Mataos 14

Efie mo Yʉanes Ndubʉr

(Markus 6.14-16; Lʉkas 9.7-9; 3.19-20)

1É til molu yaa, njwɨɨbʉr Erod Antɨpas ze joʼo lɔɔ lé ejʉŋla mpʉ kol eboʼ é lɔb bɨsyɛɛla mo Yesʉs. 2Nye ntɔʼ lɛɛ e l'osyɛl o mosa be ó: «Yé ó Yʉanes Ndubʉr. Nyi pàh é foo! Ebe no ó nye mu lé esa mosima monɨ ɨ.»

3-4Tina, yé ó, Erod ó b'a naʼ Yʉanes mobo é nyʉl, kaʼ nye, gba nye é mbʉʼ. Nye a sa no ó, é lɔb mo Erodiad, myaa ncyom we Filip. Yʉanes ze taare lé elɛɛ-lɛɛ e nye ó: «Yé mpene ó, go l'atiʼe e nye!» 5Erod a be-be e gwɨma ó, nye jʉ ó Yʉanes. Sa gwar, nye a be ó lé ekpɛɛ ntuntuma bʉr, ebe, bɨbɛh, bé a láa ó, Yʉanes, nye ó ngwiha mɨlɔb.

6Dam be no, é jɔʼ moho zɔɔ ebyɛl mo Erod, wé a pyal ɨ, sile mo Erodiad, wé ntɔʼ fulo é duò zɔɔ, taare lé ebwal, Erod ze bul kpɛl zɔɔ nye a dɨ tiʼle e. 7Nye ze kɛʼ nye, le ede mɨnkɛla ó, sa yiyɛh nye ójaʼ ɛ, nye óbana dwe nye ya. 8Sile waa ze to dî nyɔŋ we motɨɨ. Pie tɨ, nye e njwɨɨbʉr ó: «Gbaʼ me lʉ mo Yʉanes Ndubʉr kɛla wâʼ é mpyaa.»

9Njwɨɨbʉr ntɔʼ liʼ é gœʼra-gœʼra e mocyɛʼ mo nyʉl ebe sa esehe laa, lé a jaʼ nye e. Sa gwar, ebe mɨnkɛla nye a pa de e, le ojyoo onɨnɨ bé a be é teble e, no ó nye a fuo ka lomo ó, bé dweʼ sile we waa lʉ mo Yʉanes. 10Nye ze lomo mʉr é mbɛr mɨmbʉʼ lé eto tiʼe Yʉanes lʉ. 11Bé ntɔʼ ze e lʉ we é mpyaa, ze dweŋɔ esehe laa. Nye ze to cen we nyɔŋ we. 12Ompʉn mo Yʉanes ze nkɛɔ muu we, to dɨlɔ. Pie tɨ, bé ntɔʼ to lɛɛ Yesʉs sa yiyɛh yé a syɛɛlɨ ɨ.

Yesʉs lé edwe bʉr otɔɔyin otɛn mode

(Markus 6.30-44; Lʉkas 9.10-17; Yʉanes 6.1-15)

13Ejoʼo Yesʉs a joʼo mpaŋla waa ɛ, nye ntɔʼ mʉa tɨ, kable é byɛl, ze to é lʉn nko bé a be, bé mu bé ome e. Dam be no, é jɔʼ bʉr, bé a be si gʉa no e, bɨmpampaʼ bɨ bʉr é buobuo, byé ntɔʼ ze tɨbla é bɨnkana, ze duŋɔ Yesʉs e mokʉ. 14Jɔʼ Yesʉs a fulo é byɛl, bee mpampaʼ bʉr nɨnɨ yaa ɛ, leme we kʉ ze jwɨʼ be nkoo. Nye ze tiʼ mɨsyoblʉ myɔɔ mimyɛh.

15Mpʉ yé a be, yé mu bii kʉʼ ɨ, ompʉn be ntɔʼ dihle fum nye a be e. Bé e nye ó: «Bɨna ga bé wâʼ ó, é lʉn. Edurʉ, lé mu ó lé emara bɨna ga. Buula ntuntuma bʉr yi, bé fiʼɨ, to é mokwar nko bé óbee sa ede bé óbɛm bwam ɨ.» 16Yesʉs ze lɛɛ e be ó: «Yé ajɨ ó, bé toʼ gumo mpoʼ. Bɨn bʉr o tɨ, dweʼ ga be mode.» 17Bé ze lɛɛ e nye ó: «Gwɔɔ lɛɛ ó, bɨh dweʼ be mode. Zê go agʉa ó, bɨh bé wâʼ ó, njɨ e bɨbler bɨtɛn e l'ofu oba ɛ?» 18Nye ó: «Ntaʼ ga me e bya wâ.»

