Luka 23

Yesu aleetwa emberi wa Pilato

(Mat 27:1-2,11-14; Mrk 15:1-5; Yow 18:28-38)

1Mani omukaanda okwo kwoosi kweemao kwasiingira, kwamuleeta emberi wa Pilato. 2Nibachaaka ohumuwabira nibaboola bati, “Hubukaanire omusaacha wuno naali ohudoondobaniaanga esyaalo syeefwe, haandi naali ohutukaania ohutooyaanga omusolo eyiri Kaisaari, haandi n'aboola ati omweene niye Kristo haandi niye Omutuki.” 3Nae Pilato yamuteeba ati, “Niiwe omutuki w'Abayudaaya?” Nae yamukobolamo ati, “Niiwe oboolere otyo.” 4Pilato yaboolera abalaamisi bahuluundu alala neende emikaanda ch'abaandu ati, “Ese haba simbonaho omusaango kwoosi hu musaacha wuno.” 5Nabo baangalala sa nibaboola bati, “Asaangulasa abaandu, naabitira mu njekesa yae mu Yudea mwoosi, ohutulira Galilaaya ohwoolera elalira kata ano wosi.”

Yesu ayirwa eyiri Herode

6Nae Pilato niyawulira atyo, yateeba ohumanya omusaacha wuno yali Omugalilaaya. 7Mani niyamanya ati, hane Yesu atula mu butuki wa Herode, yamuyira eyiri Herode, owali yesi naali mu Yerusalemu esiha syeene esyo. 8Nae Herode niyabona Yesu, yasangaala muno, olwohuba yali yekomba luleeyi ohumubona, olwohuba yali namuwuliraangaho sa, mani yali nasuubiraanga ohubonaho ebilolero bwahola. 9Yamuteeba ebiindu biingi muno, nae omweene yahaya ohumukobolamo kata silala. 10Abalaamisi bahuluundu alala neende Abaandiiki b'Amalako nabo badoong'a sa nibeemere ao nibedinyiisye ohumutaaho omusaango. 11Nae Herode alala neende abalwaani bae beecha bachaaka ohumusaandya nibamuhomoolera; mani nibamufwaasa engubo ch'obuyaayi nibamala nibamukalusa eyiri Pilato. 12Mani ohuchaakira abweene ao, ni Herode neende Pilato bachaakirao ohuba abeecha haandi, olwohuba enyuma eyo bali nibasyuulana sa.

Yesu aheengerwa omusaango kw'ohufwa

(Mat 27:15-26; Mrk 15:6-15; Yow 18:39—19:16)

13Bulaanu, Pilato yeecha yabuusa alala abalaamisi bahuluundu neende abatuki neende abaandu baandi, 14yababoolera ati, “Muundeteere omusaacha wuno koti oyo owali n'adoondobania abaandu; nae nimalire ohumuyaasa mu moni weeng'we, boneho, ese haba siinyalire ohumunyoolaho omusaango kwoosi hweebyo byoosi bi mubeere mumwekanyiisaho; 15kata neende Herode yesi atyo, sakira atukalusiire omusaacha wuno haandi. Boneho, sibulao esiindu syoosi esihoyera ohufwa syaholereho daawe; 16Mani ese njia ohumunaalaho ehoba budiidi, mani male mulehuule yeweereo.” [17Nae bulaanu yali n'ahoyera ohubalehuulira omuundu mulala hu ludaalo lw'esidyaalo.]

