Mariko 16

Ohusyuuha hwa Yesu

(Mat 28:1-8; Luk 24:1-12; Yow 20:1-10)

1Bulaanu oludaalo lwa Sabbaato nilwawa, Maria Magadalena, neende Maria ng'ina Yakobbo alala neende Salome, baleeta amafuta k'esing'ari, nibadaha ohubaha omubiri kwa Yesu. 2Nae hu ludaalo lutaangira mu juma, echuli elyuuba nilyali hu hulitula sa liti, abahasi bano bawuuna ohuchia hu siriindwa. 3Bali nibateebanaanga abeene-na-beene bati, “Wina onaatutusireho ekina hu mulyaango kw'esiriindwa?” 4Nae niboola hu siriindwa, batingaala aakulu babona okukina nikumalire ohusiindikiswa nikutulire hu siriindwa kwali okukina kuhoongo muno. 5Nae nibeengira sa mu biriindwa bati, babona omusyaani muraaga owefwaalire ekaanju lya rachaari niyehaale hu muhono muluungi, mani besiinduha muno. 6Nae yababoolera ati, “Mutesiinduha haba; manyire endi muli ohukoonya Yesu Omunasareeti owabaambwa hu musalabba. Asyuuhire, haba saali ano; mubone abuundu yi bamwaalisa. 7#Mat 26:32; Mrk 14:28. Mani muchie muboolere abeeki bae neende Petero muti, abataangiriiremo ohuchia Galilaaya; eyo niyo yi muchia ohumubonera, koti lu yababoolera.” 8Mani batula erwaanyi, beeruha nibatula hu ng'ani; olwohuba obuti alala neende ohuteengereha byali bibadiire muno; mani haba sibabooleraho omuundu yeesi esiindu syoosi, olwohuba bali batiire muno.

Emaliiriha hale y'Emboosi Ndai

16:9-20

Yesu abonehera Maria Magadalena

(Mat 28:9-10; Yow 20:11-18)

[ 9Nae niyasyuuha, oludaalo lutaangira mu juma, yataangira ohubonehera Maria Magidalena, yi yali yeerusamo emisaambwa kitaanu-na-kibiri. 10Maria Magadalena wuno yachia yaboobera abaloondi bae abali nibalira haandi nibeesisiiha muno. 11Nae nibawulira bati, Yesu mulamu, haandi omuhasi wuno amalire ohumubonaho, haba sibasifukiirira.

Yesu abonehera abeeki bae babiri

(Luk 24:13-35)

12Luunyuma, Yesu yabonehera abeeki bae babiri mu ngeri yiindi nibali nibakeenda nibachia mu lukoongo luundi. 13Mani bano bakaluhayo baaboolera abadoong'ereyo, nae bahaya ohufukiirira ebyaabwe.

Yesu abonehera abeeki ehumi-na-mulala

(Mat 28:16-20; Luk 24:36-49; Yow 20:19-23; Biho 1:6-8)

14Muhumaliiriha, Yesu yabonehera abeeki bae ehumi-na-mulala nibali hu meesa ohulya; yaaboolobya muno hulw'obutafukiirira bwaabwe alala neende ohuba n'emyooyo myoomeranu, olwohuba bali bahayire ohufukiirira eby'abo abali babweene Yesu n'amalire ohusyuuha. 15#Biho 1:8. Mani yababoolera ati, “Muchie mu syaalo syoosi, mani muyaale emboosi ndai ya Nasaae, eyiri ebiloonge byoosi. 16Oyo ofukiirira, haandi yabatiisibwa, achia ohuwonisibwa; nae oyo otafukiirira, omusaango kuchia ohumuhira. 17Mani bino nibyo ebilolero bicha ohuba neende abo abafukiiririra: mu liita lyaange, bachia ohwiirusaanga emisaambwa; bachia ohulomalomaanga enimi njaaha; 18bachia ohudiiraanga enjuha mu mahono kaabwe, haandi nibang'wa obutwa bw'amaani, sibuchia ohubeetaanga; bachia ohwiisaanga amahono kaabwe hu balwaae, mani bawona.”

Yesu ayirwa Muukulu

(Luk 24:50-53; Biho 1:9-11)

19 # Biho 1:9-11. Nae Omwaami Yesu, niyamala ohulomaloma nabo, yayirwa Muukulu, mani yeehala hu muhono muluungi kwa Nasaae. 20Nae abeeki bae, bachia mani baayaala Emboosi Ndai buli abuundu, nae Omwaami yaholera alala nabo, niyomiisa emboosi chaabwe neende ebilolero bisiira emboosi echo. Amiina.] #16:20 Ebyandiiko bihiramo obuhuluundu biindi byaakamya esitabo sino hu lunyiriri lwa chitaanu-na-chidatu niluwaaho. Esyaandiiko silala siindi syaakamya esitabo sino nisyoongesa bino hu lunyiriri lwa chitaanu-na-chidatu: Nae baboolera Petero neende abo abali nae boosi bidiidi, bi bali bababoolere. Oluunyuma lwasino, Yesu mweene yatumira mwaabo, ohutula ebukwe ohwoola emuumbo, ohuyaala hwoolerefu hutawa ohw'obuwonia bw'endaalo choosi. Ebyandiiko bihuluundu biindi bimeedaho emboosi chitaangira haandi byemeeda neende enyiriri 9-20. Ebyandiiko bihuluundu bihira obuungi, enyiriri 9-20 biloonderera abweene-na-bweene hu lunyiriri 8; Ebyandiiko bihuluundu bidiidi muno nibyo ebiingisamo emboosi chemeedereho chino, olunyiriri lwa 14 niluweere.

Emaliirisa hale yiindi

16:9-10

[ 9 Abahasi baacha eyiri Petero neende eyiri abeecha bae bababoolera mu bwiimbikiti ebyo byoosi bi bababoolera. 10 Ebyo nibyawa, Yesu mweene yatuma abeeki ohuchia ebukwe neende emuumbo ohubayirira emboosi njoolerefu haandi ey'endaalo choosi ey'obulamu butaakama.]

Currently Selected:

Mariko 16: SAMIA

Highlight

Copy