Ohuchaaka 18

Abburahamu asuubiswa omwaana musyaani

1Omwaami haandi yabonehera Abburahamu naali aambi neende emisaala myoolerefu kya Mamure. Yali niyehaale amwiingira w'eyeema lyae esideete omubasu nikufwa muno. 2#Abaib 13:2.Abburahamu niyasiingisa obweeni bwae yatingaala, nae bone, abasaacha badatu bali nibeemere mu moni wae. Nae niyababona sa ati, yeeruha n'atula mu mulyaangiro kw'eyeema ohuchia ohubakaanira. Yeenamya aasi, obweeni bwae nibwegeeng'a hu loba, 3mani n'aboola ati, “Abaami, mutabita sa ango waange nimuteemerehoo daawe; ese nduwo ohubahalaabanira. 4Lehe mbaleetereho amaachi mweyose amakulu, munyala ohuwuluuhira mu siiniha sy'omusaala kuno. 5Njia ohubaleeteraho ebyohulya; mulye hu munyoole amaani, mani munyale ohwemeeda neende olukeendo lweeng'we. Mumbereese oluyaali ohuungeniiya, mani lehe syesi mbahalaabanire.” Nabo nibamukobolamo bati, “Otyo muno, hufukiriire.” 6Abburahamu yasiingiriramo yeengira mu yeema yaboolera Saara ati, “Yaanguyirisaho, bukula bwaangu ebipiimo bidatu eby'obusye, okaande mani wuubbemo emigaati.”

7Abburahamu yeeruha yaachia mu hoonge, yaabukula emoosi nginu haandi endai, n'ayiberesa abahalaabani bae, abayisiinja haandi bayibaaka bwaangu muno. 8Abburahamu haandi yabukula amafuta k'eng'oombe, neende amabeere, alala neende emoosi enginu yibasiinja, mani naabibaberesa nibalya, nae omweene yadoong'a naabahalaabanira mu siiniha sy'omusaala.

9Mani nibamuteeba bati, “Nae omuhasi wao Saara ali yeena?” Yabakobolamo ati, “Ali mu yeema.” 10#Rom 9:9.Mulala hu bakeni abo yamuboolera ati, “Embaka y'emyoosi kitaanu-na-kine ohutula buti, njia ohukobola obutakosa, mani omuhasi wao Saara achia ohuba neende omwaana musyaani.” Nae Saara yali niyeemere emukoongo w'olwiiki n'atekereese. 11Abburahamu neende Saara bali nibakofula nibabitiriire mu myaaka. Saara yali niyaakama ohuchia mu mwoosi. 12#1 Pet 3:6.Mani Saara niyeecheha omweene n'aboola ati, “Ese ndamala ohwetulira hu lwaanyi, haandi omusaacha waange yesi mukofu niye, mani mbula obwekoombi bwoosi obw'omusaacha.” 13Nae Omwaami n'ateeba Abburahamu ati, “Lwasiina Saara achehere n'aboola ati, ‘Ndahanyala ohwiibula omwaana mu bukofu bwaange buno?’ 14#Luk 1:37.Sibulao esiindu sihaya Omwaami. Koti lu mboolere, embaka y'emyoosi kitaanu-na-kine ohutula buti, njia ohukobola obutakosa, mani Saara achia ohuba neende omwaana musyaani.” 15Nae olwohuba Saara yali n'atiire, yayingana n'aboola ati, “Ese haba sinjehere.” Nae Omwaami yaakobolamo n'aboola ati, “Eee mubwadyeeri, ewe ochehere.”