18Nae boosi bahuumira alala nibaboola bati, “Mwiite omuundu wuno, mani mutuboololere Bbarabba” 19omusaacha yali yasukunibwa mu jeela hulw'ahasasakamalo hali hakwiireo mu siko sihuluundu haandi neende hulw'obwiiti, 20Pilato haandi yababoolera a ehabi liindi, n'adaha aboolole Yesu; 21nae haandi bahuumira mu kono ly'aakulu nibaboola bati, “Mumubaambe sa, mumubaambe!” 22Haandi ehabi lyohudatu, Pilato yeecha yababoolera ati, “Lwasiina, sibi siina syeene sy'aholere? Haba simubweeneho omusaango kwoosi okuhoyera ohufwa; Mani sakira, njia sa ohumunaalaho ehoba mani nyemeo mulehuule.” 23Nae bali neende amayiingi maangi muno nibamusaba nibehuuma bati ahoyere ohubaambwa. Mani amakono kaabwe keecha kayiingira. 24Pilato yaheenga omusaango ati ohudaha hw'abaandu nihwo ohuba huholerweho. 25Pilato yalehuula omusaacha oyo owali yasukunwa mu jeela hulw'ohusaasakamala hwali hukwiireo mu siko sihuluundu neende hulw'obwiiti, yibali nibasabire; nae yahola Yesu koti lu bali badahire.

Yesu abaambwa hu musalabba

(Mat 27:32-44; Mrk 15:21-32; Yow 19:17-27)

26Mani koti lubali hu bamutusa ao, baakwa hu Simooni wuundi Omusireeni, owali n'akobola mu siko n'atula mu ngoongo bamudwiiha omusalabba yakukiinga n'aloonda hu Yesu. 27Enyuma wae esidiiyiha sihoongo esy'abaandu syamuloondaho neende omuhunu kw'abahasi abali nibachereenjesa nibamulira. 28Nae Yesu niyakaluuhana yabalingaala, yaboola ati, “Abahaana ba Yerusalemu, mutandirira haba, nae mwelirire abeene, haandi mulirire abaana beeng'we. 29Olwohuba bone, endaalo mbao chiicha, chibahabooleremo bati, ‘Bali neende ehabi abakuumba, neende enda chiteebulaho omwaana yeesi, haandi neende embeere chitanuuniaho haba!’ 30#Hos 10:8; Hubwi 6:16. Bahachaake ohuboolera engulu bati, ‘Mutukweeho;’ haandi ohuboolera ebigulu bati, ‘Mutufuunihe.’ 31Olwohuba nibahola bati omusaala nikusisiiri omubisi, byahabe bitye nikwahabe kwoomere?”

32Bayira abasaacha babiri baandi abali abeebi babeetere alala neende Yesu. 33Nae niboola abuundu alaangwa ati, Esyangaanga, ao niwo yibabaamba Yesu hu musalabba alala neende abeebi babiri abo, mulala hu muhono muluungi, nae owuundi hu muhono kwae mukaada. 34#Sab 22:18. Yesu yaboola ati, “Laata, balehere; olwohuba bakoterwe bi bahola.” #23:34 Yesu yaboola ati: Laata, balehere; olwohuba bakoterwe bi bahola: Ebyandiiko bihuluundu bihale biindi bileha emboosi chino. Bulaanu beemao baahubba eha yohukabanira engubo chae. 35#Sab 22:7. Abaandu bali nibeemere ao nibabalingaalire; nae abatuki bamucheha nibamudyabuhira nibaboola bati, “Yaonia abaandi; mani leha yewonie omweene, naaba naali Kristo wa Nasaae, Omulobole wae Mweene!” 36#Sab 69:21. Ab'amaye bosi bamuhoomolera, nibeecha yaali nibamuba efiini yihaliihe, 37mani nibaboola bati, “Nooba nooli Omutuki w'Abayudaaya, wewonie omweene!” 38Beecha baata obwandiike buno aakulu wae, #23:38 obwandiike buno aakulu wae: Ebyandiiko bihuluundu bihale biindi bimeedaho biti, ‘mu nukuta ch'Olugiriki neende mu Lulatini neende mu Luibburania.’ echisoma chiti, “Wuno niye Omutuki w'Abayudaaya.”

