GENESIS 47
47
1Joseymi Rey Faraonman rispan willamurqa:
—Taytaymi wawqeykunapiwan, ovejantin, vacantin hinaspa tukuy kapuqnintin Canaan lawmanta chayaramunku hinaspam Gosen lawpi kachkanku —nispan.
2Pichqa wawqenkunatam pusaykurqa Rey Faraonpa qayllanman. 3Faraonmi Joseypa wawqenkunata tapurqa:
—¿Ima oficioyoqtaq kankichik? —nispan.
Chaymi paykunañataq nirqaku:
—Kay sirvientekikunaqa oveja michiqkunam kaniku abueloykumantapuni. 4Kay allpapi *f**yachakuqmi hamurqaniku animalniykupaq mana pasto kasqanrayku. Canaan lawpiqa llumpaymi kachkan muchuy, chayraykum kay runallaykikunaqa Gosen lawpi yachanaykupaq ruegakuykiku —nispa.
5Chaymi Joseyta Faraon nirqa:
—Taytaykiwan wawqekikuna kaypiña kachkaptinqa, 6Egipto allpaqa makikipim kachkan chaynaqa taytaykitawan wawqekikunataqa churamuy Gosen allinnin allpapiyá. Paykunapi yachayniyoq runakuna kasqanta yachaspaykiqa animalniykunamanta cuentallikunanpaqyá churamuy —nispa.
7Joseymi taytan Jacobta Faraonpa qayllanman pusaykurqa hinaptinmi Jacobqa Faraonpaq bendicionta rimarirqa. 8Faraonmi Jacobta tapurqa:
—¿Hayka wataykipitaq kachkanki? —nispan.
9Chaymi Jacob nirqa:
—Ñoqaqa kachkani pachak kimsa chunkan watayoqñam forastero hina purispay, asllata kaspapas sasallatañam kawsarqani, manaraqmi abueloykunapa forastero hina purisqanku watamanqa haypaniraqchu —nispa.
10Chaynata Jacob nispanmi Faraonpaq bendicionta mañakuspan lloqsimurqa. 11Faraonpa kamachisqanman hinam taytanmanwan wawqenkunaman Josey qoykurqa Egipto nacionpi allinnin allpata, chaynapimá Ramses lawpi allpayoq karqaku. 12Joseymi mantienerqa taytantawan wawqenkunata chaynataq taytanpa llapallan familiankunatapas.
Runakunapa favorninpi Joseypa imam rurasqanmanta
13Muchuy llumpayllaña kasqanraykum mikuyqa mana karqachu enteron chay lawkunapi chaymi Egipto nacionpi kaqkunapas chaynataq Canaan lawpi kaqkunapas muchuywan ñakarirqaku. 14Egipto nacionpi runakunaman hinaspa Canaan lawpi runakunaman mikuy rantikusqantam Josey huñururqa qollqeta hinaspam Faraonpa wasinpi waqaycharqa. 15Chaymi Egipto nacionpipas hinaspa Canaan lawpipas qollqe tukuruptin llapallan runakuna hamurqaku Egipto nacionpi Joseyman:
—¡Qowayku mikuyta! ¿Qollqeyku tukurusqanraykuchu wañurusaqku yarqaymanta? —nispa.
16Hinaptinmi Josey nirqa:
—Qollqekichik tukuruptinqa apamuychik animalnikichikta, chaypaqñam mikuyta qosqaykichik —nispa.
17Chay wata Joseyman animalninkuta apamuspankum kawsayta truecarqaku caballokunawan, ovejakunawan, vacakunawan hinaspa asnokunawan. 18Chay wata tukuruptinñataqmi payman rispanku nirqaku:
—Señorllayku, manam llullakuykikuchu, cheqaptam lliw qollqeyku tukurun chaynataqmi animalniykupas qam señorniykupaña, manañam imaykupas kanñachu aswanqa chakraykuwan kikillaykuñam. 19¿Imanasqataq wañurusaqku qayllaykipiqa chaynataq chakraykupas purmanqa? kawsaywanyá ñoqaykuta chaynataq chakraykutapas rantiwayku chaynapim ñoqaykuqa chakraykupiwan Faraonpaña kasaqku mana wañunaykupaq. Qowaykutaq muhuta chakrayku mana purmananpaq —nispa.
20Chaymi Josey enteron Egipto nacionpi chakrakunata rantirurqa Faraonpaq llumpay muchuy paykunapi kasqanrayku. Sapakama runakunam Egipto nacionpi chakrankuta *f**rantikurqaku chaymi chakrakunaqa Faraonpaña rikurirurqa. 21Chaymi enteron Egipto nacionpi runakuna Faraonpa sirvientenña karurqaku. 22Sacerdotekunapa chakrallantañam Joseyqa mana rantirurqachu. Paykunaqa Faraonmanta chaskispa mikusqankuraykum mana *f**rantikurqakuchu chakrankutaqa.
23Chaymi Josey nirqa runakunata:
—Faraonpaqmi rantiruykichik qamkunata chaynataq chakraykichiktapas, kayqayá muhu, kunanyá tarpumuychik chakrapi. 24Cosechaspam ichaqa pichqa costalmanta huknin costalta Faraonman qonkichik, wakin tawa costalñataqmi kanqa chakrapi tarpunaykichikpaq hinaspa qamkunapiwan familiaykichik mantienekunaykichipaq —nispa.
25Paykunañataqmi nirqaku:
—Kawsachiwarqankikum, ama hina kaspaykiyá Faraonpa sirviententa ruraykullawayku —nispa.
26Chaymi Egipto nacionpi chakrakunamanta Josey decretarqa pichqa costalmanta huknin costalta Faraonman qonankupaq, chay decretom karqa kay libro qellqasqa kasqan tiempokama. Sacerdotekunapa chakranmi ichaqa mana Faraonpachu karqa, chayraykum paykunaqa mana pagarqakuchu.
Wañukunallanpaqña Jacobpa imam mañakusqanmanta
27Israelmi Egipto nacionpi *f**yacharqa. Gosen lawpim chakrakunata dueñochakurqa hinaspam mirarqa sinchillataña. 28Jacobmi Egipto nacionpi kawsarqa chunka qanchisniyoq watataraq chaynaqa Jacobpa lliw kawsakusqanmi karqa pachak tawa chunka qanchisniyoq wata.
29Chayaramurqam Israelpa wañukunan punchaw chaymi churin Joseyta qayachimuspan nirqa:
—Ama hina kaspaykiyá makikita churaykuy piernaypa ukunman hinaspayá prometiway kay Egipto nacionpi ama pampawanaykipaq. 30Abueloykuna hina wañukuptiymi kay Egipto nacionmanta paykunapa sepulturanman apawanki hinaspam chaypi pampaykuwanki —nispa.
Chaymi Josey nirqa:
—Nisqaykiman hinam rurasaq —nispa.
31Chaymi Jacob nirqa:
—Juramentaykuway —nispan.
Josey juramentaykuptinmi Israel kumuykurqa sawnanpa hawanman.
Currently Selected:
GENESIS 47: QUEAYA87
Highlight
Share
Copy
Want to have your highlights saved across all your devices? Sign up or sign in
