Yʉánɛs 2

Nzɔɔ ebâ ɨ́ Kanâ

1Píe melú mébá, nzɔɔ ebâ nzě syɛ́ɛ ɨ́ kwár Kanâ ɨ́ sí Galilê. Nyɔ̌ŋ mé Yésʉs á be ó tɨ̂. 2Bé á si báŋle ntémé Yésʉs, bé le ompʉ́n bé ɨ́ nzɔɔ nyaá. 3Ɨ́ mpʉ ményoʼ mé á be ɨ́ gwíi yɨ́, nyɔ̌ŋ mé Yésʉs ntɔ̂ʼ lɛ́ɛ e mwân ó: «Bé mû náǎ ó, akǎ be e menyoʼ.»

4Nó ó Yésʉs á nze yala e né ó: «Mʉmá nyâ, gǒ jɨ̌ yé e me? Ewala lâm, lé dína ó, apǎ pyâl.»

5Nó ó nyɔ́ŋ á nze lɛ́ɛ le osyɛ̂l o mésâ ó: «Sáʼ gá sá yɨ́yɛ̂h nyé ólɛ́ɛ bɨ́n yɨ́.»

6Bé á be náǎ ó e mikáʼ mékóʼ mésaman. Mikâʼ myaá, myé ó b'á kʉkomo medíbé óYúden, bé á pupubo mebébe mɔ́ɔ́ e mé má. Kâʼ ngwár, wé á be ó, bɛ̌m nʉa ólíra nter. 7Yésʉs, nye le osyɛ̂l o mésâ ó: «Lóŋláá gá mikáʼ mínɨ̌ e medíbé.»

Bê nzě lóŋlo myê.

8Yésʉs, nye e bé ó: «Ɨ́ jɔ̌ʼ nɨ̌, kaá táare édaale gá medíbé ménɨ̌. Bɨ̌n a tó dwe tyéla nzɔɔ, ó nye bóblaa.»

Bê nzě sâ nó. 9Tyéla nzɔɔ ká bóblo nɛ́ɛ: nyě kǎ jóʼo ó, menyoʼ ɨ́ mbɨa mbɨa. Nyɨɛ á bé agʉ́a yɨ́ɛ nko ményoʼ maá, mé á duho yɨ́. Osyɛ̂l o mésá ó b'á daale medíbé maá bá, bé omér ó b'á jaa gʉ́a. Nó ó tyéla nzɔɔ á nze jébe mbɛ̂l mʉmá. 10Nye e né ó: «Mʉr nyɨnyɛ̂h, nyě nyɛɛ́ dwe ó, menyoʼ mempâ. Píe tɨ̂, maá me dí pâʼ e tɨ̂ʼ má, ɨ́ jɔʼ bʉ̂r o nzɔ́ɔ óbe, bé mû sí buú bɛble yɨ́. Sâ gwár, gua bé ɨ́ komo ményoʼ me dí ɨ́ mbɨa má, kumo ɨ́ báánâ.»

11Lɨ́haá ó dí esimá lé ésôʼ Yésʉs á nyɛɛ sâ lɨ́, nye ɨ́ Kanâ, ɨ́ sí Galilê. Nye á lɛ̂ʼle nó ó, kûm nyé. Ompʉ́n bé ntɔ̂ʼ báʼǎ buú dyɛ̂ʼwo e né. 12Píe tɨ̂, nye nzě tô Kapernáʉm, bé e nyɔ̌ŋ, le bɨ́ɔɔ́ bé le okɛ́l bé, le ompʉ́n bé. Bê nzě tó di gʉ̂ʼ bwá mélû.

Yésʉs ɨ́ mpáh Nzyɛ̌m

(Matthieu 21.12-17; Marc 11.15-19; Luc 19.45-48)

13Mpʉ nzɔ́ɔ Páska á be, nye mû kúno ebwalɔɔ yɨ́, Yésʉs nzě tô Yerʉ́zalɛm. 14Nyé ká nî mpáh Nzyɛ̌m nɛ́ɛ: nyě kœ̌b tɨ̂ʼ tʉ́ŋlʉ̌ ó, le bʉr o bɛ́má bíntœœ, le baá o bɛ́má bítab, le baá o bɛ́má mépɨbaa, le baá o ká syɛ́ɛla bímɔnɨ́ bá. 15Nó ó Yésʉs á nze nʉa mikǒl, nzě sâ ngáhá, ntɔ̂ʼ so bʉ̂r baá ɨ́ mpáh Nzyɛ̌m, bé e bitab ti e bintœœ byɔ́ɔ́, gɔ́na le enkɛŋ ótéble bɔ́ɔ́ sí. 16Nye e bʉr o b'á be lɨ́ ebɛ́ma mépɨbaa bá ó: «Pɛʼɛɛ gá mepɨbaa mɨ́mɛ̂h wâ. Mʉr aliŋ gá Mbɛ̌r mé Dâ mbɛ̌r ébôm.»

17Ompʉ́n bé, bê nzě símsǎ mpʉ yé á boo be cɛmá ɨ́ Mekaná mé Nzyɛ̌m ó: “Mě kpɛ̌l mbɛ̌r gô ó, kpɛ̌l ápurapúra” yɨ́.

18Jɔʼ yaá ó óYúden bé á nze dî e né ó: «Láa ésimá gó dí ɨ́ pǎ sâ, dí elɛ̂ʼle bɨ́h ó, go á bě sí dweŋɔɔ nkûl esâ mbi bísyɛ́ɛla bínɨ̌?»

19Nó ó Yésʉs á nze yala e bé ó: «Búʼáá gá mpáh Nzyɛ̌m nyɨ̂. Me óbáʼǎ sumo nyé njɨ ɨ́ melú mélɛ̂l.»

20OYúden, bé e né ó: «Mpáh á sumɔɔ tâŋ mimbû mekám ménâ e mimbú mísaman nyɨ́, nó ó, gǒ lɛ́ɛ́ ó, gua, go óbáʼǎ sumo nyé melú mélɛ̂l nyá?»

21(Tó kœb ó, “mpáh Nzyɛ̌m” Yésʉs á lɨlɛ́ɛ nyɨ́, á be ó nyʉ̂l nyé! 22Jɔ̌ʼ Yésʉs á pah ɨ́ soo, duho lɨ́ odwe yɨ́, ompʉ́n bé ntɔ̂ʼ sîsimsa mékǎn mé maá. Bé ntɔ̂ʼ bûʼla Mékaná mé Nzyɛ̌m ndu e metwɨ́ɨ́ mé Yésʉs.)

Sá dí ɨ́ mʉr yɨ́

23Jɔʼ yɨ́yɛ̂h nzɔ́ɔ Páska nyaá á bwalɔɔ yɨ́, Yésʉs á be ó Yerʉ́zalɛm. Bʉr ɨ́ buo buo, bê nzě dyɛ̂ʼwo e né ɨ́ lɔ̌b mésimá bé á bee nye lɨ́ esâ má. 24Sâ gwár, Yésʉs nyɨɛ á bé adyêʼ wé koo e bê, ebě, nye á be ó sí gʉ́a bɨ́bɛ̂h. 25Nye á bé agwɨ̂m ó, mʉr tɨ́aa nye sɔ̂ʼ dumo e mʉr, ebě, nye mʉr tɨ̂ʼ á be ɨ́ gʉ́ǎ sá dí ɨ́ lémé mʉ̂r yɨ́.

Currently Selected:

Yʉánɛs 2: ozm

Highlight

Copy