Abburahamu asabira Sodomu

16Abasaacha abo basiingira baachia abuundu yi banyala ohwewuunja mani baabona Sodomu. Abburahamu yachia nabo ohubagoobaho naabeekesa engira. 17Omwaami yaboola ati, “Haba siinjia ohukisa Abburahamu esiindu siinjia ohuhola. 18Abeechuhulu bae bachia ohweehola esyaalo sihoongo haandi esy'amaani; haandi ebyaalo byoosi bichia ohunyoola ehabi nibimubitiramo. 19Ndamudoola endi anyale ohulagira abaana bae neende abeechuhulu bae ohuumbulira, mani baholeenge ebiindu ebihoyera neende eby'obwadyeeri. Nibahola batyo, njia ohumuholera buli siindu si musuubise.” 20Omwaami haandi yaboolera Abburahamu ati, “Olwohuba Sodomu neende Gomora babyekanyiisire muno, haandi esyonoono syaabyo sihoongo muno, 21njia ohwiiha mbone oba amaliro kabandekanyisiire kadyeeri niko, nibitaali bityo njia ohumanya.” 22Ao mani abasaacha babiri batulao, bemeeda ohuchia Sodomu, nae Omwaami n'adoong'a neende Abburahamu. 23Abburahamu yasuda aambi neende Omwaami yaamuteeba ati, “Bwadyeeri mbwe ochia ohusihirisa abaandu baluungifu alala neende abonooni? 24Nae niwiichuhana abaandu baluungifu amahumi kataanu baaba nibali mu siko esyo, oba ochia sa ohusihirisa esiko esyo mani ohaye ohuwonia abaluungifu amahumi kataanu abalimo? 25Nae Omwaami yakobolamo ati, haba daawe, siinyala ohuhola esiindu sityo daawe, ohusihirisira omuluungifu alala neende omuhola-mbi. Ohuyira omuluungifu nasilala neende omuhola-mbi. Esyo haba sisinyalihana daawe. Oyo oheengera esyaalo omusaango w'obwadyeeri niye.” 26Mani Omwaami yakobolamo ati, “Niwiichuhana ndanyoola mu siko sya Sodomu abaandu baluungifu amahumi kataanu, haba siimba niinjia ohusisihirisa daawe, hulw'abaandu amahumi kataanu abo.” 27Abburahamu yakobolamo ati, “Bona, mbao ndeyaanireyo omweene ohulomaloma neende Omwaami, ese omuundu oolifwa sa. 28Nae hu mahumi kataanu abaluungifu, nihubulaho abaandu bataanu. Oba ochia sa ohusihirisa esiko syoosi olwohuba hu baandu amahumi kataanu abo hubulaho abaandu bataanu?” Nae Omwaami yaboola ati, “Haba siimba niinjia ohusihirisa esiko esyo ninyoolamo abaandu baluungifu amahumi kane neende bataanu.” 29Abburahamu yalomaloma haandi yaboola ati, “Niwiichuhana abaandu amahumi kane abaluungifu baaba nibo abali sa mu siko esyo.” Omwaami yakobolamo ati, “Hulw'abaandu amahumi kane abo, haba siimba niinjia ohusisihirisa daawe.” 30Mani Abburahamu haandi yaboola ati, “Leha mbaase endi Omwaami saachia ohuunyoolerera, nae haandi haamaye akalomaloma. Nae niwiichuhana babaamo abaandu baluungifu amahumi kadatu.” Omwaami yakobolamo ati, “Haba siimba niinjia ohusihola daawe ninyoolamo abaandu amahumi kadatu abo.” 31Abburahamu haandi yaboola ati, “Bona, omweene ndeyaanireyo ohulomaloma neende Omwaami. Nae niwiichuhana mwabaamo abaandu baluungifu amahumi kabiri boong'ene.” Omwaami haandi yakobolamo ati, “Hulw'abaandu amahumi kabiri abo, ese haba siimba niinjia ohusisihirisa daawe.” 32Abburahamu haandi yaboola ati, “Leha Omwaami ataanyoolerera daawe, luno haandi njia ohulomaloma ehabi lala lyoong'ene. Nae niwiichuhana mwaabaamo abaandu ehumi.” Omwaami yakobolamo ati, “Hulw'abaandu ehumi abo, ese haba siimba niinjia ohusisihirisa daawe.” 33Ao, Omwaami yawaao, n'amalire ohulomaloma neende Abburahamu; Abburahamu yeweerao yeekobolera engo wae.

Currently Selected:

Ohuchaaka 18: SAMIA

Highlight

Copy