Matay 20

Panizpin a meyvazay do nihakawan a tao

1“O italamozong ni Ama ta do to am akman so yamalavat a yapehngehngain a ciring eya. Amyan so tao a mangay a meykala so peyvazain na tao do nihakawan na. 2Ipanci na jira o kateyhesa ka nizpi no ipanizpi na sira do kateyhesa araw. Makarahan am ipanci na rana sira mangay meyvazay. 3Ikasyam na no vatvatek do apnezak am mangay pa meykala so tao. Karahan am to na cita sira o tatasa ka tao a abo so vazavazay. 4Maniring jira am, ‘Mai kamo a meyvazay do nihakawan ko an. Cyaha, ta panizpin ko inyo.’ 5Karahan am mangay sira meyvazay. Meyigen o araw a kado ikatlo no vatvatek do makoyab am makakala pa so tao a meyvazay do nihakawan na. 6Ikalima no vatvatek do ikakoyab na rana am nimakacita so tao a meytatanek a abo so vazay. Maniring jira am, ‘Ikongo nyo to meytatanki do jya yabo so vazay.’ 7Maniring sira am, ‘Yabo yamanci nyamen a yameyvazay.’ Maniring jira am, ‘No komwan am to kamo nangai a meyvazay do nihakawan ko.’

8“Maseyrem rana am ipanci no mapeynihakawan sya o lamlamsoy na. Maniring am, ‘Rarahen mo sira o yanimeyvazay a tao, katoro mo nya jira so nizpi da. Papwen mo do ney manowji na nimeyvazay o torwan mo, kato mo ngatwatontonan sira do ney manmanma na nimeyvazay.’ 9O nimapapo so kapeyvazay da do ikalima no vatvatek am maponged sira no teyhesa ka nizpi. 10Itoro na o nizpi da no ney manma na nimeyvazay a tao am masaray sira, ta ipanci da o kapahama na so nizpi da. Am jya nimakman sang, ta to sira meyyangangay a teyhesa ka nizpi. 11Mahap da o nizpi da am maoya sira so aktokto. 12Maniring rana sira do mapeynihakawan sya am, ‘Yasa ka vatvatek da nipeyvazay no yanimanownowji a ka nyamen. Am yamen am namen kasaraw a yameyzizikna no vazay mo. Am mo todey pehngaya sira jyamen so nizpi.’ 13Maniring rana o mapeynihakawan sya do asa ka tao jira am, ‘Mo kahakay, jyabo ko kaniomapit jinyo a. O nipamnekan ko a nizpi nyo no kapeysirsiring tamo asyo am asa ka nizpi o itoro ko jinyo. 14So ahapan nyo so nizpi nyo an. Ta nakenakem ko o ko to peyyangangain jinyo a yanimeyvazay a tao. 15Manngwa, abo onowned ko komakaday so angayan no nizpi ko? Nyo kazyakan nyaken a yamangazaw no nizpi ko.’ ” 16Karahan am maniring si Yeso am, “O yamasipanownowji sicyaikwaya am masipanmanma rana sira no makwa do teyngato. O nimasipanomanoma am masipanownowji rana sira.”

Ikeypitlo na ni Yeso a mapaziman so kawakwak na

(Make 10:32-34; Locya 18:31-34)

17Mangay sira do Yelosaleng am lovoten na ni Yeso o rarwa so ikakarwan a macinanao jya. Maniring jira am, 18“Amizngen nyo an, do tamo ipeypangay do Yelosaleng sicyaikwaya an, da kapanazang nyaken a Nipamnekan na ni Ama ta do to a tao no panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to, kapanci da no tao a omzakat jyaken, 19a katoro da nyaken do beken a tao do Yotay. So peyyaliliman da jyaken a bakbakan a padketen do jyojika. Ikatlo na araw am mirwa ko pa a mavyay.”

Kakzeben no mavakes ni Sipitay

(Make 10:35-45)

20O mavakes ni Sipitay a kano rarwa ka anak na mahakay am mangay sira ji Yeso a kapeylilitod no mavakes do tangain ni Yeso a mapasyasi jya. 21Maniring jya si Yeso am, “Ikongo mo kakzeben.” Maniring am, “No si amyan ka do peypanirsirngen mo am to mo na mancyan o anak ko a macipeyvik do wanan mo a kado ozi mo a meypanirsirngen.” 22Maniring si Yeso am, “Nyo jyatenngi o yanyo kakzeben. Manngwa, mahap nyo o rako a alalaw ko an?” Maniring sira am, “Noon, mahap namen.” 23Maniring jira si Yeso am, “Manoyong kahap nyo so alalaw ko. Am beken a yaken o mamnek do tao a omlisna do wanan ko a kado ozi ko a meypanirsirngen. Ta si Ama ta do to o mamnek do amlisna do dang.”

24Mamizing da ori no asa ngarnan a macinanao jya am ikaoya da sira o meyketeh ang. 25Karahan am lovoten na sira do tangain na ni Yeso o macinanao jya. Maniring jira am, “O panirsirngen rana do teyrahem am abo ji ngamizing sya a tao an. So pancyan da no nang a makayokod nira a tao. 26Am inyo rana am ji nyo nginara o akman sang. No si amyan jinyo so makza no kaizay na am pavevehen nyo o kataotao nyo a manidong so icyatatao nyo an. 27Si myan so tao a makza no kaizay na am inarahen na o lamlamsoy a mapeylamnay so tao. 28Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Niwakwakan na o rarwa ka mavota tao

(Make 10:46-52; Locya 18:35-43)

29Karwan da do Yedike a ili am aro tao a omonot ji Yeso. 30Amyan so rarwa ka mavota tao a omlisna do siri no rarahan. Mamizing da si Yeso a meyliktaw do dang am amlololos sira. Maniring sira am, “Imo rana macikownongan ji Tawey am ikarilaw mo pa yamen.” 31Ikaoya da sira no aro a tao. Ji da mya sira meyzezyak. Am ikeykavevek da amlololos a manci no, “Mo Panirsirngen a macikownongan ji Tawey, ikarilaw mo pa yamen.” 32Mina to neyked si Yeso a kapanci na nira mai. Maniring jira am, “Ikongo o nyo kakzeben a sidongan ko jinyo.” 33Maniring sira am, “Mo Panirsirngen, sidongen mo pa yamen do mata namen a kapakacita namen rana.” 34Ikarilaw na sira ni Yeso. Am ori o nipinanan na do mata da. Karahan am jya nimeyyahahay sira nimakacita a kapacihza da rana ji Yeso.

Currently Selected:

Matay 20: snt

Highlight

Copy