Matay 9

Niwakwakan na o ji makapeyvangon a tao

(Make 2:1-12; Locya 5:17-26)

1Omavang si Yeso a kano macinanao jya do tataloran am mangay rana sira do katovangan no rako a meybebneng a ranom a meysinaoli do peyvahayan ni Yeso a ili. 2Amyan sira so tao a mangay no ji makapeyvangon a tao no ireyrayan na do tangain ni Yeso. Macita ni Yeso o kakdeng no onowned da am maniring do meyngen a tao am, “Manganako, cyaha ta kangay mo. Yarana nimavonas o raraten mo.” 3Onowned da no tatasa ka mangnanao no iwawalam ni Ama ta do to am ipanci da si Yeso a komolala si Ama ta do to no ciring na. 4To na rana tenngi ni Yeso o nakenakem da. Maniring jira am, “Ikongo nyo ipacitarek so onowned. 5Manngwa, apyapya kapanci nya do yameyngen a tao so, ‘Yanimavonas rana o raraten mo an?’ No apyapya o kapanci no, ‘Tanek rana kalam mo rana.’ 6Ta ko kakzeben inyo a makateneng do oyowyat ko a Nipamnekan na ni Ama ta do to a tao a makavonas so raraten no tao.” So pancyan na nya do meyngen a tao so, “Tanek rana kahap mo so ireyrayan mo a mangay rana do vahay nyo.” 7So mina to na meytatanki rana no tao ang a mangay rana do vahay da. 8Macita da no tao am nisavasavak da a kazwazway da si Ama ta do to, ta nipakemkem na do tao o oyowyat na.

Rarahen na ni Yeso si Matay

(Make 2:13-17; Locya 5:27-32)

9Karwan na do dang ni Yeso am macita na o mapeyvazay so deyking a tao a meyngaran si Matay a omlisna do torotorwan no deyking a vahay. Maniring jya am, “Sijya, kapacilolo mo jyaken.” Meyratateng am meytatanek a kapacilolo na rana jya.

10Koman si Yeso do vahay ni Matay am aro sira mina kararay na mapeyvazay so deyking a tao a kano meyraraten a tao a mai a macihanghang ji Yeso a kano macinanao jya. 11Macita da no tao a macyagom do Vadisay am maniring sira do macinanao ji Yeso am, “Ikongo na ipacihanghang no sinsi nyo do mangangap so deyking a kano aro a yameyraraten a tao ang.” 12Mamizing na ni Yeso o ciring da am maniring jira am, “O apiya so kataotao a tao am ji da ngala o mangavavaw a tao. Ta o meyngen a tao o komala so koysang. 13O ciring do Seysyo am, ‘O kakdain ko am karilaw nyo no icyatatao nyo. So ikabeken a patanangen nyo a makakaday.’#9:13 Hesiya 6:6. Angay kamo na kanakenakem nyo pala so peypeypangayan no ciring ang. Ta o ko nyai am beken a ko manara so ji meyraraten a tao. Ta o yameyraraten a tao am ori o yako nyai.”

Nanao so ji mangakaday a meynozi a tao

(Make 2:18-22; Locya 5:33-39)

14Ipisa am mangay sira o macinanao ji Yowani do tangain ni Yeso. Maniring sira am, “Yamen rana kano tao a macyagom do Vadisay am namen masangib a yaji mangakaday a meynozi. Am o yamacinanao jimo am yabo yakman sang a vazay da.” 15Maniring si Yeso am, “No mamaring so kanen o mahakay a matarek so vahay a tao am manngwa, amlavi sira o nipanoyon na tao? Jyabo kakman da sang a. Am no marateng o araraw no irakep da so mahakay ang am manoyong rana o kaji da mangakadayan, do kasinalaw da nya.

16“Abo tao a mapatapang so vayo a milakayob do adan a ayob. Ta ji macimangno. So ikapising no adan a ayob ang. So ikarakorako na pa no kazamitan na. 17Abo tao a mangap so vayo a potaw cyo a paglowen do adan a kolit no baka, ta zombak. Am ori o paglowan so vayo a potaw cyo do vayo a kolit no baka an. Ta ori o ikapya na.”

