Ebiholwa 4

Petero neende Yowaana bayaasibwa mu siina

1Nae Petero neende Yowaana nibali nibasiilomalomaanga neende abaandu, abalaamisi neende omuhuluundu w'Enyuumba ya Nasaae, alala neende Abasadukaayo baboolaho, 2nibanyooleere olwohuba Petero neende Yowaana bali nibeekesaanga abaandu haandi nibayalaanga bati, Yesu yasyuuha mu bafu. 3Mani babadiira, nae olwohuba obwiire bwali bwiirire, baabata mu jeela ohwoola obwiire ohuhya. 4Nae abaandu baangi abawulira emboosi chaabwe bafukiirira; mani obuungi bw'abasaacha bafukiirira bwoola aambi elifu chitaanu (5,000).

5Nibwahya, abatuki baabwe neende abahuluundu beenjia alala neende abeekesa b'Amalako ka Musa bebuusira mu Yerusalemu. 6Anasi omulaamisi muhuluundu mweene, neende Kayaafa neende Yowaana neende Alekisaanda, alala neende abo boosi abali ab'enyuumba y'omulaamisi muhuluundu mweene bosi bebuusira mu Yerusalemu. 7Mani nibamala ohweemesa Petero neende Yowaana akatikaati waabwe, baabateeba bati, Mu bunyala siina, kose mu liita siina li muholeeremo sino? 8Nae Petero, niyechuuswe Mwooyo Mwoolerefu, yakobolamo n'ababoolera ati, “Eng'we abatuki alala neende abahuluundu b'abaandu, 9nimuli ohututeeba enyaanga yino ebidiira hu siholwa silai siholeerwe omulema wuno, haandi neende obunyala buwoniisye omusaacha wuno, 10mweesi-mwesi muhoyere ohusimanya, alala neende abaandu ba Yisiraeli boosi muti, omusaacha oyo anyalire ohweema bulai mu moni weeng'we hulw'eliita lya Yesu Kristo Omunasareeti, oyo yi mwabaamba, yi Nasaae yasyuhisa ohutula mu bafu.

11 # Sab 118:22. Lino nilyo ekina li eng'we mwahaya,

nae nilyo elyeeholere ehuluundu mu musiingi.

12Haandi obuwonia sibuli mu muundu wuundi yeesi, olwohuba abulao eliita liindi hu syaalo syoosi elyabereswa abaandu li huhoyere ohuwonisibwamo.”

13Bulaanu, ab'esiina nibabona obwomiifu bwa Petero neende Yowaana, haandi nibabona bati bali abaandu b'aasi sa, abali nibatasomaho, bawuka muno. Bamanya bati, abaandu bano balichiingi neende Yesu. 14Nae nibabona omusaacha owali awonisibwe niyeemere aambi neende Petero neende Yowaana, bahaywa esiindu syoosi esyohuboola nibabayiingania. 15Nae nibali nibamalire ohuboolera Petero neende Yowaana ohutula erwaanyi w'esiina, bachaaka ohuteebana abeene-na-beene, 16nibaboola bati, “Abasaacha bano hunabahole hutye? Olwohuba buli muundu yeesi mu Yerusalemu asimanyire ati, abasaacha bano baholere esy'amayia sihoongo muno haandi sihunyala ohusiyiingania. 17Nae ohubona huti esiindu sino sitemeeda ohumanyihana mu baandu, leha hubakayire ohulomalomaho haandi eyiri omuundu yeesi mu liita lino.” 18Balaanga Petero neende Yowaana ohwiingira mu siina, babalagira obutalomalomaho oba obuteekesaho haandi mu liita lya Yesu. 19Nae Petero neende Yowaana babakobolamo nibaboola bati, “Eng'we abeene muheengeo si huhoyera ohuhola mu moni wa Nasaae, ohuwulira eby'abaandu oba ohuwulira ebya Nasaae. 20Olwohuba efwe huli neende ohulomaloma bi hwabona neende bi hwaulira.” 21Mani ab'esiina nibamala ohwemeeda ohubatiihirisa muno, olw'ohutya abaandu, baabaleha bawaao, olwohuba sibanyoolaho engeri yoosi eyohubasaandisiramo. Olwohuba abaandu boosi bali nibakinia Nasaae hulw'ebiindu byali nibiholehaane. 22Olwohuba omusaacha wali nawonisiibwe yali abita emyaaka amahumi kane eky'obuhuluundu.

