Ohuchaaka 30

1Nae Rakeeli yali n'atebuliraho Yakobbo omwaana yeesi, mani n'abonera mwaanang'ina ehali-hali; yaboolera Yakobbo ati, “Leha nyooleho abaana naawe, ataali ao ese njia ohufwa-bufwa!” 2Yakobbo yadiirira Rakeeli etima mani yaboola ati, “Ese haba siindi Nasaae, owahwaakamia ohwiibula daawe.” 3Rakeeli nae yaboola ati, “Omuwaambe waange Bbiliha nguno ali ano, ba nae ayere enda mani niyoola ohwiibula yeebulire hu mataango kaange, syesi nyale ohunyoolaho abaana ohumubitiramo.” 4Rakeeli yaberesa Bbiliha omuhalaabani wae yaaba koti omuhasi wa Yakobbo; mani Yakobbo yaaba nae. 5Mani Bbiliha yanyoola amabaanga yeebulira Yakobbo omwaana musyaani. 6Rakeeli yaboola ati, “Nasaae nguyo akwiire hu lwaande lwaange, mani yawulira amaliro kaange syesi, yaamberesaho omwaana musyaani;” sakira yamukuliha ati “Daani.” 7Bbiliha haandi yanyoola amabaanga kaandi mani yebulira Yakobbo omwaana wohubiri. 8Rakeeli yaboola ati, “Nwaanire neende mwaanama ohulwaana hw'amaani, mani ndaamuyiingira;” Rakeeli n'alaanga omwaana oyo ati “Nafutaali.”

9Leya niyabona ati yeemere ohwiibula, yabukula omuhalaabani wae Silipa mani naamuberesa Yakobbo yaaba koti omuhasi wae. 10Silipa omuhalaabani wa Leya mani yeebulira Yakobbo omwaana musyaani. 11Mani Leya yaboola ati, “Ehabi ndai!” Mani yaakuliha omwaana oyo ati, “Gaadi.” 12Silipa omuwaambe wa Leya haandi yeebulira Yakobbo omwaana wohubiri. 13Mani Leya yaboola ati, “Nga sangaalire! Olwohuba abahasi bachia ohunaanganga omusangaafu;” mani yaakuliha omwaana oyo ati, “Aseri.”

14Mu ndaalo ch'ohukesa engaano, Rubbeeni yaachia mu ndalo mani yanyoolamo ebyaamo bilaangwa “amanduraki” yaabileteera Leya ng'ina. Rakeeli yaboolera Leya ati, “Husaba, mbereseho hu ‘amaanduraki’ k'omwaana wao.”

15Leya yamukobolamo ati, “Ohunyuula omusaacha waange haba sihuhumala? Odaha ohuyira neende ‘amanduraki’ k'omwaana waange kosi?” Rakeeli yaboola ati, “N'omberesa amanduraki k'omwaana wao, onyala ohukona neende Yakobbo esiro sino.” 16Mani engoloobe, Yakobbo niyakobola ohutula mu ndalo, Leya yachia ohumubukaanira mani yaamuboolera ati, “Oli neende ohweyalisa naange esiro sino, olwohuba hukulire neende ‘amanduraki’ k'omwaana waange.” Yakobbo yaba nae esiro esyo.

17Nasaae yawulira ohulira hwa Leya, mani yanyoola amabaanga, niyeebulira Yakobbo omwaana wohutaanu. 18Leya yaboola ati, “Nasaae yambereese omusaara kwaange, olwohuba ndaberesa omusaacha waange omuwaambe waange”; mani n'akulihaa omwaana oyo ati, “Yisakari.” 19Leya haandi yanyoola amabaanga, mani yeebulira “Yakobbo” omwaana wohusaasaba. 20Mani Leya yaboola ati, “Nasaae mbao yambereese esiyaanwa sy'obweeya; haandi omusaacha waange ohunjisamo oluyaali, olwohuba mwiibuliire abaana basyaani basaasaba;” mani yaamukuliha ati “Sabbulooni.” 21Ebyo nibyawa, Leya haandi yeebula omwaana muhaana mani yaamukuliha ati, “Dina.” 22Nasaae mani niyechulisa Rakeeli, haandi yawulira ohwekongooya hwae mani yaamuba olwiibulo. 23Rakeeli yanyoola amabaanga mani yeebula omwaana musyaani, yaboola ati, “Nasaae mbao yaandusireho amanyeko;” 24mani yaakuliha omwaana oyo ati, Yosefu, n'aboola ati, “Leha Omwaami yameede omwaana wuundi!”

