Lucas 5

Achkallataña challwarusqankumanta

(Mt 4.18-22; Mr 1.16-20)

1 # Mt 13.1-2; Mr 3.9-10; 4.1. # 5.1 Genesaret qochapa huknin sutinqa Galilea qocham. Genesaret qochapa patanpi Jesús kachkaptinmi, llapa runakuna huñunakaramurqaku paytapas kichkichanankukama Diospa palabranta uyarinankupaq. 2Hinaptinmi Jesusqa iskay barcakunata qochapa patanpi rikururqa. Challwaqkunañataqmi barcankumanta lloqsispa mallankuta mayllachkarqaku. 3Chaymi Jesusqa Simón Pedropa barcanman qespiykuspan payta ruegakurqa uku lawman tanqariykunanpaq, hinaspanmi barcapi tiyaykuspan runakunata yachachirqa. 4Rimayta tukuruspanmi Simonta nirqa:

Uku lawman barcaykita apaspa challwanaykichikpaq mallaykichikta wischuychik, nispa.

5 # Jn 21.3. Chaymi Simonñataq nirqa:

Yachachikuq, tukuy tutam llamkarqaniku, ichaqa manam hukllatapas hapirqanikuchu, ichaqa nisqaykiman hinayá mallata wischumusaq, nispa.

6 # Jn 21.6. Chaynata ruwaspankum mallankupas yaqa llikinankama achkallataña challwarurqaku. 7Hinaspam yanapachikunankupaq señaschaspanku huknin barcapi challwaqmasinkunata qayakurqaku, chaymi paykuna asuykuptinku yaqa yakuman chinkaykunankama iskaynin barcaman challwata huntarachirqaku. 8Chayta Simón Pedro qawaykuspanmi Jesuspa ñawpaqninpi qonqorakuykuspan nirqa:

Señor, ñoqamanta asurikuy, huchasapa runam kallani, nispan.

9Simonmi llamkaq masinkunapiwan achkallataña challwarusqankurayku mancharikurqaku. 10Mancharikurqataqmi Simonpa challwaqmasin Juanwan Jacobopas, paykunaqa Zebedeopa churinkunam karqaku. Chaymi Simonta Jesús nirqa:

Ama manchakuychu, kunanmantaqa runakunatañam challwamunki, nispa.

11Chaymi qochapa patanman barcankuta chayarachispanku, chaypi tukuy imankuta saqespa Jesusta qatikurqaku.

Leprawan onqoqta Jesús sanoyachisqanmanta

(Mt 8.1-4; Mr 1.40-45)

12Huk kutipim Jesús huk llaqtapi kachkarqa, chaymi leprawan onqoq runa hamuruspan Jesuspa ñawpaqninpi qonqorakuykuspan ruegakurqa:

Señorlláy, munaspaykiqa sanoyaykachiway, nispan.

13Jesusñataqmi llapchaykuspan nirqa:

Arí, munanim, sanoyayña, nispa.

Hinaptinmi chaypunilla chay lepra onqoynin chinkarurqa. 14#Lv 14.1-32.Chaymi Jesús nirqa:

Amam pimanpas willakunkichu, aswanqa sacerdoteman rispaykim paywan qawachikamunki, hinaspam sanoña kasqaykita yachanankupaq ofrendata qomunki Moisespa kamachisqanman hina, nispa.

15Chaywanpas Jesusmanta rimay aswan-aswan uyarikuptinmi, payta uyarinankupaq hinaspa onqoyninkumanta sanoyachinanpaq llapa runakuna huñunakamurqaku. 16Jesusmi ichaqa mana runapa kasqan chunniqkunaman asurikuspan Diosta chaypi mañakuq.

Suchu runata Jesús sanoyachisqanmanta

(Mt 9.1-8; Mr 2.1-12)

17Huk punchawmi Jesús yachachichkarqa, chaypitaqmi fariseokunawan Diospa leynin yachachiqkunapas tiyachkarqaku, paykunaqa Galilea lawpi hinaspa Judea lawpi llaqtakunamantawan Jerusalenmantam hamurqaku. Diospa atiyninmi Jesuswan karqa onqoqkunata sanoyachinanpaq. 18Chaypi kachkaptinmi huk runakuna suchuta chakanapi aparisqa chayaramurqaku, hinaspankum chay suchuta Jesuspa ñawpaqninman apaykuyta munarqaku. 19Ichaqa achka runakuna kasqanraykum mana apaykuyta atirqakuchu, hinaspam wasipa qatanta toqoramuspanku chaynintakama Jesuspa ñawpaqninman uraykachirqaku. 20Chaymi Jesusñataq paykunapa iñiyninta qawaykuspan chay suchuta nirqa:

Huchaykikunaqa pampachasqañam, nispa.

