Yʉánɛs 3

Yésʉs, bé e Nikodɛ́mos

1Nyʉ́ʉ́ mʉ̂r á be e díe ó, Nikodɛ́mos. Nye á be ó ɨ́ sɔ́má óFarizyɛ̂n. Nye ntémé ɨ́ bʉm nɨ́nɨ́ɨ́ dí ejwɨ́ɨ óYúden yɨ́. 2Nye á nze ó kwá mé Yésʉs ɨ́ pum. Nye e né ó: «Lɛ̂ʼla, bɨ̌h bé lɨ́ egʉ́a ó, go ó lɛ̂ʼlǎ Nzyɛ̌m á ntɨh, lɨ́ enzě lɛ̂ʼle bɨ́h nyá, ebě, yé abe e mʉr ngwár dí e nkul esâ mésimá mbi gó dí esâ wɨ́, Nzyɛ̌m bé abe e né nó.» 3Yésʉs, nye e né ó: «Me lɨ́ elɛ́ɛ gó lɨ́ otyeetye ó, mʉ̂r bé abáʼǎ byɛ̂l jɔʼ dwân nó, nyé abe e nkul enî ɨ́ Mpóʼo mé Nzyɛ̌m.» 4Nikodɛ́mos nzě dî e né ó: «Njʉ̌m mʉ̂r, wé e nkul ebáʼǎ byɛ̂l wáǎ mbi? Nzê wé e nkul enî ɨ́ mo nyɔ́ŋ wé, ntɔ̂ʼ báʼǎ byɛ̂l ɛ̌?»

5Yésʉs, nye ó: «Me lɨ́ elɛ́ɛ gó lɨ́ otyeetye ó, mʉ̂r óbe, abyɛ̂l mbyɛ́lá médíbé e waá Sísǐm nó, nyé abe e nkul enî ɨ́ Mpóʼo mé Nzyɛ̌m. 6Sá dí ebyɛ̂l mbyɛ́lá bípúno yɨ́, yé ó bipúno. Yaá dí ebyɛ̂l e nzɨ̌ Sísǐm mé Nzyɛ̌m yɨ́, yé ó sísǐm. 7Atwɨrǎ mpʉ mê lɛ́ɛ́ gó ó: “Bɨ̌n bé ɨ́ jala le ebyɛ̂l mbyɛ́lá dwân” yɨ́. 8Pubó laa ó, gúmó yé kpɛ̂l yɨ́. Gua jaá jóʼo ó, njɨ duú yé, agʉ́a yɨ́ɛ nko yé dí eduho, ndu e nko yé dí etô yɨ́. Mʉr nyɨnyɛ̂h mû mbyɛ́á ɨ́ lɔ̌b nkûl Sísǐm mé Nzyɛ̌m dí e nye nyɨ́ʼ, nyě byɛ́l ó nó.»

