Luka 14

Yesu awonia omusaacha mulwaae

1Olwoola, hu ludaalo lwa Sabbaato luundi, Yesu yacha mu nyuumba ya mulala hu beemirisi Bafarisaayo, nae niyali naalya, abaandu baandi bachaaka ohumwewunja. 2Mani bone, omusaacha wuundi owali niyafwiimba amakulu neende amahono yeecha yi Yesu yali. 3Yesu yaalomaloma neende abeekesa b'Amalako neende Abafarisaayo n'aboola ati, “Mani sifukiirirwa ohuwonia hu ludaalo lwa Sabbaato, kose haba?” 4Nabo bauleera sa. Mani Yesu yabukula omusaacha oyo, mani yamuwonia, mani yaamuleha yawaao. 5#Mat 12:11. Mani Yesu yababoolera ati, “Wiina mweene hweeng'we, oli neende omwaana wae, #14:5 omwaana wae: Ebyandiiko bihuluundu bihale biindi bimeedaho biti, ‘esuhiri oba endaawu yae, eyiba niyikwiire mu buko.’ oba naakwiire mu buko otahatulaniramo yaachia yaamuhwesa yamutusamo hu ludaalo lwa Sabbaato?” 6Nabo sibanyala ohumukobolamo mu sino.

Obuloonga neende ohuliinda abakeni

7Bulaanu, Yesu niyabona engeri yi bakeni balaange bali nibedoolera obwiihalo bw'oluyaali luhoongo, yabakaadira olukaado n'ababoolera ati, 8#Eng 25:6,7. “Nooba n'olaangirwe hu sidyaalo sy'obweeya, otachichaanga wehala mu bwiihalo bw'oluyaali luhoongo muno, olwohuba oyo ohulaangire anyala ohuba n'alaangire omuundu wuundi ohuhirira elalira oluyaali; 9mani oyo obalaangire mweembi anyala ohwiicha yahuboolera ati, ‘Ewe yikulira wuno obwiihalo obwo,’ mani bulaanu ochia ohudiirwa esoni n'osiingira nochia ohwiihala mu bwiihalo bw'oluyaali lwa aasi muno. 10Nae nooba n'olangirwe, chichaanga wihala mu bwiihalo bw'oluyaali lwa aasi muno, hu bulaanu obalaangire niyeecha, anyale ohuhuboolera ati, ‘Mwiicha waange, siingira ochie wihale aakulu;’ mani oba ochia ohunyoola oluyaali mu moni ch'abaandu boosi ababa nibehaale naawe hu meesa. 11#Mat 23:12; Luk 18:14. Olwohuba buli muundu weniinia omweene achia ohuloongoyaswa, nae oyo oweloongoyasa omweene, achia ohuniinisibwa.”

12Yesu yaboolera omuundu wali amulaangire yesi ati, “Nooba n'okabula abaandu ohulya oba hu sidyaalo, otalangaanga abeecha bao, noomba bamwaanaamao, oba abanaluyia bao, oba abasibirana naawe banyali, olwohuba bano bosi banyala ohuhulaanga oludaalo luundi, mani bahutuunga. 13Nae nooba n'okabula esidyaalo, langaanga abamanani, neende abadiimbe, neende abalema, neende abawofu, 14mani ao niwo y'ochia ohunyoolela ehabi, olwohuba abo haba sibanyala huhutuunga. Ochia ohutungwa hu ludaalo lu boolerefu bachia ohusyuuhiraho.”

Olukaado ludiira hu sidyaalo sihoongo muno

(Mat 22:1-10)