19Pie tɨ, nye ze lɛɛ e ntuntuma bʉr ó, yé diʼe si é bwaʼbwaʼ jahla yaa. Tɨʼ yé a be ó e bwa bɨka ajaa kʉ. Nye ntɔʼ nʉa bɨbler bɨtɛn e l'ofu oba baa, ze bɨn mih kʉ, dwe Zyɛm ekiba, ze pɛ̂ʼ bɨbler byaa bɨpeh, bɨpeh, ze dwe ompʉn be bya. Bé ntɔʼ kab ntuntuma bʉr bɨbler byaa. 20Bʉr bɨbɛh ze de é de de, díle. Bɨpeh bɨbler byé a kur si ɨ, bé a be ó si syɛŋ bye, loŋlo bɨkar ewʉm e bɨba. 21Bʉrʉm bé a de mode maa ɛ, bé a be ó kwoʼ be otɔɔyin otɛn, aláa bʉba e bwɔɔncyom.

Yesʉs lé ekœʼ é modibe kʉ

(Markus 6.45-52; Yʉanes 6.16-21)

22Agum bɛa nɛʼɛ, Yesʉs ze tine ompʉn be ó, bé kabla é byɛl, bé à samle, to é l'ebʉm e maŋ e nkɔm-nkɛɛ. É jɔʼ yaa, nyɛɛ óliʼ lé ebuulo ntuntuma bʉr. 23Jɔʼ nye a be si buulo be e, nye ntɔʼ ze bere é l'ecwɨʼ kʉ, lé eto jwɨʼla e Zyɛm. Mpʉ dobo, lé a be, lé mu si lɨŋa ɛ, nye a kʉ ka liʼ gʉʼ ó nye ome. 24Byɛl, wé a be ó, wé mu é ncɛra e l'ebʉm. Oboʼo o maŋ ze bul yeŋe byɛl, ebe, pubo, wé a duho ó, nko bé a be lé ejɨ to e. 25Ngbaa le eka be, mɛn, wé mu lé elama nɛʼɛ, nyi ze du be, lé eto le ekœʼ é modibe kʉ! 26Mpʉ ompʉn be, bé a bee nye lé ekœʼ é modibe kʉ ɨ, mopɨʼ ze dim be é mɨlʉ. Bé ze bul joʼo bʉa. Bé ó: «Ndim ó wi!» Bʉŋɔ bɨtim. 27Cye e cye yaa, Yesʉs, nye e be ó: «Tʉmɨ ga monyʉl. Yé ó me! Ajoʼo ga bʉa.»

28Pyɛr ze lɛɛ e nye ó: «Da, yé be ó, yé ó go cyecye nɛʼɛ, jeba me, ó me ntaʼ nko go ndɨ ɨ, kœʼ é modibe kʉ.» 29Yesʉs ntɔʼ lɛɛ e nye ó: «Ntaʼ be!» Pyɛr ntɔʼ fulo é byɛl, ze taare cyen é modibe kʉ, to nko Yesʉs a be e. 30Ejʉʼra nye a kʉ jʉʼra pubo e, nye ntɔʼ joʼo bʉa, ze taare lé emyaa, le ede modibe le etime. Nye ntɔʼ lwib lé eyɨm twii ó: «Eʼ! Da, tiʼɨ me!» 31Cye e cye yaa, Yesʉs ntɔʼ syɛm mbo, mɛr nye. Nye e nye ó: «A twaʼbe buʼo yo ɛ! Ebe yé go lé esoŋlo me e?» 32É mpʉ bé a to kable é byɛl ɨ, pubo ntɔʼ sie. 33Bʉr o b'a be é byɛl ɨ, bé ze dwiibɨ Yesʉs. Bé e nye ó: «Go ó kʉ be Mwan mo Zyɛm cyecye!»

Yesʉs lé etiʼ mɨsyoblʉ é Genezarɛt

(Markus 6.53-56)

34Bé ntɔʼ ze sil ntaa maŋ, to pyal é l'ebʉm e Genezarɛt. 35Bʉr o lal waa ntɔʼ ze dweʼɔ Yesʉs, ntɔʼ cenɔ bʉr é lal e lal wɛh, lé eto le etuno epyal le. Bʉr o lal, bé ntɔʼ ze nye e mɨsyoblʉ mimyɛh. 36Bé ze jwɨʼla e nye ó, nye mɛʼla ó, bé kuna sɔʼɔ njɨ e mozeʼle mo kan we. Mʉr nyiwɛh a kuna e me e, a be ó si tiʼe.

Currently Selected:

Mataos 14: ozmBad

Highlight

Copy