Lʉʉka 10

ɄYesu isuungʼha avavʉlanɨsɨvua fijigho lekelalʉbale na vavɨlɨ

1Pambele, ʉMʉtwa ʉYesu akasalʉla avavʉlanɨsɨvua avange fijigho lekelalʉbale na vavɨlɨ, kuuti avasuungʼhe. Pe akavasuungʼha vavɨlɨ vavɨlɨ, mʉ makaaja ni mbale sooni kʉno alyafumbilue kulʉta jʉjuo, kuuti valongole. 2ɄYesu akavavʉʉla akati, “Mʉ mʉghʉnda ifiinu fimotwike, neke avanya kʉpeta vadebe. Lɨno, mʉnsʉʉme ʉnya mʉghʉnda, asuungʼhe avaanhu avange avanya kʉpeta. 3Lɨno mʉlʉtaghe, neke mʉkagʉlaghe vʉnofu kuuti, nɨkʉvasuungʼha hwene nyanangʼholo pakate pa ngʼhekeeva! 4Namʉngagadaghe indalama, nambe ɨnyambe, nambe ifilatu ifya kwandʉla. Mʉlekaghe kusofia ʉnsiki kuhʉngɨla avaanhu mʉ sɨla.

5“Kange, pano mukwingila mʉ nyumba ja muunhu, mʉtalaghe pihʉngɨla mʉtisaghe, ‘ɄNgʉlʉve avapelaghe ʉlʉtengaano mʉ nyumba muno.’ 6Nave avanya nyumba vavʉpiile nʉ lʉtengaano, apuo ɨnyumba ɨjio jivisagha nʉ lʉtengaano. Looli, nave navavʉpiile, apuo ʉlʉtengaano lujighagha numue. 7Mʉlekaghe kuhamahaama. Looli, ɨnyumba jɨno vavʉpiile mukalaghe mumuo na kulia ifyakʉlia fino vikʉvapeela. Ʉlwakʉva ʉmʼbombi anoghiile kupelua fyoni fino ilonda.

8“Mʉngingile mʉ lɨkaaja lɨmonga, neke avanya kaaja vangavʉpɨle nʉ lʉkeelo, ifyakʉlia fino vikʉvapeela mʉlisaghe. 9Avatamu vano valɨ mʉ lɨkaaja ɨlio, mʉvasosyaghe. Mʉvavʉlaghe kuuti, ‘ɄVʉtwa vwa Ngʉlʉve vʉlɨ piipi.’ 10Looli, mʉngingile mʉ lɨkaaja, neke valeke kʉkʉvʉpɨla, pano mukila mʉ sɨla saave, mʉtisaghe, 11‘Nalʉ lʉngʼhʉnde ʉlwa lɨkaaja liinu lʉno lʉlɨ mʉ maghʉlʉ ghiitu, tukungʼuuna kuuti vʉʉve vwolesi kʉlyʉmue. Kange, mʉkagʉlaghe kuuti, ʉVʉtwa vwa Ngʉlʉve vʉlɨ piipi!’ 12Nɨkʉvavʉʉla kuuti, ɨkɨghono ɨkya vʉhɨghi, avaanhu va lɨkaaja ɨlio viliiva nʉ lʉpumuko ʉlʉkome, kukila ʉlʉpumuko ʉlwa vaanhu ava kʉ Sodoma!#Vʉtengʉlɨlo 19:24-29

Ʉlʉpumuko ʉlwa makaaja ghano ghikʉnkaana ʉYesu

(Mataayi 11:20-24)

13“Ɨga mwe vaanhu va lɨkaaja lya Kolasini! Ɨga mwe vaanhu va lɨkaaja ɨlya Betisaida!#10:13 Kolasini nɨ Betisaida ghalyale makaaja gha Vayahudi. Avaanhu va mʉ makaaja aghuo valyale vikuvona kuuti vagholofu kukila avaanhu ava makaaja aghange ndavʉle agha Tiilo nɨ Sidoni ghano ghaale gha vaanhu vano naVayahudi. Ʉlwakʉva ifidegho fino nɨvombile kʉlyʉmue, fyale fivombeke kʉ lɨkaaja ɨlya Tiilo nɨ lya Sidoni, avaanhu mʉ makaaja aghuo ngale valyalatile. Vale vifwala amagunila na kupakala ɨlɨpembo kuhʉfia ʉlʉlaato lwave. 14Lɨno, pa kɨghono ɨkya vʉhɨghi, ʉlʉpumuko lwinu luliiva lʉkome, kukila ʉlwa vaanhu ava kʉ Tiilo na kʉ Sidoni! 15Na jʉmue mwe vaanhu mʉ lɨkaaja lya Kapelenaumu, mukuvona kuuti mulifika kʉkyanya kwa Ngʉlʉve! Jeeje, nafye luliiva! Looli mulitaghua paasi kʉvʉfue.”