39Mulala hu beebi babiri abali bosi nibabaambirwe alala nae ao yahabuhira Yesu n'aboola ati, “Ewe haba siniiwe Kristo? Weewonie omweene neende efwe fwesi!” 40Nae owuundi oyo nae yaalabira owaasye oyo n'aboola ati, “Ewe haba sotyaaho Nasaae, nga wesi oheengerwe sa omusaango nasilala nae? 41Nae ese naawe huhoyera sa ohuholwa huti; olwohuba efwe huli sa ohunyoola omukabo kuhoyera ebiholwa byeefwe bibi; nae omusaacha wuno nae haba saaholereho esiindu sitahoyera syoosi.” 42Yaboola ati, “Wama Yesu, wunjichulisaangaho niwiingira mu bwaami bwao.” 43Nae Yesu yamuboolera ati, “Mubwadyeeri bweene, ndi ohuhuboolera endi, nyaanga yino ochia ohuba naange mu Paradiiso.”

Ohufwa hwa Yesu

(Mat 27:45-56; Mrk 15:33-41; Yow 19:28-30)

44 # Hut 26:31-33. Ebiha bino byali nibiri aambi w'esaa chisaasaba mani esiirima syeecha syadiira esyaalo syoosi ohwoola esaa chitaanu-na-chine, 45omubasu nikuhayire ohufwa; epasya yadembaanga mu Nyuumba ya Nasaae yeecha yataanduhamo habiri. 46#Sab 31:5. Yesu yalira mu kono ly'aakulu, yaboola ati, “Laata, ngeeng'a omwooyo kwaange mu mahono kao!” Yesu niyamala ohuboola atyo, yayeera omuuya kwae kumaliirihayo. 47Nae bulaanu, omumaye muhuluundu niyamala ohubona ebyo byoosi ebyaholehana, yaafumia Nasaae, mani yamala yaboola ati, “Ataali ohukana-kana, omusaacha wuno abeere omulai mweene!” 48Abweene-na-bweene ao, ebidiiyiha byoosi ebyali nibyebuusiire ao ohubonaho ebyo, nibabona ebyaholehana ebyo byoosi, bakobola mu madaala kaabwe nibehuya hu birifu. 49#Luk 8:2,3. Abaandu bali bamumanyirira boosi, alala neende abahasi bali bamuloondereho ohutula Galilaaya beecha beema eyale mani babona bulai muno ebiindu bino.

Ohusiihwa hwa Yesu

(Mat 27:57-61; Mrk 15:42-47; Yow 19:38-42)

50Bulaanu waliwo omusaacha olaangwa ati, Yosefu otula mu siko sya Buyudea silaangwa siti Arimatea. Yali mulala hu b'oluhiiho, haandi yali omusaacha mulai haandi omuluungifu muno, 51yali natafukiirisaanie neende ebichiiririrwa neende ebiholwa bibi by'abaasye, haandi yali n'aliindiriire Obwaami bwa Nasaae bwiiche. 52Omusaacha wuno yacha eyiri Pilato, mani yaamusaba omubiri kwa Yesu. 53Yakwanula, yakuboya mu suuka ly'elaasi lya rachaari, mani yamwalisa mu ng'ani yabaachwa mu lwaanda yi bali basisiiri ohusiiha hoomo omuundu yeesi. 54Oludaalo olwo lwali oludaalo lw'ohweetekeheramo, haandi Sabbaato yali aambi ohuchaaka. #23:54 Sabbaato yali aambi ohuchaaka: Mu Lugiriki bati, bwali buhya. 55Abahasi bali beechere nae ohutula Galilaaya, baloondaho, mani babona eng'ani, neende engeri yi bali basihiiremo omubiri kwae; 56#Hut 20:10; Amal 5:14. Mani bakobolayo, batekeha ebiindu biwunya esing'aari neende amafuta k'ohumubaha.

Hu ludaalo lwa Sabbaato, bawuluuha ohweema koti lu amalako kaboola.

Currently Selected:

Luka 23: SAMDC

Highlight

Copy