Matayo 7

Ohuheengera abaandi omusaango

(Luk 6:37-38,41-42)

1“Mutaheengeraanga abasyeeng'we omusaango, hu mwesi muhaye ohuheengerwa omusaango, 2#Mrk 4:24.olwohuba engeri yimuheengeramo abasyeeng'we omusaango, niyo nasilala yimwahaheengerwemo. Haandi esikero simukereramo abasyeeng'we, nisyo simwahakererwemo. 3Lwasiina ewe olingirisa esikoha siri mu moni y'owaasyo, nae ewe omweene s'obaasa hu sichihi siri mu moni yao? 4Onyala otye ohuboolera owaasyo oti: ‘Leha hutusemo esikoha si huli mu moni’ naawe omweene osisiiri neende esichihi mu moni yao? 5Omwebachirisi ewe, taangira mberi otuse esichihi esiri mu moni yao, hu weemeo obone bilai, onyale ohutusa esikoha siri mu moni y'owaasyo.

6“Otaberesaanga embwa ebiindu byoolerefu, haandi otasukuniraanga embiichi ebiindu byao by'obuhala, olwohuba chiba chinaabisenakire mu makulu, mani cheecha chahweechuuhira chaahuluma.

Ohusaba, ohukoonya neende ohuhong'oonda

(Luk 11:9-13)

7“N'odaha esiindu, saba; n'odaha ohubukaana, koonya; haandi n'odaha ohwikulirwao, hong'oonda; 8olwohuba buli osaba, abereswa; buli okoonya, abukaana; haandi buli ohong'oonda hu lwiiki, yekulirwawo. 9Nae wiina hweeng'we, onyala ohuberesa omwaana wae ekina namusabire omugaati, 10oba, yaamuberesa enjuha namusabire eng'eeni? 11Eng'we abataali boolerefu mumanyire ohuberesa abaana beeng'we ebiindu bilai, nae Nasaae Seeng'we oli Muukulu siyahahirireo muno ohuberesa ebiindu bilai abo ababa nibamusabire? 12#Luk 6:31.Mani, muholereenge abasyeeng'we koti lumwahadahire babaholere. Ako niko amahuluundu k'amalako ka Musa neende enjekesa y'abanabbi.

Esiruwa sidiiyu

(Luk 13:24)

13“Mwiingirire mu siruwa sidiiyu, olwohuba esiruwa sitakalafu neende engira nyaangu, #7:13 esiruwa sitakalafu neende engira nyaangu: Ebyandiiko bihuluundu bihale biindi bisoma biti, engira eyo ndakalafu haandi nyaangu niyo biyira abaandu mu nyaanja y'omuliro, abasiingiriramo nibo abaangi. 14Nae esiruwa siingisa mu bulamu butaakama, sidiiyu nisyo neende engira yolayo, ndinyu niyo ohubitaho, haandi abaandu badiidi muno abayibona.

Omusaala neende esyaamo syakwo

(Luk 6:43-44)

15“Mweliinde muhaye ohubachibwa neende abanabbi bataali badyeeri; olwohuba, beecha ohwiicha yi muli nibeloongoyaase koti amakoondi nae mubwadyeeri bweene, mu myooyo kyaabwe, n'ebinamiindi byeene. 16Mwahabamanyire hu biholwa byaabwe. Omusaala kw'oryaang'i kunyala ohwaamaho emisabbiibbu? Kose, enduli wahachinoka hu nyalwete-kwaachi? 17Olwohuba omusaala mulai kutulaho ebyaamo bilai, nae omusaala mubi kwosi kutulaho ebyaamo bibi. 18Omusaala mulai sikunyala kwaamaho ebyaamo bibi, haandi omusaala mubi kwosi sikwaamaho ebyaamo bilai. 19#Mat 3:10; Luk 3:9.Omusaala kwoosi okutaamaho ebyaamo bilai kutemwa, kwasukunwa mu muliro. 20#Mat 12:33.Mani muchia ohumanyaanga abanabbi b'obubacha, ohweema hu biholwa byaabwe.

Sindabamanyaho daawe

(Luk 13:25-27)

21“Sisiri siti buli muundu wunaanga ati; ‘Omwaami, Omwaami,’ niye owaheengire mu bwaami bwo Muukulu; ohutusaho oyo ohola bi Laata oli Muukulu by'adaha. 22Hu ludaalo olwo abaandu baangi baheeche nibaboola bati, ‘Omwaami, Omwaami, hwatuumbulaanga eliita lyao koti bawamwaanda bao; haandi hweerusaanga emisaambwa miingi muno nihwehoonyera eliita lyao; haandi mu liita lyao hwaholaanga eby'amayia biingi ebitaali nasilala?’ 23#Sab 6:8.Naange ndahabakobolemo endi, ‘Simbamanyireho! Mubweere-eyi, eng'we abahola-mbi!’

Omwoombahi woombaha hu musenye neende owoombaha hu lwaanda.

(Luk 6:47-49)

24“Mani sakira omuundu yeesi owulira emboosi chaange chino, haandi yaachiholeraho, achia ohufwaana koti omuundu mukesi owoombaha enyuumba yae hu musiingi mwomiifu. 25Efula yayiyomboohaho, emihula kyayehubbaho, omuyaka kw'amaani kwayiwuchaho, nae enyuumba eyo, haba siyakwa olwohuba yali yoombahwa hu musiingi kw'olwaanda. 26Nae omuundu owulira emboosi chaange chino, yahaya ohuchiholeraho, afwaana koti omwoombahi musiru owoombaha enyuumba yae hu musiingi kw'olusenye. 27Efula yayiyomboohaho, emihula kyayehubbaho, omuyaka kw'amaani kwayiwuchaho, mani yaakwa, yanyonyoboha.”

Obunyala bwa Yesu

28 # Mrk 1:22; Luk 4:32. Mani Yesu niyamala ohulomaloma atyo, abaandu bawuka muno engeri yiyekeseramo eyo. 29Olwohuba engeri yiyeekeseramo eyo, yali yikabuhana muno neende enjekesa y'Abandiiki b'Amalako, olwohuba Yesu yeekesa koti omuundu w'obunyala.

Currently Selected:

Matayo 7: SAMIA

Highlight

Copy