9Nikodɛ́mos, nye e né ó: «Bisyɛ́ɛla bínɨ̌, byé ósyɛ́ɛ nyá?» 10Yésʉs, nye e né ó: «Gua yɨ́ɛ mʉr dí lɛ̂ʼla dí ɨ́ buú gúmlɔɔ ɨ́ kúl bʉ̂r o b'Ɨ́zraɛ̂l yɨ́yɛ̂h nyá, nzê gua, gó agʉ́a mílɔ̌b mîʼ ɛ̌? 11Me lɨ́ elɛ́ɛ gó lɨ́ otyeetye ó, me lɨ́ eboʼlo mílɔ̌b mé dí egʉ́a mí. Mě lɛ́ɛ́ ntémé ó, sá mé á bee yɨ́. Sâ gwár, bɨ̌n bé akpɛl ékǎm lɔ́ɔ́ wâm. 12Bɨ̌n apǎ nyɛɛ́ kam ɨ́ jɔʼ mé dí elɛ́ɛ bɨ́n bisâ bi dí esyɛ́ɛ ɨ́ sí yɨ̂ʼ bí. Nzê bɨ̌n bé óbuú kam ɨ́ jɔʼ mé lɛ́ɛ́ bɨ́n byaá bi dí esyɛ́ɛ ɨ́ jʉ́o kʉ́ bí ɛ́? 13Abe e mʉr ngwár dí ɨ́ pǎ bére, tó kumo ɨ́ jʉ́o kʉ́, píe Mwân mé Mʉr, mʉr á duho ɨ́ jʉ́o kʉ́ nyá. 14Jwɨʼ gwár Moyɨ̂z á nʉa mveʼle nyʉ́a, gbâ ɨ́ lɨ́, bɨ̂n yé kʉ́ ɨ́ lʉá yɨ́, jwɨʼ gwár yaá ntémé ó Mwân mé Mʉr jálá le ebɨ́nɔɔ kʉ́ yɨ́. 15Nye óbɨ́nɔɔ kʉ́ nó ó, mʉr nyɨnyɛ̂h ngá dyɛ̂ʼwo e né nyá, bíʼee twǐʼ njʉ̌m dǐ. 16Ebě, kpɛ̌l Nzyɛ̌m á bu kpɛl bʉr ó sí yɨ̂ʼ yɨ́, nye á be ɨ́ dwe Étíʼé é Mwân lé ó, ɨ́ sɔ́má bʉ̂r bɨ́bɛ̂h, mʉr ngá dyɛ̂ʼwo e né nyá, nye ádîm ɨ́ nkɔb bʉr, ebě, nye mû ó e twǐʼ njʉ̌m dǐ. 17Nye á bé antɨh Mwân wé ó, nye ntáa nzě dwe bʉ̂r ó sí yɨ̂ʼ mebě. Nye á ntɨh nye ó, bʉr bíʼee twiʼ ɨ́ nzɨ̌ nyé. 18Mʉr dí edyɛ̂ʼwo e Mwân mé Nzyɛ̌m nyá, nyé akǎ be e mebyaʼ. Mʉr dí adyɛ̂ʼwo e né nyá nyɨɛ ó dí e mebyaʼ, ebě, nyé apǎ dyɛ̂ʼwo le Etíʼé é Mwân mé Nzyɛ̌m. 19Mebě me mʉ̂r waá, mé duho ó, ɨ́ lɔ̌b njʉl mû sí pan ɨ́ sí yɨ̂ʼ wɨ́. Bʉr bɨ́ɛ kǎ kpɛl édúrʉ́ʉ́, laǎ njʉl waá, ebě, bé lɨ́ ebuú kpɛl ésâ mísyóm. 20Mʉr nyɨnyɛ̂h dí esâ syóm nyá, nye lɨ́ ekpɛ́ɛ̌ njʉl. Nyé abe lɨ́ enze ɨ́ gúmó wé dí yɨ́, ebě, nyě kpɛ́ɛ́ ó, misyóm myé, myé ámû jaá gwíhǎ kʉ̌l. 21Bʉr bɨ́bɛ̂h o dí esâ bísyɛ́ɛla bimpâ bá, bé kpɛl étʉtô ó, nkǒ njʉl dí yɨ́, bʉr nkʉ̂ bee ó, bisyɛ́ɛla byɔ́ɔ́, byê duho ó ɨ́ gwɨ́má mé Nzyɛ̌m.»

Yésʉs, bé e Yʉánɛs Ndubʉr

22Píe tɨ̂, Yésʉs, bé le ompʉ́n bé nzě tô sí Yʉ́da. Bê nzě jâ gʉ̂ʼ bwá mélû. Nye á be lɨ́ edudu bʉ̂r. 23Yʉánɛs ntémé á be ó, lɨ́ edu bʉ̂r lɨ́ ebʉ́m lé Ayɨnɔ̂n, bǎʼ e Salîm, ebě, medíbé, mé á be ó ɨ́ buo tɨ̂. Bʉr nzě gɔ́na le etô kwá mé Yʉánɛs, nyɨɛ ntɔ̂ʼ dudu bê. 24(Jɔʼ yaá, yé á be ó, Yʉánɛs dína apǎ gbáŋɔɔ ɨ́ mbɛ̌r mímbʉʼ.)

