Ohuchaaka 19

Esyonoono sya Sodomu

1Bamalaika babiri boola Sodomu engoloobe. Loti yali niyehaale mu siruwa sya Sodomu. Loti niyababona, yasiingira ohubaakaanira, mani yeenama, obweeni nibwegeeng'a hu loba, 2n'aboola ati, “Abaami, ndi ano ohubahalaabanira. Mbekongooya mwiiche mube mu nyuumba yaange. Munyala ohweeyosa amakulu, mani mweyalisa ano esiro sino. Nibunaahye echuli, munyala mwawuuna ohwemeede neende olukeendo lweeng'we.” Nae nibakobolamo bati, “Daawe; efwe huchia ohweyalisa hu ngira.” 3Yameeda-bumeeda ohubekweeda, mani baachia nae ewae, beengira mu nyuumba yae. Yaabaholera Esidyaalo, haandi yaboobbera emigaati kitabbaahirwe, baalya. 4Nae nibasisiiri ohweeyalisa, abasaacha bomu Sodomu, bebodoohania enyuumba eyo. Abasaacha bomu siko boosi, abayere neende abahuluundu beecha baakedeeresania enyuumba eyo 5#Bak 19:22-24.balaanga Loti nibamuteeba bati, “Abasaacha bahukeniiye engoloobe yino bali yena? Batuse erwaanyi hubakone.” 6Loti yatula erwaanyi mani yeekalao olwiiki. 7Yababoolera ati, “Basyaange mbekweeda mutaholaho abakeni bano esyonoono esyo. 8Bone, ndi neende abahaana baange babiri abataamanyireho eby'abasaacha. Lehe mbatuse mbaberese, munyale ohubahola koti lu mudaha. Nae mutaholaho esiindu syoosi hu basaacha bano; olwohuba bakeni nibo mu daala lyaange, hoyerwa ohubaliinda bulai.” 9Nabo bamukobolamo bati, “Tuweere-eyi, walukeendwa sa ewe! Niiwe wiina otuboolera esy'ohuhola? Tuweere-eyi, ataali ao, huchia ohuhuhola obubi ohuhiraho bihwahabaholere.” Mani nibafwiinyirira Loti muno, nibaba aambi ohufunaka olwiiki. 10Nae abasaacha abo bahweesa Loti baamwiingisa mu nyuumba, mani beekalao olwiiki. 11#2 Abat 6:18.Mani nibawofusa abasaacha bali erwaanyi w'enyuumba boosi, abayere neende abahuluundu, mani nibachaaka ohubabaasaanga sa nibakoonyeresa yi lwiiki luli.

Looti awuuya mu Sodomu

12Bulaanu abasaacha abo nibateeba Looti bati, “Oliho neende omuundu yesi-yeesi muno? Tusa abaandu bao boosi mu siko sino, abaana basyaani, abaana bahaana, abahwe, oba omwiiho wuundi yeesi owamenya mu siko sino, boosi obatuse mu siko muno. 13Olwohuba huchia ohusihirisa abuundu ano. Omwaami awuliire ohwekanyiirisa hubi ohudiira hu baandu bano, mani Omwaami atutumire ohusihirisa Sodomu sino.” 14Looti yatula erwaanyi mani yaboolera abahwe bae, abo abali nibachia ohudeehya abahaana bae abo ati, “Siingire, mutule ano, olwohuba Omwaami achia ohusihirisa abuundu ano.” Nabo nibabaasa bati ali ohukachula-bukachula.

