JUAN 4

Jesús i samaritana warmi

1Imeymi, Señor káyirerqan farisewkuna niyanqanta wiyarir: Jesús ruran i bawtisan mas disípulukunata Juanpita 2(Jesusqa manam bawtisarqantsu, sinowqa disípulunkunam), 3Judeyapita yarqurir, yapey eywakorqan Galileyapa. 4Presisarqanmi Samaryapa pasanan. 5Shamorqan, Samaryachow Sikar jutiyoq markaman, Jakob tsurin Joséta erensya qoshqan ládunman. 6Tseychowmi Jakobpa pósun karqan. Tseynam Jesús, nánichow utishqa, jamakurerqan pósu ládunchow. Karqan joqta óranowmi. 7Shamorqan juk warmi Samaryapita yaku jorqoq. Jesusnam nerqan: —Upunápaq qomey.

8Disípulunkunanam eywashqa kayarqan pwebluta rantipakoq mikuyanampaq. 9Samaritana warminam nerqan: ¿Imanowtaq qam, judyu keykar, noqata mañamanki upuneykipaq, samaritana warmi keykaptiy? Judyukunawan Samaritanukunaqa mana allim pasayan.

10Jesús yaskirnin nerqan: —Si Dyospa qareyninta reqirqa, i pí nishonqeykita: “Qomey upunápaq”, qammi mañakunkiman, i peymi qoshunkiman kaweykaq yakuta.

11Warminam nerqan: —Señor, imeykipis kantsu jorquneykipaq, pósupis rurim. ¿Meypitataq kaweykaq yakiyki kan? 12¿Akasu qam kanki teytákuna Jakobpa mayorninku, key posuta qoyamashqa, keypitam upuyarqan pey, tsurinkuna i wátankuna?

13Jesús yaskir nerqan: —Meyqampis keypita yaku upoqqa, yapeymi yakunanqa; 14mas pipis noqa yaku qonqá upyaqqa, manam imeypis yakunanqatsu; sinowqa yaku noqa qonqáqa peychowmi kanqa pukyu yaku wiñey kaweypaq.

15Warminam nerqan: —Señor, qomey tsey yakuta, mana yakunanápaq, ni keyman jorqoq shamunápaq.

16Jesusmi nerqan: —Eywey, qoweykita qayamiy, i keyman shamiy.

17Warminam yaskirnin nerqan: —Manam qowá kantsu.

Jesusnam nerqan: —Allim nerqonki: Manam qowá kantsu; 18pitsqam qoweykikuna kapushorqonki i kanan kaqqa manam qoweykitsu; keyta nerqonki rasonpam.

19Warminam nerqan: —Señor, qamqa profetatsunchi kanki. 20Teytákuna key jirkachowmi adorayarqan, i qamkunaqa Jerusalenchowmi adorakuna niyanki.

21Jesusnam nerqan: —Warmi, kreyimey, óra shamunnam ni key jirkachowtsu ni Jerusalenchowtsu adorayanki Teytataqa. 22Qamkuna adorayanki mana musyayanqeykitam; noqakunaqa adorayá musyayanqátam; salbasyonqa shamun judyukunapitam. 23Óranam shamun, i kananmi, rasonpa adoraqkuna adorayanqa Teytata espirituchow i rasonkaqchow; Teytapis tseynow adoraqkunatam ashin adorayanampaq. 24Dyosqa Espiritum; i adoraqkunaqa, presisanmi adorayanan espirituchow i rasonkaqchow.

25Warminam nerqan: —Musyámi Mesiyas shamunanta, Kristu jutiyoq. Pey shamurnam llapan kosaskakunata willayámanqa.

26Jesusmi nerqan: —Noqam ká, qamwan parlaq.

27Tseymannam disípulunkuna shayámorqan i almirakuyarqan warmiwan parlaptin; peru, manam meyqampis ima niyarqantsu: “¿Imatataq tapunki?” ó “¿Imatataq peywan parlanki?” 28Tseynam warmi puyñunta jaqirir, eywarqan pwebluta, i nunakunata nerqan: 29—¡Shayámi! Rikáyey juk nunata keymi nimarqon llapan ruranqákunata. ¿Manatsuraq key Kristu?

