Make 6

Ikaoya da si Yeso no tao do Nasale

(Matay 13:53-58; Locya 4:16-30)

1Karwan na ni Yeso do dang am meysinaoli a mangay rana do ili da a kapacihza da jya no macinanao jya. 2Marateng rana o ipeywalam no tao am mangnanao si Yeso do peyneynozyan. Aro tao a somavasavak no nimamizing da ciring ni Yeso. Maniring sira am, “Do wanjin na nipakamizngan so sang. Sino yamanta nya so teneng na ang. Asyo ori yato makapeyvazay so mapeyzokab a vazay. 3Beken a ori o meykeykawaz a tao asyo? Beken a iya o anak ni Madiya asyo? Beken a kaka na ni Yake a kani Yoseyvo a kani Yota kani Simong ori asyo? Da kapeyvahay do jya no wari na mavakes eya am.” Makarahan am ikaoya da na si Yeso. 4Maniring jira si Yeso am, “O panoyonoywan na ni Ama ta do to so ciring na tao am ikanig da sira no tao do peycyeylilyan na. Am kolalahen da sira no pacikeylyanan da kano pacivahayan da tao.” 5Am ori o ji na nimapeyvazai so mapeyzokab a vazay do ili da. So nikapereh no tao a niparapongan na so lima na a omiwakwak jira. 6Am ori o nyeyyakan na nira, ta ji sira manganoyong o aro a tao. So ji na nimacimazai do kalivolivon na do peycyeylilyan na mangnanao so tao.

Tovoin na sira a mangnanao o rarwa so ikakarwan a macinanao jya

(Matay 10:5-15; Locya 9:1-6)

7Nilovot na sira o rarwa so ikakarwan a macinanao jya kateyrararwa da tovoin a kapanta na nira so oyowyat da ipamozwaw da so kalamsoyan ni Satan a komovot do tao. 8Maniring jira am, “No mangay kamo am sisikod nyo o palolwen nyo. Ji kamo mapalolo so kanen nyo am nizpi nyo. Ji kamo meyyaomas. 9Apya o kapeytokap nyo. Ji nyo peytapila o ayob nyo.” 10Maniring pa jira am, “No makaranes kamo do asa ka ili am no masaray o tao a tomaotao jinyo am to kamo na ngisan do vahay da. No mangay kamo rana am ori o karwan nyo jira. 11No mangay kamo do vahay da a kaji da raralayan ninyo a taotawwen a ji da ngamiznga so ciring am to nyo na ngaroi sira katoktok nyo so domket do ai nyo a tana, ta tovilan nyo jira meyraraten a tao a ji mamlis so nakenakem.” 12Makarahan am mangay rana sira o macinanao ji Yeso a meylimwang no ciring na ni Ama ta do to a kavavaga da do aro a tao a mamlis rana komaro do peyraratenan da. 13Aro o nivozwaw da a kalamsoyan ni Satan a komovot do tao a kakoris da no haneng do meyngen a tao. So nikaro no niwakwakan da meyngen a tao.

Mawakwak o nimanaktak a si Yowani

(Matay 14:1-12; Locya 9:7-9)

14Mamizing no panirsirngen a meyngaran so Helote o aro a vazay ni Yeso a meylimwang rana do peycyeylilyan na. Maniring sira o tao am, “Iya o nimanaktak a meyngaran so Yowani a yanimirwa mavyay. Am ori o na ikatey mowyat a yamapeyvazay so mapeyzokab a vazay.” 15Maniring pa sira o tao am, “Iya rana am si Idiya.” So iyan no tao a manci nya akmey tao no kakwa a panoyonoywan na so ciring ni Ama ta do to. 16Mamizing na o ciring ori no panirsirngen a meyngaran so Helote am maniring am, “Iya asyo o nimanaktak a si Yowani a nipotowan ko so oo a yarana nimirwa mavyay.”

17-18O cinawakwak na ni Yowani am o panirsirngen a meyngaran so Helote am to ney mehsa o mavakes no kakteh na a meyngaran so Veydipo. O ngaran no mavakes am si Helotiya. Masangib si Yowani a mazyak nya do kato ney papenan so kahanghang na no kakteh na. Am ori o nipanovoy ni Helote so tao no kanang a omrakep si Yowani a kangay da nya do pamemtengan. 19Si Helotiya rana am to na peyyana do onowned na o oyyan na ni Yowani. Am ori o naknakman na so kawakwak na sya. Am ji na pakongo, 20ta ikanig na ni Helote si Yowani. Ta abo karatan na. Am ori o ji na gogaji nya. Ta ikakza na amizngen o ipangnanao ni Yowani. Am mangday no amizngen na o ipangnanao ni Yowani o kaji nangnedan so ninyakan.

21Marateng o araraw no cinatazak na tao ni Helote am naknakmen na rana ni Helotiya o kalita na ji Yowani. Makarahan am manaotao si Helote so aro a meynakem a tao a kapazagom na so panipanirsirngen da no tao do Cyadidi. 22Makarahan am ipanci na ni Helotiya o anak na mavakes a maganam. Ikakza ni Helote a kano tao na o ganam na. Maniring si Helote do maganam a mavakes am, “No si amyan so amin mo jyaken am cyaha, ta itoro ko jimo.” 23Maniring pa am, “Tana amin mo jyaken o kakteb no pongso ta ya am jyabo kaji ko norwan nya jimo a.” 24Makarahan am mangay na ahesen o ina na no mavakes ang. Maniring ji ina na am, “Ikongo amin ko.” Maniring o ina na am, “Oo no nimanaktak a si Yowani.” 25Meysinaoli o mavakes do panirsirngen a si Helote a manci nya jya. Maniring am, “Ji mo peyyahahaya o oo no nimanaktak a si Yowani a pangain do kakanan a itoro jyaken.”