21Diospa leynin yachachiqkunawan fariseokunañataqmi kaynata piensarqaku: “¿Pitaq kay runaqa karqa Diospa contranpi rimananpaqqa? Diosllam huchataqa pampachan”, nispanku.

22Chayna piensasqankuta yachaspanmi Jesusñataq nirqa:

¿Imanasqataq chaynakunata piensankichik? 23¿Mayqantaq fácil kanman: “Huchaykikunaqa pampachasqañam” niychu, icha: “Hatarispayki puriyña” niychu? 24Kunanmi yachankichik runapa Churinqa huchakunata pampachananpaq kay pachapi atiyniyuq kasqanta, nispan.

Chaynata niruspanmi suchutañataq nirqa:

Qamtam niki, hatarispayki chakanaykita hoqarispa wasikiman ripukuy, nispa.

25Suchuñataqmi llapallanku qawachkaptinku chaylla hatariruspan chakananta hoqarispan Diosta yupaychastin wasinman ripukurqa. 26Chaymi lliw admirakuspanku Diosta yupaycharqaku, hinaspam ancha mancharisqallaña nirqaku:

¡Kunanqa admirakuypaq kaqkunatam rikuykunchik! nispanku.

Leviyta Jesús qayasqanmanta

(Mt 9.9-13; Mr 2.13-17)

27Jesusmi chaymanta pasaspan rikururqa Romapaq impuesto cobraq Leviyta, impuesto cobrananpi tiyachkaqta, hinaspanmi nirqa:

Qatiway, nispan.

28Chaymi Leviyqa tukuy imantapas saqeruspan Jesusta qatikurqa.

29Paymi Jesuspaq hatun convidota wasinpi ruwachirqa. Hinaptinmi Romapaq impuesto cobraqkunawan achkallaña runakuna paykunawan kuska mikurqaku. 30#Lc 15.1-2.Chaymi Diospa leynin yachachiqkunawan fariseokunañataq Jesuspa discipulonkunapa contranpi rimaspanku nirqaku:

¿Imanasqataq qamkunaqa impuesto cobraqkunawan hinaspa huchasapakunawan kuska mikuspa upyachkankichik? nispanku.

31Hinaptinmi Jesusñataq nirqa:

Sano runakunaqa manam medicotaqa necesitankuchu, aswanqa onqoqkunallam. 32Ñoqaqa manam sano runakuna qayaqchu hamurqani, aswanqa huchasapakunata qayaqmi, chaynapi Diosman kutirikunankupaq, nispa.

Ayunomanta tapukuy

(Mt 9.14-17; Mr 2.18-22)

33Wakin runakunañataqmi Jesusta tapurqaku:

¿Imanasqataq Bautizaq Juanpa chaynataq fariseokunapa discipulonkunaqa chaylla-chaylla ayunanku hinaspa Diostapas llumpayta mañakunku, discipuloykikunañataq mikuyllapi hinaspa upyayllapi kakuchkanku? nispanku.

34Hinaptinmi Jesusñataq nirqa:

¿Yaqachu paykunawanraq novio kachkaptin casamientoman riq runakunata ayunachiwaqchik? 35Ichaqa chayamunqam punchaw paykunamanta novio qechusqa kananpaq, hinaptinmi ichaqa ayunanqaku, nispa.

36Jesusqa kay rikchanachiytapas nirqataqmi:

Manam pipas mawka pachataqa musoq pachata llikispanqa remiendanmanchu. Chaynata ruwaspanqa musoq pachatam yanqacharunqa, mawka pachaman serasqanpas manataqmi tupanqachu. 37Manataqmi pipas mawka odrekunamanqa mana poqosqa vinotaqa hillpunmanchu, yanqañataqmi chay vino poqoruspan mawka odrekunata toqyarachinman, hinaptinmi vinopas usunman, chaynataqmi odrekunapas mana valeqña kanman. 38Mana poqosqa vinotaqa musoq odrekunamanmi hillpuna. 39Manataqmi pipas poqosqa vinota upyachkaspaqa, mana poqosqa vino upyaytaqa munanmanchu, aswanqa ninqam: “Poqosqa vinom aswan allinqa”, nispan.

Currently Selected:

Lucas 5: RCQ12

Highlight

Copy