MALAQUÍAS 1

Israelta Diospa munakusqan

1Kay simitan Señor Diosqa Israel llaqtaman profeta Malaquiaswan#1.1 Hebreo rimaypi Malaquías simiqa “willaq” ninantan nin. willachirqan.

2Señor Diosmi Israel runakunata nin: Ñoqan munakurqaykichis, nispa.

Qankunataq ichaqa ninkichis: ¿Imaynatataq munakuwarqankiku? nispa.

Señor Diostaq nin: ¿Manachu Esauqa Jacobpa wawqen karqan? Chaypas Jacobtan munakurqani, 3Esautataq cheqnikurqani. Orqonkunatan purunyachirqani, suyuntapas ch'inneqpi chacal animalkunapaqmi saqerqani, nispa.

4Esaupa miraynin Edom suyu runakunachus ninqa: Thunisqan kapuyku, chaypas wakmantan thunisqa kasqaykuta sayarichisaqku, nispa chayqa, Tukuy-atiyniyoq Señor Diosmi ninqa: Paykunaqa wakmanta sayarichinkumanmi, ñoqan ichaqa wakmanta thunisaq. Suyunkutan sutichanqaku: “Millay Suyu”, nispa. Paykunatapas ninqakun: Wiñaypaqmi Señor Diosqa qankunapaq phiñakushan, nispa.

5Israel runakunan chayta rikuspa rimankichis: ¡Ancha hatunmi Señor Diosqa Israel suyupipas wak suyukunapipas! nispa.

Sacerdotekunata Señor Diospa phiñarisqan

6Tukuy-atiyniyoq Señor Diosmi sacerdotekunata nin: Churiqa taytantan respetan, kamachipas patronnintan manchakun. Ñoqaqa Taytaykichismi kani, ¿imanaqtintaq mana yupaychawankichischu? Patronniykichismi kani, ¿imanaqtintaq mana manchakuwankichischu? Qankunan pisichawankichis, niwankichisraqtaq: ¿Imapitaq pisicharqaykiku? nispaykichis. 7Qankunaqa altarniypi millakuna qhelli mikhunata haywawaspaykichismi pisichawarqankichis.

Chaypas ninkichisraqtaq: ¿Imapitaq pisicharqaykiku? nispaykichis. Ñoqa Señor Diospa mesaytan pisicharqankichis. 8Ñawsa animalkunata sacrificanapaq haywawankichis chayqa, ¿allillanchu? Wist'u animaltapas, onqosqa animaltapas haywawankichis chayqa, ¿allillanchu?

Riychis, kamachiqniykichisman apaychis. Payqa, ¿kusisqachu chayta chaskisunkichisman? nispa. Ñoqa Tukuy-atiyniyoq Señor Diosmi chayta nini.

9Yaw, sacerdotekuna, Diosmanta mañakuychis khuyapayaykuwananchispaq. Chay hinakunata haywaqtiykichisqa, ¿chaskisunkichismanchu? Manapunin.

Ñoqa Tukuy-atiyniyoq Señor Diosmi chayta nini.

10Tukuy-atiyniyoq Señor Diosmi nin: ¡May allinchá kanman mayqennillaykichispas yupaychana wasiy punkuta wisq'awaqchis chayqa, altarniypi amaña ninata yanqa hap'ichinaykichispaq! Manan qankunawan kusikunichu, manan ofrendaykichistapas chaskisqaykichischu. 11Kay pachantin runakunan hatunchawanku. Hinantinmantan ñoqamanqa inciensowan q'apachimuwanku, ch'uya ofrendakunatapas haywamuwanku. Sutiyqa suyukuna ukhupi ancha hatunmi. Ñoqa Tukuy-atiyniyoq Señor Diosmi chayta nini.

12Qankunan ichaqa pisichawankichis: Qhellin Señor Diospa mesanqa, mikhunanpas millakuymi, nispaykichis. 13Nillankichistaqmi: Ñan chaykunawanqa amikunchisña, nispa qhawarpariwankichis. Ñoqa Tukuy-atiyniyoq Señor Diosmi chayta nini. Apamullawankichistaqmi suwasqa animalta, wist'u animalta, onqosqa animalta, hinaspataq sacrificiopi haywawankichis. Chaykunatari, ¿chaskisqaykichischu? Ñoqa Señor Diosmi chayta nini.

14Wakinmi uywa t'aqanmanta qhali orqo uywanta qowananpaq prometekun, ichaqa ch'achu kaspan ñoqa Señor Diosman mana allin animalta sacrificiopi haywawan. ¡Ñakasqa kachun chay runakunaqa! Ñoqaqa ancha hatun Reymi kani, llapan suyukuna ukhupin runakunaqa manchakuwanku, nispa. Ñoqa Tukuy-atiyniyoq Señor Diosmi chayta nini.

Currently Selected:

MALAQUÍAS 1: QUECUZ

Highlight

Copy