25Bé dína náǎ nɛ́ɛ: bʉ́ʉ́ ómpʉ́n mé Yʉánɛs nzě táare épére métwíí, bé e nyʉ́ʉ́ Yúden ɨ́ mbi bé jálá le epuba mébébe wɨ́. 26Bê nzě tô nkǒ Yʉánɛs á be yɨ́. Bé e né ó: «Lɛ̂ʼla, ɨ́ sɔ́má bʉ̂r bɨ́n le onɔ́ɔ́ bé á be ɨ́ pɨ̌n díbé Yɔrdên kɔ́m nkɛ́ɛ́ bá, nzê go lɨ́ ekǎ símsa mʉ̂r gó á sêʼle nyá ɛ́? Ɨ́ báánâ, nyɨɛ ntémé mû ó lɨ́ edu bʉ̂r. Ntémé, bʉr bɨ́bɛ̂h mû jaá tô ó, njɨ kwá nyé.»

27Yʉánɛs, nye e bé ó: «Nzyɛ̌m bé adwe mʉ̂r sɔ̂ʼ nó, nyé abe e nkul ebi yê. 28Bɨ̌n bʉr o tɨ̂, bé lɨ́ egʉ́a ó, me á be ó sí boʼlo ó, ntʉ mɛ̂m dí Mʉ̌r Nzyɛ̌m á lœm múló mé jwɨ́ɨ nyá. Me ó mʉ̌r Nzyɛ̌m á nyɛɛ lómo lɨ́ esóʼ lé nyá. 29Mbɛ̂l mʉmá ó dí e mʉmá. Só mé mbɛ̂l nyɨɛ títyɛ́b ɨ́ puuu ó, nye nkʉ̂ gʉ́a jôʼlo étyêl me mbɛ̂l. Nye lɨ́ ebuú soho lɨ́ ejóʼo étyél lé. Nó yaá ó mé dí ebuú soho ɨ́ báánâʼ yɨ́. 30Kûm nyé ó dí ejala le ebwǎʼ bwaʼáa; nyaá nyǎm twâʼwǒ twáʼwáa.»

Mʉr dí eduho ɨ́ jʉ́o kʉ́ nyá

31«Mʉr dúhó kʉ́ nyá ó láá bʉ̂r bɨ́bɛ̂h. Mʉr dí mʉr sí yɨ̂ʼ nyá, nyě gúmó ó e sí yɨ̂. Nyě jaá lwilwib ntémé ó, njɨ milɔ̌b mi kâ. Mʉr dí eduho ɨ́ jʉ́o kʉ́ nyá ó láá mʉ̂r nyɨnyɛ̂h. 32Nyě boʼló ó, sá nyé á bee le ejóʼo yɨ́. Sâ gwár, bʉr, bé akǎm lɔ́ɔ́ wé. 33Mʉr nyɨnyɛ̂h dí ekǎm mboʼlá wé nyá, nyě lɛ́ʼlé tɨ̂ʼ ó, Nzyɛ̌m ó dí le otyeetye. 34Mʉ̌r Nzyɛ̌m á lómo nyá, lɛ́ɛ́ ó mekǎn mé Nzyɛ̌m, ebě, Nzyɛ̌m, nye lɨ́ edwe nyé Sísǐm wé, ntinɨ̂ e ntinɨ̂. 35Nzyɛ̌m Sɔ́ŋ, nye lɨ́ ekpɛl Mwân wé. Nyɨ́ boó gbâ sá yɨ́yɛ̂h sí jwɨ́ɨ́ yé. 36Mʉr dí edyɛ̂ʼwo e mwân waá nyá ó ngá bǐ twǐʼ njʉ̌m dǐ. Mʉr dí adyɛ̂ʼwo e né nyá, nye ákóʼó bǐ twiʼ yaá. Nyɨ́haá ójaʼra e nkpaǎ Nzyɛ̌m ngá lɛ̂ʼle nyé nyɨ́.»

Currently Selected:

Yʉánɛs 3: ozm

Highlight

Copy