15Nibwahya echuli, bamalaika abo bateemaho muno ohubona bati Looti yaanguyaho; mani nibaboola bati, “Siingira obukule omuhasi wao neende abahaana bao boombi abo abali ano, mani muhaye ohufwiira mu siko sy'abonooni sino.” 16#2 Pet 2:7.Nae Looti yachaaka ohweng'oyaania; nae Omwaami ohudaha ohumukwiira esisa, abasaacha bano bamukwaaho alala neende omuhasi wae, neende abahaana bae, mani nibabahwehweesa nibabadiirire amahono, nibabatusa erwaanyi w'esiko. 17Nibamala ohubatusa boosi erwaanyi w'esiko esyo, malaika mulala yababoolera ati, “Mwiiruhe muwonie obulamu bweeng'we. Mutahubbaho amahemo enyuma daawe, kata sa mweemaho mu hooho omwo daawe. Mwiiruhire mu bigulu hu muhaye ohwiitwa.” 18Nae Looti yamukobolamo ati, “Omwaami, haba daawe; otakera hwaahola esyo. 19Wuungwiriire muno esisa, niwumonia ohufwa. Nae ebigulu ebyo biri eyale muno, amasira kanyala ohungwaaho mani ndaafwa nisisiiri ohwoolayo. 20Obona esiko sidiidi esyo? Nisyo esiri aambi muno. Leha njiruhire omwo, monisireyo obulamu bwaange, olwohuba ebiha biimbweereho!” 21Mani Omwaami yamuboolera ati, “Bona chia, mbao ese hufukiriire. Haba siinjia husihirisa esiko esyo daawe. 22Yanguyaho! Yiiruha! Haba siinjia ohuhola esiindu syoosi n'otoolayo.” Koti lu Looti yalaanga esiko esyo ati sidiidi, sakira esiko esyo syakulihwa Soari.

Sodomu neende Gomora bisihiriswa

23Looti yoola Soari elyuuba hulitula. 24#Mat 10:15; 11:23,24; Luk 10:12; 17:29; 2 Pet 2:6; Yuda 1:7.Mani Omwaami naakwiisa hu Sodomu neende Gomora omuliro ohutula muukulu; 25mani naasihirisa ebiko ebyo neende ehooho lyoosi alala neende abaandu bomu biko ebyo boosi neende buli siindu syoosi esyamera hu loba. 26#Luk 17:32.Nae omuhasi wa Looti yahubba amahemo enyuma mani niyehola esiiro y'omuunyu. 27Obwiire nibwahya, Abburahamu yawuuna echuli-chuli mu mabwiibwi, yaachia abuundu yi yali yeemeraho mu moni w'Omwaami; 28n'atingaalire emwaalo wa Sodomu neende Gomora, alala neende esyaalo syomu hooho, yabona omwoosi nikuniooha nikutula mu syaalo esyo, nikuli koti omwoosi muungi kw'esiroombe.

29Nae Nasaae niyali n'asihirisa ebiko byomu hooho bi Looti yali yamenyamo, yeechulisa Abburahamu mani yaafukiirira Looti ohubyeeyibamo ahaye ohusihiriswa.

Enjaako y'Abamoabbu neende Abaamooni

30Looti yatya ohudoong'a mu Soari, mani yawuuya alala neende abaana bahaana bae boombi, baachia mu bigulu, nibamenya mu ng'uungu. 31Omwaana muhuluundu yaboolera omuyere ati, “Laata yeefwe mbao akofula, nae abulao omusaacha wuundi yeesi hu syaalo onyala ohutudeehya daawe mani hwanyoola abaana. 32Yicha, leha hung'weese seefwe amalwa ameere, mani huchie hube nae mani hwiibule nae.” 33Mani nibang'weesa saabwe efiini, esiro esyo omwaana muhuluundu naaba neende laatang'ene. Nae laatang'ene yali n'ameerere muno mani sino n'atasimanya daawe. 34Nae nibwahya, omwaana muhuluundu yaboolera omuyere ati, “Bona, ekulo ndabeere neende laata yeefwe; leha nyaanga yino lwosi humumeese haandi, mani wesi ochie obe nae. Mani hukanye laata yeefwe atwiibulemo abaana.” 35Ao mani, nibang'weesa laata yaabwe amalwa nameera esiro esyo syosi. Mani omwaana muyere yesi naaba neende laata yaabwe oyo. Nae koti lu laata yaabwe oyo yali n'ameerere muno, esiindu si yahola sino haba siyasimanya daawe. 36Mani abaana ba Loti boombi nibanyoola amabaanga neende laata yaabwe mweene. 37Omwaana muhuluundu niyeebula omwaana musyaani, mani naamukuliha ati Moabbu. Wuno niye kukaang'ene Abamoabbu ohwoola buti. 38Omwaana muyere yesi niyeebula omwaana musyaani mani naamukuliha ati Bbenami. Wuno niye kukaang'ene Abaamooni boosi ohwoola buti.

Currently Selected:

Ohuchaaka 19: SAMIA

Highlight

Copy