Luka 2

Ohwiibulwa hwa Yesu

(Mat 1:18-25)

1Mu ndaalo echo, Kaisaari Agusito yatusa elako ati abaandu boosi mu bwaami bwae bahoyere ohubalibwa. 2Huno nihwo ohwali ohubalibwa hutaangira Kwirino naali gafana wa Siria. 3Mani buli muundu yeesi yacha ohubalibwa, mu siko syae. 4Mani Yosefu yesi yatula mu Galilaaya, mu siko sya Nasareeti, yacha Yudea, mu siko sya Daudi, esilaangwa siti Bbetilehemu, olwohuba yali ow'enyuumba haandi ow'olwiibulo lwa Daudi, 5ohuchia ohubalibwa neende Maria, yi yali afukiirisaanie nae ohudeehisania. Maria oyo yali ali asito. 6Nae nibali eyo, ebiha byae by'ohweetusaho byoola. 7Mani yeebula omwaana wae musyaani omwikula-nda, yamubwiha mu bikubo, mani yamwalisa mu bwaato bu byaayo birirangamo obunyaasi, koti lubatanyoola obweyaango mu nyuumba ch'abakeni.

Abaayi neende Bamalaika

8Nae mu syaalo esyo, mwalimo abaayi nibali mu lwaayiro, nibaliindire ebyaayo byaabwe esiro. 9Malaika w'Omwaami yababonehera, mani oluyaali lw'Omwaami lweechula lwaaduha nilubebodohaanie, beecha besiinduha muno. 10Nae malaika yababoolera ati, “Mutaba neende ohutya; olwohuba bone, mbaleetera emboosi ndai ch'esangaalo liingi, elicha ohuba hu baandu boosi; 11olwohuba enyaanga yino, mu siko sya Daudi, Omuwonia abebuliirwe, niye Kristo Omwaami. 12Mani hano niho ahanaba ahalolero heeng'we; muchia ohwakaana omwaana mudoto yibabwihire mu bikubo, haandi nibamwaliise mu bwaato bu byaayo biriraangamo.” 13Nae bwaangu-bwaangu, malaika oyo alala neende bamalaika baandi baangi abo Muukulu baboneha nibafumia Nasaae nibaboola bati,

14“Oluyaali lube eyiri Nasaae aakulu Muukulu,

nae omuleembe kube hu syaalo mu baandu abahola ebiindu bisangaasa Nasaae!” #2:14 hu baandu abahola ebiindu bisangaasa Nasaae: Ebyandiiko bihuluundu bihale biindi bisoma biti, ‘hu baandu b'emyooyo milai.’

15Nae Bamalaika nibatulao bawaao bachia Muukulu, abaayi beecha baboolanira abeene-na-beene bati, “Mulehe huchie Bbetilehemu, hubone esiindu sino esiholehaane, si Omwaami atwekeese.” 16Mani badiindikirira ohuchia, bakaana Maria neende Yosefu, alala neende omwaana mudoto oyo, nibamwaliise mu bwaato bu byaayo biriiraangamo. 17Mani nibabona omwaana oyo, batuumbula ebyo ebyali bibabooleerwe ebidiira hu mwaana wuno; 18Mani abo boosi ababiwulira, bawuka muno ebyo bi baayi bali nibababooleere. 19Nae Maria yabiiha ebiindu bino byoosi, n'abibasaangaho muno mu mwooyo kwae. 20Mani abaayi bakobolayo ewaabwe, nibafumia haandi nibaberesa Nasaae oluyaali, hulweebyo byoosi bi bali nibawuliire haandi nibabweene, olwohuba byali sa koti lu byali nibibabooleerwe.

Yesu abereswa eliita

21 # Lef 12:3; Luk 1:31. Nae luunyuma lw'endaalo chitaanu-na-chidatu, omwaana niyali amalire ohuhebwa, yabeereswa eliita Yesu, eliita li malaika yamuberesa n'atayerwa mu nda.

Yesu ayirwa mu Nyuumba ya Nasaae

22Nae ebiha nibyoola eby'ohulabiswa babe aboolerefu, koti elako lya Musa lyali, Yosefu neende Maria baleeta Yesu Yerusalemu ohudiisa Omwaami 23#Hut 13:2,12. (koti lu syandiikwa mu lako lya Omwaami siti, “Buli mwaana musyaani yeesi, owikula enda ya ng'ina achia ohulaangwaanga omwoolerefu w'Omwaami”) 24#Lef 12:6-8.haandi bachia ohuyanaanga esiyaanwa esihoyerwa koti lu lako ly'Omwaami liboola liti, “amaguugu kabiri, oba amabburuuku madoto kabiri.” 25Bulaanu, mu Yerusalemu, mwalimo omusaacha olaangwa mbwe Simeoni, owali omuluungifu haandi owaheera Nasaae muno, owali n'aliindaanga ohulemeswa omwooyo hwa abaandu ba Yisiraeli, haandi nga Mwooyo Mwoolerefu amuliho. 26Haandi yali yamala ohwekeswa neende Mwooyo Mwoolerefu ati, haba saachia hufwa n'ataabona Kristo wa Nasaae. 27Mani niyali niyeemiriirwe neende Mwooyo, yeecha mu Nyuumba ya Nasaae; mani abeebusi ba Yesu nibali hubamwiingisa bati mu Nyuumba ya Nasaae, bamuholere koti lu lako liboola, 28Simeoni yakiinga Yesu mu mahono, mani yeebasa Nasaae n'aboola ati,

