Mataos 15

Motum bɨmpam bɨ oYʉden

(Markus 7.1-13)

1É til molu yaa, oFarizyɛŋ bé e l'oyeʼle o motie, bé ze duho Yerʉsalɛm, ntɔʼ pyal gumo Yesʉs a be e. Bé ze dî e nye ó: 2«Ebe yé ompʉn bo ndɨ entaa mɨnjwɨr bɨmpam ga bina, byé a ntɛŋ bɨna mi ɛ? Ebe, bé abe lé etaare jwɨ̀ɨ mobo é jɔʼ bé lé ejɨ de e.» 3Yesʉs ze bɨha e be ó: «Ebe yé bɨn ndɨ entaa motie mo Zyɛm ɨ? Ebe yé bɨn lé ebula du njɨ mɨnjwɨr bɨmpam bin byé a ntɛŋ bɨn ɨ? 4Ebe, Zyɛm a lɛɛ ó: “Dwaaba sɔŋ e nyɔŋ go.” Nye a lɛɛ nteme ó: “Mʉr lé ekáale sɔŋ, nkʉ nyɔŋ ɨ, nye ejala ó jʉŋɔ.” 5To kœb ó, bɨn bɛɛ, bé elɛɛ ó, mʉr nyiwɛh óbɛm lɛɛ e sɔŋ e nyɔŋ ó: “Sa bɨn ngbaa bi ó, yé diʼe bɨn e nyɔm ɨ, me ófuʼla dwe Zyɛm ya!” 6É mbea win, waa si sa no e, nye abe e nkul eka gul sɔŋ e nyɔŋ e tɨ. No yé ó: é jɔʼ bɨn ndɨ adwaabe osɔŋ e l'onyɔŋ bɨn ɨ, bɨn bé egbɛɛ lɔɔ Zyɛm é l'efu le edu mɨnjwɨr bɨmpam bin byé a ntɛŋ bɨn ɨ! 7Bɨn baanya-bɨkʉʉŋʉ ba, gʉŋa ga ó, Ezayi a be ó si kʉ gʉa gwih mɨlɔb min é jɔʼ nye a bɛa lɛɛ ó:

8“Zyɛm, nye elɛɛ ó:

‘Kul yi, yé ekʉ dwiibɨ me ó, njɨ é bɨbɨʼ bɨ nʉm kʉl.

To kœb ó, mɨleme myɔɔ, mi bul cɛra e me.

9Mbi bʉr baa lé edwiibɨ me e,

wé ó kʉ be tɨtoʼo, abe ba e nyɔm,

ebe, sikʉlʉ bé lé edweela paʼra wɔɔ ɛ, yé ó njɨ yaa bʉr.’”»

Sa ndɨ elœʼ mʉr é mih mo Zyɛm ɨ

(Markus 7.14-23)

10No ó Yesʉs a jebe ntuntuma bʉr, ze lɛɛ e be ó: «Mbɛngɛɛ, bɨn bé à kʉ gʉa joʼlo ga sa yi. 11Sa ndɨ elœʼ mʉr é mih mo Zyɛm ɨ, yé abe yaa mʉr lé ede e. Sa ndɨ elœʼ mʉr é mih me e, yé ó yaa lé eduho mʉr waa é nʉm ɨ.»

12Ompʉn mo Yesʉs ze dihle fum nye a be e. Bé e nye ó: «Zê gɨ gʉa ó, sa go lɛɛ oFarizyɛŋ nɨ, yé si bɨm be ebɔʼ é mɨleme ɛ?» 13Nye ntɔʼ bɨha e be ó: «Mpœʼ yiyɛh Sɔŋ wam ndɨ é jobo kʉ ɨ, a baabè e, yé óduŋɔ ndwe e mɨkaale mye mimyɛh. 14Birɨ ga be: bé ó ontim lé eliʼle bʉʉ bʉr é zi ɨ! ǃƗ ntim si liʼle nuu ntim é zi nɛʼɛ, bɨbɛh oba, bé ólʉŋa é bɨ.»

15No ó Pyɛr a ze nʉa lwib. Nye e nye ó: «Pɛʼla bɨh kɨkɛna nɨ.» 16Yesʉs ntɔʼ lɛɛ ó: «Zê bɨn dina ó mɨmiʼ ɛ? 17Zê bɨn dina ó, apa gʉa ó, sa mʉr lé egba é nʉm ɨ, yé elaa ó, é mo tʉŋlʉ, pyal kʉl, ntɔʼ kur é duʼ ɛ? 18To kœb ó, bɨsa lé eduho é nʉm ɨ, byé eduho ó, é leme mʉr tʉŋlʉ. Bɨsa byaa ó ndɨ elœʼ mʉr é mih mo Zyɛm. 19Ebe, bɨsa bɨ ebebe bibyɛh, byé eduho ó, é leme. Byé ó: bɨbebebebe mɨpɛhla, ejwɨɨ e bʉr, mɨfyɛba, bɨmala, díbe, ebuʼo mɨɔ go mʉr mɨlɔb ndwe e movoʼ. 20Bɨsa bɨnɨ bibyɛh ó ndɨ elœʼ mʉr é mih mo Zyɛm! Ntʉʼ lɔb ede apa jwɨ̀ɨ mobo ndɨ elœʼ mʉr é mih me.»

