Luka 15

Ekoondi lyakota

(Mat 18:12-14)

1 # Luk 5:29,30. Olwoola, abatoosa b'emisolo neende abahola-mbi boosi bachaaka ohwiicha eyiri Yesu ohuwulira bi yekesa. 2Nae Abafarisaayo neende abaandiiki b'Amalako bachaaka ohweng'ulung'uunya nibaboola bati, “Omusaacha wuno yakaanira abahola-mbi haandi yaalya nabo.” 3Mani Yesu yabakaadira olukaado luno ati, 4“Mundu siina hweeng'we, oba neende amakoondi kae emia ndala, mani lala hu ako lyakota, otahalehao amahumi kataanu-na-kane neende kataanu-na-kane kala mu saa, mani yacha yakoonya lala lira eliba nilikotere, ohwoola lwalyakaana? 5Mani n'alyakaana, alikiinga hu mabeka kae, niyehoya. 6Nae niyoola engo, alaanga abeecha bae alala neende abaasye, n'ababoolera ati, ‘Mwiiche hwehoyere alala, olwohuba malire ohwakaana ekoondi lyaange libeere likotere.’ 7Mbaboolera endi, mu ngeri nasilala yityo, nilwo lu mwehoyo muungi kuchia ohuba Muukulu hulw'omuhola-mbi mulala oweyolobya ohuhira abaandu baluungifu amahumi kataanu-na-kane neende bataanu-na-bane abatadaha ohweyolobya.

Eseende yakota

8“Oba muhasi siina, oba neende eseende mwaamwa ch'efeesa ehumi, #15:8 mwaamwa ch'efeesa. Eyilaangwa ano yiti, “durakima.” yali aambi ohwaakana neende omusaara kw'omuhalaabani okw'oludaalo lulala. mani yaakosa emwaamwa ndala eyo, otawaambya etaara, yeeya bulai bweene enyuumba yoosi n'akoonya, ohwoola lwayakaana? 9Mani naamala ohuyakaana, alaanga abeecha bae alala neende abaasye, n'aboola ati, ‘Mwiiche hwehoyere alala, olwohuba njakaanire eseende y'emwaamwa yaange eyali niyikotere.’ 10Mbaboolera endi, mu ngeri nasilala yityo, niyo yi bamalaika ba Nasaae lubeehoyera omunooni mulala oweyolobya.”

Omusyaani wakota

11Yesu haandi yaboola ati, “Olwoola, yaliwo omusaacha wuundi owali neende abasyaani bae babiri; 12mani omusyaani muyere yeecha yaboolera laatang'ene ati, ‘Laata, mberese esiha sino omukabo kwaange kw'obuyiinda kuwahaamberese n'ofwiire.’ Mani saabwe yabakabaniamo obuyiinda bwae.” 13Nae endaalo endiidi muno nichabitao, omusyaani muyere oyo yabuusa alala ebiindu bi yali nabyo byoosi, mani yadiira olukeendo yacha mu syaalo sy'eyale muno, mani yachakia-chakira eyo obuyiinda bwae bwoosi mu bulamu bw'ohuchakala. 14Mani niyamala ohwehoonyera buli siindu si yali nasyo, enjala nyiingi muno yeecha yaakwawo mu syaalo esyo, ohwoola luyadoong'a naabulaho esiindu syoosi. 15Mani yacha yaamenya neende mulala hu baandu bomu syaalo esyo, owamutuma achie mu mikuunda chae amuliisire embiichi. 16Yoola ohwekoomba ohulya #15:16 ohulya: Ebyandiiko bihuluundu bihale biindi bisoma biti, ‘ohwiichusa enda yae neende’. ebyoola bi mbiichi chalichaanga; nae abulao omuundu yeesi owamuberesa esiindu syoosi. 17Nae niyekaluhaho, yabaasa omweene n'aboola ati, Nae baanga hu bahalaabani ba laata yaange yapaangisa abali neende emigaati chibalya haandi chadoong'aho, nae ese ndi ohufwiira ano enjala! 18Ese njia ohusiingira mani njie eyiri laata, mani njia ohumuboolera endi, “Laata, ndakosa mu moni w'Ekulu neende mu moni wao; 19Sisihoyera ohulaangwa, omwaana wao; nae mbukule sa koti mulala hu bahalaabani bao bapangise.” 20Mani yasiingira yakaluha eyiri laatang'ene. Nae niyali n'asisiiri eyale, laatang'ene yamubona mani yaamukwiira esisa, yeeruha yacha yamubukaanira yaamukwa mu sirifu. 21Nae omusyaani oyo yamuboolera ati, “Laata, ndakosa mu moni w'Ekulu neende mu moni wao; Sisihoyera ohulaangwa omwaana wao.” 22Nae laatang'ene yaboolera abahalaabani bae ati, “Muleete bwaangu engubo yihiramo obulai, mani mumufwaase; haandi mumuteeho engila hu muhono, haandi mumufwaase ebiraato mu makulu; 23muchie muleete emoosi nginu muyiite, mani lehe hulye hwesangaase; 24olwohuba omwaana waange wuno yali yafwa, nae bulaanu mulamu; yali yakota, nae bulaanu abonehane.” Mani bachaaka ohwesangaasa.

25Nae bulaanu, omwaana wae muhuluundu yali naali mu mukuunda; mani niyali naakobola, yoola aambi neende edaala, yawulira abaandu nibeemba haandi nibahina. 26Mani yalaanga mulala hu bahalaabani yamuteeba ati, “Siina syeene ebikwiireo?” 27Nae yamuboolera ati, “mwaanamaao yeechere, mani lataao amwitiire emoosi nginu, olwohuba amwakaanire naali omulamu abweene.” 28Nae yaanyoolera muno, mani yaahaya ohwiingira mu daala. Nae laatang'ene yaatula erwaanyi yacha yamwekweeda yengire, 29nae yakobola mu laatang'ene ati, Bonaho, ese huhalaabaniire sa koti omuhalaabani muwaambe emyaaka kino kyoosi, haandi kata sindahalakaho amalako kao daawe; nae osisiiri kata ohumbaaho sa ahameeme hoong'ene, nyale ohwesangaasaho neende abeecha baange. 30Nae omwaana wao wuno, owanyaasa omwaandu kwao neende abacheke niyeechere, ewe omwiitire emoosi nginu! 31Nae yamuboolera ati, “mwaana waange, buli siha oli naange ano, ebiindu byaange byoosi byao nibyo.” 32Mani sibeere esilai muno hwesangaase haandi hwehoye, olwohuba mwaanamaao wuno yali yafwa, nae bulaanu mulamu; yali yakota, nae bulaanu abonehane.

Currently Selected:

Luka 15: SAMDC

Highlight

Copy