Matay 10
10
Rarwa so ikakarwan (12) a omlivolivon no ciriciring na
(Make 3:13-19; Locya 6:12-16)
1Lovoten na ni Yeso o rarwa so ikakarwan (12) a macinanao jya a kapanta na nira so oyowyat da ipamozwaw da so kalamsoyan ni Satan a kapangiwakwak da so meykeyngeyngen a tao. 2O ngarangaran da no macinanao jya am yadomket do jya. Ney manma na am si Simong, kasaing no ngaran na am si Pite, a kani wari na a meyngaran si Antele a kano anak ni Sipitay a meyngaran si Yake a kani wari na a meyngaran si Yowani, 3a kani Veydipo a kani Patolomaw a kani Tomase kano mapeyvazay so deyking a tao a meyngaran si Matay a kani Yake a anak ni Alevey a kani Tatay, 4a kani Simong a macikagom do macioya do Loma a tao a kano nimanazang ni Yeso a tao do Isecyadi a meyngaran si Yota.
Tovoin na sira a mangnanao o rarwa so ikakarwan a macinanao jya
(Make 6:7-13; Locya 9:1-6)
5Tovoin na ni Yeso o rarwa so ikakarwan am maniring jira am, “Ji kamo angay do ili da no beken a tao do Yotay. Ji kamo angay do ili da no Samadiya. 6Mangay kamo do Isedi a tao, ta yakmey mavozaw sira kagling. 7Ipeylimwang nyo do angayan nyo o kakeykai na rana makaranes no katalamozong na ninyo ni Ama ta do to. 8Iwakwakan nyo sira o meykeyngeyngen a tao. Avyain nyo sira o nimawakwak a tao, kapya da no omlabyab so kolit a tao a kapamozwaw nyo so kalamsoyan ni Satan a komovot do tao. Yabo o ngina na no oyowyat ni Ama ta do to a nitoro na jinyo. So icyakman nyo sang a ji macyami do sidongen nyo a tao. 9Ji kamo mapalolo so ovay a kano gizit a kano nizpi. 10No mangilili kamo am taosya o kapalolo nyo so adwa ka patapilen nyo a ayob nyo. Taosya o kapeytokap nyo a kano sisikod nyo. Ta o peyvazain a tao am pakanen sira an. 11No mangay kamo do teyhesa ka ili am amyamizngen nyo o tao a masaray a tomaotao jinyo. Ta ori o isanan nyo so vahay mangay do ikaro nyo na do dang. 12No somdep kamo do asa ka vahay am ipanci nyo jira o ‘Kokay kamo.’ 13No isaray da inyo no asa ka vahay am ipeynozi nyo sira a kangay na jira no aryarilaw na ni Ama ta do to. No ji da raralayan inyo am cyaha, ta ji na sira arilawan ni Ama ta do to. 14O ji naotao jinyo a kano ji ngamizing so ciring nyo a kavahay na kano keyliyli na am to nyo na ngaroi sira a katoktok nyo so tana do ai nyo. 15To ko na macitangayan jinyo am no marateng rana o araraw no kapeykapyapinpin na so tao ni Ama ta do to am makdekdeng pa o oyaoyyan na do ji naotao jinyo a kano nipasingsingkad na do tao do Sotoma kano Hamola no kakwa pa.
Pakakasin da sira o tovoin ni Yeso
(Make 13:9-13; Locya 12:11-12; 21:12-17)
16“Amizngen nyo an, ta akma kamoy kagling a ko tovoin do kokoman so tao. Am ori o ipeytataziman nyo a makapiya so nakenakem jira. 17Azimanen nyo o amrakep jinyo a kano mangay ninyo do pacicicyan a kabakbak da jinyo do peyneynozyan, 18mangay o kangay da ninyo do tangain da no panirsirngen a kado meymatmatngeh no teyhesa ka mahataw a pacicin. So ikanoyong nyo a meylimwang no Mapasaray a Ciriciring ko jira a kado beken a tao do Yotay. 19No pacicin da inyo am ji nyo anyaheyan o kaji nyo makatenngan do itovis nyo jira a ciring. Ta ipeypalanginan na inyo ni Ama ta do to a mapasapa jira. 20Ta o ciring nyo am beken a monganay jinyo, ta itoro na no Seyzi ni Ama ta do to o ciring na jinyo. 21No si marateng o araraw no nang am ipanazang da no tao o meysominogat a kakteh da a wakwaken no tao. So icyakman na sang no ama da do ananak da. O ananak da am ioya da sira o inyapwan da a manci no kawakwak da sira no tao. 22Pacioyyan da inyo a yaomraralay nyaken. Am o jyamama no makakaday a alalaw a tao am mahap da o to meyyonong a ikavyay no pahad da. 23No peyrarehten da inyo do asa ka ili am to kamo na nayo a mangay do asa ka ili. To ko na macitangayan jinyo am ji nyo pa nilivon o ili do Isedi a peylimwangan no ciriciring ko am meyhekas ko rana a Nipamnekan na ni Ama ta do to a tao.
