Lucas 7
7
Capitanpa serviqninta Jesús sanoyachisqanmanta
(Mt 8.5-13)
1Runakunaman willayta tukuruspanmi Capernaúm llaqtaman Jesús chayarurqa. 2Chaypim capitanpa ancha kuyasqan serviqnin onqoruspa wañuy patanpiña kachkarqa. 3Jesusmanta rimasqankuta chay capitán uyariruspanmi, judiokunapa kamachiqninkunata kacharqa ruegakamuptinku hamuspan onqoq serviqninta sanoyaykachinanpaq. 4Chaymi Jesuspa kasqanman chayaruspanku anchallataña ruegakuspa nirqaku:
Yanapaykunaykipaq hinam kay capitanqa. 5Payqa nacionninchikta anchata kuyaspanmi sinagogaykutapas ruwachipuwarqaku, nispanku.
6Chaymi paykunawan Jesús rirqa. Ichaqa wasipa hichpanpiña kach-kaptinkum, chay capitanqa amistadninkunawan nichimurqa:
Señorlláy, amayá piñakuychu, manam wasiyman yaykuykamunaykipaq hinachu kallani. 7Chayraykum maskaqnikipas mana kikiychu hamurqani, rimariykuptillaykim serviqniyqa sanoyarunqa. 8Ñoqapas kamachiwaqniykunatam kasukuni, soldadoykunapas kamachiptiyqa kasuwankum. Sichum hukninta “riy” niptiyqa rinmi, huknintapas “hamuy” niptiyqa hamuntaqmi. Serviqniyta imatapas ruwananpaq kamachiptiyqa ruwanmi, nispa.
9Chayna nisqanwan admirakuspanmi qatiqninkunata qawarispan Jesús nirqa:
Israelpipunipas manam kayna iñiyniyuq runataqa tarirqanichu, nispa.
10Chaymi Jesusman taripaqkunaqa wasiman kutispanku, capitanpa serviqninta sanotaña tariykurqaku.
Viudapa wawanta Jesús kawsarichisqanmanta
11Chaykunapa qepantam Jesusqa discipulonkunawan hinaspa achkallaña runakunawan kuska Naín llaqtaman rirqaku. 12Llaqtapa punkunman hichpaykuchkaptinkum, huk viudapa sapallan qari wawan wañuruptin pampaq apachkarqaku. Llaqta runakunapas achkallañam pampaysiq rirqaku. 13Chayta qawaykuspanmi Jesusñataq chay viudata llakipayarispan nirqa:
Ama waqaychu, nispa.
14Hinaspam chakanaman asuykuspa llapchaykurqa, hinaptinmi llapa wantuqkunapas sayarurqaku, chaymi ayata Jesús nirqa:
Yaw joven, qamtam niki, ¡hatariy! nispa.
15Hinaptinmi wañusqanmanta kawsariruspa rimayta qallaykurqa, chaymi Jesusñataq mamanman qoykurqa. 16Chaypi kaqkunañataqmi llumpayta mancharikurqaku, chaymi Diosta kaynata nispa yupaycharqaku:
Chawpinchikpim hatun profeta hatarirun. Diosmi yanapaykunanpaq llaqtanta watukaykamun, nispanku.
17Jesuspa kaykuna ruwasqanmi tukuy Judea lawpi chaynataq muyuriqnin llaqtakunapipas willakusqa karqa.
Bautizaq Juanpa kachasqankunamanta
(Mt 11.2-19)
18Jesuspa tukuy ruwasqankunata Bautizaq Juanpa discipulonkuna yacharuspankum Juanman willarqaku. Juanñataqmi iskay discipulonkunata qayaykuspan 19Jesusta tapuchimurqa:
¿Qamchu Diosmanta hamuq kachkanki, icha huktachu suyasaqku? nispa.
20Chaymi paykunañataq Jesuspa kasqanman rispanku nirqaku:
Bautizaq Juanmi kachamuwanku: “¿Qamchu Diosmanta hamuq kachkanki, icha huktachu suyasaqku?” nispanku.
21Jesusñataqmi chay ratollapi achka runakunata tukuy rikchaq onqoyninkumanta, nanayninkumanta, mana allin espiritupa ñakarichisqanmanta sanoyachirqa, chaynataqmi ñawsakunatapas qawirichirqa. 22#Is 35.5-6.#Is 61.1.Hinaspanmi Juanpa kachamusqankunata nirqa:
Kutispa qawasqaykichiktawan uyarisqaykichikta Juanman willamuychik. Ñawsakunam qawakuchkanña, suchukunam purichkanña, leprawan onqoqkunam sanoyachkanña, mana uyarikuqkunam uyarikuchkanña, wañusqakunam kawsariramunña, wakchakunapas evangeliotam uyarichkankuña, nispaykichik. 23Mayna kusisqam mana iskayrayaspa ñoqapi hapipakuqkunaqa, nispa.
