Ohuchaaka 29

Yakobbo yoola mu ngo wa Labbani

1Yakobbo yemeeda neende olukeendo lwae, yoola mu syaalo sy'abaandu b'ebukwe. 2Niyatingaala, yabona esulo mu siino, neende amayiicho kadatu k'amakoondi kali nikeyaliise aambi neende esulo eyo. Ebyaayo byang'wechaanga mu mwaalo okwo. Esulo eyo yali niyabwiihwaho okukina kuhoongo muno. 3Ebyaayo nibyamalaanga ohwebusira ao, abaayi bahwesaanga okukina nibakutusa hu sulo, mani nibadayira amakoondi amaachi ohung'wa; nikamala ohung'wa bafuuniha haandi okukina okwo hu mwaalo.

4Yakobbo yateeba abaayi ati, “Basyaange, mutula yeena?” Bakobolamo bati, “Hutula Harani.” 5Haandi yabateeba ati, “Mumanyire Labbani omwaana wa Nahori?” Bakobolamo bati, “Humumanyire.” 6Yakobbo haandi yabateeba ati, “Mani aliyo omulamu?” Bamuboolera bati, “Aliyo omulamu; haandi bona, omuhaana wae Rakeeli ali ohwiicha neende amakoondi kae!” 7Yakobbo yaboola ati, “Bona, sisisiiri esideete, haandi ebiha by'ohubuusiramo alala ebisolo bisisiiri ohwoola; lwasiina song'weesa amakoondi, hu waachia wakaaya?” 8Nabo baboola bati, “Haba sihunyala ohubing'weesa ohwoola lu bisolo byoosi byebuusa alala, mani okukina kwahweeswa ohutula hu sulo; hu hwamala hwang'wesa amakoondi.”

9Yakobbo yali nasiilomalomaanga atyo, Rakeeli niyoola neende amakoondi ka laatang'ene, olwohuba niye owali nakaaya. 10Nae Yakobbo niyabona Rakeeli omwaana wa Labbani hoochaang'ene, neende amakoondi kae, Yakobbo yeeruha yaachia yahweesa okukina ohukutusa hu sulo, mani yang'weesa ebyaayo bya Labbani hoochaang'ene. 11Yakobbo yakwa Rakeeli mu sirifu, mani yaalirira mu kono lya aakulu. 12Yakobbo yaboolera Rakeeli ati, “Ndi omwiibulanwa wa laatao, omwaana wa Rebbeka.” Rakeeli niyeeruha naachia n'aboolera laatang'ene atyo.

13Nae Labbani niyawulira emboosi chidiira hu Yakobbo omwiiwa wae, yeeruha yaachia ohumubukaanira, mani yaamukwa mu sirifu, yaamuyira engo wae. Yakobbo niyamala ohuboolera Labbani ebiindu byoosi, 14Labbani yamuboolera ati, “Mubwadyeeri bweene, oli ow'amabaanga kaange keene neende omubiri kwaange kweene.” Yakobbo yamala atyo mani yaamenya ewa Labbani ohumala omwoosi mulala omulaamba.

Yakobbo ahalaabanira Labbani hulwa Rakeeli neende Leya

15Labbani yaboolera Yakobbo ati, “Olwohuba oli omwibulanwa waange, soohoyerwa ohuuhalaabanira bihaya. Mboolere omusaara koti lu kwaaka?” 16Bulaanu Labbani yali neende abahaana babiri; omuhuluundu olaangwa Leya, nae omuyere olaangwa Rakeeli. 17Emoni cha Leya chali engata kata, nae Rakeeli yali obonehana bulai muno. 18Yakobbo yali naadaha Rakeeli mani yaboolera Labbani ati, “Njia ohuhuhalaabanira embaka y'emyaaka kitaanu-na-kibiri, nookanya, huunyale ohudeehya Rakeeli.” 19Labbani yamukobolamo ati, “Silai ohuhuberesa Rakeeli ohuhira ohumuberesa omusaacha wuundi; mani doong'a naange.” 20Yakobbo yahalaabanira Labbani naadaha Rakeeli hulw'embaka y'emyaaka kitaanu-na-kibiri, nae kyabonehana koti endaalo ndiidi sa olwohuba yali niyaheera Rakeeli muno.

21Yakobbo yeemao yaboolera Labbani ati, “Mberese omuhasi waange, mbao endaalo chaange ch'ohuhuhalaabanira chiweere.” 22Labbani mani yabuusa alala abaandu b'esituundu esyo mani yaahola esidyaalo. 23Nae esiro esyo, mu siha sya Rakeeli, Labbani yabukula Leya omwaana wae muhuluundu mani yamuberesa Yakobbo, yaaba nae 24(Labbani yabukula Silipa, omuhalaabani wae muhasi mani yaamuberesa Leya abe omuwaambe wae.) 25Nae bone, nibwahya, Yakobbo yabona ati Leya niye, mani yateeba Labbani ati, “Wuuholere siina syeene sino? Ese haba sindahuhalaabanira endi wuumberese Rakeeli, kose? Lwasiina wuumbachire?” 26Labbani yamukaluhamo ati, “Mu syaalo syeefwe, sy'omusiro nisyo ohudeehisania omwaana muyere, omuhuluundu n'asisiiri ohudeeha. 27Mala ejuma ndala neende wuno, mani njia ohuhuberesa owuundi wula yesi noomalire ohuhuhalaabanira emyaaka kitaanu-na-kibiri kiindi.” 28Yakobbo yafukiirira, mani yaamala neende Leya ejuma enaamba. Labbani yamuberesa omwaana wae Rakeeli abe omuhasi wae. 29(Labbani mani yabukula Bbiliha omuwaambe wae muhasi yaamuberesa Rakeeli abe omuhalaabani wae.) 30Yakobbo yaba neende Rakeeli yesi, naadaha Rakeeli muno ohuhira Leya. Ao mani yaahalaabanira Labbani emyaaka kiindi kitaanu-na-kibiri.

Abaana ba Yakobbo

31Nae Omwaami niyabona ati Leya haba sibamudaha koti Rakeeli, yamuba olwiibulo, nae Rakeeli yaaba omukuumba. 32Leya yanyoola amabaanga mani yeebula omwaana musyaani. Yaboola ati, “Omwaami abweene ebidinyu byaange, mani omusaacha waange achia ohuuheera.” Mani yaamukuliha ati, “Rubbeeni.” 33Leya haandi yanyoola amabaanga mani yeebula omwaana musyaani. Yaboola ati, “Hane Omwaami yawulira ati haba sibaandaha, mani haandi yaamberesa omwaana wuno yesi;” mani yaamukuliha, Simeoni.

34Leya haandi yanyoola amabaanga kaandi mani yeebula omwaana wuundi. Yaboola ati, “Bulaanu ehabi lino omusaacha waange achia ohuungumiraho, olwohuba mwiibuliire abaana basyaani badatu;” sakira yamulaanga, “Leefi.” 35Leya yanyoola amabaanga mani yeebula omwaana wuundi. Yaboola ati, “Njia ohufumia Omwaami;” mani yaamukuliha, Yuda; mani yaamala yaakama ohwiibula.

Currently Selected:

Ohuchaaka 29: SAMIA

Highlight

Copy