15Nae bulaanu mulala hu baandu bali nibehaale neende Yesu hu meesa, niyawulira sino yamuboolera ati, “Ali neende ehabi oyo owahalye omugaati mu bwaami bwa Nasaae!” 16Nae Yesu yamuboolera ati, “Olwoola, omusaacha wuundi yakabula esidyaalo sihoongo muno, mani yalaanga abaandu baangi muno ohwiicha; 17mani esiha sy'esidyaalo nisyoola, yeecha yaatuma omuhalaabani wae achie aboolere abaandu bali balaangirwe ati, ‘Mwiiche; olwohuba buli siindu sidahibwa simalire ohutekehwa.’ 18Nae boosi bachaaka buli mulala ohwelira-bwelira. Owataangira yamuboolera ati, ‘Ese bulaanu hu ngulire omukuunda, mani hoyeere njie kuboneho; hwekongooyere muno wundehere obuteecha.’ 19Haandi owuundi yaboola ati, ‘Ese bulaanu hundaakulire endaawu chirima emikoondo kitaanu, mani hoyeere njie mbone koti lu kirima; mani hwekongooyere muno wundeheremo obuteecha.’ 20Haandi owuundi yaboola ati, ‘Ese bulaanu hundaadehiisye omuhasi, mani haba sinyala ohwiicha.’ 21Mani omuhalaabani oyo yeecha yaakobola mani yaboolera omwaami wae atyo. Mani etima lyadiira omwenengo oyo mani yaboolera omuhalaabani wae oyo ati, ‘Cha bwaangu hu makira neende hu myaanda chiri mu siko sihoongo, mani oleete abamanani, neende abadiimbe, neende abawofu, neende abalema.’ 22Mani omuhalaabani oyo yaboola ati, ‘Omuhuluundu, ebyo byoosi biwumboleere ohuhola, mbyosereese endyo, nae haandi obweyaango buundi busiidoong'ereo.’ 23Nae omwaami oyo yaboolera omuhalaabani oyo ati, ‘Tula mani ochie hu ngira hoongo choosi, neende otukira tudiidi twoosi, mani oleete abaandu beengire beechule enyuumba yaange. 24Olwohuba huboolera endi, #14:24 huboolera: Emboosi y'Olugiriki eya ‘huboolera’ ano yeekesa ‘obuungi bw'abaandu baboolerwa.’ abulao omuundu yeesi hu baandu bali balaangirwe ochia ohuhoombaho hu sidyaalo syaange.’ ”

Esidahibwa ohuba omweeki wa Yesu

(Mat 10:37-38)

25Bulaanu, ebidiiyiha bihoongo biindi byeecha byachiana neende Yesu; yakaluhaana yaababoolera ati, 26#Mat 10:37. “Omuundu yeesi owiicha yi ndi, saanyala ohuba omweeki waange ohutusaho n'ataangire mberi ohusyuula laatang'ene mweene neende ng'ina neende omuhasi wae, neende abaana bae, neende bamwaanang'ina, neende bamboochong'ene, eee, neende kata obulamu bwae bweene. 27#Mat 10:38; 16:24; Mrk 8:34; Luk 9:23. Oyo yeesi otanyala ohukiinga omusalabba kwae kweene, mani yanoonda, haba saanyala ohuba omweeki waange.” 28Olwohuba, wiina mweene hweeng'we, oba n'adaha ohwombaha omunara, otataangira mberi yehala aasi, mani yabaliirira obuungi bw'ebiindu bidahibwa, yabona oba ali neende ebiindu bimala ohwombaha omunara kwawa? 29Ataali ao, naamala ohwombaha omusiingi, mani byeecha byamuhaya ohumaliirisa, abo boosi abakubona, baba banamucheha, 30nibaboola bati, “Omuundu wuno yachaaka ohwombaha nae siyanyala ohumaliirisa.” 31Oba mutuki siina, oba naachia ohulwaana neende omutuki wuundi, atataangira mberi yehala aasi, yabaliirira bulai naali neende abalwaani elifu ehumi (10,000) n'anyala ohuyingira oyo omuseeta neende abalwaani elifu amahumi kabiri (20,000)? 32Mani naabona ati sibinyaliha, atuma bawamwaanda basabe ohuwuliirisania babe neende omuleembe, omutuki waasye oyo n'asisiiri eyale muno. 33Mani sakira, oyo yeesi mweeng'we otebwaaba byoosi byali nabyo, saanyala ohuba omweeki waange.

Omuunyu kuwuma obuhoonyi

(Mat 5:13; Mrk 9:50)

34“Omuunyu mulai nikwo; nae omuunyu nikuwaamo echamu lyakwo, kunyala ohukaluswamo kutye echamu elyo? 35Kubula obuhoonyi bwoosi hu loba, oba hu mbolera yosi; kusukunwa sa eyale. Oyo oli neende amatwi kawulira, leha awuliire.”

Currently Selected:

Luka 14: SAMDC

Highlight

Copy