24Juanpa kachamusqankuna kutiruptinkum, Juanmanta rimaspan runakunata Jesús tapurqa:
¿Ima qawaqtaq purunta rirqankichik? ¿Wayrapa kuyuchisqan soqosta qawaqchu? 25¿Pi qawaqtaq rirqankichik? ¿Allin pachawan pachasqa runata qawaqchu? Allin pachawan churakuq runakunaqa fiestakunapi hinaspa reykunapa palacionpim kachkanku. 26Chaynaqa, ¿pi qawaqtaq rirqankichik? ¿Huk profetata qawaqchu? Arí, cheqaptapunim nikichik, payqa profetamantapas masmi. 27#Mal 3.1.Juanmantam qellqasqa kachkan:
“Ñoqam willakuqniyta qanmanta puntata kachasaq,
paymi ñannikita allichanqa”, nispa. 28Cheqaptapunim nikichik, warmimanta nacemuq runakunamantaqa manam pipas Bautizaq Juan hinaqa kanchu. Chaywanpas Diospa munaychakuyninpi kaqkunamantaqa taksan kaqmi Juanmantapas aswan hatunqa.
29 #
Mt 21.32; Lc 3.12. Juanpa willakuyninta uyariqkunaqa, Romapaq impuesto cobraqkunawan kuskam Juanwan bautizachikurqaku, chaynatam Diospa kamachikuyninta cumplirqaku. 30Fariseokunawan Diospa leynin yachachiqkunam ichaqa mana Juanwan bautizachikurqakuchu, chaynatam paykunapaq Diospa imam munasqanta wischupakurqaku. 31Jesusqa nirqataqmi:
¿Imamantaq tupachiyman kunan tiempo miraykunata? ¿Imamantaq rikchakunmanku? 32Paykunaqa rikchakun plazakunapi pukllaspan qayaykachanakuq warmakunamanmi. Paykunam ninakunku: “Qenata tocaptiykupas manam tusurqankichikchu, aya takita takiptiykupas manam waqarqanki-chikchu”, nispanku. 33Bautizaq Juanmi hamurqa, payqa manam mikurqachu nitaqmi vinotapas tomarqachu, hinaptinmi nirqankichik: “Payqa demoniopa huntasqanmi”, nispaykichik. 34Runapa Churin hamuruspa mikuptin vinotapas tomaptinñataqmi ninkichik: “Kay runaqa mikuysapa hinaspa vino upyakuqmi, impuesto cobraqkunapa chaynataq huchasapakunapa amistadninmi”, nispaykichik. 35Diospa yachayninqa churinkunapa ruwayninpim qawachikun, nispa.
Jesusman perfumeta huk warmipa tallisqanmanta
36Hukkaqnin fariseom Jesusta con-vidarqa wasinpi mikuykamunanpaq, chaymi rispan mesapi tiyaykurqa. 37#Mt 26.7; Mr 14.3; Jn 12.3.Hinaptinmi chay llaqtapi kaq huchasapa warmiñataq, fariseopa wasinpi Jesús kasqanta yacharuspan, rumimanta pomochapi perfume aparisqa chayaramurqa. 38Hinaspanmi waqaspan Jesuspa qepanpi qonqorakuykuspan chakinkunata weqenwan mayllaspan chukchanwanñataq chakichirqa, hinaspam muchaykuspan perfumeta talliykurqa. 39Convidaqnin fariseoñataqmi chayta qawaykuspan piensarqa: “Sichum kay runa cheqaptapuni profeta kaspanqa, yachanmanmi imayna clasem kay llapchaqnin warmi kasqanta, kay warmiqa huchasapam”, nispan. 40Chaymi Jesusñataq nirqa:
Simón hukmi ninay kachkan, nispa.
Simonñataqmi nirqa:
Yachachikuq, chaynaqa niykuwayá, nispan.
41Hinaptinmi Jesusñataq nirqa:
Qollqe prestaq runatam iskay runakuna debekurqa. Hukninmi prestakurqa pichqa pachakta, hukninñataqmi pichqa chunkallata. 42Mana imaynapas pagayta atiptinkum iskayninta pampachaykurqa. Chaynaqa, ¿mayqanninkutaq masta kuyanqa? nispa.
43Chaymi Simonñataq nirqa:
Ñoqamantaqa achkanpi debekuqmi mastaqa kuyanqa, nispa.
Hinaptinmi Jesusñataq nirqa:
Allintam nirunki, nispa.
44Chaymantam warmita qawarispan Simonta nirqa:
¿Qawachkankichu kay warmita? Wasikiman yaykuykamuptiyqa manam yakutapas chakiyta mayllakunaypaq qoykuwarqankichu, kay warmim icha-qa weqenkunawan chakiykunata mayllaykun, hinaspam chukchanwan chakiykachin. 45Manam muchaykuwarqankichu, kay warmim ichaqa yaykuykamusqanmantapuni chakiykunata muchapayachkan. 46Aceitewanpas manam umaymanqa tallirqankichu, kay warmim ichaqa perfumewanraq chakiykunaman talliykun. 47Chayraykum niki, achka-achka huchankunam pampachasqa, chayraykum payqa llumpayta kuyawan. Pipas pisilla huchanmanta pampachasqam ichaqa pisillatataq kuyakunpas, nispa.
48Chaynata niruspanmi warmitañataq nirqa:
Huchaykikunaqa pampachasqañam, nispan.
49Jesuswan kuska convidasqa kaqkunañataqmi ninakurqaku:
¿Pitaq kay runaqa huchakunatapas pampachananpaqqa? nispanku.
50Jesusñataqmi warmita nirqa:
Iñiynikim salvarusunki, kunanqa hawkañayá pasakuy, nispan.
Currently Selected:
Lucas 7: RCQ12
Highlight
Share
Copy
Want to have your highlights saved across all your devices? Sign up or sign in
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