29“Omwaami, bulaanu onyala ohuleha omuhalaabani wao yawaawo mu muleembe,

koti lu mboosi yao yiboola;

30olwohuba emoni chaange chimalire ohubonaho obuwonia bwao

31bu ewe mweene watekehera mu moni w'abaandu boosi,

32 # Yis 42:6; 49:6; 52:10. obulafu buhosera Abateende obuheeri bwao,

haandi obw'oluyaali eyiri abaandu bao Yisiraeli.”

33Mani laatang'ene neende ng'ina bawuka muno ebiindu byali bimulomalomwaho;

34haandi Simeoni yabasabira ehabi mani yaboolera Maria ng'ina ati,

“Bone, omwaana wuno ateerweo hulw'ohukwa neende ohusiingira hw'abaandu baangi mu Yisiraeli,

haandi neende ohuba esilolero siyiinganisibwa

35(haandi olugaanga luchia ohuhufumita lubite mu mwooyo kwao kwosi), hu bibaaso by'emyooyo miingi binyale ohubonehana alafu.”

36Haandi yaliwo nabbi muhasi, Ana, omuhaana wa Fanueli, ow'enono y'Aseri; yali omukofu naali neende emyaaka miingi muno. Ohutula n'awaamo omubiri ati, yamenya neende wamwe wamutusamo omubiri oyo emyaaka kitaanu-na-kibiri kyoong'ene, 37mani yadoong'a koti omuhasi mufwiirwe olw'embaka y'emyaaka amahumi kataanu-na-kadatu-na-kine. Haba siyalehaho Enyuumba ya Nasaae, nae yabechaanga sa omwo nalaama, haandi nasiiba alala neende ohusaba esaala esiro neende esideete. 38Nae niyoolerao ebiha byeene ebyo, yebasa Nasaae, haandi yaboolera abo boosi abali baliindiriire ohuwonisibwa hwa Yerusalemu, ebidiira hu mwaana oyo.

Abeebusi ba Yesu bakobola Nasareeti

39 # Mat 2:23. Nae nibamala ohuhola ebyo byoosi, bi lako ly'Omwaami liboola, bakobolayo mu Galilaaya, mu siko syaabwe syeene sya Nasareeti. 40Mani omwaana oyo yahula, haandi yaba ow'amaani, niyeechula amakesi; haandi ehabi ya Nasaae yamuliho.

Yesu achia mu Nyuumba ya Nasaae n'asisiiri omuraaga

41 # Hut 12:1-27; Amal 16:1-8. Bulaanu abeebusi bae bachichaanga Yerusalemu buli mwaaka hu Sidyaalo sya Paasaka. 42Mani Yesu niyoosa emyaaka ehumi neende chibiri eky'obuhuluundu, bachia Yerusalemu hu sidyaalo, koti lu bali nibaholaanga; 43Nae esidyaalo nisyawa, nibali nibakobolayo engo, omuraaga wuno Yesu yadoong'a enyuma mu Yerusalemu. Nae sino, abeebusi bae haba sibasimanya, 44nae koti lu bali babaasa bati ali mu baasye babakeenda nabo, bakeenda oludaalo olulaamba nibatamubona, mani bachaaka ohumukoonya mu beeho baabwe neende mu baandu babamanyire; 45nae nibatamuduuhana, bakaluha Yerusalemu nibamukoonya. 46Endaalo chidatu nichabitao, bamuduuhana naali mu Nyuumba ya Nasaae, niyehaale mu beekesa, n'abatekeeresaanga haandi n'abateebaanga ebiteebo; 47mani abo boosi abawulira by'aboola, bawuka muno amakesi kae neende engaluhamo yae. 48Nae abeebusi bae nibamubona, bawuka muno; mani ng'ina yamuboolera ati, “mwaana waange, lwasina otuholere otyo? Bonaho, ese neende lataao koti lu huhukoonyere nihwaabaaba.” 49Nae yabakobolamo ati, “Bibeere bitye mwangoonya? Mubeere mukoterwe muti hoyeere ohuba mu nyuumba ya Laata?” 50Mani byabahaya ohumanya biyeemaho ohubaboolera ebyo. 51Mani Yesu yasiingira yawaawo nabo bakobola Nasareeti, mani yaba omuwulisi yi bali; nae ng'ina yabiiha ebiindu bino byoosi mu mwooyo kwae. 52#1 Sam 2:26; Eng 3:4. Mani Yesu yemeeda ohuhula, haandi amakesi kae kemeeda, haandi yemeeda ohuheerwa neende abaandu alala neende Nasaae.

Currently Selected:

Luka 2: SAMIA

Highlight

Copy