24“O macyamizing rana am jyakarakarang a kano mangnanao. O peylamsoin da am ji da meyhavasi o mapeylamsoy sira. 25O macinanao a tao am amyan so kasaraw a ipacingay da do amnanao sira. Akman sang o peylamsoin da tao, ta amyan so kasaraw a ipacikto da do mapeylamsoy sira tao. No ngaranan da o makayokod no asa ka vahay so marahet a ngaran a Peysepo#10:25 O peypeypangayan no Peysepo am ingaran da ji Satan a manlita so tao. am jyabo kaji da to macizagoman no macivahay jya tao a.
Si Ama ta do to o ikanyahey ta
(Locya 12:4-7)
26“Am ori o ji nyo anyahei no tao an, ta mamimin o matayo a vazay a mababa. So icyakman na sang no ji meycicicyan a vazay a meytotwaw. 27O ko ipanci jinyo a ji da mamizing no karwan no tao am ipeylimwang nyo do aro a tao. 28O makawakwak so kataotao a ji makawakwak so pahad am ji nyo anyaheyan. Si Ama ta do to o ikanyahey nyo. Ta iya o makawakwak so kataotao a kano pahad a alyowen do kararatan. 29Kakwakwan da no likta meyyasasalap ori a na manakem ni Ama ta do to am imanngo kamo. 30Kakwakwan no avok nyo a na katenngan so vilang. 31Am ori o ji nyo anyaheyan. Ta yarakorako o nakenakem na jinyo ni Ama ta do to a kano meyyasasalap.
32“Ko pa ciring jinyo am omanoyong jyaken do tangain no tao am anoyngan ko ori do tangain ni Ama ta do to. 33Omalalas jyaken do tangain no tao am alalasan ko ori do tangain ni Ama ta do to.
Yapwan no ipeyvwak no tao
(Locya 12:51-53; 14:26-27)
34“Nyo ipanci yaken a yameygegcin no ikapya nyo so nakem do icyatatao nyo an? Beken a ori o ko nyai. Ta ko nyai do karawan o ikasyasyay nyo. 35Ta papwen sicyakwaya o ikasyasyay da no lalima do vahay da. O tatlo am ji sira macipaswasovoy do rarwa jira. 36O ney makdeng na kavosoyan no tao am monganay jira asa ka vahay.#10:36 Mikaya 7:6. 37O mapahamahama pa so inyapwan na ka nyaken am ji ko na abneka o akman sang a tao a macilolo jyaken. O mapahamahama pa so ananak na ka nyaken am ji ko na abneka o akman sang a macilolo jyaken. 38O ji nabway no jyojika na a macihza jyaken am ji ko na abneka ori a macilolo jyaken. 39Ta o tao a makza no kasaray na do karawan am beken a ikapya na ori. Am o to ngawaw pa no kataotao na a mahap so vazay ko am mahap na o to meyyonong a ikavyay no pahad na.
40“O tomaotao jinyo am yaken o taotawwen da. O tomaotao jyaken am akma dey to naotawwa o yanitomovoy jyaken. 41O tomaotao so lamlamsoy ni Ama ta do to am pazanoden na sira do yazaw na so lamlamsoy na. O tomaotao so ji meylimoteng so onowned a tao am pazanoden na sira ni Ama ta do to do yazaw na so ji meylimoteng so onowned a tao. 42To ko na macitangayan jinyo am o maglaw no pakananaken da a omraralay nyaken a tao am jyabo kaji na makahapan so nakem na sya ni Ama ta do to a.”
Currently Selected:
Matay 10: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
