Ebiholwa 3

Omusaacha mulema awonisibwa

1Oludaalo luundi, Petero neende Yowaana bali bachia mu Nyuumba ya Nasaae, esaa chitaanu-na-chine esiha sy'ohulaama. 2Mani niboola hu siruwa sy'Enyuumba ya Nasaae esilaangwa siti Esiruwa Siroonyo, babukaanao omusaacha walema ohutula mu budoto bwae niyesabirisaanga. 3Niyabona sa ati, Petero neende Yowaana nibeengira mu Nyuumba ya Nasaae, yabasaba obuhoonyi. 4Nae Petero neende Yowaana bamutingaala tiiri mu moni, mani Petero yamuboolera ati, “Tutingaale.” 5Mani yabahayisiraho emoni, yabaasa ati bachia ohumubaaho esiindu. 6Nae Petero yamuboolera ati, “Ese mbula efeesa oba esaabbu, nae njia ohuhuberesa esiindu si ndi nasyo; mu liita lya Yesu Kristo Omunasareeti, siingira okeende.” 7Yaamudiira omuhono muluungi yamusiingisa; mani abweene-na-bweene ao, amakulu kae alala neende ebisiisiro byae nibyomiira. 8Yaduuma yeema yachaaka ohukeenda mani yeengira mu Nyuumba ya Nasaae alala neende Petero neende Yowaana, yakeenda naduumakala naakinia Nasaae. 9Abaandu boosi abamubona n'akeenda haandi n'afumia Nasaae, 10bamanya bati niye owehalaanga niyesabirisa hu Siruwa Siroonyo sy'Enyuumba ya Nasaae; mani baawuka haandi besiinduha muno hulw'ebiindu byali bi mweeholehaneho.

Enomanoma ya Petero naali mu Nyuumba ya Nasaae

11Omusaacha oyo niyali n'asyomeere hu Petero neende Yowaana, abaandu boosi bawuka beeruha yi bali mu siseenge silaangwa siti esya Solomooni. 12Nae Petero niyabona atyo, yaboolera abaandu ati, “Eng'we Abaisiraeli basyaange, lwasiina sino sibawuukisa, oba lwasiina mutudangaaliireho, muti fwaana niifwe abakerere omusaacha wuno yakeenda hulw'amaani keefwe abeene oba hulw'obwoolerefu bweefwe abeene? 13#Hut 3:15. Nasaae wa Abburahamu neende Yisaka neende Yakobbo, Nasaae wa bakuuka yeefwe, niye owaberesa Yesu omuhalaabani wae oluyaali. Oyo yi mwadiisa mu mahono k'abahoongo haandi mwamwekaana mu moni wa Pilato, owali n'aheengereo ohumulehuula. 14#Mat 27:15-23; Mrk 15:6-14; Luk 23:13-23; Yow 19:12-15. Nae eng'we mwekaana Oyo Omwoolerefu haandi Omuluungifu mweene, mani mwasaba babalehuulire omwiiti. 15Nae eng'we ning'we abeeta Omweene bulamu, yi Nasaae yasyuhisa ohutula mu bafu. Niifwe abaloli ba sino. 16Mu liita lyae, neende ohusuubira mu liita lyae, nibyo ebikerere omusaacha yi mubona wuno haandi yi mumanyire yanyoola amaani. Haandi efukiirira mu Yesu niyo eyikerere omusaacha wuno yaaba omulamu mweene koti lu mweesi mubona.

17“Mani bulaanu basyaange, manyire endi mwasihola mu butamanya, koti lu batuki beeng'we bosi bahola. 18Nae, esyo si Nasaae yalomalomera hale mu banabbi boosi, ati Kristo wae ahoyere ohusaanda, yasyoseresa abweene atyo. 19Hulwesyo mweyolobye ebyonoono byeeng'we, mukaluhe eyiri Nasaae, hu bibi byeeng'we binyale ohutusibwao, mani hu biha by'ohweekobosa buyaaha bibeechere nibitula eyiri Omwaami, 20mani abatumire Kristo yi yabadoolera, niye Yesu. 21Yesu oyo niye ohoyere ohuba Muukulu ohwoolera elalira hu biha byeebyo byoosi bi Nasaae yalomalomera mu banabbi bae boolerefu boosi abaluwo hale. 22#Amal 18:15,18. Olwohuba Musa yaboola ati, ‘Omwaami Nasaae weeng'we achia ohubatumira omunabbi otula mu baandu beeng'we koti lu yaanduma. Muhoyere mumuwulire mu buli siindu sy'ababoolera. 23#Amal 18:19. Omuundu yeesi otahawuliire emboosi ch'omunabbi oyo, achia ohutusibwa mu baandu mani asihirisibweengwe.’ 24Abanabbi boosi abalomalomaanga hale, ohutulira elalira hu Samueli neende abamuloondaho, bosi balomalomaanga ebidiira hu ndaalo chino. 25#Huc 22:18. Eng'we niing'we abaana ba banabbi haandi ab'Endagaano yi Nasaae yaberesa bakuuka yeeng'we n'aboolera Abburahamu ati, ‘Njia ohuberesa abaandu bohu syaalo syoosi ehabi nimbitira mu lwiibulo lwao.’ 26Nasaae niyamala ohudoola omuhalaabani wae, yataangira ohumutuma eyiri eng'we, ohubaberesa ehabi n'akaluhaania buli muundu hweeng'we ohutula mu ngira chae mbi.”

Currently Selected:

Ebiholwa 3: SAMDC

Highlight

Copy