Rarwa ka tao a manoyong a meyhanhan ni Yeso

(Make 5:21-43; Locya 8:40-56)

18Macisirsiring pa jira si Yeso am mai o asa ka meymatmatngeh no peyneynozyan a tao a meylilitod do tangain na ni Yeso. Maniring am, “Na kawakwak pa no anak ko a mavakes. Kapakamo mo am mangay mo pa parapongen o lima mo do anak ko a kavyay na rana.” 19Makarahan am meytatanek si Yeso a omonot jya mangay. O macinanao jya am nimacilolo sira.

20Amyan so asa ka mavakes a makadwa so icyarwa (12) so awawan a to makaliliw so kataotao na gomcin no rala. Iya rana am nimangay a manlikod ji Yeso a kapinan na do seysayan no talili na. 21Manakenakem o mavakes am, “Tana kabnek ko a minan do ayob na am jya todapya rana o kataotao ko a.” 22Meyvazingowngaw si Yeso am macita na o mavakes ang. Maniring jya am, “Manganako, ka manoyong a meyhanhan nyaken. Am ori o to na rana apyai no ingingnen mo.” Makarahan am mina todapya rana o ingingnen no mavakes ang.

23Mangay si Yeso do vahay no meymatmatngeh no peyneynozyan a tao am macita na omonong do inawan a tao a kano aro a meykalalavi a tao. 24Maniring jira am, “Pakowbot kamo, ta yamitkeh o kanakan eya. Yamakongo kwan nyo.” Mamizing da o ciring ni Yeso am no mangay o kaming da am mangay o kapeyoyaoya da. 25Makarahan am powboten na sira ni Yeso o aro a tao. Somdep si Yeso do itkehan na no kanakan a kahap na so lima na a kapeyvangon na rana. 26Nimakeykai o vazay a nimeylimwang do dang.

Niwakwakan na o rarwa ka mavota tao

27Karwan na do dang ni Yeso am amyan so rarwa ka mavota tao a macilolo jya. Maniring sira am, “Imo rana sivovoong ni Tawey am ikarilaw mo pa yamen!” 28Somdep si Yeso do asa ka vahay a kai da no rarwa ka mavota tao do tangain na. Maniring jira si Yeso am, “Nyo anoyngan yaken a makeywakwak jinyo an?” Maniring sira am, “Mo Panirsirngen, namen anoyngan.” 29Meyratateng am pinanan ni Yeso o mata da. Maniring jira am, “To ko mangozai o nakenakem nyo jyaken a omiwakwak jinyo.” 30Makarahan am to sira na makacita. Maniring rana si Yeso jira am, “Ji nyo meycicicyan o vazay eya do tao an.” 31Am kapakowbot da no rarwa ori am ipeylimwang da rana o mina vazay na ni Yeso jira do ili do dang.

Mapeyzokab a vazay ni Yeso do asa ka ji makabnebnek a tao

32Mangay rana sira o nimavota a tao ori am yai no tao do tangain ni Yeso o kovotan no kalamsoyan ni Satan a tao a ji makabnebnek. 33Vozwawen ni Yeso o kalamsoyan ni Satan do kataotao na am to rana makabnebnek o tao ang. Ori o nisavasavakan da nya no aro a tao. Maniring sira am, “Abo pa o akman so sya vazay a nimacita namen do Isedi!” 34Am maniring sira o tao a macyagom do Vadisay am, “Oyowyat na ori a yamamozwaw an? No na nitoro jya ni Satan.”

Karilawan na no tao ni Yeso

(Locya 10:2)

35Nilivolivon ni Yeso o peyneynozyan do peycyeylilyan na a kapangnanao na a meylimwang no Mapasaray a Ciriciring do katalamozong na rana nyaten ni Ama ta do to, a keywakwak na do meykeyngeyngen a tao. 36Macita ni Yeso o aro a tao am ikarilaw na sira. Ta akmey minaminasbang sira abo so marilaw nira. Akman so kagling a abo so omonong jira a tao. 37Am maniring do macinanao jya am, “Aro tao a makza no Mapasaray a Ciriciring. Akman so nihakawan a mazako rana. Aro o langin am apeleh o tao a manlangi. 38Am ori o ipeynozi nyo ji Ama ta do to a kapanovoy na so tao a meylimwang no ciriciring na.”

Currently Selected:

Matay 9: snt

Highlight

Copy