26Mamizing na o ciring na no panirsirngen am ikeyngen na no oo. Am ji na rana pakongo, ta nimamizing da rana no aro a tao o ipanma na ciring. Am ori o ji na makapeyolii so nakem na do mavakes ang. 27Makarahan am ipanci na rana o lamlamsoy na mangay do pamemtengan a kapotow na ji Yowani, 28kapangay na so oo na do kakanan a yangay do anak ni Helotiya a mavakes kangay na rana ji ina na. 29Mamizing no macinanao ji Yowani o vazay da am mangay da pingsanan o kataotao na ni Yowani a kangay da rana mapakakasa sya.

Nibsoy ni Yeso o kakaliman sira ranaw (5000) a tao

(Matay 14:13-21; Locya 9:10-17; Yowani 6:1-15)

30Meysinaoli sira ji Yeso o nipamnekan na a omlivolivon no ciriciring na am ipanci da rana ji Yeso o mina vazay da no kapeylimwang da no ciriciring na. 31Ikongo do tey yaro o tao, am ori o ikabo no ipeywalam da koman. Maniring si Yeso jira am, “Sijya kamo a kangay tamo meywalam do kabwan no tao.” 32Makarahan am zomagpit sira do vazangay a kangay da rana do kabwan no tao. 33Am macita da sira no aro a tao am to da rana tenngi o angayan da. Am ori o nipanmanma da rana no aro a tao do peycyeylilyan a mangay do angayan ni Yeso a kano macinanao jya. 34Makaranes si Yeso do pamsan na am macita na o aro a tao akmey kagling a abo so omonong nira. Am ori o nikasyan na nira. Makarahan am nanawen na sira no aro a ciring.

35Maseyrem rana am mai sira o macinanao jya. Maniring sira ji Yeso am, “Yatey mahep rana. Yabo pa do jya o panazangan. 36To ta rana mancyan sira meysyasyay a kangay da do ili a mangay manazang so kanen da.” 37Maniring jira si Yeso am, “Pantan kamo sira so kanen da.” Maniring sira o macinanao jya am, “Manngwa, ipanta mo yamen saon so meycyalaklaksa a nizpi a ipangap namen so kanen da myanpaw?”#6:37 O ciriciring da no Sila am: adwa ranaw a ka dena. O nizpi da do kasaraw no meyvazay a tao am asa ka dena. 38Maniring si Yeso jira am, “Angay pala cita yapira o yada nipalolo a myanpaw.” Citahen da am alima ka myanpaw a kano yadwa ka among. 39Makarahan am ipanci na rana ni Yeso o macinanao jya mapeykapyapinpin sira do katamtamkan, 40kalisna da rana no aro a tao. So niyan dang no kakapowan (100) a tao do asa ka lipenpenan. Amyan so kakaliman (50) do asa ka lipenpenan. 41Todahen na ni Yeso o alima ka myanpaw a kano adwa ka among am tangarahen na rana o hanit a kasaray na rana nya ji Ama ta do to, a kakcikcil na rana so myanpaw a itoro do macinanao jya. Makarahan am vonongen da rana sya do aro a tao. Akman sang o among a itoro na do macinanao jya. 42So nikamimin da rana nikoman a mabsoy. 43Peykakasahen da na no macinanao jya o atda da myanpaw a kano among am adwa pa o ikarwa na ka yala no nimapanpan. 44Vilangan da o mahakay a nikoman am kakaliman a ranaw (5000) sira.#6:44 Ji da nipavilang o mavavakes a kano kanakan.

Omalam si Yeso do ranom

(Matay 14:22-23; Yowani 6:16-21)

45Mavitos o vazay na am to na rana panma ni Yeso o macinanao jya a somakay do vazangay a mangay do Peysayta a ili. Ta tovoin na pa sira o aro a tao a mangay rana. 46Teyka na taitaiden o aro a tao ni Yeso am omangaz do tokon a meynozi. 47Mahep rana am makanavak o vazangay do rako a meybebneng a ranom am maveyvow pa si Yeso do tokon a meynozi. 48Macita na o macinanao jya mazikna komaod so vazangay a somangoz so yanan da ranom. Toda jyaraw am mangonong si Yeso do ranom a mangay do macinanao jya. 49Macita da no macinanao jya si Yeso a omalam do ranom am ipanci da anito. Am ori o nilololos da a manyahey. 50So nikamimin da nimanyahey a makacita sya. Maniring si Yeso jira am, “Ji kamo anyahey, ta yaken.” 51Makarahan am zomagpit rana do vazangay kapacioran na rana jira. Makarahan am mahanang rana. Am ori o nisavasavakan da nya no macinanao jya. 52Ta tana nimacita da rana o kaniomabsoy na so aro a tao am ji da pa tenngi o ka Tao do to na ni Yeso, do kaji da makazaban sya no onowned.

Niwakwakan na o meyngen a tao do Kenisale

(Matay 14:34-36)

53Makarahan am makaranes rana sira do Kenisale. 54Meyhekas sira do vazangay am katovilan da rana si Yeso no aro a tao. 55Mamizing da si Yeso amyan dang am ori o nipeypalapalalayo da a mangay a mahap so meykeyngeyngen a tao do itkehan da a mangay nira do yanan ni Yeso. 56Tana mangay si Yeso do likta ili a tana mangay do rako a ili am mamimin o meykeyngeyngen a tao a peypangain da do rararahan. Ta si ori pa o ipakapinan da do ayob ni Yeso do ipeyhavas na. Ta o minan do ayob ni Yeso a tao am todapya rana sira.

Currently Selected:

Make 6: snt

Highlight

Copy