Yakobbo yoosana neende Labbani

25Bulaanu Rakeeli n'amalire ohwiibula Yosefu, Yakobbo yaboolera Labbani ati, “Seebule mbweo, ngobole weefwe haandi mu syaalo syeefwe. 26Mberese abahasi baange neende abaana baange boosi bandahuhalaabanira, mani wuundehe mbweo; olwohuba omanyire koti lu ndahuhalaabanira bulai.” 27Nae Labbani yamuboolera ati, “N'ofukiirira, leha mboole endyo, mbwihuliirwe mani ndaamanya endi Omwaami yamberesa ehabi ohubitira mweewe; 28mboolere omusaara kwao, njia ohukuhuberesa.” 29Yakobbo yamuboolera ati, “Ewe omweene omanyire koti lu huhalaabanire, haandi koti ebyaayo byao lu bibeere nimbeere nihuhalaabanira. 30Olwohuba wali neende ebyaayo bidiidi nisisiiri ohwiicha, nae buti byemeedere muno; haandi Omwaami ahuumberesereenge ehabi buli yi ndachichaanga. Nae bulaanu ndahanyoole liina emyaandu kyaange kyeene syesi?”

31Labbani yamuteeba ati, “Huberese siina syeene?” Yakobbo yakobolamo ati, “Sibulao esiindi si ndaha wuumberese; olwohuba niwuumberesa esiindu syoosi, mba haandi njia ohwemeeda sa ohuhuhalaabanira ni njaya ebyaayo byao: 32Leha enyaanga yino mbite mu byaayo byao, mani njawulemo buli koondi ly'amakoondo neende buli mwaana kw'ekoondi kwa rateeng'i, neende buli mbusi y'amakoondo, mani bino nibyo ebiba bichia ohuba omusaara kwaange. 33Mani ochia ohumanya obwadyeeri bwaange, ni huchaaka ohubaliirira naawe omusaara kwaange. N'onyoola buli mbusi yitaalimo amakoondo, kata sa amakoondi kataali akadichooli, ochia ohubiyira koti ebiibe.” 34Labbani yakobolamo ati, “Eee! Leha sibe koti lu wahaboola.” 35Nae hu ludaalo olwo, Labbani yaawulamo ehole choosi echalimo amakoondo, neende edwaasi choosi echalimo amakoondo, echo choosi echalimo obwa dibbo, neende buli koondi yere elya dichooli, mani yaaberesa abaana bae basyaani ohwaaya. 36Mani nibakabuhana ohumala embaka y'endaalo chidatu; Yakobbo yadoong'a n'aliinda ebyaayo bya Labbani.

37Yakobbo mani niyaakula amasaga mabisi k'emisaala mipopula, alimoondi neende emipulaane, mani niyoobulaho amoola kaandi yaleha nikaliho emihoosi kya rachaari. 38Yafumita esaala ch'emihoosi-hoosi kya rachaari echomu moni w'ebyaayo yi bing'weera. Nae koti lu byaayo byawoochanaanga nibiicha ohung'wa, 39byawoochana mu moni w'obusaala obwo, byeebula ebyaayo byamakondo-koondo. 40Yakobbo yaakabulamo amakoondi madoto, mani yayira akalimo amakoondo, nae akadichooli yaakaberesa Labbani; haba siyasasaania akae alala neende aka Labbani daawe. 41Buli bisolo by'amaani muno ni byawoochanaanga, Yakobbo yachomehaanga esaala ch'obuhoosi-hoosi echo aambi neende abuundu w'ohung'weera, hu ebisolo biwoochanire ao. 42Nae ebisolo bibulamo amaani nibyawoochanaanga, Yakobbo haba siyachomehaanga esaala, mani esolo engata choosi cheecha chaaba echa Labbani, nae ech'amaani choosi chaaba echa Yakobbo. 43Yakobbo yaba omuyiinda muno, mani yaaba neende ebyaayo biingi, neende abawaambe bahasi baangi neende abawaambe basaacha baangi, alala neende engamia nyiingi neende esuhiri nyiingi.

Currently Selected:

Ohuchaaka 30: SAMIA

Highlight

Copy