Mʉma bɨkul lé ejyɛʼ taa buʼo ye boo Yesʉs

(Markus 7.24-30)

21No ó Yesʉs a duho é gumo yaa, ze to é nkɔra nkana Tir e nkana Sidɔn. 22Ngbaa le eka be nɛʼɛ, nuu mʉma Kanan ze duho kwar waa, ze lwib lé eyɨm twii ó: «Da ɔɔ! Mwan mo David ɛɛ! Jwɨʼɨ me nkoo! Sile wam, wi bul sia e l'eleme!» 23Yesʉs a baabɨha e nye. Ompʉn be ze dihle kunokuno e Yesʉs. Bé e nye ó: «Lɛŋɨ nye ó, nye toʼ, ebe, nye edu bɨna ga e bɨtim.» 24Yesʉs ze bɨha e be ó: «Me a kʉ ka lomɔ ó njɨ é l'efu e bɨntœme bɨ lal Ɨzraɛl mu si pɔhba, to dim ɨ.» 25Mʉma waa, ntɔʼ bɨʼ mpom we si é mih me. Nye e nye ó: «Da, kɛmɨ me.» 26Yesʉs ntɔʼ bɨha e nye ó: «Yé ambɨa ó, mode lé ejala le edweŋɔ bwan ɨ, mé bula dweŋɔ bwa ompye.» 27Mʉma, nye e nye ó: «Da ɛɛ, yé ó no! Dam be no, bwa ompye, bé esa nteme ó, de bɨtwiʼ mode lé ekur si teble é mbɛr mo sɔŋ wɔɔ ɛ.» 28Yesʉs ntɔʼ lɛɛ e mʉma waa ó: «Mʉma nwa, gɨ kʉ jyɛʼ taa buʼo yo boo me! Yé saŋɔ go mpʉ gwɨma yo ndɨ ɨ!» Taare é jɔʼ gwar yaa, sile we, wé ntɔʼ tiʼe.

Yesʉs lé etiʼ mɨsyoblʉ é nkpah maŋ mo Galɨle

(Markus 7.31-37)

29Yesʉs ntɔʼ duho é gumo yaa, ze to nkpah maŋ mo Galɨle. Nye ntɔʼ bere é l'ecwɨʼ kʉ, di si. 30Ntuntuma bʉr, yé ntɔʼ fwal gumo nye a be e, e mɨsyoblʉ é buobuo: baa b'a be lé etɨa ɛ, ontim, baa b'a be e bɨjyɛm ɨ, bɨgʉ́ʼ, le myʉʉ mɨsyoblʉ é buobuo. Bʉr o b'a ze e mɨsyoblʉ myaa ɛ, bé a fil-fil mye ó, é mokʉ me si, nye ze tiʼ-tiʼ mye. 31Ntuntuma bʉr, yé ze jehe lé ebee bɨgʉ́ʼ mu lé elwib; baa b'a be e bɨjyɛm ɨ, mu mbɨmbɨa; baa b'a be lé etɨa ɛ, mu ó lé ekœʼ mbɨmbɨa nteme; ontim mu ó lé ebee. Bé ntɔʼ dwiibɨ Zyɛm mpoʼo Ɨzraɛl.

Yesʉs lé edwe bʉr otɔɔyin onâ mode

(Markus 8.1-10)

32Yesʉs ze jebe ompʉn be, ntɔʼ lɛɛ e be ó: «Me ejwɨʼ bʉr baʼ nkoo, ebe, bɨna ga e boo nɔɔ, bɨ di molu molɛl. Bé aka be e sa ede. Bé mu nteme ó, si cyɛʼ e za. No ó, me akpɛl ó, bé fiʼɨ no. Nuu mʉr amu jaa to nkaŋa si temezi é l'eguu e za.» 33No ó ompʉn be, bé a dî e nye ó: «A bɨh bé ópa kʉ kœb bim mode dwe bim ntuntuma bʉr yiʼ nko? É lʉn bɨna ga ndɨ yi?» 34Yesʉs ze dî e be ó: «Bɨn bé e bɨbler bɨntɨɛ?» Bé ntɔʼ bɨha ó: «Tambɛl, ka kɛl bwa ofu abuo.» 35Nye ntɔʼ lɛɛ e ntuntuma bʉr ó, bɨbɛh diʼe si. 36Nye ntɔʼ nʉa bɨbler tambɛl byaa le bwa ofu baa, dwe Zyɛm ekiba, ntɔʼ pɛ̂ʼ bye bɨpeh, to le edwe ompʉn be bya. Bé ze nʉa, kab bʉr bɨbɛh. 37Bʉr bɨbɛh ze de, díle, kar mode. Mompubuʼo mode ompʉn, bé a to le etʉʼla ɛ, mé a si kaalɔ é mokuro tambɛl! 38Bʉr o b'a de e, bé a be ó: bʉrʉm e bʉrʉm, otɔɔyin onâ, aláa bʉba le bwɔɔncyom.

39Jɔʼ nye a sil buulo ntuntuma bʉr yaa ɛ, Yesʉs ze kable é byɛl, to lal Magadan.

Currently Selected:

Mataos 15: ozmBad

Highlight

Copy