Abakristo basaba Nasaae ababerese obwomiifu

23Nibamala ohubalehuula sa bati, Petero neende Yowaana bakobola eyiri abasyaabwe bababoolera ebiindu byoosi bi Abalaamisi bahuluundu neende abahuluundu beenjia bali bababooleere. 24#Hut 20:11; Neh 9:6; Sab 146:6. Mani nibawulira sino, boosi bebuusa alala balaama Nasaae nibaboola bati, “Omwaami w'obunyala bwoosi, owaloonga Ekulu neende esyaalo, alala neende enyaanja neende ebiindu bi yirimo byoosi, 25#Sab 2:1,2. hale walomalomaanga mu Mwooyo Mwoolerefu n'obitira mu kuuka yeefwe Daudi omuhalaabani wao noboola oti,

Lwasiina Abateende bali neende obwaalaba,

haandi abaandu baandi babaasa ebiindu bitaalimo amahuluundu?

26Abatuki b'esyaalo beetekeehe,

haandi abeemirisi b'abaandu bebuusire alala,

ohuyiingania Omwaami neende Kristo wae

27 # Luk 23:7-11; Mat 27:1,2; Mrk 15:1; Luk 23:1; Yow 18:28,29. olwohuba mubwadyeeri bweene, abaandu boosi mu siko sihoongo sino, alala neende Herode neende Pondio Pilato, neende Abateende alala neende abaandu Baisiraeli, bali nibahaya omuhalaabani wao mwoolerefu Yesu, yi ewe omweene wadoola mani wabahaho amafuta, 28ohuhola buli siindu si muhono kwao alala neende endekeha yao byali nibyatekehwa ohuholehana. 29Nae bulaanu, Omwaami, tingaala obone bulai ohutihirisa hwaabwe huno, mani oberese efwe abahalaabani bao obunyala bw'ohulomaloma emboosi chao neende obwomiifu bwoosi koti lu bwaaka, 30mani naawe weemeo okololeenge omuhono kwao kuwonieenge, mani ebilolero biingi alala neende ebiwukisa biingi biholwe ohubitira mu liita ly'omuhalaabani wao mwoolerefu Yesu.” 31Nibali nibahamala ohulaama, abuundu ao yi bali nibebuusiire alala yeecha yateengereha; boosi beechusibwa Mwooyo Mwoolerefu mani balomaloma emboosi ya Nasaae neende obwomiifu.

Abakristo beehoonyera alala ebiindu byaabwe

32 # Biho 2:44,45. Bulaanu, omukaanda kw'abaandu bali nibafukiriire mu Yesu Kristo, babechaanga neende ebibaaso bilala, haandi neende omwooyo mulala, mani abulao omuundu yeesi owabolaanga ati, esiindu syoosi si yabechaanga naali nasyo syalichiingi esyae yeeng'ene, nae boosi balichiingi abeene neende buli siindu alala. 33Mani Abatume batusaanga obuloli bwaabwe obudiira hu husyuuha hw'Omwaami Yesu, haandi embabaasi nyiingi muno chabechaanga hu buli mulala. 34Siyaliwo omuundu yeesi mu beene abo owalichiingi neende si yekoomba ohuba nasyo daawe, olwohuba abaandu baangi abalichiingi neende amaloba kata amayuumba, babikusaanga byoosi, mani bamala baleetaanga ebyalichiingi nibitulire mu hukusa ohwo 35mu makulu k'Abatume; mani bakabira buli otula koti lu yalichiingi niyekoomba. 36Ao niwo yi Yosefu owali yakulihwa neende Abatume ati Bbarinabba (esyeekesa siti, Omusyaani w'ohugumia omwooyo), Omuleefi, owamenya mu Saipurasi, 37yakusa omukuunda kwae, mani y'aleeta eseende echo choosi yaachita mu makulu k'Abatume.

Currently Selected:

Ebiholwa 4: SAMDC

Highlight

Copy