GENESIS 46

Egipto nacionman Jacob risqanmanta

1Israelmi tukuy kapuqnintin rirqa Beerseba llaqtaman hinaspam taytan Isaacpa Diosninta adorananpaq wañuchirqa animalkunata. 2Israeltam mosqoyninpi Dios rimapayaspan nirqa:

—Jacob, Jacob —nispan.

Payñataqmi nirqa:

—¿Imata Taytalláy? —nispa.

3Chaymi Diosñataq nirqa:

—Ñoqam kani Dios, taytaykipa Diosnin. Ama manchakuychu Egipto nacionman riyta, chaypim hatun nacionta qanmanta hatarichisaq. 4Ñoqam risaq Egipto nacionman qanwan kuska. Ñoqataqmi kutichimusqayki, wañukuptikipas Joseymi kanqa ladoykipi —nispa.

5Chaymi Jacob Beerseba llaqtamanta rirqa. Churinkunam aparqaku taytanku Jacobta chaynataq wawakunatapas mamantinta Faraonpa apachimusqan carretakunapi. 6Jacobmi lliw mirayninkunapiwan rirqaku Egipto nacionman. Animalninkuta qatispam aparqakutaq Canaan lawpi armasqankutapas hinaspam rirqaku Egipto nacionman. 7Jacobmi Egipto nacionman pusarqa qaripas-warmipas churinkunata, qaripas-warmipas willkankunata hinaspa llapallan mirayninkunata.

8Egipto nacionman riq Israelpa mirayninkunam otaq Jacobpa mirayninkunam karqa:

Jacobpa piwi churin Ruben. 9Rubenpa churinñataqmi karqa Hanoc, Falu, Hezron hinaspa Carmi.

10Simeonpa churinkunañataqmi karqa Jemuel, Jamin, Ohad, Jaquin, Zohar hinaspa Canaan warmipa wawan Saul.

11Leviypa churinkunam karqa Gerson, Coat hinaspa Mirari.

12Judapa churinkunam karqa Er, Onan, Sela, Fares hinaspa Zara. Erwan Onanqa wañururqaku Canaan lawpim. Farespa churinkunañataqmi karqa Hezron hinaspa Hamul.

13Isacarpa churinkunam karqa Tola, Fua, Job hinaspa Simron.

14Zabulonpa churinkunam karqa Sered, Elon hinaspa Jahleel.

15Paykunam karqa Jacobpa warmin Leapa wachakusqan mirayninkuna. Paykunam Padan-aram lawpi nacerqaku. Warmi churin Dinatawan yupaptinkum qaripas-warmipas karqa kimsa chunka kimsayoq.

16Gadpa churinkunam karqa Zifion, Hagui, Ezbon, Suni, Eri, Arodi hinaspa Areli.

17Aserpa churinkunam karqa Imna, Isua, Isui hinaspa Beria. Paykunapa paninñataqmi karqa Sera. Beriapa churinkunañataqmi karqa Heber hinaspa Malquiel. 18Paykunam karqa Zilpapi Jacobpa mirayninkuna, Zilpatam Laban qorqa churin Leaman sirvientanpaq, paypa mirayninkunam karqa chunka soqtayoq.

19Jacobpa warmin Raquelpa wawankunañataqmi karqa Joseywan Benjamin. 20Egipto llaqtapi Joseypa churinkuna naceqmi karqa Manaseswan Efrain, paykunam karqa On llaqtapi sacerdote Potifarpa churin Asenatpa wawankuna. 21Benjaminpa churinkunañataqmi karqa Bela, Bequer, Asbel, Gera, Naaman, Ehi, Ros, Mupim, Hupim hinaspa Ard. 22Warmin Raquelpi Jacobpa mirayninkunam karqa chunka tawayoq runakuna.

23Danpa churinmi karqa Husim.

24Neftaliypa churinkunañataqmi karqa Jahzeel, Guni, Jezer hinaspa Silem. 25Paykunam karqa Bilhapi Jacobpa mirayninkuna. Bilhatam Laban qorqa churin Raquelman sirvientanpaq, Bilhapa mirayninkunamá karqa qanchis runakuna.

26Jacobwan Egipto nacionman riqkunam karqaku soqta chunka soqtayoq runakuna. Jacobpa churinkunapa warminkunam ichaqa mana yupasqachu karqa. 27Egiptopi naceq Joseypa churinkunam karqa iskay. Egipto nacionman chayaq Jacobpa llapallan mirayninmi karqa qanchis chunka runakuna.

28Jacobmi churin Judata ñawpachirqa Joseyman chaynapi Gosen lawman pusananpaq chaymi Gosen lawman chayarqaku. 29Joseymi carretanta preparaspan rirqa Gosen lawman taytan Israelta chaskinanpaq. Joseymi taytanta rikuykuspan abrazakuykurqa hinaspam waqarqa unaysu. 30Chaymi Joseyta Israel nirqa:

—Kayqaya kawsachkaqtaraq rikuykuyki, kunanqa wañukusaqñayá —nispa.

31Joseymi nirqa wawqenkunamanwan taytanpa ayllunkunaman:

—Rispayá willamusaq Rey Faraonman: “Canaan lawpi kaq wawqeykunawan taytaypa ayllunkunam chayaramuwan. 32Paykunaqa animalniyoq oveja michiqkunam chaymi ovejankuta, vacankuta hinaspa tukuy kapuqninkuta aparamunku” nispay. 33Rey Faraon qayasuspaykichik “¿Ima oficioyoqtaq kankichik?” nispa tapusuptikichikqa 34ninkichik: “Kay runallaykikunaqa animalkuna uywakuqllam kaniku warma kayniykumantapunipas chaynataq abueloykumantapunipas” nispa. Chaynapim Gosen lawpi *f**yachankichik Egipto runakunaqa oveja michiqkunataqa millakusqanrayku —nispa.

Currently Selected:

GENESIS 46: QUEAYA87

Highlight

Copy