16Pe ʉYesu akavavʉʉla avavʉlanɨsɨvua vaake avuo akati, “Ʉmuunhu jʉno ɨkʉvapʉlɨka ʉmue, iiva ɨkʉmhʉlɨka ʉne, ghwope jʉno ɨkʉvakaana ʉmue, iiva ɨkʉngʼhaana ʉne. Kange, jʉno ɨkʉngʼhaana ʉne, iiva ɨkʉnkaana jʉno asungʼhile.”

Avavʉlanɨsɨvua fijigho lekelalʉbale na vavɨlɨ vigomoka nʉ lʉkeelo

17Pambele avavʉlanɨsɨvua va Yesu fijigho lekelalʉbale na vavɨlɨ,#10:17 Fijigho lekelalʉbale na vavɨlɨ: Mʉ malembe aghange agha Kɨyunaani lɨlembilue, fijigho lekelalʉbale. vakagomoka vahovwike, vakamʼbʉʉla ʉYesu vakati, “Ghwe Mʉtwa, nagha mapepo amalamafu, pano tʉkʉghadaga mʉ lɨtavua lyako, ghikʉtʉkʉnda!” 18ɄYesu akavavʉʉla akati, “Namwagha ʉSetano isangʉka kuhʉma kʉkyanya,#10:18 ɄSetano isangʉka kuhʉma kʉkyanya: Alyadagilue kuhʉma kʉkyanya kwa Ngʉlʉve (Yesaya 14:12). ighua hwene lʉmuli lwa fula. 19Lolagha, nɨvapeliile ingʉfu isa kʉmʉlema ʉmʉlʉgʉ mʉ sooni. Mʉ ngʉfu isio mukanyagha injoka ni fingʼhomilevʉli, kange nakwekɨlɨ kɨmonga ɨkya kʉvalemasia. 20Neke, nambe muhovoka ʉlwakʉva amapepo amalamafu ghikʉvakʉnda, mʉlekaghe kuhovoka vwɨmɨla ʉluo lwene, looli mʉhovokaghe ʉlwakʉva amatavua ghiinu ghalembilue nʉ Ngʉlʉve kʉkyanya.”

Ʉlʉkeelo lwa Yesu

(Mataayi 11:25-27; 13:16-17)

21Ʉnsiki ghʉghuo, ʉMhepo ʉMwɨmɨke akampelela ʉYesu kuhovoka fiijo akati, “Ghwe Nhaata, ghwe jʉno ʉtemile kʉkyanya na paasi, nɨkʉkʉhongesia ʉlwakʉva imhola isi ʉvafisile avɨmbi na vakagʉsi, neke ʉvahʉfisie avaanhu vano vikujisia hwene vaana vadebe. Eena Nhaata, ʉlwakʉva ʉluo lwe lʉno ʉkeliile.” 22Akajova kange akati, “ɄNhaata ghwango anhavʉliile fyoni. Neke nakwale jʉno ankagwile ʉMwana, looli jʉ Nhaata mwene. Kange, nakwale jʉno ankagwile ʉNhaata, looli ʉMwana, nʉ muunhu ghweni jʉno ʉMwana ilonda kʉkʉmhʉfia.”

23Pepano ʉYesu akavasyetʉkɨla avavʉlanɨsɨvua vaake akavavʉʉla akati, “Mʉfunyilue ʉmue mwe vano mʉkʉsivona isi! 24Nɨkʉvavʉʉla kuuti, kwevalyale avavɨli vinga na vatwa vano valyale vilonda kʉkʉsivona sino mʉkʉsivona ʉmue, neke navalyasivwene. Kange, valyale vilonda kupʉlɨka sino mupʉlɨka ʉmue, neke navalyasipʉliike.”

Ɨkɨhwanɨkɨsio ɨkya Nsamalia ʉnkoola

25Nakalɨngi, ʉmʼbʉlanɨsi jʉmonga ʉghwa ndaghɨlo, akɨɨma kʉkʉmposia ʉYesu kʉkʉmʉghela akati, “Ghwe Mʼbʉlanɨsi, nɨvombe kɨki, neke nɨɨve nʉ vwʉmi ʉvwa kʉvʉsila kʉsila?” 26ɄYesu akamwamʉla akati, “Indaghɨlo sa Ngʉlʉve siiti kɨki? Ʉkʉsitangʼhania ndaani?” 27Akamwamʉla akati, “Ʉmʉghanaghe ʉMʉtwa ʉNgʉlʉve ghwako nɨ nhumbula jaako jooni, nʉ mwojo ghwako ghwoni, nʉ lʉhala lwako lwoni, ni ngʉfu saako sooni.#Similisio sa Ndaghɨlo 6:5 Ʉmʉghanaghe ʉnnino ndavʉle ghukughana jʉʉve.”#Valeevi 19:18 28ɄYesu akati, “Ghwamwile vʉnofu! Ʉvombaghe enendɨɨkɨ, pe ghuuva nʉ vwʉmi ʉvwa kʉvʉsila kʉsila.”

