MALAQUÍAS 2
2
1Tukuy-atiyniyoq Señor Diosmi nin: Yaw, sacerdotekuna, kay simiwanmi qankunata anyaykuykichis. 2Qankunaqa manachus maki uyariwankichis, manachus tukuy sonqo yuyaykukuspa yupaychawankichis chayqa, ñakasqaykichismi, saminchasqa kanaykichismantaqa ñakasqan kapunkichis. Runakunaq qankunaman apamusqantaqa ñakaniñan, manan qankunaqa tukuy sonqo yuyaykukuspachu yupaychawankichis.
3Chayraykun mirayniykichista muchuchisaq. Fiestapi sacrificanapaq apamusqaykichis animalkunaq phusnuntan uyaykichisman hich'aykusqaykichis. Qankunapas phusnuwan kuskan picharparisqa kapunkichis. 4Chaymi yachankichis ñoqa kay simiwan anyaykusqayta, Leví ayllu sacerdotekunawan rimanakusqay mana p'akisqa kananpaq. Ñoqa Tukuy-atiyniyoq Señor Diosmi chayta nini. 5Leví aylluwan rimanakuspayqa kawsayta, thak-kayta qonaypaqmi prometekurqani, chaykunatan paykunaman qorqani manchakuwanankupaq. Chaypachan paykunaqa manchakuwarqanku k'umuykamuwarqanku. 6Kamachisqay simitan cheqaqta paykunaqa yachachirqanku, manataqmi mana allinkaqtaqa rimarqankuchu. Sumaqtan chanintan ñoqawan kawsarqanku, askhatataqmi mana chanin ruwaymanta t'aqachirqanku.
7Sacerdotekunaqa allin yachaywanmi rimananku, ñoqata reqsiwanankupaqtaq yachachinanku, munayniyman hina kawsayta yachaqanankupaq, paykunaqa ñoqa Tukuy-atiyniyoq Señor Diospa willaqniykunan kanku. 8Qankunan ichaqa allin ñanmanta t'aqakapurqankichis. Yachachisqaykichiswanmi askha runata misk'achirqankichis. Chhaynapin Leví aylluwan rimanakusqayta waqllichirqankichis.
Ñoqa Tukuy-atiyniyoq Señor Diosmi chayta nini. 9Manan kasuwarqankichischu, llaqtaman kamachikuy simita yachachishaspaykichispas manan llapa runatachu allinpaq hap'irqankichis, chaymi ñoqapas llapa runawan pisichachirqaykichis qhawarparichirqaykichis, nispa.
10¿Manachu llapanchis huk taytallayoq kanchis? ¿Manachu huk Dioslla kamawarqanchis? ¿Imanaqtintaq simi kacharisqanchista mana hunt'anchischu, ñawpa taytanchiskunaq Dioswan rimanakusqanta sarunchaspa? 11Israel suyupi Jerusalén llaqtapi millay-millayta ruwaspan Judá aylluqa Diosman prometekusqanta p'akirqan. Judá runakunan wak dioskuna yupaychaq warmikunawan casarakuspa, Señor Diospa munakusqan ch'uya wasinta qhellicharqan. 12Señor Diosmi chay hina ruwaq runataqa Jacobpa ayllunmanta wikch'unqa, pipas kakuchun, Tukuy-atiyniyoq Señor Diosman ofrenda haywaqpas kakuchun.
13Qankunaqa manan chayllataraqchu ruwankichis. Señor Diospa altarnintan anchata waqapayankichis, khuyaytapunin waqaykunkichis ofrendasqaykichista Señor Dios manaña kusisqachu chaskisqasuykichisrayku. 14Ninkichisraqtaq: ¿Imanaqtinmi manaña chaskiwanchischu? nispa. Qanmi wayna kashaspa casarakuq-masiyki warmiman prometesqaykita mana hunt'arqankichu, chaymi Señor Diosqa mana chaskisunkichu. Payqa warmiykin karqan, paywanmi Diospa qayllanpi rimanakurqanki. 15¿Manachu Diosqa iskayniykichista hukllaman tukuchirqasunkichis cuerpontinta espirituntinta? Chayta ruwaspari, ¿imatataq Diosri munarqan? Dios sonqo wawayoq kanaykichistan munarqan. Nispaqa, sonqoykichista waqaychakuychis, amataq wayna kashaspa casarakusqaykichis warmitapas wasanchaychischu. 16Israelpa Tukuy-atiyniyoq Señor Diosninmi nin: Ñoqaqa cheqnikunin t'aqanakuytaqa, huk qhari warminta chay hinata ñak'arichiqtinqa.
Chhaynaqa, sonqoykichista waqaychakuychis, amataq chay hina mana hunt'aqchu kaychis, nispa.
Taripay p'unchaymanta
17Simiykichiswanmi Señor Diosta sayk'uchirqankichis. Ninkichisraqtaq: ¿Imawantaq paytari sayk'uchirqayku? nispa. Qankunaqa sayk'uchirqankichis: Señor Diosqa pipas mana allinkaqta ruwaqtan allinpaq hap'in, paykunawanmi kusikun, nispa. Hinallataq ninkichis:
¿Maytaq chaninkaqta ruwaq Diosri? nispa.
Currently Selected:
MALAQUÍAS 2: QUECUZ
Highlight
Share
Copy
Want to have your highlights saved across all your devices? Sign up or sign in
Revised Quechua Cuzco Bible © Peruvian Bible Society, 2004.
