituni. Pepano akavasuungʼha vavɨlɨ nkate mʉ vavʉlanɨsɨvua vaake, 2akati, “Mʉlʉte mʉ kɨkaaja kɨno kɨlɨ kʉvʉlongolo kʉlyʉmue. Kyamukwingila mʉ kɨkaaja ɨkio, mʉkʉjaagha ɨnyaana ja dogovi jɨkʉngilue. Ɨdogovi ɨjio, nambe muunhu naaghelile kʉkʉjangalɨla. Ɨjio mwavʉle mʉleete. 3Ʉmuunhu angavaposie kuuti, ‘Kɨki muvomba ʉluo?’ Mʉtisaghe, ‘ɄMʉtwa alɨ nʉ vʉfumbue najo, igomosia ʉnsiki nʼdebe vʉvʉle.’ ”

4Avavʉlanɨsɨvua vala vakalʉta, vakajaagha ɨnyaana ɨja dogovi, jɨkʉngilue pa nyumba jɨno jaale mʉlʉbale mʉ nsevo, pe vakajavʉla. 5Avaanhu vamonga vano valyale piipi vakavaposia vakati, “Kɨki mʉkʉjavʉla ɨnyaana ja dogovi?” 6Pepano avavʉlanɨsɨvua vakamʉla ndavʉle aveele avalaghiile ʉYesu. Avaanhu vala vakavaleka vilʉta najoope. 7Vakantwalɨla ʉYesu ɨnyaana ja dogovi,#11:7 Dogovi: Kʉ Vayahudi idogovi filyale fikanu fya kʉpɨnda avaanhu nambe amasigho. Avatwa valyale vipɨndua ni falaasi. Ifalaasi pamonga sikapindagha avaanhu kulʉta kulua ɨlɨlʉgʉ. ɄYesu pano ikwingila mʉ Yelusalemu angaliile ɨdogovi, alyale ivonia kuuti ʉmwene ntwa ghwa lʉtengaano, ʉntwa ʉmhʉʉgʉ. pe vakatandɨka amenda ghaave pa dogovi jɨla, neke ʉYesu akangalɨla. 8Avaanhu vinga vakava vitandɨka amenda ghaave mʉ nsevo, vamonga vakalagha amataafi ghano vadenyile mʉ mapiki ghano ghaale mʉ maghʉnda. 9Avaanhu vooni vano valyalongwile na vano valyale mʉmbele vakava nɨ njegheelo ɨja lʉkeelo viiti,

“Aghinwaghe!#11:9 Aghinwaghe: Mʉ Kɨebulania viiti, Hosiana, kwekʉti Ʉtʉpoke nambe Aghinwaghe.

Afunyilue jʉno ikwisa mʉ lɨtavua lya Mʉtwa ʉNgʉlʉve!#Sabuli 118:26

10Vʉfunyilue ʉVʉtwa vʉno vukwisa,

ndavʉle vwale ʉvʉtwa vwa nhaata ghwitu ʉDavɨdi!#11:10 ɄDavɨdi: Ɨmba ɨlɨsio Davɨdi kʉ Vʉghanʉle vwa Masio aMahesia.

Aghinwaghe ʉNgʉlʉve kʉkyanya!”

11ɄYesu akafika mʉ lɨkaaja ɨlya Yelusalemu, akingila mʉ nyumba ɨnyɨmɨke ɨja kufunyila.#11:11 Nyumba ɨnyɨmɨke ɨja kufunyila: Ɨmba kʉ Vʉghanʉle vwa Masio aMahesia. Pe akalola vʉnofu ifiinu fyoni. Ʉlwakʉva jɨlyale vwilile, akalʉta kʉ Betania palɨkɨmo na vavʉlanɨsɨvua vaake kɨjigho na vavɨlɨ.

ɄYesu ɨkʉghʉghuna ʉmpiki ʉntini

(Mataayi 21:18-19)

12Palwakɨlo ye vahʉmile kʉ Betania vilʉta kʉ Yelusalemu, ʉYesu jɨkamʼbava ɨnjala. 13Akaghʉvona ʉmpiki ʉntini pa vʉtali ghʉlɨ na matʉndʉ minga. Akaveela kuuti pamo alakɨvona ɨkɨpeke mʉ mpiki ghʉla. Neke ye afikile, naakakyagha nambe kɨpeke, akavona ghalɨ gha matʉndʉ gheene, ʉlwakʉva naghwale nsiki ghwa kʉkoma ifipeke. 14ɄYesu akaghʉvʉʉla ʉmpiki ghʉla akati, “Kuhʉma ʉmʉsyʉghʉ ʉmuunhu ghweni naalalia lʉsiku ɨkɨpeke mʉlyʉve.” Avavʉlanɨsɨvua vaake vakapʉlɨka sino ajovile.

