Make 5

Nivozwaw na ni Yeso o nikomovot do tao a aro a kalamsoyan ni Satan

(Matay 8:28-34; Locya 8:26-39)

1Mangay sira do katovangan no rako a meybebneng a ranom a meyngaran so Cyadidi. Do dang rana am ili da no tao do Kelasen. 2Kapakaranes ni Yeso do pamsan na am makasazi so tao apo do kanitwan. O tao rana am kovotan no kalamsoyan ni Satan. 3Amyamyan ori do kanitwan. Abo makataid do tao ang. Tana vaoden da no vahalang am ji da vaod. 4Ta to na zavazavata o ivaod da sya. So ikabo no tao a makavaod sya. 5Mangday so araw o kalololos na do kanitwan a kado taketakey a kapangap na so vato a izaza na so kataotao na.

6Macita na si Yeso do marai pa am malalayo a mangay a kapeylilitod na do tangain ni Yeso, 7a kalolos na. Maniring am, “Ikongo mo gogadan nyaken, mo Yeso a Anak no ney manokdwan na Tao do to. Ko ipanci do Tao do to o kaji mo pasingsingtan jyaken.” 8O pancyan na no nang am nipanci na ni Yeso o kapakowbot na rana no kalamsoyan ni Satan do kataotao na.

9Maniring si Yeso am, “Sino ngaran mo.” Maniring am, “O ngaran ko am Si Malavong, ta namen malavong.” 10To mapasyasi ji Yeso a manci no kaji na vozwawan sira do dang. 11No kanang am amyan do tokon so aro a kois a meykoskos. 12Maniring o aro a kalamsoyan ni Satan a mapasyasi ji Yeso am, “To mo rana novoya yamen do aro a kois ang a kangay namen a komovot jira.” 13Makarahan am apyahen na sira ni Yeso. Am ori o nipakowbot da na do kataotao na no tao ang a kangay da komovot do aro a kois. Ala adwa zivo (2000) o kois a nikomsoz do alalasyas a kangay da mehmes do rako a meybebneng a ranom a kamimin da mawakwak.

14Mina tongsoz rana o tomita so kois a tao kangay da na do ili a meylimwang no akman sang a vazay. Mamizing da no aro a tao am meypakokowbot sira tomita so vazay ang. 15Makaranes sira ji Yeso am macita da o nikovotan no aro a kalamsoyan ni Satan a amlisna do dang a apiya rana so ayob a makownong rana do nakenakem na. Am ori o nikarahet da so onowned a to rana nyahey, ta tey arako oyowyat ni Yeso. 16O nimakacita so nikovotan a tao a kano nikomsoz a kois am ononongan da rana do aro a tao o panpandan na. 17Am ori o nipancyan da rana ni Yeso a komaro do dang.

18Zomagpit do vazangay si Yeso am mangay mapasyasi ji Yeso o nikovotan a tao a manci no kapehza na sya. 19Am ji na mya ni Yeso. Maniring jya am, “Angay rana do vahay nyo a kapanci mo nya do zipozipos nyo so na mina vazay jimo ni Ama ta do to a yamarilaw nimo.” 20Mangay rana o tao ori am ipeylimwang na rana o ngaran ni Yeso do ngaranan da Meykasa ngarnan a ili, do kanimvozwaw na rana so kalamsoyan ni Satan do kataotao na. O makamizing sya aro a tao am isavasavak da o akman sang a vazay ni Yeso.

Rarwa ka tao a manoyong a nimeyhanhan ni Yeso

(Matay 9:18-26; Locya 8:40-56)

21Somakay si Yeso do vazangay am mangay do katovangan no rako a meybebneng a ranom. Makaranes am meylovolovot o aro a tao do tangain na. 22Amyan do dang so asa ka meymatmatngeh no peyneynozyan a meyngaran so Yalo a nimacizavoz do aro a tao. Macita na si Yeso am mangay meylilitod do tangain ni Yeso a mapasyasi jya. 23Maniring am, “Yatey makdeng o ingingnen no anak ko a mavakes. Mangay mo pa parapongen o lima mo jya keywakwak mo jya kapya na rana.” 24Makarahan am macihza si Yeso jya mangay. Aro tao a meysilisilin a macihza jya.

25Amyan do dang so asa ka mavakes a makadwa so icyarwa (12) so awawan a to makaliliw so kataotao na gomcin no rala. 26Nipasowsow na o kangangay na do pangavavawan am ji na apyan no ingingnen na, ta ipeypeyparahet na. 27Mamizing na o vazay ni Yeso am ori o nipacislin na do aro a tao a kangay na do likod ni Yeso a minan do talili na. 28O nakenakem na am, “No si pinanan ko o ayob na am jya todapya rana o kataotao ko a.” 29Makarahan am mina todapya rana o kataotao na do pakaliliwan na sya. 30Am to na rana tenngi ni Yeso o oyowyat a makowbot do kataotao na. Am ori o nipaolyan na so mata na do aro a tao. Maniring am, “Sino yaminan do ayob ko ang.” 31Maniring sira o macinanao jya am, “Mo panangangayan nya. Mo jyacita o aro a tao a meysilisilin a mangay jimo? Mo kapanahes no niminan jimo.” 32Am ori o nicittan na so sirisiri na. Cittan na so tao a niminan jya. 33Katenngan na rana no mavakes o kapya na rana no kataotao na am to rana zikzik a manyahey. Am ori o nipeylilitod na do tangain ni Yeso a manci no kaniminan na jya. 34Maniring jya si Yeso am, “Manganako, ka manoyong a yameyhanhan nyaken. Makapiya ka so onowned a mangay rana, ta yarana apya o ingingnen mo.”

35Ji pa vitos o ciring ni Yeso am mai o tao apo do vahay ni Yalo. Maniring sira ji Yalo am, “Ji mo na mancyan si Yeso, ta yarana nimawakwak o anak mo.” 36Am ji na ngazidan ni Yeso o ciring da. Maniring rana si Yeso do meymatmatngeh no peyneynozyan am, “Ji ka nyahey. Anoyngan mo yaken.” 37Makarahan am palolwen na si Pite a kani Yake a kano kakteh na ni Yake a meyngaran so Yowani a mangay. Am ji na mya ni Yeso o tarek a tao a macihza jya.

38Makaranes sira do vahay no meymatmatngeh no peyneynozyan am macita na sira o aro a tao a meykabakabayo a omlavi jya. 39Somdep si Yeso am maniring jira am, “Ji kamo lavi, ta yamitkeh. Nimakongo kwan nyo.” 40Mamizing da o ciring ni Yeso am no mangay o kaming da am mangay o kapeyoyaoya da. Makarahan am powboten na sira ni Yeso o aro a tao. O inyapwan na kano tatlo a macinanao jya o amyan do sahad na. 41Makarahan am ahapen na o lima no kanakan. Maniring jya am, “Tadita komi.” O peypeypangayan na no nang am, “Ko ipanci imo a meyvangon, manganako.” 42Makarahan am meyvangon rana o kanakan a kalam na rana. No kano nang am adwa o ikasikarwa na no kakawakawan na no kanakan ang. So nipeyzokaban da no vazay ang no inyapwan na. 43Maniring jira si Yeso am, “Ji nyo meyvehvehyan do tao o akman sang a vazay,” kapanci na rana nira a mantan nya so kanen na.

Currently Selected:

Make 5: snt

Highlight

Copy