Make 4

Pehngain na do manokos a tao

(Matay 13:1-9; Locya 8:4-8)

1Mangnanao si Yeso do rako a meybebneng a ranom a meyngaran so Cyadidi am tey yaro sira o tao a meysilisilin do katangked na. Am ori o to na rana zagpici do vazangay a amlisna a kahatahataw na do meybebneng a ranom no vazangay. O aro a tao am meytatanek sira do pamsan na. 2Makarahan am nanawen na sira no aro a ciring a pehngehngain na. Maniring jira am, 3“Pakamizngen nyo an. Amyan so asa ka tao a mangay manokos. 4Manokos am amyan so zomsi do rarahan. Am mangay da toktokan no meyyasasalap. 5O karwan na am zomsi do kavatovatwan am amlida, ta amyan so alikey a tana do dang. 6No amdada o araw am mapseng do kaji na makayamotan, ta alikey o tana do dang. 7O zomsi do katamtamkan na am tana amlida am ji malasi, ta kaongongan no aro a tamek. 8O zomsi do apya so tanatana am apiya o kalidalida na a kapakapya na rana malasi. So iyan no malasi so sikatlo a ngarnan (30) a kano sikanem a ngarnan (60) a kano makapoo (100) so asi.”

9Maniring si Yeso am, “Amizngen nyo an, peyyanen nyo do onowned nyo ori an.”

Peypeypangayan no manokos a tao

(Matay 13:10-23; Locya 8:9-15)

10Maveyvow si Yeso am o niomamizing so ciring na tao am macihza sira do rarwa so ikakarwan a macinanao ji Yeso a mangay manahes no peypeypangayan na. 11Maniring si Yeso am, “O ji na nipatwaw pa peypeypangayan na no katalamozong na ninyo ni Ama ta do to am ipanci ko jinyo an. O karwan da no tao am nanawen ko sira no pehngehngayan ko so ciring ko. 12Akman so ciring do Seysyo. Maniring am,

‘Tana citacitahen da am akma dey jyacita. Tana amyamizngen da am ji da tenngi. Yabo da kasngesngenan jyaken. Makongo ko so wanjin a amvonas so raraten da.’ ”#4:12 Isayya 6:9-10.

13Maniring jira si Yeso am, “Nyo jyatenngi o ko pehngehngain a ciring ko? No si akman kamo so sang am jyabo kapakateneng nyo do karwan no pehngehngayan ko so ciring ko a. 14O na ipanokos no tao ori am ciriciring na ni Ama ta do to. 15O nizomsi do rarahan am kapalangayan ori no tao a ji meyyahahay so nimamizing a ciring na ni Ama ta do to ahapen ni Satan do onowned da. 16O nizomsi do kavatovatwan am akman ori so tao a masaray a omamizing so ciring na ni Ama ta do to. 17Am ji makayamot o ciring na ni Ama ta do to do onowned da. No masazi da o alalaw da kano peyrarehtan da sira, do kahap da so nanao ni Ama ta do to am makeykai a mablis o onowned da. 18O nizomsi rana do katamtamkan am tana amizngen da o ciring na ni Ama ta do to am, 19ji makapalasi, ta masanga sira no vazay da do karawan a kalita jira no peymeymasaodan da kano makakaday a ikeykakza da do karawan. Am ori o ikabengbeng no ciring na ni Ama ta do to do onowned da. 20O nizomsi rana do apya so tanatana am akman so tao a omamizing so ciring na ni Ama ta do a meyngongyod a meyhanhan nya do onowned da. So icyakman da so aro so asi a kayo.”

Pehngehngain na o ciring na do zampo

(Locya 8:16-18)

21Maniring pa si Yeso am, “Sino o mapangay so zampo do teyrahem no ireyrayan. Ji na pangaya o zampo do pakacittan sya no tao a. 22Abo ji meytotwaw a matayo a vazay. Akman sang, ta tana nyo jyatenngi sicyaikwaya o nanao ko jinyo am cyaha, ta katenngan nyo rana no makwa. 23Amizngen nyo an, peyyanen nyo do onowned nyo ori an.”

24Maniring pa jira am, “Peyyanen nyo do onowned nyo o yanyo nimamizing a ciring. O ahahapan nyo sya do icyatatao nyo am akman sang o ahahapan na sya jinyo ni Ama ta do to. So ikarwaro na pa no itoro na jinyo a yarana omamizing so nanao na ni Ama ta do to. 25Am ori o pakamizngan nyo sya an. Ta o mamizing so ciring na ni Ama ta do to am arwaro pa o makarapa jira ciring. Am o ji ngamizing so ciring na ni Ama ta do to am tana myan so alikey a katenngan da am to meykabobo jira ori.”

Pehngehngain na o ciring na do omlida rana nitokos

26Maniring pa si Yeso am, “O italamozong ni Ama ta do to am akman so manokos a tao. 27Mitkeh do mahep a kayokay na do maraw am ji na tenngi o ilida na rana no nitokos na. 28O tana am mapalida so makakaday a nipamowa na. No apiya rana o kalidalida na am mapka rana no asi na a kazako na rana. 29No mazako rana o nimowa na am langin na rana no mapeymowamowa sya no ingiten, do kazako na rana no mowamowa na.”

Pehngehngain na o ciring na do vettow no nappa

(Matay 13:31-32; Locya 13:18-19)

30Maniring si Yeso do pacicyan na sira am, “Akman so wanjin o italamozong na ni Ama ta do to. Ikongo pehngehngayan ta sya. 31O italamozong ni Ama ta do to am akman so vettow no nappa so kalikelikey. No pamowahen no tao do tana am, 32amlida rana no kadadayan no araw. No omlida rana ori am abo makataha so sang a nappa so karakorako a mangay da peyvahayan no meyyasasalap.”

33Aro o akman sang a payyaingen na ni Yeso a ciring na a inanao na so tao. To na mangozai o katenngan da no tao a inanao na sira. 34No myan do kalwalovotan am nanawen na sira no pehngehngain na a ciring. No maveyvow si Yeso a kano macinanao jya o pancyan na no peypeypangayan no nanao na.

Nipeyhanahanang na ni Yeso o rako abkas a kano pagpag

(Matay 8:23-27; Locya 8:22-25)

35Do ahep na no kasaraw am maniring si Yeso do macinanao jya am, “Mangay tamo do katovangan no rako a meybebneng a ranom eya.” 36Makarahan am karwan da o aro a tao. Am nimanmanma rana si Yeso a nisomakay do vazangay. Mangay rana sira am amyan so karwan no vazangay a macizavoz jira. 37Makarahan am to na ngirasa sira no rako a pagpag. Am ori o nipeykabkas na rana. Makarahan am lokolokongan na rana o vazangay da kaji na rana a tengpahan no vazangay da. 38No kanang am amyan do maoji na si Yeso a tomangen so oo na mitkeh. Am ori o niyokayan da sya. Maniring sira am, “Mo Mangnanao, tamo na marahet. Manngwa, ka jyalaw?” 39Meyvangon si Yeso am sirsirngen na rana o pagpag a kano paopaong na. So ji na nimeyyahahai a meyhanahanang. 40Maniring rana si Yeso do macinanao jya am, “Ikongo nyo ikanyahey. Nyo ji meyhanhanan si Ama ta do to?” 41Mamizing da am yeyyak da. Maniring sira do kadwan jira am, “Sinosino ya, na to ngamiznga pa no pagpag a kano abkas.”

Currently Selected:

Make 4: snt

Highlight

Copy