29Neke ʉmʼbʉlanɨsi ghwa ndaghɨlo jʉla, akalondagha kukuvɨɨka kuuti ghwa kyangʼhaani, akamposia kange ʉYesu akati, “Lɨno, ʉnʼjango ghwe veeni?” 30ɄYesu akamwamʉla akati, “Kwealyale ʉmuunhu jʉmonga, alyahʉmile kʉ Yelusalemu, ilʉta kʉ lɨkaaja ɨlya Yeliko. Neke mʉ sɨla, avahɨjiavabudi vakamwalʉkɨla, vakantova kyongo, vakamfuula amenda, vakamʉleka ghukova. 31Nakalɨngi ʉntekesi jʉmonga akava ikila mʉ sɨla jɨla, ye ɨkʉmwagha ʉmuunhu jʉla akaseena. 32Najʉ Mʉleevi,#10:32 Mʉleevi: Avaanhu ava vakahʉmagha mʉ kɨkolo kya Leevi ɨkɨkolo ɨkya vatekesi (Mbalɨlo 3:17-27). Neke ɨmbombo jaave jaale ja kʉvatanga avatekesi na kulolelela ɨnyumba ɨnyɨmɨke ɨja kufunyila (Mbalɨlo 3:28-37). ye ifika pala, akamwagha ʉmuunhu jʉla, ghwope akaseena. 33Pambele akiisa ʉNsamalia jʉmonga, jʉno alyale ikyʉla kukilila ɨsɨla jɨla. Ye ɨkʉmwagha ʉmuunhu jʉla, akamʼbonela ɨkɨsa, 34akamʼbelelela, akampaka ʉlʉhʉʉje na mafuta mʉ fikoongʼo fyake kʉkʉmʼbʉvʉsia, akampinya ifikoongʼo fyake. Akantosia pa dogovi jaake, akantwala kʉ nyumba ja vahesia, akava ɨkʉmʉlolelela.

35“Ye kʉkiile, akahʉmia idinali ivɨlɨ,#10:35 Idinali ivɨlɨ, salɨngʼhiine nʉ lʉhombo ʉlwa mʼbombi jʉmo kʉ fighono fivɨlɨ. akampeela ʉnya nyumba jɨla, pe akamʼbʉʉla akati, ‘Ʉmʼbʉvʉsyaghe ʉmuunhu ʉjʉ. Nave ihela isi sisilile, neke ʉhʉmisie isingi mʉlwa kʉntengelela, kyanigomoka, nɨkʉkʉhomba.’ ” 36Pepano, ʉYesu akamposia ʉmʼbʉlanɨsi jʉla ʉghwa ndaghɨlo akati, “Asi, mʉ vatatu ava, ghwe veeni jʉno ghusaagha kuuti ghwe nnine ghwa kyangʼhaani ghwa muunhu jʉno vakamwalʉkiile avahɨjiavabudi?” 37Akamwamʉla akati, “Jʉno amʼbonela ɨkɨsa.” ɄYesu akamʼbʉʉla akati, “Na jʉʉve ʉlʉtaghe ʉvombaghe enendɨɨkɨ!”

ɄYesu mʉ nyumba ja Malita nʉ Maliya

38ɄYesu na vavʉlanɨsɨvua vaake, ye valɨ mʉ sɨla vilʉta kʉ Yelusalemu, vakafika mʉ kɨkaaja kɨmonga. Neke ʉmʉkɨjʉʉva jʉmonga, jʉno akatambʉlwagha Malita, akamwʉpɨla ʉYesu kʉ kaaja kwa mwene. 39ɄMalita alyale nʉ nnuuna jʉno akatambʉlwagha Maliya. Ʉnsiki ʉghuo, ʉMaliya alikalile piipi nʉ Yesu, ipʉlɨkɨsia imbʉlanɨsio saake. 40Neke ʉMalita akava ihangajɨka ni mbombo nyinga isa kʉntengelela ʉYesu. Pe akamʼbʉʉla ʉYesu akati, “Ghwe Mʉtwa, naghuvona lʉviivi pano ʉnnunavango andekile nivomba jʉʉne? Lɨno, ʉmʼbʉʉle anhange!”

41ɄMʉtwa akamwamʉla akati, “Malita, Malita! Kɨki ghupumuka ni mbombo nyinga? 42Looli kilondua ɨkɨɨnu kɨmo ɨkɨnono, kye kɨno ʉMaliya asalwile, nakwale ʉmuunhu jʉno ndepoonu ɨkʉkɨvʉsia kwa mwene.”

Currently Selected:

Lʉʉka 10: wbi

Highlight

Copy