APOSTULKUNA RURAYANQAN RUREYKUNA 4

Pedru i Juan karsilashqa kayan

1Peykuna nunakunata parlapeykáyaptin, shayámurqan saserdotikuna templu tápaq mandakoqwan, i sadusewkunapis, 2nunakunata yachatsiyanqanta piñakur, i Jesuschow wanushqakunapita kawarimiyta willakuyaptin. 3I tsariyarqan, i karselman wichqayarqan waránin junaqyaq, tardina kaptin. 4Peru palabra wiyashqakunapita atskaq kreyiyarqan; i ollqukuna kayarqan pitsqa waranqanow.

Pedruwan Juan sanedrinchow

5Waránin junaqnam, eyllukáyarqan Jerusalenchow mandakoqkuna, awkinkuna i judyukunapa leynin yachatsikoqkuna, 6apun saserdoti Anas, Kayfas i Juan i Alejandro, i llapan apun saserdotikunapa kastan kaqkuna; 7chowpiman sheykatsir, peykunata tapuyarqan: —¿Ima poderwantaq, o pipa jutinchowtaq, qamkuna keyta rurayarqonki?

8Tseynam Pedru, Espiritu Santupa juntashqa, nerqan: —Pwebluchow mandakoqkuna, Israyelpa awkinninkuna: 9Yákina kanan tapuyámanki juk qeshyeykaq nunata alli rurayanqáta, imanowpa key kachakátsishqa kanqanta, 10musyey katsun qamkunachow, i llapan Israyel nunakunaman, Nasaretpita Jesukristupa jutinchow, peytam qamkuna krusifikayarqeyki i peytam Dyos kawaritsimushqa wanushqakunapita, peypam key nuna nowpeykikunachow yamey keykan. 11Key Jesusmi rechasashqa rumi qamkuna perqaqkunapa, keymi shamushqa eskina rumi kanampaq. 12I ni pí jukchow kantsu salbasyon, manam kantsu juk juti key patsachow nunakunata qoshqa, salbashqa kanantsikpaq.

13Tseynam Pedrupa i Juanpa balorninta rikeykur, mana letrayoq lluta nunakuna kayashqanta musyarirnin, almirakuyarqan; i reqiriyarqan Jesuswan kayashqanta. 14I kachakárishqa nunata rikeykurnam, peykunawan sheykaqta kontran ni ima nita pwediyarqantsu. 15Tseynam mandayarqan konsilyupita yarquyánanpaq; i parlayarqan kikinkunapura, 16nishpa: —¿Imataraq rurashun key nunakunawan? Tseqeypam, peykuna señal rurayanqan rikakushqa, llapan Jerusalenchow, i manam negeyta pwedintsiktsu. 17Imanow karpis, llapan nunakunachow mana musyey kananpaq, mantsatsishun keypita witsepa mana parlapáyananpaq ni juk nunata key jutíchow.

18I qayeykuyarnam, atikayarqan mana parlayánanpaq ni yachatsiyananpaq Jesuspa jutinchow. 19Pedruwan Juan yaskirnin niyarqan: —Jusgayey alliku Dyospa nowpanchow qamkunata wiyayashqeyki, Dyospita puntata. 20Manam jaqita pwediyatsu rikáyanqáta i wiyayanqáta nita.

21Tseynam peykuna jurapárir kachariyarqan, kastigayananpaq mana imata tarir, nunakunareykur; llapanmi Dyosta glorifikáyaq rurakanqanpita, 22key nunachow kachakey milagru rurakashqa kaptin, chusku chunka watayoqmi karqan.

Jurapashqa disípulukunapa Dyosman mañakiyninkuna

23Kachariyaptinnam, shayámorqan kikinkunapaman i willakuyarqan llapanta apun saserdotikuna i awkinkuna niyanqanta. 24I peykunanam, wiyaríkur, juknowlla qapariyarqan Dyosman i niyarqan: “Pwedeq Señor, qanmi kanki Dyos syeluta i patsata, lamarta i tseykunachow llapan kaqkunata ruraq; 25sirwishoqniki Dabidpa shiminpam nirqeyki:

¿Imanirtaq pweblukuna búllakurkuyan,

i nunakuna yarpáyan mana sirweqkunata?

26Key patsa reykuna eyllukáyarqan,

i apukuna eyllukáyarqan Señorpa kontran,

i Kristunpa kontran.

27Rasonpam eyllukáyarqan key markachow Santu Tsuriki Jesuspa kontran, Peytam ungirqeyki, Erodis i Ponsyu Pilátu, gentilkunawan i Israyel pwebluwan, 28makiki i willapákiyniki rurashqa kananpaq uneypita nishqa karqan susedinanpaq. 29Kananqa, Señor, rikey jurapákiyninkunata, qoy sirwishoqnikikunata balorwan parlayananpaq palabreykikunata, 30makikiyta makyareykámuptiki kachakeykuna, señalkuna i milagrukuna rurakánanpaq santu Tsuriki Jesuspa jutinchow.”

31Dyosta mañakuriyaptinnam, eyllukayanqan sityu kuyurerqan, i llapankuna juntashqa kayarqan Espiritu Santuwan i parlayarqan balorwan Dyospa palabranta.

Juknowlla kawey kreyintikunachow

32Atskaq kreyikushqakunanam kayarqan juk shonqulla i juk almalla; i ni meyqanpis nerqantsu kapoqnin kikinpa kanqanta, sinowqa llapan kosaskunatam llapanpaq katsiyaq. 33I jatun poderwan apostulkuna willakuyarqan Señor Jesuspa kawarimiyninta, i atska alli key karqan llapankunaman. 34Tseymi peykunachow ni juk wanéyoq karqantsu, llapan chakran kapoqkuna o wayiyoqkuna, rantikuyaq i rantikuyanqanpa chaninta apayámoq, 35i churayaq apostulkunapa chakinkunaman. I rakipáyarqan kada únuta wanayanqanmannow.

36Tseynam José, peytam apostulkuna jutitsiyarqan Bernabé (key ninanmi, shoqakipa Tsurin), Chipripita, lebita, 37chákran kapuptin, rantikorqan i chaninta apamorqan i apostulkunapa chakinman churarqan.

Currently Selected:

APOSTULKUNA RURAYANQAN RUREYKUNA 4: QUEAN

Highlight

Copy