Luka 17

Esyonoono

(Mat 18:6-7,21-22; Mrk 9:42)

1Haandi Yesu yeemao yaboolera abeeki bae ati, “Amateemo kakera omuundu yonoona #17:1 Amateemo kakera omuundu yonoona: Mu Lugiriki bati, ebiindu by'ohwegumulaho. kachia ohubaao; nae chimwakaanire oyo okaleeta! 2Syahamubereere esilai ohuboyebwa mu kosi wae ekina hoongo libasyeraangaho, mani yamala yaasukunwa mu nyaanja, ohuhira lwaakera mulala hu baana bayere bano, yonoona. #17:2 yonoona: Mu Lugiriki bati, yeegumula. 3#Mat 18:15. Mani mweliinde abeene; mwaanamaao nahwonoonera, mweekese esyonoono sy'aba naaholere, nae niyeyolobya, mulehere; 4nae nahwonoonera amahabi kataanu-na-kabiri mu ludaalo lulala, haandi yakobola yooli amahabi kataanu-na-kabiri, n'aboola ati, ‘Ndeeyolobya,’ ohoyere ohumulehera.”

Efukiirira

5Abatume beecha baboolera Omwaami bati, “Twongese efukiirira!” 6Nae Omwaami yaboola ati, “Muba muli neende efukiirira yaakana neende olumwo lw'omutuumba, mwahaboolere omusaala muhuyu kuno muti, ‘Weyiye, mani ochie wetaake mu nyaanja,’ mani kwahabawuliire.

Bi muhalaabani ahoyere ohuhola

7“Ali hoo hweeng'we, oli neende omuhalaabani olima oba owaaya amakoondi, onyala yamuboolera niyaheenuha ati, ‘Yicha bwaangu wihale hu meesa olye’? 8Oba n'atamuboolere ati, ‘Taangira mberi wundekehere esy'engoloobe, omale weterese bulai mani wiche wuninde, male ohulya neende ohung'wa; luunyuma wesi hu ochie olye haandi hwoong'we’? 9Mani omwenengo oyo, anyala yebasa omuhalaabani oyo olwohuba aholere syaatumirwe ohuhola? 10Mani mwesi, nimuba nimuholere ebyo byoosi bi mutumirwe ohuhola, muboleenge muti, ‘Efwe huli sa abahalaabani abatahoyera; huholere sa ebiindu bi huhoyere ohuhola.’ ”

Yesu awonia abasaacha ehumi

11Yesu niyali hu lukeendo ohuchia Yerusalemu, yabitira hu lwaaho lukabuhania esyaalo sya Samaria neende esya Galilaaya. 12Mani niyali huyaheengira mu lukoongo luundi, yabukanana neende abasaacha bageeng'e ehumi. Beyaaba beemaho eyale nae 13mani behuuma nibaboola bati, “Omwaami Yesu, tukwiire esisa.” 14#Lef 14:1-32. Nae Yesu niyababona, yababoolera ati, “Eng'we muchie mweyekese eyiri abalaamisi.” Mani nibali hu bachia, baonisibwa. 15Nae mulala hu abo, niyabona ati amalire ohuwona, yakaluuhana yacha eyiri Yesu naafumia Nasaae mu kono ly'aakulu; 16mani yaakwa, yafumama aasi mu makulu ka Yesu, namwebasa muno. Bulaanu, omusaacha wuno yali Omusamaria. 17Yesu yeecha yaboola ati, “Abaandu baonisibwe, haba sibabeere ehumi? Nae bataanu-na-bane bali yeena? 18Abulao owahakoboole ohufumia Nasaae ohutusaho omuteende wuno?” 19Yesu yeecha yamuboolera ati, “Siingira mani ochie y'ochia; efukiirira yao yihuwonisye.”

Ohwiicha hw'Obwaami

(Mat 24:23-28,37-41)

20Abafarisaayo nibateeba Yesu lu Bwaami bwa Nasaae bucha ohwiichira, Yesu yakobolamo ati, “Obwaami bwa Nasaae haba sibuchia ohwiicha neende ebilolero buboneha; 21oba, sibahaboole bati, ‘Eee, mbano buli ano!’ Oba bati, ‘Mbula buli era!’ Olwohuba bone, Obwaami bwa Nasaae buli akatikaati weeng'we.” #17:21 akatikaati weeng'we: Oba buli mweeng'we.

22Yesu yaboolera abeeki bae ati, “Endaalo chiicha, lumwahekoombere ohubonaho hu ludaalo lulala lw'Omwaana w'Omuundu, nae simuchia hulubona. 23Mani bahababoolere bati, ‘Eee, mbao buli era!’ Oba, ‘Eee, mbano buli ano!’ Nae mutachia, mutabaloondaho. 24Olwohuba, koti lu lumesu lumyesuhaanga mani luhosa ekulu ohutula hu lwaande lulala ohwoola hu lwaande luundi, nilwo lu Omwaana w'Omuundu achia ohuba hu ludaalo lwae. #17:24 hu ludaalo lwae: Ebyandiiko bihuluundu biindi bihale bileha bino biti ‘hu ludaalo lwae.’ 25Nae ahoyere ohusaandisibwa mberi mu biindu biingi muno, haandi yebwabwe neende olwiibulo luno. 26#Huc 6:5-8. Koti lu byali mu ndaalo cha Nowa, nilwo lu bichia ohuba mu ndaalo ch'Omwaana w'Omuundu. 27#Huc 7:6-24. Abaandu bali nibalichaanga, nibang'wechaanga, nibadeehyaanga, haandi nibadehaanga, ohwoolera elalira hu ludaalo lu Nowa yengirira mu lyaato, mani amaachi k'ofwomboole keecha kabasihirisa boosi. 28#Huc 18:20—19:25. Haandi nasilala koti lu byali mu ndaalo cha Looti, abaandu balichaanga, bang'wechaanga, bakulaanga, bakusaanga, bataakaanga, boombahaanga, 29nae hu ludaalo lu Looti yatuhiraho mu Sodomu, omuliro neende enjeserye byakwa ohutula Muukulu mani byabasihirisa boosi. 30Haandi nilwo lu sichia ohuba hu ludaalo lu Omwaana w'Omuundu yahabonehere. 31#Mat 24:17,18; Mrk 13:15,16. Hu ludaalo olwo, leha oyo oli hu sirama sy'enyuumba, yi biindu byae biri mu nyuumba, ahaye ohwiiha aasi ohubibukula; haandi nasilala, leha oyo oli mu ndalo ahaye ohukobola engo. 32#Huc 19:26. Mwiichulise omuhasi wa Looti. 33#Mat 10:39; 16:25; Mrk 8:35; Luk 9:24; Yow 12:25. Oyo yeesi okoonya ohuliinda obulamu bwae, achia ohubufwiirwa, nae oyo ofwiirwa obulamu bwae, achia ohubuliinda. 34Mbaboolera endi, mu siro esyo, abaliba babiri hu sitaanda silala; mulala yahayirwe, nae owuundi alehwe. 35Abahasi babiri abalibechaanga alala nibali ohusya; mulala aliyirwaangwa nae owuundi alehwa.” [36Abasaacha babiri abahabecheenge mu ndalo; mulala aliyirwaangwa, nae owuundi alehwa.] 37Nae abeeki bae baboolera Yesu bati, “Omwaami, yeena bweene?” Nae yababoolera ati, “Yi mubiri kuba, niyo yi ngosya chahebuusira alala.”

Currently Selected:

Luka 17: SAMDC

Highlight

Copy