30Tseynam pweblupita yarqamurnin shayámorqan peyman.

Luyaqnam murushqakuna seganapaq

31Tseyaqmi, disípulunkuna rowayarqan, nirnin: —Rabí, mikiy.

32Peynam nerqan: —Noqapaqqa kanmi mikiyni mikunápaq, qamkuna mana musyayanqeyki.

33Tseynam disípulunkuna ninakuyarqan juknin juknimpis: —¿Piraq apamorqon mikunampaq?

34Jesusnam nerqan: —Mikiyneyqa kachamaqnípa muneynin ruranámi, i rureyninta ushanámi. 35¿Manaku qamkuna niyanki: “Chusku killaran pishin segakiy chámunampaq?” Keymi key niyaq: ¡Rikáyey murushqakunata; luyaqashqanam kayan seganapaq! 36Segaqqa páguta chaskinmi, i eyllunmi wayíta wiñey kaweypaq, murukoqpis eylloqwan jukllachow kushikunampaq. 37Keymi rasonpa kaq nishqa: “Jukmi muroqqa i juknam segaqqa.” 38Noqa kachayarqoq segaqmi mana uryayashqeykiman; jukkunam uryayarqan, i qamkunanam yeykuyarqonki uryayashqanman.

39Atskaq samaritanukunam tsey markapita kreyiyarqan peyman warmi parlakiynimpa, willakorqan nishpa: “Nimarqon llapan rurashqákunatam.” 40Tseynam samaritanukuna shayámorqan peyman i rowayarqan peykunawan keydakunanpaq; i tseychow ishkey junaq keydakorqan. 41Atskaqmi kreyiyarqan pey parlakiynimpa. 42Warmitanam niyarqan: —Manam kreyiyá qam ninqeykillapatsu, kikiykunanam wiyayarqó, i musyayá rasonpam, keymi mundu Salbaq, Kristu.

Jesús kachakátsin ofisyalpa tsurinta

43Tseypeq ishkey junaqta, yarqurir Galileyata eywarqan. 44Kikin Jesusmi willakorqan markanchowqa mana onrashqa kanqanta. 45Galileyaman shamuptinnam, Galilewkuna chaskiyarqan, llapan kosaskuna rurashqanta Jerusalen fyestachow rikashqa karnin, peykunapis fyestaman eywayashqa karqan.

46Yapeynam Jesús shamurqan Kaná Galileyaman, tseychowmi yakuta bínuman tikratserqan. Karqan Kapernaunchownam reypa juk ofisyalnin, peypa tsurinnam qeshyarqan. 47Peynam, Jesús Judeyapita Galileyaman cháramushqanta wiyarir, peyman shamorqan i rowarqan eyweykunampaq, wanukikaq tsurinta kachakátsinampaq. 48Tseynam Jesús nerqan: —Manatsun rikáyanki señalkunata i milagrukunata, manam kreyiyankitsu.

49Reypa ofisyalninnam nerqan: —Señor, eyweykiy tsurillá manaraq wanuptin.

50Jesusnam nerqan: —Eywey, tsurikiqa kawanmi.

Nunanam kreyerqan Jesús nenqanta, i eywakorqan. 51Pey uráreykaptinnam, yarqayamorqan chaskeq sirweqninkuna, i willariyarqan nishpa: Tsurikiqa kawanmi. 52Tseynam pey taporqan, imey órataq alliyar qalleykorqan. I niyarqan: —Qanyan qanchis óram jaqirirqan fiebri.

53Teytanam káyirerqan tsey óra Jesús nishqanta: —“Tsuriki kawanmi.” I peynam kreyerqan llapan wayinpin. 54Key ishkan kaq señalta Jesús rurarqan, Judeyapita Galileyaman eywar.

Currently Selected:

JUAN 4: QUEAN

Highlight

Copy