MALAKÍAS 3
3
1Chaymi Tukuy-atiyniyoq Señor Diosqa nin: Ñoqan kachamunayta ñawpachimuni, paymi ñanta wakichipuwanqa. Maskhashasqaykichis Señor Diosqa ñoqan kani, qonqayllan yupaychana wasiyman chayamusaq. Qankunan munaykushankichis rimanakusqayta willakuq kachapurita, paymi hamunqa, nispa.
2¿Pitaq Señor Diospa hamunan p'unchayta muchunman? Chayri, ¿pitaq pay rikhurimuqtin sayanman? Payqa ch'uyayachiq nina hinan, t'aqsaqkunaq lejian hinan. 3Paymi Levipa mirayninkunata ch'uyayachinanpaq tiyaykunqa, imaynan qolqetapas qoritapas ch'uyayachinku hinatan paykunata ch'uyayachinqa. Chayraqmi paykunaqa Señor Diosman ofrendakunata haywanqaku imaynan haywanankuta hinapuni. 4Chaymi Señor Diosqa Judá aylluq Jerusalén llaqtaq ofrendankunata chaskinqa, imaynan ñawpa p'unchaykuna chaskirqan hinata.
5Tukuy-atiyniyoq Señor Diosmi nin: Ñoqan qankunata juzgaq hamusaq. Hinallataqmi allin testigo kasaq layqakuna contra, wasanchaqkuna contra, llullakuspa juraqkuna contra, llank'apakuqninkuq pagonta suwakuqkuna contra, viudakunatapas, mana tayta-mamayoqkunatapas alqochaqkuna contra, wak llaqtayoqkunapaqpas mana chaninchapuqkuna contra ima. Paykunaqa llapallanmi mana manchakuwankuchu.
Diezmomantawan ofrendamantawan
6Ñoqaqa Señor Diosmi kani, kaqllapunin kashani. Qankunaqa Jacobpa wawallanpunin kashankichis. 7Machulaykichispa p'unchayninkunamantapachan kamachisqay simikunamanta t'aqakushallankichis, manataq chaykunata kasuyta munashankichischu. Kutirikamuwaychis, ñoqapas kutirimullasqaykichistaqmi.
Qankunataq ninkichis: ¿Imaynatataq kutirikamusqaykiku? nispa. 8Tapuykuykichismi: Runari, ¿Diosmanta suwakunmanchu? Manan riki. Chaypas qankunaqa suwakuwankichismi. Ninkichisraqtaq: ¿Imatataq suwakushaykiku? nispa. Suwakushawankichisqa diezmokunatapas ofrendakunatapas mana qowaspaykichismi. 9Arí, llapallaykichismi suwakushawankichis, chaymi ñakasqaykichis. 10Diezmoykichista llapallanta wasiyman apamuychis, chaypi mikhuna kananpaq. Chaywan probaykuwaychis, ahinapin yachankichis hanaq pacha ventanakunata kicharispa saminchata llimp'arishaqta hich'aykamusqaykichischus icha manachus chayta. 11Q'aruq langostatapas hark'apullasqaykichistaqmi chakra ruruta mana mikhurparinankupaq. Uvas chakraykichispas rurunqapunin. 12Hallp'aykichismi munapakuna kanqa, chaymi llapa hatun suyukunaqa nisunkichis: Kusisamiyoqmi kankichis, nispa. Ñoqa Tukuy-atiyniyoq Señor Diosmi chayta nini, nispa.
Llaqtanta Diospa llakipayasqan
13Señor Diosmi nin: Ñoqa contran k'arak simikunata rimarqankichis. Ninkichisraqtaq: ¿Imatan contraykita rimarqayku? nispa.
14Kaytan nirqankichis: Yanqan Dios serviyqa. ¿Ima allinninchispaqtaq kamachikusqanta hunt'ayninchisqa? ¿Ima allinninchispaqtaq Tukuy-atiyniyoq Señor Diospa qayllanpi huchanchismanta llakisqa puriyninchispas? 15Uma hoqariqkunaqa kusisamiyoqmi kanku. Millay runakunapas allillanpunin kanku, Diosta wateqaqkunapas manan imatapas muchunkuchu, nispaykichis, nispa.
16Chaypachan Señor Diosta manchakuqkunaqa paykuna pura rimarqanku, chaytataq Señor Diosqa maki uyarispa yacharqan. Señor Diospa ñawpaqenpitaq huk qelqapi qelqasqa karqan Señor Diosta manchakuspa yupaychaqkunaq sutin, paykunata Señor Dios yuyarinanpaq. 17Tukuy-atiyniyoq Señor Diosmi nin: Ñoqaq unanchasqay p'unchaymi paykunaqa aswan chaniyoq llaqtay kanqaku. Imaynan taytaqa kamachin ruwaq churinta llakipayan, chay hinatan ñoqaqa paykunata llakipayaspa mana muchuchisaqchu. 18Hinaqtinmi qankunaqa wakmanta reparankichis allin runaq millay runaq imaynachus kasqanta, pichus ñoqata serviq, pitaqchus ñoqata mana serviq kasqantapas.
Currently Selected:
MALAKÍAS 3: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.