APOSTULKUNA RURAYANQAN RUREYKUNA 3

Pedru kachakátsin juk kójuta templuchow

1Pedruwan Juan eywayarqan juntu templuman isqon óra, Dyos mañakiy óra. 2I apamushqa karqan juk nuna yurikiyninpita kóju, peytam churayaq kada junaq Ermosa jutiyoq templupa punkunman, yeykoqkunata llimushnata mañakunampaq. 3Pey, Pedruta i Juanta templuman yeykuyananta rikar, rowakurqan llimushnan qoyánampaq. 4Pedru, Juanwan, peyta alleq rikeykur, nerqan: —Rikáyámey.

5Tseynam pey alkábu karqan, peykunapita imallatapis chaskita shuyarar. 6Pedrunam nerqan: —Manam kapamantsu qelley ni óru, peru kapamaqnitam qoq. Nasaretpita Jesukristupa jutinchow, ¡sharkiy i eywey!

7Derécha kaq makipita tsariykur sharkatsirqan; tsey óram sinchiyárirqan chakinkuna i moqunkuna; 8i pintirnam, sharkur purirqan; i peykunawan yeykurqan templuman, purirna, i pintikachar, i Dyosta alabarnin.

9I llapan nunam rikarqan pureqta i Dyos alabaqta. 10Reqiriyarqan Ermosa nishqan templupa punkunchow limushnakur tákoq kanqanta; i mantseypa i espanteypa juntashqa tikrariyarqan, key susedishqanpita.

Pedrupa predikeynin templuchow

11Kachakashqa kóju, Pedruta i Juanta tsarakushqa keykaptin, llapan nuna, mantsakashqa, peykunaman eyllukáyarqan Salomon jutiyoq korredorman. 12Keyta rikeykurnam Pedru, nunakunata yaskerqan: —Israyelita ollqukuna, ¿Imanirtaq keypita almirakuyanki? ¿Imanirtaq rikarayámanki noqakunata, imeyka kikíkunapa pwedeq keyníkunawan o ankupákiywan keyta puritsishqa kayaptínow? 13Abrahampa, Isakpa, i Jakobpa Dyosninmi, teytantsikkunapa Dyosnin, glorifikashqa Tsurin Jesusta, peytam qamkuna entregayarqeyki i negayarqeyki Pilátupa nowpanchow, pey kacharinampaq keykaptin. 14Qamkunaqa Santuta i Jutsannaqtam negayarqeyki, i mañayarqeyki juk wanutsikoqta qoykuyashuneykipaq, 15i wanutsiyarqeyki Kawey Ruraqta, peytam Dyos kawaritsimushqa wanushqakunapita. Keypitam noqakuna testigu kayá.

16»I jutinchow kreyipam, keyta, qamkuna rikáyanki i reqiyanki, jutinta patsakátsishqa. I kreyikiypa qoshqa keyta paqwey kachakeynin llapeykikunapa nowpeykikunachow. 17Kananqa, wawqikuna, káyími mana musyarnin rurayanqeykita, tseynowllam mandakoqnikikunapis. 18Peru Dyosqa tseynowmi kumplishqa llapan profetankunapa shimin uney parlashqannow, Kristum jipananta.

19»Tseymi, wanakuyey i trokakáyey, jutseykikuna ushakashqa kanampaq; Señorpa nowpampita jamakiy tyempukuna shayámunampaq, 20i pey Jesukristuta kachamunampaq, uney willayáshunqeykinow. 21Peytam tseqeypa wanan syelu chaskinan llapan kosaskunapita kutitsi tyempukunakama, Dyos parlanqan santu profetankunapa uney tyempu kayashqanpita. 22Moysesmi nerqan teytakunata: Señor Dyosnikikunam sharkatsimonqa profetata wawqikunapeq, noqatanow; peytam wiyayanki llapan kosaskunata parlapáyashuptiki. 23I llapan nuna taqey profetata mana wiyaqqa, pweblupita qarqushqam kanqa. 24I llapan profetakuna Samuelpita qalleykur, llapanmi parlayashqa, i kanan junaqkunapis willakuyashqam.

25»Qamkunam profetakunapa tsurinkuna kayanki, i paktuta teytantsikkunawan Dyos ruranqanpa, Abrahamta nirnin: Kasteykichowmi bendisishqa kayanqa llapan kastakuna patsachow. 26Qamkunatam puntata, Dyos, Tsurinta pallarkushqa keykar, kachamurqan bendisiyashuneykipaq, kada únu mana alli rureynikikunapita trokakáyáneykipaq.

Currently Selected:

APOSTULKUNA RURAYANQAN RUREYKUNA 3: QUEAN

Highlight

Copy