ɄYesu ivalasia ɨnyumba ɨnyɨmɨke ɨja kufunyila

(Mataayi 21:12-17; Lʉʉka 19:45-48; Yohani 2:13-22)

15Ye vafikile mʉ Yelusalemu, ʉYesu akingila mʉ lʉvɨɨka ʉlwa nyumba ɨnyɨmɨke ɨja kufunyila, akatengʉla kʉkʉvadaga vano vakaghʉsyagha na kughʉla ifiinu. Akabɨlɨvandʉla imeesa isa vano vakananiagha indalama ni fitengo ifya vaghʉsia ngʼhʉnda. 16Naakamwɨtɨkɨsyagha nambe jʉmo kukila nɨ kɨtwalo mʉ nyumba ɨnyɨmɨke ɨja kufunyila. 17Pe akavavʉlanɨsyagha avaanhu akatisagha, “Nalɨlembilue kuuti, ‘Ɨnyumba jango jitambʉlwagha nyumba ja kufunyila ifisina fyoni’?#Yesaya 56:7 Neke ʉmue mʉhambwile ‘mhanga ja valyasi!’#Yelemia 7:11 ”

18Avavaha va vatekesi na vavʉlanɨsi va ndaghɨlo, ye vapʉliike imhola isio, vakatengʉla kulonda ɨsɨla ɨja kʉmʼbuda, ʉlwakʉva vakamwoghopagha pano avaanhu vinga vakakelagha imbʉlanɨsio saake. 19Ye vwilile, ʉYesu na vavʉlanɨsɨvua vaake vakahʉma mʉ lɨkaaja ɨlya Yelusalemu.

Ʉlʉvʉlanɨsio vwɨmɨla ʉmpiki ʉntini ghʉno ghwaghunilue

(Mataayi 21:20-22)

20Palwakɨlo, ye kʉkiile, vakakilila pa mpiki ʉntini ghʉla, vakavona ghwʉmile ghwoni kuhʉma pa kɨsikina. 21ɄPeteli akakʉmbʉka isa mpiki ʉntini, pe akati, “Mʼbʉlanɨsi, lola ʉmpiki ghʉno ghwaghʉghuna, ghwʉmile!”

22ɄYesu akati, “Mʉmwɨtɨkaghe ʉNgʉlʉve. 23Kyangʼhaani nɨkʉvavʉʉla, ʉmuunhu ghweni angakɨvʉʉle ɨkɨdunda ɨkɨ, ‘Kumuka, ghutaaghe mʉ nyanja,’ angave nʉ lwɨtɨko ʉlʉsila nganighani mʉ mwojo ghwake, na kuhʉvɨɨla kuuti sino ajovile sivombeka, ʉlufuunyo lwake lukwʉpɨlua.

24“Mʉ ʉluo nɨkʉvavʉʉla kuuti, fyoni fino musʉʉma pano mukufuunya, mʉhʉvɨlaghe kuuti mʉpelilue, ifio fivisagha fiinu. 25Pano mukufuunya, mʉvasaghɨlaghe vano vavahokile, pe na jʉmue ʉNhaata ghwinu ʉghwa kʉkyanya ɨkʉvapyanɨlagha ʉvʉhosi vwinu. 26Nave namʉkʉvasaghɨla avange vano vikʉvahoka, najʉ Nhaata ghwinu ʉghwa kʉkyanya naɨkʉvapyanɨlagha amakole ghiinu.”#11:26 Akadebe aka namwekale mʉ fitabu fimonga ifikʉʉlʉ.

Ʉlʉposio vwɨmɨla ʉvʉtavʉlɨlua vwa Yesu

(Mataayi 21:23-27; Lʉʉka 20:1-8)

27ɄYesu na vavʉlanɨsɨvua vaake vakafika kange kʉ Yelusalemu, vakingila mʉ nyumba ɨnyɨmɨke ɨja kufunyila. ɄYesu ye ighendaghenda mula, avavaha va vatekesi na vavʉlanɨsi va ndaghɨlo palɨkɨmo na vagojo vakamʉlʉtɨla. 28Vakamposia vakati, “Ghuvomba isi mʉ vʉtavʉlɨlua vwani?” 29ɄYesu akavavʉʉla akati, “Na jʉʉne nɨkʉvaposia lʉmonga, mʉnganyamʉle, pe na jʉʉne nɨkʉvavʉʉla kʉno vuhʉma ʉvʉtavʉlɨlua vʉno nivombela isi. 30Ʉvʉtavʉlɨlua vwa Yohani ʉvwa kwofugha vʉlyahʉmile kwani? Vʉlyahʉmile kwa Ngʉlʉve, kʉ vaanhu? Mʉnyamʉle.”

31Pe vakiposaniagha veene viiti, “Tʉngati, ‘Vʉlyahʉmile kwa Ngʉlʉve,’ kyaiiti, ‘Ongo namʉlyamwɨtiike?’ 32Kange tʉngati, ‘Vʉlyahʉmile kʉ vaanhu,’ avaanhu navangɨtɨke.” Vakoghopa ɨlɨpʉgha lya vaanhu, ʉlwakʉva vooni valyantangʼhinie ʉYohani kuuti mʼbɨli ghwa Ngʉlʉve. 33Pe vakamwamʉla ʉYesu vakati, “Natʉkagwile.” Ghwope ʉYesu akavamʉla akati, “Na jʉʉne nanɨkʉvavʉʉla kʉno vuhʉma ʉvʉtavʉlɨlua vʉno nivombela isi.”

Currently Selected:

Malɨka 11: wbi

Highlight

Copy