JUAN 5

Jesús kachakátsin Betesdachow paralítikuta

1Keykunapitanam judyukunapa fyestan karqan, Jesusnam witsarqan Jerusalenman. 2I Jerusalenchowmi kan, úshakunapa punkun ládunchow juk kita, keypam jutin ebrewchowqa Betesda, pitsqa punkuyoq. 3Keykunachowmi keykáyarqan atskaq qeshyayoqkuna, wiskukuna, kojukuna i paraliytikukuna, yaku kuyunanta shuyarar. 4Uneytayanmi juk angel urámoq kitaman, yakuta kuyutseq; puntata yaku kuyureqman yeykureqmi, kachakáreq imeyka qeshyapitapis.

5I tseychowmi karqan juk nuna kima chunka puwaq watana qeshyakoq. 6Iskareykaqta Jesús rikeykurnam, musyarqan allápa uneypitana kanqanta, nerqan: —¿Munankiku sanukeyta?

7Qeshyaqnam yaskirqan, Señor, manam pipis kantsu kitaman yeykatsimanampaq yaku kuyuptin; tseyraq noqa eywareykaptimi juk llallimar yeykurin.

8Jesusnam nerqan: —Sharkiy, qopikita aparkur eywey.

9Tsey óram kachakárerqan, i qopinta aparkur eywakorqan. Tsey junaq jamakiy junaqmi karqan.

10Tseynam judyukuna kachakashqa nunata niyarqan: —Jamakiy junaqmi; manam permitishqatsu qopikita apaneyki.

11Peynam yaskerqan: —Kachakátsimaqními, nimarqon: “Qopikita aparkur ewkiy.”

12Tseynam tapuyarqan: —¿Pitaq nishurqonki: “Qopikita aparkur ewkiy?”

13Kachakashqa kaqnam musyarqantsu pí kanqanta, Jesús tseypita ewkushqana karqan nunakunapita rakikákurir. 14Tseypitanam Jesús tarirerqan templuchow i nerqan: —Rikey, kachakashqanam kanki; ama masqa jutsata rureynatsu, qanman mana alli shamunampaq.

15Nunanam ewkorqan, i judyukunata willarqan, Jesús kachakátseqnin kanqanta. 16Key kawsareykurmi judyukuna qatikachayarqan Jesusta, wanutsita munar, jamakiy junaqchow keykunata ruraptin. 17Jesusnam yaskerqan: —Teytáqa kananyaqmi uryan, i noqapis uryá.

18Keykunareykur judyukuna masraq wanutsita munayarqan, jamakiy junaqta manam kásuntsu, sinowqa Dyospis Teytámi nin, Dyostukur.

Jesús parlan awtoridáninpita

19Yaskirnam Jesús, nerqan: —Tseqeypa, tseqeypam niyaq: Manam Tsuriqa kikinllapitaqa imata rureyta pwedintsu, sinowqa Teyta rurashqanta rikarnin; llapan Teytan rurashqantam, ruran Tsuripis tseynowlla. 20Teytaqa kuyanmi Tsurita i rikátsinmi llapan pey rurashqanta; i keykunapita mas jatusaq rureykunatam rikátsinqa, tseymi qamkuna almirakuyanki. 21Imanowmi Teyta wanushqakunata sharkatsin, i kaweynin qon, tseynowmi Tsuripis munashqanta kaweynin qon. 22Teytaqa manam pitapis jusgantsu, sinowqa llapan fisyutam Tsurita qoshqa, 23llapanpis Tsurita onrayanampaq Teytata onrayanqannow. Tsurita mana onraqqa, kachamaqniy Teytatapis onrayantsu.

24»Tseqeypa, tseqeypam niyaq: Palabra wiyaq i kachamaqniyman kreyeq kaqqa, wiñey kawéyoqmi; manam shamonqatsu kondenasyonman, sinowqa wanípita kaweymanmi pasarishqa. 25Tseqeypa, tseqeypam niyaq: Óram shamun, i keymi key, wanushqakuna wiyayanqa Dyospa Tsurimpa bosninta; i wiyaq kaqkunaqa kawayanqam. 26Imanowmi Teytapa kaweynin kikinchow kan, tseynowmi Tsuritapis qoshqa kaweynin kikinchow kanampaq; 27i tseynowmi awtoridánin qoshqa fisyuta ruranampaq, Nunapa Tsurin kaptin. 28Ama almirakuyeytsu keypita; shamonqam óra llapan pampashqakuna bosninta wiyayanqa; 29i allita ruraqkunaqa yarqayámonqa kawarikiy kaweyman; i mana alli ruraqkunaqa, kondenasyon kawariman. 30Noqaqa manam imata rureyta pweditsu kikiypitaqa; wiyanqámannowmi, jusgá; i jusganqáqa allim, manam kikiypa muneynítatsu ashiy, sinowqa kachamaqniy, Teytápa muneynintam.

Jesuspaq willaq

31»Si noqatsun kikiypaq willakú, willakiyniy manam rasonpatsu. 32Noqapaq willakoqqa jukmi, i musyámi pey noqapaq willakushqanqa rasonpa kanqantam. 33Qamkuna kachayarqeykim willakoqkunata Juanman, pey willakorqan rasonpa kaqta. 34Peru noqa manam chaskiy ni meyqan nunapitatsu willakiyta; mas keyta ní, qamkuna salbashqa kayaneykipaqmi. 35Peymi karqan rawreykaq antorcha i atsikyarqan; qamkunaqa munayarqeykim kushikiyta juk tyempulla aktsinchow.

36»Noqapa willakiyniqa mas jatunmi Juanpa willakininpita; Teyta rureyninkuna qomanqanta kumplinápaq, key ruranqákunam willakun, noqapaq Yaya kachamashqanta.

37»Kachamaqni Teytapis willakushqam noqapaq. Imeypis wiyayarqonkitsu bosninta, ni imarikoq keyninta rikáyarqonkitsu, 38i palabrampis qamkunachow yachantsu; pey kachamushqanman, qamkuna kreyiyankitsu. 39Alleq rikáyey Eskritúrakunata; qamkunata nirápuyashunki wiñey kaweynikikuna keykunachow kanqanta; keykunanam willakuyan noqapaq. 40I munayankitsu noqaman shamiyta kaweynikikuna kanampaq.

41»Nunakunapa gloryanta manam chaskítsu. 42Noqa reqiyaqmi, Dyospa kuyakiynin mana qamkunachow kashqanta. 43Noqa shamorqó Teytápa jutinchow, i mana chaskiyamankitsu; si juk kikimpa jutinchow shamunman, tseytaqa chaskiyankim. 44¿Imanowtaq kreyiyanki qamkuna, jukniki juknikipita sumeyta chaskikur, i ashiyankitsu japallan Dyospita shamoq gloryanta?

45»Ama pensayeytsu noqa Teytápa nowpanchow shimpiyánaqta; kanmi juk shimpiyashoqniki, Moysesmi, peychow shuyakuyanqeyki. 46Si Moysesta kreyerqa, noqatapis kreyiyamankimanmi, noqapeqmi peypis qellqarqan. 47Qellqashqankunaman mana kreyerqa, ¿imanowparaq kreyiyanki parlakiyníkunaman?

Currently Selected:

JUAN 5: QUEAN

Highlight

Copy